09/06/2023
ഡൊണാള്ഡ് ഫോണ്ട്ലറി ഡക്ക്
പ്രശസ്ത കാർട്ടൂൺ കഥാപാത്രമായ ഡൊണാള്ഡ് ഡക്കിന് (Donald Duck) ഇന്ന് 88 വയസ്സ് തികയുകയാണ്. 1934 ജൂണ് 9 ആണ് ഡൊണാള്ഡ് ഡക്കിന്റെ ജൻമദിനം. കാര്ട്ടൂണ് കഥാപാത്രങ്ങളില് എല്ലാവരുടെയും പ്രിയങ്കരനായി മാറിയ കഥാപാത്രമാണ് ഡൊണാള്ഡ് ഡക്ക് (Donald duck). വാള്ട്ട് ഡിസ്നിയുടെ (Walt Disney) ദി വൈസ് ലിറ്റില് ഹെന് (TWLH) എന്ന കോമഡി ചിത്രത്തിലൂടെയായിരുന്നു ഡൊണാള്ഡ് ഡക്കിന്റെ അരങ്ങേറ്റം.
തന്റെ കൈയിലുള്ള ചോളം നടാന് ഡൊണാള്ഡ് ഡക്കിനോടും പീറ്റര് പിഗിനോടും കോഴി ആവശ്യപ്പെടുന്നതാണ് ചിത്രത്തിന്റെ പ്രമേയം. എന്നാല് ഇരുവരും ജോലി ചെയ്യാന് മടിച്ചു നില്ക്കുകയാണ്. ദ ലിറ്റില് റെഡ് ഹെന് എന്ന അമേരിക്കന് കഥയെ അടിസ്ഥാനമാക്കിയുള്ളതാണ് ഈ കാര്ട്ടൂണ്. കഠിനാധ്വാനത്തിന്റെ പ്രാധാന്യത്തെക്കുറിച്ചാണ് ഇതില് പറയുന്നത്. 7 മിനിറ്റ് ദൈര്ഘ്യമുള്ള ചിത്രമാണിത്.
വെളുത്ത നിറവും നാവികന്മാരുടേതിന് സമാനമായ കോട്ടും തൊപ്പിയും ടൈയും ആണ് ഡൊണാള്ഡ് ഡക്കിന്റെ വേഷം. ഡൊണാള്ഡിന്റെ ചുണ്ടിന് മഞ്ഞ നിറമാണുള്ളത്. ഈ ജനപ്രിയ കാര്ട്ടൂണ് കഥാപാത്രത്തിലേക്ക് ആരാധകരെ ആകര്ഷിച്ചത് അതിന്റെ സ്വഭാവവും, സംസാരരീതിയും വികൃതിയും, പൊങ്ങച്ചം പറയുന്ന പെരുമാറ്റമാണ്. കുഴിമടിയനും പെട്ടെന്ന് ദേഷ്യം വരുന്ന കഥാപാത്രവുമാണ് ഡൊണാള്ഡ് ഡക്ക്. ഇതെല്ലാം ഡൊണാള്ഡ് ഡക്കിനെ ഹിറ്റാക്കി.
150 ഓളം തിയറ്റര് സിനിമകളില് ഡൊണാള്ഡ് ഡക്ക് കഥാപാത്രമായിട്ടുണ്ട്. കൂടാതെ, ലോകത്തെ കോമിക് പുസ്തകങ്ങളില് ഏറ്റവുമധികം പ്രസിദ്ധീകരിക്കപ്പെട്ട ഒരു കഥാപാത്രം കൂടിയാണ് ഡൊണാള്ഡ്. എന്നാല് ഡൊണാള്ഡ് ഡക്കിന് ഒരു മിഡിൽ നെയിം കൂടി ഉണ്ട്. ഇന്സ്റ്റഗ്രാമിലൂടെ ഡിസ്നിയാണ് ഒരു ചിത്രം പങ്കുവെച്ച് കൊണ്ട് ഈ രഹസ്യം വെളിപ്പെടുത്തിയത്. ഡൊണാള്ഡ് ഫോണ്ട്ലറി ഡക്ക് (donald fauntleroy duck) എന്നാണ് ഡൊണാള്ഡിന്റെ യഥാര്ത്ഥ പേര്.
