16/07/2022
ഏറുന്ന മരണങ്ങൾ; താങ്ങാവുന്നതും 'താങ്ങ്' ആവുന്നതുമായ ഇൻഷൂറൻസും.
ഈ മാസം രണ്ടാഴ്ച മാത്രം പിന്നിടുന്ന 1 നും 14 നും ഇടയിൽ മൂന്ന് ഖത്തർ മലയാളി പ്രവാസി സഹോദരങ്ങൾ മരണപ്പെട്ടതായി റിപ്പോർട്ടുകളിൽ കാണാൻ സാധിച്ചു! കഴിഞ്ഞ മാസം നമ്മിൽ നിന്ന് ഇങ്ങിനെ വിട വാങ്ങിയത് ഏഴ് പേർ!
പലരുടെയും മരണം അപകടം, ഹാർട്ട് അറ്റാക്ക്, മസ്തിഷ്കാഘാതം തുടങ്ങിയ ആകസ്മിക മരണങ്ങളാണ്. ജീവിതം കരുപ്പിടിച്ച് തുടങ്ങുന്ന ഘട്ടത്തിലുള്ള യുവാക്കൾ ഇത്തരം സംഭവങ്ങളിൽ മരണപ്പെടുന്നതും സ്ഥിര കാഴ്ചയാണ്.
നമുക്കറിയാവുന്നതുപോലെ, മിക്ക കുടുംബങ്ങളും സാധാരണക്കാരും ഗൃഹനാഥന്റെ വിയോഗത്തോടെ നിത്യ ചിലവുകൾക്ക് പോലും മറ്റുള്ളവരെ ആശ്രയിക്കേണ്ടി വരുന്ന അവസ്ഥയും അതിനും പുറമെ മരണമടയുന്ന പ്രവാസി കടക്കാരൻ കൂടെയാണെങ്കിൽ ആ കുടുംബത്തിന്റെ അവസ്ഥ ഏറെ പരിതാപകരവുമായിരിക്കും.
ദേഹവിയോഗ ബുദ്ധിമുട്ടിനാൽ കഴിയുന്ന ഇത്തരം സന്ദർഭങ്ങളിൽ ഏറെ സഹായകമാവുന്ന ഐ.സി.ബി.എഫ് ഇൻഷൂറൻസ് ഇനിയും ധാരാളം പേരിലേക്ക് എത്തിക്കേണ്ടതുണ്ട്. രണ്ട് വർഷ കാലാവധിയുള്ള ഈ ലൈഫ് ഇൻഷൂറൻസിന് നാം ചിലവഴിക്കേണ്ടത് 125/- ഖത്തർ റിയാൽ ആണ്. എന്നാൽ ഇതിന്റെ കവറേജ് ആവട്ടെ ഒരു ലക്ഷം ഖത്തർ റിയാലാണ്. മരണത്തിന് പുറമെ, അപകടം മൂലം അംഗവൈകല്യം സംഭവിച്ചാൽ അതിന്റെ തോത് അനുസരിച്ച് പരമാവധി കവറേജ് തുകയായ ഒരു ലക്ഷം ഖത്തർ റിയാൽ ലഭിക്കും. വളരെ ലളിതമായ നടപടിക്രമങ്ങളിലൂടെ വിതരണം ചെയ്യുന്ന തുക നിരവധി പ്രവാസി കുടുബങ്ങൾക്കാണ് തുണയായത് എന്ന് നാം ഓർക്കണം. ഈ പദ്ധതിയിൽ ഖത്തറിലെ എല്ലാ ഇന്ത്യൻ പ്രവാസികൾക്കും അംഗമാവാം.
നേരിട്ട് ചേരാൻ സമയം ലഭിക്കാത്ത സൂപ്പർമാർക്കറ്റ്, കാഫിറ്റീരിയ, വീട്ടുജോലിക്കാർ തുടങ്ങിയവരെ ചേരുന്നതിനായി സഹായിക്കാൻ സുഹൃത്തുക്കൾക്കും സംഘടനകൾക്കും ഏറെ സാധിക്കും.
പ്രിയരെ, നമുക്ക് ആർക്കും അത്യാഹിതങ്ങൾ സംഭവിക്കാതിരിക്കട്ടെ.
സംഭവിച്ച പ്രവാസിയുടെ കുടുംബത്തിന് താങ്ങ് ആവാൻ നമ്മുടെ അംഗത്വം കൊണ്ട് സാധിക്കട്ടെ.
മുകളിൽ പ്രതിപാദിച്ച വിഷയം പലപ്പോഴും ചർച്ച ചെയ്തതാണെങ്കിലും ഏറെ പ്രസക്തവുമാണല്ലോ.
✍️അബ്ദുൽ റഊഫ് കൊണ്ടോട്ടി.
