08/10/2015
पुणे - देवाची वस्त्रे, देवीची चुनरी, घटाला वावरी (काळी माती), घट, धान्य, परड्या, हळदी-कुंकू आणि बांगड्यांसहीत पूजेच्या साहित्यांनी बाजारपेठ फुलू लागली आहे. शारदीय नवरात्रोत्सव अश्विन शुद्ध प्रतिपदेला (ता. 13) सुरू होत असल्याने, सार्वजनिक मंडळांतर्फे शहर व उपनगरांत ठिकठिकाणी मंडप घालण्यास सुरवात केली आहे.
नवरात्रोत्सव सुरू होण्यास अवघे पाचच दिवस राहिले असल्याने, ग्रामदैवत तांबडी जोगेश्वरी देवी, चतुःशृंगी देवस्थान, भवानी माता मंदिर, काळी जोगेश्वरी मंदिर, पद्मावती मंदिर, महालक्ष्मी मंदिर; तसेच शहर व उपनगरांतील विविध खासगी; तसेच सार्वजनिक मंदिरांत रंगरंगोटी, सजावटीची तयारी अंतिम टप्प्यात आली आहे.
महात्मा फुले मंडईत घटस्थापनेच्या पूजेकरिता आवश्यक साहित्याला मागणी वाढू लागली आहे. मातीचे घट, गरबा, खणानारळांची दुकाने थाटण्यास सुरवात झाली आहे. विक्रेत्या सुमन काळभोर म्हणाल्या, ‘लोणी काळभोर, हडपसर, मांजरी अशा ठिकाणांहून घटाला वावरी (काळी माती) येते. घटस्थापनेकरिता खपाल, सातू, हरभरा, बाजरी, करडई, मटकी, गहू आदी सात प्रकारचे धान्य, परडीबरोबरच इतरही पूजेचे साहित्य उपलब्ध होऊ लागले आहे. एकादशीनंतर बाजारपेठेत नागरिकांची गर्दी वाढायला सुरवात होईल. घटस्थापनेकरिता फळांसहित विविध प्रकारचे साहित्य बाजारात येऊ लागले आहे.‘‘ महाराष्ट्र मटका भांडारचे इब्राहिम युसूफ कुंभार म्हणाले, ‘गुजराती, मारवाडी, बंगाली आणि महाराष्ट्रीय नागरिकांमध्ये घट स्थापनेची पद्धती निराळी आहे. गुजराती, मारवाडी, पंजाबी, बंगाली नागरिक गरबा वापरतात. गरब्यामध्ये नऊ दिवस दिवा लावण्याची प्रथा असते. नऊ दिवस दिवा लावायचा म्हणून नागरिक पणत्याही खरेदी करतात.‘‘ गुलाब हॅंडीक्राफ्टचे रमेश परदेशी म्हणाले, ‘तेलगू, मद्रासी व बंगाली नागरिकांमध्ये विशेषतः मूर्ती पूजेला व पारंपरिक पद्धतीने गरब्याला महत्त्व असते. गरब्यासाठी गुजरातवरून तांबडी, पांढरी माती मागवतो.‘
सौजन्य- सकाळ
