23/02/2026
تیمەکانی بەڕێوەبەرایەتی چاککردنەوە و پاراستنی ڕێگاوبانی ڕانیە بەردەوامن لە کارەکانیان بۆ خزمەتکردنی هاوڵاتییان و پاراستنی ڕێگاوبانەکان لە مەترسییەکانی لافاو و تێکچوون.
لە گوندی پڵنگانی سەر بە ناحیەی سەرکەپکان، تیمەکانمان هەستان بە گۆڕینی ئاوبارەیەکی لولەیی کۆن لە تیرەی 30 سم بۆ تیرەی 75 سم. ئەم کارە بە مەبەستی زیادکردنی توانای تێپەڕبوونی ئاوی باراناو و پارێزگاری کردن لە ڕێگاکە ئەنجامدراوە.
تیمەکانمان بەردەوام دەبن بۆ چاککردنی هەموو ئەو ڕێگا سەرەکییانەی بەهۆی باران و بەفرەوە تووشی زیان بوون، لەپێناو دابینکردنی هاتووچۆیەکی سەلامەت بۆ هاوڵاتییان..
⚠️ ئاگاداری و داواکاری بۆ هاوڵاتیانی خۆشەویست :
داواکارین لەپێناو پاراستنی ڕێگاوبانەکان و سەلامەتی گشتی، بەهیچ شێوەیەک تەنیشتە جۆگاکان (شانەکانی ڕێگا) دانەخەن، چ بە دروستکردنی دیوار و سیاج یان پڕکردنەوەیان.
گرتنی ڕێڕەوی ئاو دەبێتە هۆی کۆبوونەوەی باراناو و تێکچوونی خێرای شەقامەکان، کە ئەمەش مەترسی بۆ سەر ژیانی شۆفێران دروست دەکات.
پاراستنی ڕێگاوبانەکان ئەرکی هەموومانە.
