27/09/2019
صباح الخير طلابنا 🌺 واهالينا 🌺 ومعلمينا ومعلماتنا 🌺
اول شي خلي نتمنالكم سنة دراسية سعيدة ويارب الموفقية والدرجات العالية
واحب اشارككم مجموعة من النصائح وحلول للمشاكل اللي جنت اعاني منها كطالبة واللي اشوفها بأغلب الطلاب اللي ادرسهم ...
هذا اسلوب اعيط على الطالب حتى يفهمني أثناء الشرح نتائجه سلبية واكبر غلط ... مجرد عيطت معناها الطالب فصل عنك وحس بالفشل ولو شيصير بعد ميستوعب حجاية
طبيعي ... اذا غلط
وطبيعي .... اذا ما افتهم من اول مرة
وشنو يعني نسى المعادلة الكيميائية الفلانية او التعريف الفلاني او القانون الفلاني
حلها بسييييط ... اكتب القانون ١٠ مرات
ما حفظها؟ .... اطلب من الطالب يكتبها ٢٥ مرة وزيد المرات لحد ما يحفظه .... كرر الكلام والشرح مرة مرتين لل١٠٠ مرة وراح تلاحظ الفرق
المشكلة الاهم .... او فقط !!
هي مو المعلمة مو زينة ... اريد كل اب وام يتخيل الاتي
صف بيه حوالي ٤٠ طالب بين العبقري وبين اللي استيعابه بطيء
درس مدة معينه ولازم يخلص بفتره معينه يعني (خطه)
وهذا يحجي وهذا يسأل وذاك يشاغب
تضطر بهالحالة المعلمة تشرح للفئة الوسط اللي لا هم الشطار كلش ولا هم اللي يحتاج الهم وقت اطول
من ابني او بنتي يجيني بدرجات مو زينه
اسأل الأهالي انتو هم هيج حالة أولادكم اذا حاله جماعية الغلط من المدرسة
اذا بس طفلي ... معناها لازم اني ادرسه ... اشوف احد يدرسه... اسأله شنو مشكلتك واحاول الكالها حل قبل نص السنه حتى لا تضيع عليه
وعلى فكرة باليوتيوب اكو محاضرات كاملة يعني مو الا استاذ خصوصي ... والملازم المواد الدرخية موجودة اني أكدر اساعد ابني او بنتي حتى لو اتعلم لخاطره
واخيرا
أغلب المشاكل الدراسية او حتى الاجتماعية هي لانه الطفل يخاف يحجي ... ممكن طفلي كاره المدرسة لانه ديتعرض للتنمر... ممكن كاعد يم تلميذ وكح .... ممكن صدك معلمته شاده وياه ... مهما تكون المشكله خليج دائما الحظن اللي يركض اله الطفل من يريد يلكى الحل
اتمنالكم النجاح ...
إدارة الصفحة
