25/05/2026
PRESS RELEASE
শদিয়া সম-জিলাত সফলতাৰে সম্পন্ন "জন ভাগীদাৰী–চবসে দূৰ, চবসে পেহলে" শীৰ্ষক কাৰ্যসূচী। শদিয়া ২৫ মেঃ ভাৰত চৰকাৰৰ জনজাতি পৰিক্ৰমা মন্ত্ৰালয়ে জনজাতীয় লোকসকলৰ কল্যাণাৰ্থে ১৮ মে'ৰ পৰা ২৫ মে'লৈকে আয়োজন কৰা “জন ভাগীদাৰী–চবসে দূৰ, চবসে পেহলে" শীৰ্ষক কাৰ্যসূচী আজি শদিয়া সম-জিলাত সফলতাৰে সম্পন্ন হয়। তিনিচুকীয়া জিলাৰ শদিয়া আৰু চৈখোৱা উন্নয়ন খণ্ডৰ অন্তৰ্গত ৩৫ খন জনজাতীয় গাওঁত এই কাৰ্যসূচীৰ অধীনত চৰকাৰী জনকল্যাণমূলক সেৱা তথা আঁচনি সন্দৰ্ভত সজাগতা আৰু বিভিন্ন চৰকাৰী সেৱা প্ৰদানৰ শিবিৰ আয়োজন কৰা হয়। তৃণমূল পৰ্যায়ৰ শাসন ব্যৱস্থা শক্তিশালী কৰা, চৰকাৰী আঁচনিৰ সজাগতা বৃদ্ধি, হিতাধিকাৰী সম্পৃক্তকৰণ আৰু জনজাতীয় ৰাইজৰ সমস্যা সমাধান কৰাই আছিল এই অভিযানৰ মূল উদ্দেশ্য। সমগ্ৰ দেশৰ লগতে তিনিচুকীয়া জিলাতো ১৮ মে'ত এই কাৰ্যসূচীৰ শুভাৰম্ভ কৰে জিলা আয়ুক্ত সুমিত ছাত্তাৱানে। ইয়াৰ পাছতে ১৯ মে’ত সম জিলাখনৰ ২খন উন্নয়ন খণ্ডত স্বাস্থ্য বিভাগৰ সহযোগত স্বাস্থ্য শিবিৰৰ আয়োজন কৰা হয়। যোগ্য হিতাধিকাৰীক আয়ুষ্মান কাৰ্ড প্ৰদান আৰু ঘৰে ঘৰে গৈ আঁচনিৰ নথি-পত্ৰৰ সহায় আগবঢ়োৱা হয়। ২০ মে’ত বিভিন্ন জনজাতীয় গাঁৱত ‘ট্ৰেন্সেক্ট ৱাক' ৰ আয়োজন কৰা হয়। এই কাৰ্যসূচীৰ মূল লক্ষ্য আছিল ভিতৰুৱা জনজাতীয় এলেকাত চৰকাৰী কল্যাণকামী আঁচনিৰ বিষয়ে সজাগতা সৃষ্টি কৰা আৰু প্ৰতিগৰাকী প্ৰকৃত হিতাধিকাৰীক ইয়াৰ আওঁতালৈ অনা। এই বিশেষ অভিযানৰ অংশস্বৰূপ বিভিন্ন বিভাগৰ মুৰব্বী বিষয়াসকলে স্থানীয় জনজাতীয় বসতিস্থলসমূহলৈ খোজ কাঢ়ি গৈ ‘ট্ৰেন্সেক্ট ৱাক’ কৰে আৰু ৰাইজৰ জীৱন-ধাৰণৰ মানদণ্ড তথা মৌলিক অভাৱ-অভিযোগসমূহ প্ৰত্যক্ষভাৱে পৰিদৰ্শন কৰে। উক্ত কাৰ্যসূচীত কৃষি, খাদ্য, অসামৰিক যোগান আৰু গ্ৰাহক পৰিক্ৰমা, পশুপালন আৰু পশু চিকিৎসা, জনস্বাস্থ্য-কাৰিকৰী, স্বাস্থ্য আৰু পৰিয়াল কল্যাণ বিভাগৰ লগতে অন্যান্য বিভিন্ন বিভাগৰ প্ৰতিনিধি আৰু বিষয়াসকলে উপস্থিত থাকে। বিভাগীয় বিষয়াসকলে স্থানীয় ৰাইজৰ সৈতে পোনপটীয়া মতবিনিময়ত মিলিত হৈ চৰকাৰৰ বিভিন্ন হিতাধিকাৰীমুখী সেৱা, প্ৰাপ্য অধিকাৰ আৰু উন্নয়নমূলক পদক্ষেপসমূহ সৰল ভাষাত আলোকপাত কৰে। ২১ মে’ৰ পৰা ২৩ মে’লৈ বিভিন্ন খণ্ডত জন শুনানি অনুষ্ঠিত হয়। এই জন শুনানিত ৰাইজে উপস্থিত বিভিন্ন বিভাগৰ বিষয়াসকলৰ আগত তেওঁলোকৰ অভাৱ অভিযোগসমূহ উত্থাপন কৰে। বিভাগীয় প্ৰতিনিধিসকলে স্থানীয় ৰাইজে উত্থাপন কৰা বিভিন্ন সমস্যা আৰু অভাৱ-অভিযোগসমূহ লিখিতভাৱে নথিভুক্ত কৰে, যাতে পৰৱৰ্তী সময়ত সেই সমস্যা তথা অভাৱ অভিযোগৰ ক্ষীপ্ৰ সমাধান আৰু প্ৰয়োজনীয় ফলপ্ৰসূ ব্যৱস্থা গ্ৰহণ কৰিব পৰা যায়। উল্লেখযোগ্য যে, পঞ্চায়ত আৰু গ্ৰামোন্নয়ন, কৃষি, স্বাস্থ্য, পশুপালন, জনস্বাস্থ্য কাৰিকৰী, ৰাজহ, বন, খাদ্য আৰু যোগান, শিক্ষা, উদ্যোগ, শক্তি আদি বিভাগে সক্ৰিয়ভাৱে এই কাৰ্যসূচীত অংশগ্ৰহণ কৰে। ৰাইজক আঁচনিৰ যোগ্যতা, আবেদন প্ৰক্ৰিয়া আৰু সুবিধাৰ বিষয়ে বেনাৰ, পত্ৰিকা আৰু প্ৰত্যক্ষ আলোচনাৰে সজাগ কৰা হয়। এই অভিযানে দুৰ্গম জনজাতীয় অঞ্চলত চৰকাৰী আঁচনিৰ প্ৰসাৰ, স্থানীয় সমস্যাৰ চিনাক্তকৰণ আৰু নাগৰিক-কেন্দ্ৰিক প্ৰশাসন শক্তিশালী কৰাত গুৰুত্বপূৰ্ণ অৱদান আগবঢ়াইছে। ৰাইজৰ উৎসাহজনক অংশগ্ৰহণে প্ৰশাসন আৰু জনজাতীয় সমাজৰ মাজত বিশ্বাস বৃদ্ধি কৰিছে। "জন ভাগীদাৰী-চবসে দূৰ, সবসে পেহলে" কাৰ্যসূচীত বিভিন্ন বিভাগৰ সন্মিলিত পদক্ষেপে দুৰ্গম অঞ্চলৰ জনজাতীয় লোকসকলক চৰকাৰী ব্যৱস্থাৰ প্ৰতি অধিক বিশ্বাসী কৰি তোলাৰ লগতে সামগ্ৰিক উন্নয়ন ত্বৰান্বিত কৰাত বিশেষ ভূমিকা গ্ৰহণ কৰিব বুলি আশা প্ৰকাশ কৰা হৈছে।
মহকুমা তথ্য আৰু জনসংযোগ বিভাগ, শদিয়া ।
