12/03/2026
उमरग्यात नगरपरिषद कर्मचाऱ्यांच्या माणुसकीचे दर्शन; खोल नालीत अडकलेल्या गोमातेला जीवदान
उमरगा:
शहरातील एकोंडी रोड परिसरातील एका खोल नालीत अडकलेल्या गायीला उमरगा नगरपरिषदेच्या स्वच्छता विभागाच्या कर्मचाऱ्यांनी शर्थीचे प्रयत्न करून सुखरूप बाहेर काढले. विशेष म्हणजे, कोणतेही आधुनिक यंत्र किंवा 'जेसीबी'चा वापर न करता, केवळ दोरीच्या मदतीने आणि सामूहिक मनुष्यबळाच्या जोरावर ही मोहीम यशस्वी करण्यात आली.
नेमकी घटना काय?
मिळालेल्या माहितीनुसार, एकोंडी रोड परिसरात एका खोल असलेल्या गटारात एक गाय चुकून पडली होती. गटाराची खोली जास्त आणि जागा अरुंद असल्याने गायीला स्वतःहून बाहेर पडणे अशक्य झाले होते आणि कुठल्या दिशेला जावे कळेनासे झाल्याने गाय कासावीस झाली होती. ही बाब परिसरातील नागरिकांनी तातडीने कार्यालयीन अधीक्षक श्री. भैरवनाथ काळे यांच्या निदर्शनास आणून दिली. घटनेचे गांभीर्य ओळखून मुख्याधिकारी श्री. रामकृष्ण जाधवर यांनी स्वच्छता विभागाला तातडीने बचाव कार्याचे आदेश दिले.
यंत्राविना राबवली बचाव मोहीम
मुख्याधिकाऱ्यांच्या सूचनेनुसार स्वच्छता निरीक्षक विकास दनाने आणि मुकादम उद्धव कांबळे यांच्या मार्गदर्शनाखाली कर्मचाऱ्यांनी तात्काळ घटनास्थळी धाव घेतली. यंत्राची किंवा जेसीबीची वाट न पाहता, कर्मचाऱ्यांनी दोरीच्या सहाय्याने गायीला बाहेर काढण्याचा निर्णय घेतला. गटारातील चिखल, दुर्गंधी आणि अरुंद जागा अशा आव्हानात्मक परिस्थितीतही कर्मचाऱ्यांनी जिद्दीने या मुक्या जीवाची सुरक्षित सुटका केली. या बचाव मोहिमेत स्वच्छता विभागाच्या पुढील कर्मचाऱ्यांनी मोलाची कामगिरी बजावली शंकर सोनकांबळे, विकास बनसोडे,लक्ष्मण सुरवसे, धनराज सुरवसे, शाहूराज कांबळे, अनिल खंडागळे, आनंद सुरवसे, रोहित दुनगे तुळशीदास कटके
शहरवासियांकडून कौतुकाचा वर्षाव
कोणत्याही यांत्रिक मदतीशिवाय, केवळ कौशल्य आणि शारीरिक श्रमाच्या जोरावर गायीचे प्राण वाचवल्याबद्दल या सर्व कर्मचाऱ्यांचे आणि उमरगा नगरपरिषदेचे सर्वत्र कौतुक होत आहे. वेळेवर मिळालेल्या मदतीमुळे एका गोमातेला जीवदान मिळाले, अशी कृतज्ञता नागरिकांनी व्यक्त केली आहे.
