03/06/2026
സിബിഎസ്ഇ പരീക്ഷാ മൂല്യനിർണയത്തിലെ ക്രമക്കേടുകൾക്ക് ജുഡീഷ്യൽ അന്വേഷണം വേണം – എഐഎസ്എഫ്
സിബിഎസ്ഇ പരീക്ഷാ മൂല്യനിർണയവുമായി ബന്ധപ്പെട്ട് ഉയർന്നുവരുന്ന പരാതികളുടെയും ആശങ്കകളുടെയും പശ്ചാത്തലത്തിൽ വിഷയത്തിൽ ജുഡീഷ്യൽ അന്വേഷണം നടത്തണമെന്ന് എഐഎസ്എഫ് സംസ്ഥാന എക്സിക്യൂട്ടിവ് ആവശ്യപ്പെട്ടു.
മൂല്യനിർണയത്തിൽ ഏകീകൃത മാനദണ്ഡങ്ങൾ എല്ലായിടത്തും കൃത്യമായി പാലിക്കപ്പെടുന്നില്ലെന്ന പരാതി വിദ്യാർത്ഥികൾ നിരന്തരം ഉന്നയിച്ചിട്ടും അധികൃതർ വിഷയത്തിൽ ക്രിയാത്മകമായ ഇടപെടലുകൾ നടത്തുന്നില്ലെന്ന് എഐഎസ്എഫ് കുറ്റപ്പെടുത്തി.
മൂല്യനിർണയത്തിലും പുനർ മൂല്യ നിർണയത്തിലും ഗുരുതര ക്രമക്കേടുകൾ കണ്ടെത്തിയതിനെ തുടർന്ന്
സിബിഎസ്ഇ ചെയർമാനെയും സെക്രട്ടറിയേയും സ്ഥലംമാറ്റിയത് വിഷയത്തിന്റെ ഗൗരവം വ്യക്തമാക്കുന്നതാണ്.
മൂല്യനിർണയത്തിലും പുനർമൂല്യനിർണയത്തിലും ഗുരുതരമായ അപാകതകൾ ഉണ്ടെന്ന പരാതികൾ വ്യാപകമാണ്.
ഉത്തരക്കടലാസുകളുടെ പുനർമൂല്യനിർണയത്തിന് പരിമിതമായ അവസരങ്ങൾ മാത്രമുള്ളതും ഒരേ നിലവാരത്തിലുള്ള ഉത്തരങ്ങൾക്ക് വ്യത്യസ്ത മാർക്ക് ലഭിക്കുന്ന സാഹചര്യം ഉണ്ടാകാമെന്ന ആശങ്കയും നിലനിൽക്കുന്നുണ്ട്. മൂല്യനിർണയത്തിലെ പിഴവുകൾ വിദ്യാർത്ഥികളുടെ ഉന്നതവിദ്യാഭ്യാസ പ്രവേശനത്തെയും ഭാവി അവസരങ്ങളെയും നേരിട്ട് ബാധിക്കുന്നതാണെന്നും അത് കൊണ്ട് തന്നെ വിഷയത്തിൽ ശക്തമായ നടപടികൾ സ്വീകരിക്കാൻ കേന്ദ്രം തയ്യാറാകണമെന്നും
എഐഎസ്എഫ് സംസ്ഥാന പ്രസിഡന്റ് ബിബിൻ എബ്രഹാം സെക്രട്ടറി
എ അധിൻ എന്നിവർ അഭിപ്രായപ്പെട്ടു.
