14/11/2025
10 जानेवारी 2024 च्या शासन निर्णयानुसार राज्यात 13,011 नवीन अंगणवाडी मदतनीस पदांची निर्मिती झाली होती. ही सर्व पदे नवीन जाहिरात देऊनच भरावीत स्पष्ट सूचना शासनाने प्रकल्प अधिकाऱ्यांना दिल्या होत्या तसेच, 02 फेब्रुवारी 2023 च्या शासन निर्णयातील मुद्दा क्रमांक 2 नुसार नवीन निर्माण पदे फक्त जाहिरातीद्वारेच भरण्याची अट स्पष्टपणे नमूद आहे.
मात्र या सर्व सूचनांकडे दुर्लक्ष करून काही प्रकल्प अधिकाऱ्यांनी 2023 मधील मदतनीस भरतीतील प्रतीक्षा यादीतील उमेदवारांना थेट नवीन पदांवर नियुक्ती देऊन नियमबाह्य निर्णय घेतला आहे.
विशेष म्हणजे, प्रतीक्षा यादी च्या अटी —राजीनामा,अन्य कारणास्तव पद रिक्त,नवीन अंगणवाडीची मंजुरी
— या तीनही गोष्टी प्रत्यक्षात घडल्या नसतानाही प्रतीक्षा यादीच्या नियमाचा गैरवापर करण्यात आल्याचा आरोप आहे.
या चुकीच्या नियुक्त्यांविरोधात 8 ऑगस्ट 2024 रोजी मुख्य कार्यकारी अधिकाऱ्यांकडे लेखी तक्रार दाखल करण्यात आली. त्यानंतर 28 ऑगस्ट 2024 रोजी CEO यांनी सुनावणी घेतली व विषयावर आयुक्तांचे मार्गदर्शन मागितले.
यानुसार 23 जानेवारी 2025 रोजी छत्रपती संभाजीनगर जिल्हा परिषदेला प्राप्त झालेल्या मार्गदर्शनातही नवीन निर्माण पदे जाहिरात देऊनच भरावीत, अशी स्पष्ट सूचना पुन्हा देण्यात आली आहे.
संघटनेचे म्हणणे आहे की —“आयुक्तांचे स्पष्ट मार्गदर्शन मिळूनही जिल्हा परिषद प्रशासन चुकीच्या नियुक्त्या रद्द करण्याचा निर्णय घेण्यास विलंब करीत आहे, आणि यामुळे अनेक पात्र उमेदवारांवर सरळ अन्याय होत आहे.”पात्र उमेदवारांनी या सर्व नियमबाह्य नियुक्त्या तातडीने रद्द करून न्याय्य, पारदर्शक व कायदेशीर भरती प्रक्रिया पुन्हा सुरू करण्याची मागणी प्रशासनाकडे केली आहे.
सुधीर सोनवणे जिल्हाध्यक्ष अंगणवाडी कर्मचारी संघटना सिटु
