18/05/2020
https://www.facebook.com/298515573825400/posts/1184519941891621/
കേരളീയരുടെ മനസ്സില് എന്നും നിലനില്ക്കുന്ന സ്നേഹസാന്നിധ്യമാണ് സഖാവ് ഇ കെ നായനാര്. കമ്യൂണിസ്റ്റ് നേതാവ്, തൊഴിലാളിവര്ഗ സംഘാടകന്, പ്രത്യയശാസ്ത്ര പ്രചാരകന്, പാര്ലമെന്റേറിയന് എന്നീ നിലകളിലെല്ലാം നിസ്തുലമായ സംഭാവനകള് അദ്ദേഹം നല്കി. പഠിക്കുന്ന കാലത്തുതന്നെ സാമൂഹ്യപ്രവര്ത്തനങ്ങളില് താല്പ്പര്യം പ്രകടിപ്പിച്ചു. ബാലസംഘം പ്രവര്ത്തനത്തിലൂടെ പൊതുരംഗത്തേക്ക് വന്ന സഖാവ് സ്റ്റുഡന്റ്സ് ഫെഡറേഷന്റെ പ്രവര്ത്തനങ്ങളില് വ്യാപൃതനായി. മലബാര് പ്രദേശത്തെ സാമ്രാജ്യവിരുദ്ധ സമരത്തിലും കര്ഷക-കര്ഷകതൊഴിലാളി സമരത്തിലും സജീവമായി. മൊറാഴ, കയ്യൂര് സമരനായകരില് പ്രധാനിയായിരുന്നു. 11 വര്ഷക്കാലം കേരളത്തിന്റെ മുഖ്യമന്ത്രിയായി സേവനമനുഷ്ഠിച്ച സഖാവിന്റെ ഭരണം കേരളത്തിലെ സാമൂഹ്യ ജീവിതത്തിലും സംസ്ഥാനത്തിന്റെ വികസനത്തിലും ഒട്ടനവധി മഹത്തായ സംഭാവനകള് നല്കി.
കര്ഷകത്തൊഴിലാളി പെന്ഷന് ഇന്ത്യയില് ആദ്യമായി നടപ്പാക്കിയത് നായനാര് നയിച്ച എല്ഡിഎഫ് സര്ക്കാരാണ്. സമ്പൂര്ണ സാക്ഷരതായജ്ഞം, കേരളത്തില് ആദ്യത്തെ ടെക്നോപാര്ക്ക് എന്നിവ അദ്ദേഹത്തിന്റെ ഭരണനേട്ടങ്ങളാണ്. ജനകീയാസൂത്രണം, മാവേലി സ്റ്റോര്, എല്ലാ പഞ്ചായത്തിലും ഹൈസ്കൂള്, വൈദ്യുതിയില് സ്വയംപര്യാപ്തത എന്നിവയെല്ലാം ആ ഭരണനൈപുണ്യത്തിന്റെ സുവര്ണരേഖകളാണ്. വ്യക്തിപരമായി ഏറെ അടുപ്പമുള്ള നേതാവായിരുന്നു. വലിയ പിന്തുണയും അദ്ദേഹം നല്കിയിട്ടുണ്ട്. സഖാവിന്റെ ഓര്മ്മകള് ഇടതുപക്ഷ പ്രസ്ഥാനങ്ങള്ക്ക് മുന്നോട്ടുള്ള പ്രവര്ത്തനങ്ങള്ക്ക് കരുത്തും ഉര്ജ്ജവുമാണ്.
