08/06/2026
🚩 जय महाराष्ट्र! 🚩
पनवेल महानगरपालिकेच्या ढिसाळ व निष्काळजी कारभाराचा पर्दाफाश!
प्रभाग क्रमांक १३, सत्यकुंज सोसायटी, प्लॉट क्र. ४१/४२, सेक्टर ३६, कामोठे येथील पनवेल महानगरपालिकेच्या अनागोंदी व नियोजनशून्य कारभारामुळे नागरिकांमध्ये तीव्र संतापाची लाट उसळली आहे.
महिनाभरापूर्वीच लाखो रुपयांचा खर्च करून नव्याने काँक्रीट फुटपाथ तयार करण्यात आला. मात्र, काम सुरू करण्यापूर्वी संबंधित अधिकाऱ्यांनी पावसाचे पाणी वाहून जाण्यासाठी आवश्यक जाळी (ड्रेनेज आउटलेट) आहे की नाही, याची साधी पडताळणीही केली नाही. हा निष्काळजीपणा पनवेल महानगरपालिकेच्या कार्यपद्धतीवर गंभीर प्रश्नचिन्ह निर्माण करणारा आहे.
इतकेच नव्हे, तर अवघ्या काही दिवसांपूर्वी तयार झालेला फुटपाथ पुन्हा खोदण्यात आला. जिथे पाण्याचा निचरा होण्यासाठी कोणतीही योग्य व्यवस्था किंवा आउटलेटच नाही, तिथे हे काम कोणत्या नियोजनातून करण्यात आले? एका महिन्यात एकाच ठिकाणी दोनदा काम करून जनतेच्या कराच्या पैशांची उधळपट्टी केली जात आहे. या आर्थिक नुकसानीला जबाबदार कोण, याचा जाब नागरिकांनी विचारण्याची वेळ आली आहे.
काल शिवसेना (उद्धव बाळासाहेब ठाकरे) पक्षाच्या पदाधिकाऱ्यांनी घटनास्थळी धडक देऊन प्रशासनाला जाब विचारल्यानंतरच आज रस्त्यावर पडलेला मातीचा ढिगारा हटविण्यात आला. यावरून पनवेल महानगरपालिकेच्या निष्क्रिय कारभाराचे वास्तव समोर आले आहे.
सर्वात गंभीर बाब म्हणजे, कामाच्या ठिकाणी कोणत्याही प्रकारची सुरक्षा व्यवस्था करण्यात आलेली नव्हती. लहान मुले, ज्येष्ठ नागरिक आणि पादचारी यांच्या जीविताला धोका निर्माण झाला होता. त्यामुळे सामाजिक जबाबदारी म्हणून आम्ही स्वखर्चाने "डेंजर पट्टी" लावून परिसर सुरक्षित करण्याचा प्रयत्न केला, ही अत्यंत खेदजनक बाब आहे.
यावेळी शहर संघटक श्री संतोष गोळे, विभाग प्रमुख श्री बबन गोगावले, युवासेना महानगर प्रमुख श्री महेश भिसे, उपमहानगर प्रमुख श्री सागर पाटील, विभाग प्रमुख प्रभाग ११ श्री प्रशांत आनंदे, उपविभाग प्रमुख श्री सचिन दाईंगडे, शाखाप्रमुख श्री सुरेश मोरे, तसेच श्री दीपक जाधव, श्री अक्षय नवसकर, श्री मनीष नाईक आणि इतर पदाधिकारी उपस्थित होते.
पनवेल महानगरपालिकेच्या निष्काळजी व नियोजनशून्य कारभारामुळे जनतेच्या पैशांची उधळपट्टी होत असून नागरिकांच्या जीवितालाही धोका निर्माण होत आहे. या प्रकरणाची सखोल चौकशी करून संबंधित अधिकारी व ठेकेदारांवर कठोर कारवाई करण्यात यावी, ही जनतेची रास्त मागणी आहे.
आपलाच,
श्री सागर बबन पाटील
युवासेना उपमहानगर प्रमुख 🚩
