30/07/2025
*ਜੇ ਤੁਸੀਂ ਇਸ ਤਰ੍ਹਾਂ ਹੀ ਕਾਫ਼ਿਲੇ ਬਣਾਕੇ ਚੱਲਦੇ ਰਹੇ ਤਾਂ, ਇੱਕ ਦਿਨ ਦਿੱਲੀ ਦੇ ਤਖ਼ਤ ਤੇ ਤੁਹਾਡਾ ਹੀ ਰਾਜ ਹੋਵੇਗਾ।*
*ਬਹੁਜਨ ਨਾਇਕ, ਕ੍ਰਾਂਤੀਕਾਰੀ, ਮਹਾਨ ਤਿਆਗੀ, ਮਹਾਨ ਤਪੱਸਵੀ, ਬਹੁਜਨਾਂ ਦੇ ਮਾਰਗ ਦਰਸ਼ਕ ਅਤੇ ਸਾਇੰਸਦਾਨ ਤੋਂ ਬਣੇ ਸਮਾਜਿਕ ਸਾਇੰਸਦਾਨ ਮਾਨਿਆਵਰ ਸਾਹਿਬ ਸ੍ਰੀ ਕਾਂਸ਼ੀ ਰਾਮ ਜੀ ਦੀ ਤਿਆਗ ਅਤੇ ਸਘੰਰਸ਼ਭਰੀ ਜ਼ਿੰਦਗੀ ਦੀ ਦਾਸਤਾਨ ਨੂੰ ਤੁਹਾਡੇ ਨਾਲ ਸਾਂਝੀ ਕਰਦੇ ਹਾਂ।*
ਵਾਕਿਆ 1982-83 ਹਿਮਾਚਲ ਪ੍ਰਦੇਸ਼ ਦੇ ਸੁੰਦਰ ਨਗਰ ਵਿਖੇ ਸਥਿਤ ਸ੍ਰੀ ਗੁਰੂ ਰਵਿਦਾਸ ਮੰਦਿਰ ਵਿਖੇ ਦਾ। ਸਾਹਿਬ ਨੇ ਇੱਥੇ ਇੱਕ ਕੇਡਰ ਕੈਂਪ ਆਯੋਜਿਤ ਕੀਤਾ, ਜਿਸ ਵਿੱਚ ਮਹਿਜ਼ ਵੀਹ ਕੁ ਮੁਲਾਜ਼ਮਾਂ ਨੇ ਭਾਗ ਲਿਆ। ਸਾਹਿਬ ਨੂੰ ਕੇਡਰ ਕੈਂਪ ਵਿੱਚ ਸ਼ਾਮਿਲ ਜਦੋਂ ਮਾਸਟਰ ਮੇਵਾ ਸਿੰਘ ਰੋੜ੍ਹੀਆਂ ਨੇ ਸਵਾਲ ਕੀਤਾ ਕਿ ਸਾਹਿਬ ਜੀ ਸਾਡਾ ਸਮਾਜ ਤਾਂ ਇਕੱਠਾ ਨਹੀਂ ਹੁੰਦਾ, ਫਿਰ ਭਲਾ ਬੈਕਵਾਰਡ ਸਮਾਜ ਦੇ ਲੋਕ ਸਾਡੇ ਨਾਲ ਕਿੱਦਾਂ ਆਉਣਗੇ। ਜਿਸ 85% ਸਮਾਜ ਨੂੰ ਤੁਸੀਂ ਇਕੱਠਾ ਕਰਨ ਦੀ ਗੱਲ ਕਰ ਰਹੇ ਹੋ, ਇਹ ਗੱਲ ਕੁੱਝ ਸਾਡੇ ਗਲੇ ਨਹੀਂ ਉੱਤਰਦੀ। ਇਸ ਸਵਾਲ ਦਾ ਜਵਾਬ ਸਾਹਿਬ ਨੇ ਬਹੁਤ ਹੀ ਠਰੰਮੇ ਜਿਹੇ ਨਾਲ ਦਿੰਦਿਆਂ ਕਿਹਾ ਕਿ ਜੇ ਤੁਸੀਂ ਮੇਰੇ ਨਾਲ ਇਸ ਤਰ੍ਹਾਂ ਹੀ ਜੁੜਦੇ ਗਏ ਤੇ ਕਾਫ਼ਿਲੇ ਬਣਾਕੇ ਮੇਰੇ ਨਾਲ ਇਸ ਤਰ੍ਹਾਂ ਹੀ ਚੱਲਦੇ ਰਹੇ ਤਾਂ ਉਹ ਦਿਨ ਬਹੁਤੇ ਦੂਰ ਨਹੀਂ, ਜਦੋਂ ਬਹੁਜਨ ਸਮਾਜ ਦਾ ਦਿੱਲੀ ਦੇ ਤਖ਼ਤ ਤੇ ਕਬਜਾ ਹੋਵੇਗਾ। ਤੇ ਸ਼ੂਦਰ ਲੋਕ ਇਸ ਮੁਲਕ ਦੇ ਮਾਲਿਕ ਹੋਣਗੇ । ਤੇ ਫਿਰ ਬ੍ਰਾਹਮਣਵਾਦੀ ਮਾਨਸਿਕਤਾ ਦੇ ਸ਼ਿਕਾਰ ਲੋਕ ਨੌਕਰਾਂ ਦੀ ਤਰ੍ਹਾਂ ਗੁਜ਼ਰ-ਬਸਰ ਕਰਨ ਲਈ ਮਜ਼ਬੂਰ ਹੋਣਗੇ। ਬਸ਼ਰਤੇ ਕਿ ਤੁਸੀਂ ਲੋਕ ਮੇਰੇ ਨਾਲ ਦਿਲੋਂ ਖੜ੍ਹੇ ਹੋਇਓ, ਜੇ ਮੇਰੀ ਪਿੱਠ ਤੇ ਖੜ੍ਹਨਾ ਹੈ। ਇਹ ਕੇਡਰ ਕੈਂਪ ਰਾਤ ਦੇ ਗਿਆਰਾਂ ਵਜੇ ਖ਼ਤਮ ਹੋਇਆ। ਉਸ ਤੋਂ ਬਾਅਦ ਸਾਹਿਬ ਨੇ ਦੋ ਪ੍ਰਸ਼ਾਦੇ ਉੱਥੇ ਹੀ ਮੰਗਵਾਕੇ ਖਾਧੇ ਤੇ ਵਰਕਰਾਂ ਕੋਲੋਂ ਚੰਡੀਗੜ੍ਹ ਜਾਣ ਤੱਕ ਦਾ ਕਿਰਾਇਆ ਮੰਗਿਆ। ਕਿਸੇ ਨੇ ਇੱਕ ਰੁਪਿਆ ਦਿੱਤਾ ਤੇ ਕਿਸੇ ਨੇ ਦੋ ਰੁਪਏ ਤੇ ਕਿਸੇ ਨੇ ਪੰਜ ਰੁਪਏ। ਉਸ ਤੋਂ ਬਾਅਦ ਸਾਹਿਬ 11 ਵੱਜ ਕੇ 50 ਮਿੰਟ ਤੇ ਸ੍ਰੀ ਗੁਰੂ ਰਵਿਦਾਸ ਮੰਦਿਰ ਦੇ ਕੋਲੋਂ, ਜੀਰੋ ਚੌਂਕ ਚੋਂ ਮਨਾਲੀ ਟੂ ਚੰਡੀਗੜ੍ਹ, ਨਾਇਟ ਸਰਵਿਸ ਬੱਸ ਫੜ੍ਹਕੇ ਆਪਣੇ ਅਗਲੇ ਪੜ੍ਹਾਅ ਲਈ ਰਵਾਨਾ ਹੋ ਗਏ। ਮੇਵਾ ਸਿੰਘ ਇੱਕ ਗੱਲ ਹੋਰ ਆਖਦਾ ਹੈ ਕਿ ਉਸ ਵਕਤ ਸਾਡੇ ਚੋਂ ਕਿਸੇ ਇੱਕ ਦੇ ਵੀ ਮਨ ਵਿੱਚ ਇਹ ਨਹੀਂ ਸੀ, ਕਿ ਵਰਕਰਾਂ ਤੋਂ ਇੱਕ ਇੱਕ ਤੇ ਦੋ-ਦੋ ਰੁਪਏ ਕਿਰਾਏ ਦੇ ਰੂਪ ਵਿੱਚ ਮੰਗਣ ਵਾਲਾ ਇਹ ਸ਼ਖ਼ਸ ਆਉਂਣ ਵਾਲੇ ਸਮੇਂ ਵਿੱਚ ਦੱਬੇ ਕੁੱਚਲੇ ਤੇ ਗਏ ਗੁਜਰੇ ਲੋਕਾਂ ਨੂੰ ਇੱਕ ਨੀਲੇ ਝੰਡੇ ਥੱਲੇ ਇਕੱਠੇ ਕਰਕੇ ਬ੍ਰਾਹਮਣਵਾਦ ਦੇ ਖਿਲਾਫ਼ ਫ਼ੈਸਲਾਕੁੰਨ ਜੰਗ ਛੇੜ ਦੇਵੇਗਾ ਤੇ ਜਿੱਤ ਵੀ ਪ੍ਰਾਪਤ ਕਰੇਗਾ। ਇਸ ਕੇਡਰ ਕੈਂਪ ਵਿੱਚ ਰੋਪੜ ਜ਼ਿਲ੍ਹੇ ਦਾ ਦੀਪ ਸਿੰਘ ਰਾਹੀ ਵੀ ਹਾਜ਼ਿਰ ਸੀ। ਦੀਪ ਸਿੰਘ ਰਾਹੀ ਉਹ ਸ਼ਖ਼ਸ ਸੀ, ਜਿਹੜਾ ਸਾਹਿਬ ਨੂੰ 20-20 ਕਿਲੋਮੀਟਰ ਹਿਮਾਚਲ ਦੀਆਂ ਪਹਾੜੀਆਂ ਤੇ ਮੌਤ ਤੋਂ ਵੀ ਖ਼ਤਰਨਾਕ ਪੱਗ ਡੰਡੀਆਂ ਤੇ ਤੋਰ ਕੇ ਕੇਡਰ ਕੈਂਪਾਂ ਤੱਕ ਲੈ ਜਾਂਦਾ ਸੀ। ਉਸ ਦੇ ਨਾਲ ਦੇ ਸਾਥੀਆਂ, ਕਿਸੇ ਨੇ ਮੋਢਿਆਂ ਤੇ ਸਪੀਕਰ ਚੁੱਕਿਆ ਹੁੰਦਾ ਸੀ ਤੇ ਕਿਸੇ ਨੇ ਬੈਟਰੀ ਤੇ ਕਿਸੇ ਨੇ ਵਿਛਾਉਣ ਵਾਲੀਆਂ ਦਰੀਆਂ।
*ਬਾਬਾ ਸਾਹਿਬ ਦੇ ਕਾਫ਼ਿਲੇ ਨੂੰ ਅੱਗੇ ਵਧਾਉਣ ਦੇ ਲਈ ਜ਼ਰੂਰੀ ਊਰਜਾ ਅਤੇ ਯਤਨ ਕਰਨ ਵਿੱਚ ਅਸਫ਼ਲ ਹੋਏ, ਜਿਸ ਕਰਕੇ ਕਾਫਿਲਾ ਧੜੰਮ ਕਰਕੇ ਹੇਠਾਂ ਜਾ ਡਿੱਗਿਆ-ਸਾਹਿਬ ਕਾਂਸ਼ੀ ਰਾਮ*
*ਪੇਸ਼ ਕਰਦੇ ਹਨ।*
*ਇੰਜੀਨੀਅਰ ਤੇਜਪਾਲ ਸਿੰਘ*
*94177-94756*
*ਮੈਡਮ ਸਤਵੰਤ ਕੌਰ 97811-00478*
*ਯੁੱਗ ਪੁਰਸ ਬਹੁਜਨ ਮਹਾਂ-ਨਾਇਕ*
*ਮੈਂ ਕਾਂਸ਼ੀ ਰਾਮ ਬੋਲਦਾ ਹਾਂ ਭਾਗ -2*
*ਪੰਮੀ ਲਾਲੋ ਮਜਾਰਾ-95011-43755
