21/06/2022
റീ-അക്രെഡിറ്റഷനിൽ കേരളസർവകലാശാലയ്ക്ക് A++
കേരളസർവകലാശാല നാഷണൽ അസസ്മെന്റ് ആന്റ് അക്രെഡിറ്റേഷൻ കൌൺസിൽ (NAAC) റീ-അക്രെഡിറ്റേഷനിൽ 3.67 ഗ്രേഡ് പോയിന്റോടെ A++ നേടി. കേരളത്തിൽ ആദ്യമായാണ് ഒരു സർവകലാശാലയ്ക്ക് A++ ലഭിക്കുന്നത്.
A++ ന് ആധാരമായ സൂചകങ്ങൾ താഴെപ്പറയുന്നവയാണ്:
കരിക്കുലം - 3.08,
അദ്ധ്യാപനം/ബോധനം/മൂല്യനിർണ്ണയം - 3.47,
ഗവേഷണം/കണ്ടുപിടിത്തം/അനുബന്ധപ്രവർത്തനം - 3.52,
അടിസ്ഥാന സൌകര്യമേഖല/പഠന സൌകര്യങ്ങളുടെ പര്യാപ്ത - 3.75,
സ്റ്റുഡന്റ്സ് സപ്പോർട്ട്/പ്രോഗഷൻ - 3.93,
ഗവേണൻസ്/ലീഡർഷിപ്പ്/മാനേജ്മെന്റ് - 3.61,
ഇൻസ്റ്റിറ്റ്യൂഷണൽ വാല്യു ആന്റ് ബെസ്റ്റ് പ്രാക്ടീസ് - 3.96,
ടോട്ടൽ ആവറേജ് - 3.67.
രാജ്യത്ത് കേന്ദ്രസംസ്ഥാനസർക്കാരിന്റെ നിയന്ത്രണത്തിൽ A++ ഉളള മൊത്തം സർവകലാശാലകളുടെ എണ്ണം 9 ആയിരുന്നു. കേരളസർവകലാശാലയ്ക്ക് A++ കിട്ടിയതോടെ അത് 10 ആയി മാറി. ഇതിൽ സംസ്ഥാന സർക്കാരുകളുടെ നിയന്ത്രണത്തിലുളള 6 സർവകലാശാലകളിൽ 3.67 ഗ്രേഡ് പോയിന്റ് ലഭിച്ചതോടെ കേരളസർവകലാശാല ഒന്നാം സ്ഥാനം നേടി.
എൻ.ഐ.ആർ.എഫ്. റാങ്കിൽ ഒന്നാം സ്ഥാനം നേടിയ ബാംഗ്ലൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിന്റെ (IISc) നിലവിലുളള ഗ്രേഡ് പോയിന്റിന് തുല്യമായ ഗ്രേഡ് പോയിന്റാണ് ഇപ്പോൾ കേരളസർവകലാശാലയ്ക്ക് ലഭിച്ചിരിക്കുന്നത്.
അന്താരാഷ്ട്ര നിലവാരത്തിലുളള പാഠ്യപദ്ധതി, ഓൺലൈൻ/ഓഫ് ലൈൻ മാർഗ്ഗത്തിലൂടെയുളള അദ്ധ്യാപനവും ബോധനപ്രക്രിയയും മൂല്യനിർണ്ണയരീതിയും ശ്രദ്ധേയമായി.
ലോകോത്തരനിലവാരമുളള കേന്ദ്രീകൃത ലബോറട്ടറി സംവിധാനം ഒരുക്കിയതിലൂടെ മികച്ച ഗവേഷണപ്രവർത്തനവും കണ്ടുപിടിത്തങ്ങളും പ്രബന്ധങ്ങളും പേറ്റന്റുകളും നേടുന്നതിന് സഹായകമായി. ഐ.ടി. ഉൾപ്പെടെയുളള അടിസ്ഥാനസൌകര്യങ്ങൾ വികസിപ്പിക്കുകയും ലൈബ്രറിയും പരീക്ഷാസംവിധാനവും നൂതനസാങ്കേതികവിദ്യയുമായി ബന്ധിപ്പിക്കുകയും ചെയ്തിരുന്നു. പഠന-ഗവേഷണമേഖലകളിൽ ഉന്നതനേട്ടങ്ങൾ കൈവരിക്കാനുതകുന്ന തരത്തിൽ സർവകലാശാല നൽകിയ ഫെല്ലോഷിപ്പുകൾ ഉൾപ്പെടെയുളള ആനുകൂല്യങ്ങൾ, പഠനം പൂർത്തിയാക്കിയവർക്ക് തുടർപ്രവർത്തനത്തിനും തൊഴിൽ നേടുന്നതിനും ഒരുക്കിയ സൌകര്യങ്ങൾ, വിഭവ സമാഹരണം ഉൾപ്പെടെയുളള മേഖലകളിൽ നടത്തിയ കാര്യക്ഷമവും വികേന്ദ്രീകൃതവുമായ ഭരണനിർവ്വഹണം എന്നിവ പ്രത്യേകം ശ്രദ്ധിക്കപ്പെട്ടു.
സർവകലാശാലയുടെ മികച്ച രണ്ടു പ്രവർത്തനങ്ങൾ പ്രത്യേകമായി പരിശോധിച്ചിരുന്നു. ഇതിൽ ഒന്നാമത്തേത് വിജാഞാനമേഖലയ്ക്കും സമൂഹത്തിനും ഒരുപോലെ ഉപയോഗപ്രദമായ ഗവേഷണം ആണ്. രണ്ടാമത്തേത് സുസ്ഥിരവികസനപദ്ധതിയുടെയും ഭക്ഷ്യസുരക്ഷയുടേയും ഭാഗമായി ആവിഷ്ക്കരിച്ച ഹരിതാലയം പദ്ധതി ആണ്. ഈ രണ്ട് മികച്ച പ്രവർത്തനങ്ങൾക്കും പൂർണ്ണ അംഗീകാരമാണ് ലഭിച്ചത്. സാമൂഹ്യപരിവർത്തനത്തിന് ഉതകുന്ന തരത്തിൽ നാനാ തുറകളിലുളള വിദ്യാർത്ഥികൾക്കും ഗുണനിലവാരമുളള വിദ്യാഭ്യാസം ഉറപ്പാക്കിയ സർവകലാശാലയുടെ സമീപനം ഇതര ഉന്നതവിദ്യാഭ്യാസസ്ഥാപനങ്ങളിൽ നിന്ന് കേരളസർവകലാശാലയുടെ വേറിട്ട പ്രവർത്തനമായി വിലയിരുത്തപ്പെട്ടു.
A++ ഗ്രേഡ് കിട്ടിയതോടെ മികവിന്റെ കേന്ദ്രമായി ദേശീയ തലത്തിൽ കേരളസർവകലാശാല അഗീകരിക്കപ്പെട്ടു.
വാർത്താസമ്മേളനത്തിൽ പ്രൊ-വൈസ് ചാൻസലർ പ്രൊഫ.പി.പി.അജയകുമാർ, സിൻഡിക്കേറ്റ് അംഗങ്ങളായ അഡ്വ.കെ.എച്ച്.ബാബുജാൻ, ഡോ.എസ്.നസീബ്, ശ്രീ.ബി.പി.മുരളി, അഡ്വ.ബി.ബാലചന്ദ്രൻ, അഡ്വ.എ.അജികുമാർ, ഡോ.എം.വിജയൻപിളള, ഡോ.കെ.ബി.മനോജ്, രജിസ്ട്രാർ പ്രൊഫ.കെ.എസ്.അനിൽകുമാർ ഐ.ക്യു.എ.സി.ഡയറക്ടർ ഡോ.സൈമൺ തട്ടിൽ, ജോയിന്റ് ഡയറക്ടർ ഡോ.ഇ.ഷാജി, റിസർച്ച് ഡയറക്ടർ പ്രൊഫ.ആർ.ബി.ബിനോജ്കുമാർ എന്നിവർ പങ്കെടുത്തു.
