03/06/2026
ایس ڈی ایم کرناہ پہنچ گئے
پہلی جائزہ میٹنگ میں ترقیاتی کاموں اور عوامی فلاحی منصوبوں پر زور
پیرزادہ سعید
کرناہ //نو تعینات سب ڈویژنل مجسٹریٹ (ایس ڈی ایم) کرناہ محمد ریاض (جے کے اے ایس) نے آج مختلف محکموں کے افسران کے ساتھ اپنی پہلی جائزہ میٹنگ منعقد کی، جس میں سب ڈویژن میں جاری ترقیاتی منصوبوں اور عوامی فلاح و بہبود کی اسکیموں کی پیش رفت کا تفصیلی جائزہ لیا گیا۔
میٹنگ کے دوران ایس ڈی ایم نے اہم ترقیاتی منصوبوں، عوامی خدمات کی فراہمی کے نظام اور مختلف سرکاری اسکیموں کے نفاذ کی صورتحال کا جائزہ لیا۔ انہوں نے متعلقہ محکموں پر زور دیا کہ ترقیاتی کاموں کو بروقت مکمل کیا جائے، عوامی شکایات کا فوری ازالہ یقینی بنایا جائے اور محکموں کے درمیان بہتر رابطہ و تال میل قائم رکھا جائے تاکہ عوام کو نچلی سطح تک مؤثر خدمات فراہم کی جا سکیں۔افسران نے اپنے اپنے شعبوں میں ہونے والی پیش رفت سے اجلاس کو آگاہ کیا اور درپیش مسائل و چیلنجز بھی سامنے رکھے۔ ایس ڈی ایم نے تمام محکموں کو ہدایت دی کہ وہ باہمی اشتراک کے ساتھ کام کریں اور ترقیاتی سرگرمیوں کی مسلسل نگرانی کو یقینی بنائیں تاکہ مطلوبہ نتائج حاصل کیے جا سکیں۔
اجلاس میں تحصیلدار کرناہ، ٹریژری آفیسر، ایگزیکٹو انجینئر آر اینڈ بی، مختلف تعلیمی اداروں کے پرنسپلز، نائب تحصیلدار چمکوٹ و ٹنگڈار، ایس ایچ او ٹنگڈار، بلاک میڈیکل آفیسر ٹنگڈار، زونل ایجوکیشن آفیسر ٹنگڈار، ہارٹیکلچر ڈیولپمنٹ آفیسر کرناہ، سب ڈویژنل ایگریکلچر آفیسر کرناہ، رینج آفیسر کرناہ، آر اینڈ بی اور پی ڈی ڈی کے اسسٹنٹ ایگزیکٹو انجینئرز، بلاک ویٹرنری آفیسر کرناہ، آئی ٹی آئی کے نمائندوں اور تحصیل سپلائی آفیسر کرناہ سمیت دیگر متعلقہ افسران نے شرکت کی۔
