03/03/2026
സമ്പൂർണ ഭക്ഷ്യസുരക്ഷ ഗ്രാമ പഞ്ചായത്ത് പദ്ധതി 2025–26ന്റെ ഭാഗമായി തൃശ്ശൂർ ജില്ലയിൽ ഭക്ഷ്യസുരക്ഷ പുതുക്കാട് സർക്കിളിന്റെ നേതൃത്വത്തിൽ വരന്തരപ്പിള്ളി ഗ്രാമ പഞ്ചായത്തിൽ ആശ വർക്കേഴ്സ്,റെസ്റ്റോറൻ്റ്& കാറ്ററിങ്ങ് ജീവനക്കാർ, റെസിഡൻസ് അസോസിയേഷൻ എന്നിവർക്കായി ബോധവത്കരണ ക്ലാസ്സുകൾ സംഘടിപ്പിച്ചു. 2026ഫെബ്രുവരി 24 ന് വരന്തരപ്പിള്ളി ഗ്രാമ പഞ്ചായത്ത് ഹാളിൽ നടന്ന പരിപാടി പഞ്ചായത്ത് പ്രസിഡൻ്റ് ശ്രീമതി .മീന മദനൻ ഉദ്ഘാടനം ചെയ്തു.പഞ്ചായത്ത് വൈസ് പ്രസിഡൻ്റ്,ആരോഗ്യ സ്റ്റാൻഡിങ് കമ്മിറ്റി ചെയർമാൻ എന്നിവർ ആശംസകൾ അർപ്പിച്ചു. പുതുക്കാട് ഭക്ഷ്യസുരക്ഷ ഓഫീസർ ശ്രീമതി ഷഫീല വി പി, ഒല്ലൂർ ഭക്ഷ്യ സുരക്ഷ ഓഫീസർ ശ്രീ.അരുൺ പി കാര്യാട്ട് , ന്യൂട്രിഷനിസ്റ്റ് ആഗ്നസ് റെജി എന്നിവർ ക്ലാസ്സുകൾ നയിച്ചു.
ആരോഗ്യകരമായ ഭക്ഷണ ശീലങ്ങളെക്കുറിച്ചും സമീകൃതാഹാരത്തെക്കുറിച്ചും ജീവിതശൈലി രോഗങ്ങളെക്കുറിച്ചും ന്യൂട്രിഷനിസ്റ്റ് ക്ലാസിൽ വിശദീകരിച്ചു.ഭക്ഷ്യസുരക്ഷ മാനദണ്ഡങ്ങൾ, വ്യക്തിപരമായും സ്ഥാപന തലത്തിലും പാലിക്കേണ്ട ശുചിത്വക്രമങ്ങൾ, സുരക്ഷിതമായ ഭക്ഷ്യസംഭരണം, ഭക്ഷ്യ കൈകാര്യം ചെയ്യൽ രീതികൾ എന്നിവയെക്കുറിച്ച് വിശദമായ അവബോധം ഫുഡ് സേഫ്റ്റി ഓഫീസർമാർ ക്ലാസിലൂടെ നൽകി.
ഭക്ഷ്യസുരക്ഷ എല്ലാവരുടെയും ഉത്തരവാദിത്തമാണ് എന്ന സന്ദേശം ഉയർത്തിപ്പിടിച്ചുകൊണ്ടാണ് പരിപാടി സമാപിച്ചത്. ഇതോടനുബന്ധിച്ച IEC മെറ്റീരിയൽസ് ക്ലാസിൽ വിതരണം ചെയ്തു.ഭക്ഷ്യ സുരക്ഷ ലൈസൻസ്/രജിസ്ട്രേഷൻ മേളയും ഇതോടൊപ്പം സംഘടിപ്പിച്ചു.
