What are the opening hours?

Monday 10am - 5pm Tuesday 10am - 5pm Wednesday 10am - 5pm Thursday 10am - 5pm Friday 10am - 5pm Saturday 10am - 5pm

District Information Office, Malappuram, B3 Block, civil station, Malappuram (2026)

02/06/2026

ക്യാമ്പ് ഫോളോവര്‍ നിയമനം

അരീക്കോട് സ്‌പെഷ്യല്‍ ഓപറേഷന്‍ ഗ്രൂപ്പ് ക്യാമ്പിലെ പ്രതീക്ഷിത ഒഴിവിലേക്ക് ദിവസ വേതനാടിസ്ഥാനത്തില്‍ ക്യാമ്പ് ഫോളോവര്‍മാരെ നിയമിക്കുന്നതിനുള്ള കൂടിക്കാഴ്ചയും പ്രായോഗിക പരീക്ഷയും ജൂണ്‍ നാലിന് രാവിലെ 10ന് ക്യാമ്പിലെ ഡെപ്യൂട്ടി കമാന്‍ഡന്റ് (അഡ്മിന്‍) ഓഫീസില്‍ നടക്കും. 59 ദിവസത്തേക്കാണ് നിയമനം. താത്പര്യമുള്ളവര്‍ പേര്, മേല്‍വിലാസം, വയസ് എന്നിവ തെളിയിക്കുന്ന സര്‍ട്ടിഫിക്കറ്റും ആധാര്‍ കാര്‍ഡും സഹിതം ഹാജരാകണം. ഫോണ്‍- 0483-2960251.

02/06/2026

മത്സ്യത്തൊഴിലാളി ഭവന പുനരുദ്ധാരണ പദ്ധതി: അപേക്ഷ ക്ഷണിച്ചു

പി.എം.എം.എസ്.വൈ സംയോജിത ആധുനിക മത്സ്യഗ്രാമം പദ്ധതി പ്രകാരം മത്സ്യത്തൊഴിലാളി ഭവന പുനരുദ്ധാരണ പദ്ധതിയിലേക്ക് സ്വന്തം ഉടമസ്ഥതയില്‍ ഭവനമുളള മത്സ്യത്തൊഴിലാളികളില്‍ നിന്നും അപേക്ഷ ക്ഷണിച്ചു. പൊന്നാനി മത്സ്യ ഭവനിലെ തെക്കേകടവ്, മരക്കടവ്, മുക്കാടി, മീന്‍തെരുവ്, മത്സ്യഗ്രാമങ്ങളില്‍ ഉള്‍പെട്ടവര്‍ ജൂണ്‍ 12നകം അപേക്ഷിക്കണം. രണ്ടു ലക്ഷം രൂപയാണ് സഹായധനം ലഭിക്കുന്നത്. അപേക്ഷാ ഫോം മത്സ്യഭവനില്‍ ലഭ്യമാണ്. ഫോണ്‍- 0494- 2666428.

02/06/2026

📌സിവില്‍ സര്‍വീസ് പരീക്ഷാ പരിശീലനത്തിന് അപേക്ഷ ക്ഷണിച്ചു

കേരള സിവില്‍ സര്‍വീസ് അക്കാദമിയുടെ ഉപകേന്ദ്രമായി പൊന്നാനിയില്‍ പ്രവര്‍ത്തിക്കുന്ന ഇന്‍സ്റ്റിറ്റ്യൂട്ട് ഓഫ് കരിയര്‍ സ്റ്റഡീസ് ആന്‍ഡ് റിസര്‍ച്ചില്‍ (ഐ.സി.എസ്.ആര്‍) 2026-2027 റഗുലര്‍ ബാച്ചിലേക്കുള്ള സിവില്‍ സര്‍വീസ് പരിശീലനത്തിന് അപേക്ഷ ക്ഷണിച്ചു https://kscsa.org എന്ന വെബ്‌സൈറ്റ് വഴി ഓണ്‍ലൈനായി അപേക്ഷിക്കാം. ക്ലാസുകള്‍ ജൂണ്‍ 15ന് ആരംഭിക്കും. പ്രവേശനത്തിനുള്ള യോഗ്യത, ഫീസ് നിരക്ക്, ഫീസ് ഇളവുകള്‍ എന്നിവ സംബന്ധിച്ച കൂടുതല്‍ വിവരങ്ങള്‍ https://kscsa.org എന്ന വെബ്‌സൈറ്റില്‍ ലഭ്യമാണ്. മുസ്ലീം ന്യൂനപക്ഷ സംവരണത്തിന് അര്‍ഹത നിശ്ചയിക്കുന്നതിനുള്ള പ്രവേശനപരീക്ഷ ജൂണ്‍ 13ന് രാവിലെ 10ന് ഐ.സി.എസ്.ആറില്‍ നടക്കും. വിലാസം- ഇന്‍സ്റ്റിറ്റ്യൂട്ട് ഓഫ് കരിയര്‍ സ്റ്റഡീസ് ആന്റ് റിസര്‍ച്ച്, കരിമ്പന, ഈശ്വരമംഗലം പി.ഒ, പൊന്നാനി, പിന്‍ - 679573, ഫോണ്‍-0494 2665489, 8281098868, 9846715386, 9645988778.

📌 സൗജന്യ പി.എസ്.സി പരിശീലനത്തിന് ജൂണ്‍ 24 വരെ അപേക്ഷിക്കാം

ന്യൂനപക്ഷ ക്ഷേമ വകുപ്പിന് കീഴില്‍ തിരൂര്‍ ആലത്തിയൂരില്‍ പ്രവര്‍ത്തിക്കുന്ന ന്യൂനപക്ഷ യുവജനതക്കുള്ള പി.എസ്.സി പരിശീലന കേന്ദ്രത്തില്‍ ജൂലൈ ഒന്നിന് ആരംഭിക്കുന്ന സൗജന്യ പരിശീലന ബാച്ചുകളിലേക്ക് ജൂണ്‍ മൂന്നു മുതല്‍ 24 വരെ അപേക്ഷിക്കാം. ഉദ്യോഗാര്‍ഥികളുടെ സൗകര്യമനുസരിച്ച് റെഗുലര്‍, ഹോളിഡേ ബാച്ചുകള്‍ ലഭ്യമാണ്. ന്യൂനപക്ഷ വിഭാഗത്തില്‍ ഉള്‍പ്പെടുന്ന ഉദ്യോഗാര്‍ത്ഥികള്‍ മാത്രമാണ് അപേക്ഷിക്കേണ്ടത്. യോഗ്യരായവര്‍ എസ്.എസ്.എല്‍.സി സര്‍ട്ടിഫിക്കറ്റ്, മറ്റു വിദ്യാഭ്യാസ യോഗ്യത തെളിയിക്കുന്ന സര്‍ട്ടിഫിക്കറ്റുകള്‍, ആധാര്‍ കാര്‍ഡ് എന്നിവയുടെ പകര്‍പ്പും രണ്ടു കോപ്പി ഫോട്ടോയും സഹിതം പ്രിന്‍സിപ്പല്‍, കോച്ചിങ്് സെന്റര്‍ ഫോര്‍ മൈനോറിറ്റി യൂത്ത്, കെ.ബി.ആര്‍. കോംപ്ലക്‌സ്, ആലത്തിയൂര്‍, 676102 എന്ന വിലാസത്തില്‍ അപേക്ഷിക്കണം. അപേക്ഷാ ഫോം ഓഫീസില്‍ നിന്നും രാവിലെ 10 മുതല്‍ ഉച്ചയ്ക്ക് മൂന്നു വരെ ലഭ്യമാണ്. കൂടുതല്‍ വിവരങ്ങള്‍ www.minoritywelfare.kerala.gov.in എന്ന വെബ്‌സൈറ്റിലും, 0494 2565056, 9895733289, 9037003619, 9645015017, 9961509439 എന്നീ നമ്പറുകകളിലും ലഭ്യമാണ്.

📌 സൗജന്യ കംപ്യൂട്ടര്‍ പരിശീലനം

ദേശീയ തൊഴില്‍ സേവനകേന്ദ്രത്തിന്റെ ആഭിമുഖ്യത്തില്‍ പട്ടികജാതി/പട്ടികവര്‍ഗ്ഗ വിഭാഗത്തില്‍പ്പെട്ട ഉദ്യോഗാര്‍ത്ഥികള്‍ക്കായി സൗജന്യ കംപ്യൂട്ടര്‍ പരിശീലന കോഴ്‌സിന് അപേക്ഷ ക്ഷണിച്ചു. കേന്ദ്രസര്‍ക്കാരിന്റെ കീഴിലുള്ള എന്‍.ഐ.ഇ.എല്‍.ഐ.ടി. നടത്തുന്ന ഒരു വര്‍ഷത്തെ സൈബര്‍ സെക്വേഡ് വെബ് ഡവലപ്‌മെന്റ് അസോസിയേറ്റ് കോഴ്‌സിലേക്കാണ് പ്രവേശനം.
കെല്‍ട്രോണിന്റെ കോഴിക്കോട്ടുള്ള നോളഡ്ജ് സെന്ററിലാണ് കോഴ്‌സ് നടത്തുന്നത്. 30 വയസ്സില്‍ താഴെയുള്ള മൂന്ന് ലക്ഷത്തില്‍ താഴെ വാര്‍ഷിക വരുമാനമുള്ള പ്ലസ്ടു പാസ്സായ എസ്.സി/എസ്.ടി വിഭാഗത്തില്‍പ്പെട്ടവര്‍ക്ക് അപേക്ഷിക്കാം. താത്പര്യമുള്ളവര്‍ യോഗ്യത തെളിയിക്കുന്ന സര്‍ട്ടിഫിക്കറ്റുകളുമായി കോഴിക്കോട് റെയില്‍വേ സ്റ്റേഷന്‍ ലിങ്ക്‌റോഡിലുള്ള കെല്‍ട്രോണ്‍ നോളഡ്ജ് സെന്ററില്‍ നേരിട്ട് ഹാജരാകണം. ഫോണ്‍- 0495-2301772, 8590605275.

02/06/2026

മഴക്കാല മുന്നൊരുക്കം: കരുതാം കന്നുകാലികളെയും; ജാഗ്രത നിര്‍ദേശവുമായി മൃഗസംരക്ഷണ വകുപ്പ്

കാലവര്‍ഷം ശക്തമാകുന്നതോടെ കന്നുകാലികളില്‍ വിവിധ തരത്തിലുള്ള രോഗങ്ങള്‍ പടര്‍ന്നുപിടിക്കാന്‍ സാധ്യതയുള്ളതിനാല്‍ ജില്ലയിലെ ക്ഷീരകര്‍ഷകര്‍ അതീവ ജാഗ്രത പാലിക്കണമെന്ന് മലപ്പുറം ജില്ലാ മൃഗസംരക്ഷണ ഓഫീസര്‍ അറിയിച്ചു. ഈര്‍പ്പമുള്ള കാലാവസ്ഥയായതിനാല്‍ മുടന്തന്‍പനി, കുളമ്പുരോഗം, പൂപ്പല്‍വിഷബാധ, അകിടുവീക്കം, കരളടപ്പന്‍ തുടങ്ങിയ രോഗങ്ങള്‍ വരാന്‍ സാധ്യത കൂടുതലാണ്. പൂര്‍ണ്ണമായ ശുചിത്വം പാലിച്ചുകൊണ്ടുള്ള പരിചരണമാണ് മൃഗങ്ങള്‍ക്ക് അവശ്യം.

ചാണകക്കുഴി, മൂത്രച്ചാലുകള്‍ എന്നിവയില്‍ മഴവെള്ളം കെട്ടിക്കിടക്കാന്‍ അനുവദിക്കരുത്. ഏതു കാലാവസ്ഥയിലും ചാണകവും മൂത്രവും തൊഴുത്തിന് സമീപം കെട്ടിക്കിടക്കാതെ തത്സമയം മാറ്റണം. തൊഴുത്ത് കഴുകി വൃത്തിയാക്കാന്‍ ബ്ലീച്ചിംഗ് പൗഡര്‍, അലക്കുകാരം, കുമ്മായം എന്നിവ ഉപയോഗിക്കാവുന്നതാണ്. തൊഴുത്തിന്റെ തറയില്‍ വെള്ളമോ പാലോ കെട്ടിക്കിടക്കാതെ എപ്പോഴും ഉണക്കി സൂക്ഷിക്കണം. കൂടാതെ തൊഴുത്തിന്റെ പരിസരങ്ങളില്‍ കൃത്യമായി കുമ്മായം വിതറുന്നത് രോഗാണുക്കളെ നശിപ്പിക്കാന്‍ സഹായിക്കും.

ജൂണ്‍, ജൂലൈ മാസങ്ങളില്‍ തൊഴുത്തിലും പരിസരത്തും ഈച്ച, കൊതുക്, പട്ടുണ്ണി തുടങ്ങിയ പരാദങ്ങളുടെ ശല്യം വളരെ കൂടുതലായിരിക്കും. ഇവയെ നിയന്ത്രിക്കുന്നതിനായി തൊഴുത്തില്‍ കര്‍പ്പൂരം, കുന്തിരിക്കം, ഉണങ്ങിയ തുമ്പ എന്നിവ പുകയ്ക്കുന്നത് ഫലപ്രദമായ മാര്‍ഗ്ഗമാണ്. കന്നുകാലികളിലെ ബാഹ്യ-ആന്തരിക പരാദങ്ങള്‍ക്കെതിരെ കൃത്യസമയത്ത് തന്നെ ആവശ്യമായ മരുന്നുകള്‍ നല്‍കണം. കാലിത്തീറ്റ, വൈക്കോല്‍ തുടങ്ങിയവ ഈര്‍പ്പം തട്ടാതെ ഉണങ്ങിയ സ്ഥലങ്ങളില്‍ വേണം സൂക്ഷിക്കാന്‍. കുടിവെള്ളത്തൊട്ടികള്‍ ആഴ്ചയിലൊരിക്കല്‍ നന്നായി കഴുകി വൃത്തിയാക്കി അതില്‍ പൂപ്പല്‍ പിടിച്ചിട്ടില്ലെന്ന് ഉറപ്പുവരുത്തേണ്ടതുണ്ട്.

തൊഴുത്തിന് മുകളിലൂടെയോ അതിനോട് ചേര്‍ന്നോ ഇലക്ട്രിക് ലൈനുകള്‍ കടന്നുപോകുന്നുണ്ടെങ്കില്‍ കര്‍ഷകര്‍ അതീവ ജാഗ്രത പാലിക്കണം. വൈദ്യുതി ആഘാതം, തീപ്പിടുത്തം, മിന്നല്‍ എന്നിവ നേരിടാനുള്ള സാധ്യതയുള്ളതിനാല്‍ ഇവ തമ്മില്‍ കൃത്യമായ സുരക്ഷിത അകലമുണ്ടെന്ന് ഉറപ്പുവരുത്തണം. തൊഴുത്തിലെ വയറിംഗ് കൃത്യമായി എര്‍ത്ത് ചെയ്തിട്ടുണ്ടോ എന്ന് പരിശോധിക്കേണ്ടതാണ്. ഇടിമിന്നലുള്ള സന്ദര്‍ഭങ്ങളില്‍ കന്നുകാലികളെ യാതൊരു കാരണവശാലും തുറസ്സായ സ്ഥലങ്ങളില്‍ മേയാന്‍ വിടരുത്.

വെള്ളപ്പൊക്ക സാധ്യത കൂടുതലുള്ള പ്രദേശങ്ങളിലെ കര്‍ഷകര്‍, അടിയന്തര സാഹചര്യമുണ്ടായാല്‍ മൃഗങ്ങളെ സുരക്ഷിതമായി മാറ്റിപ്പാര്‍പ്പിക്കാന്‍ പറ്റിയ ഉയര്‍ന്ന സ്ഥലങ്ങള്‍ മുന്‍കൂട്ടി കണ്ടു വെക്കേണ്ടതാണ്.

02/06/2026

കാലവര്‍ഷ മുന്നൊരുക്കം; മന്ത്രി പി.കെ ബഷീര്‍ ജില്ലയിലെ മഴക്കാല പൂര്‍വ തയാറെടുപ്പുകള്‍ വിലയിരുത്തി

ജില്ലയില്‍ കാലവര്‍ഷം ശക്തമാകുന്നതിന് മുന്നോടിയായി ദുരന്തനിവാരണ-മുന്നൊരുക്ക പ്രവര്‍ത്തനങ്ങള്‍ വിലയിരുത്തുന്നതിനായി മലപ്പുറം ജില്ലയുടെ ചുമതലയുള്ള പൊതുമരാമത്ത് വകുപ്പ് മന്ത്രി പി.കെ ബഷീറിന്റെ അധ്യക്ഷതയില്‍ ജില്ലാതല ഉദ്യോഗസ്ഥരുടെ അടിയന്തര അവലോകന യോഗം ചേര്‍ന്നു. ജില്ലയിലെ വിവിധ വകുപ്പുകളുടെ മഴക്കാല മുന്നൊരുക്ക പ്രവര്‍ത്തനങ്ങള്‍ മന്ത്രി വിലയിരുത്തി. കാലവര്‍ഷവുമായി ബന്ധപ്പെട്ട് ഉണ്ടാകാനിടയുള്ള അടിയന്തര സാഹചര്യങ്ങള്‍ നേരിടാന്‍ എല്ലാ വകുപ്പുകളും പൂര്‍ണ്ണ സജ്ജരായിരിക്കണമെന്നും ജാഗ്രത പുലര്‍ത്തണമെന്നും മന്ത്രി നിര്‍ദേശിച്ചു. മുന്‍വര്‍ഷങ്ങളിലെ അനുഭവങ്ങളുടെ പശ്ചാത്തലത്തില്‍ അപകട സാധ്യതയുള്ള മേഖലകളില്‍ പ്രത്യേക ശ്രദ്ധ പതിപ്പിക്കാന്‍ യോഗത്തില്‍ തീരുമാനമായി.

റോഡുകളുടെ സുരക്ഷ ഉറപ്പാക്കുന്നതിനായി റോഡരികിലെ കാടുകളും പടര്‍ന്നുപന്തലിച്ചു നില്‍ക്കുന്ന മരച്ചില്ലകളും അടിയന്തരമായി വെട്ടിമാറ്റാന്‍ മന്ത്രി നിര്‍ദേശം നല്‍കി. ഓടകള്‍ വൃത്തിയാക്കി സുഗമമായ ഒഴുക്ക് ഉറപ്പാക്കേണ്ടതുണ്ട്. പൊതുസ്ഥലങ്ങളിലും വിദ്യാലയ പരിസരങ്ങളിലും അപകട ഭീഷണിയുയര്‍ത്തുന്ന മരങ്ങളും ചില്ലകളും മുറിച്ചുമാറ്റാനും മന്ത്രി നിര്‍ദേശിച്ചു. പകര്‍ച്ചവ്യാധി പ്രതിരോധത്തിന്റെ ഭാഗമായി ജില്ലയിലുടനീളം തദ്ദേശ സ്ഥാപനങ്ങളുടെയും ആരോഗ്യവകുപ്പിന്റെയും നേതൃത്വത്തില്‍ വിപുലമായ ശുചീകരണ പ്രവര്‍ത്തനങ്ങള്‍ ഊര്‍ജ്ജിതമാക്കാനും യോഗത്തില്‍ തീരുമാനിച്ചു. പ്രവര്‍ത്തനങ്ങള്‍ കൃത്യമായി നടക്കുന്നുണ്ടെന്ന് ഉറപ്പാക്കാന്‍ വകുപ്പ് മേധാവികള്‍ സംവിധാനം ഏര്‍പ്പെടുത്തണമെന്ന് മന്ത്രി നിര്‍ദ്ദേശിച്ചു. കണ്‍ട്രോള്‍ റൂമുകള്‍ സജ്ജമാക്കല്‍, താലൂക്ക് തലങ്ങളിലെ ഏകോപനം എന്നിവയും യോഗം വിലയിരുത്തി.

02/06/2026

📌 സി -ഡിറ്റില്‍ വിവിധ മാധ്യമ കോഴ്‌സുകള്‍ക്ക് അപേക്ഷ ക്ഷണിച്ചു

സംസ്ഥാന സര്‍ക്കാര്‍ സ്ഥാപനമായ സി -ഡിറ്റ് മാധ്യമ രംഗത്തെ വിവിധ സര്‍ട്ടിഫിക്കറ്റ്, ഡിപ്ലോമ കോഴ്‌സുകളിലേക്ക് അപേക്ഷ ക്ഷണിച്ചു. ഡിപ്ലോമ കോഴ്‌സുകളായ ഡിജിറ്റല്‍ മീഡിയ പ്രൊഡക്ഷന്‍, ഡിജിറ്റല്‍ വിഡിയോഗ്രഫി, വീഡിയോ എഡിറ്റിങ് എന്നിവയിലേക്കും സര്‍ട്ടിഫിക്കറ്റ് കോഴ്‌സ് ഇന്‍ വീഡിയോഗ്രഫി, ഡിജിറ്റല്‍ ഫോട്ടോഗ്രാഫി എന്നിവയിലേക്കുമാണ് അപേക്ഷ ക്ഷണിച്ചിട്ടുള്ളത്. കെ-ഡിസ്‌കിന് കീഴില്‍ വരുന്ന കേരള നോളഡ്ജ് ഇക്കോണമി മിഷന്‍ പ്രൊജക്ടില്‍ ഉള്‍പ്പെടുത്തി യോഗ്യതയുള്ള വിഭാഗത്തിലെ വിദ്യാര്‍ത്ഥികള്‍ക്ക് സ്‌കോളര്‍ഷിപ് ലഭിക്കും. താത്പര്യമുള്ളവര്‍ ജൂണ്‍ ആറിനകം അപേക്ഷിക്കണം. ഫോണ്‍:- 8547720167,9961491540 വെബ്‌സൈറ്റ്-- https://mediastudies. cdit.org/

📌ഏറനാട് താലൂക്ക് വികസന സമിതി യോഗം ജൂണ്‍ ആറിന്

ജൂണ്‍ മാസത്തിലെ ഏറനാട് താലൂക്ക് വികസന സമിതി യോഗം ജൂണ്‍ ആറിന് രാവിലെ 10.30ന് ഏറനാട് താലൂക്ക് ഓഫീസില്‍ നടക്കും.

📌സൗജന്യ പി.എസ്.സി പരിശീലനം

ന്യൂനപക്ഷ ക്ഷേമ വകുപ്പിന്റെ കീഴില്‍ പൊന്നാനിയില്‍ പ്രവര്‍ത്തിക്കുന്ന ന്യൂനപക്ഷ യുവജന പരിശീലന കേന്ദ്രത്തില്‍ ആറു മാസം ദൈര്‍ഘ്യമുള്ള സൗജന്യ പി.എസ്.സി പരിശീലനത്തിന് അപേക്ഷ ക്ഷണിച്ചു. റഗുലര്‍, ഹോളിഡേ വിഭാഗങ്ങളായാണ് പരിശീലനം. 18നും 43 നും ഇടയില്‍ പ്രായമുള്ളവര്‍ക്ക് അപേക്ഷിക്കാം. അവസാന തീയതി ജൂണ്‍ 22. ഫോണ്‍- 9072045179, 9947112443, 9633757286, 9946175811.

📌 സൗജന്യ നൈപുണ്യ പരിശീലനം: അപേക്ഷ ക്ഷണിച്ചു

പാണ്ടിക്കാട് അസാപ് കമ്മ്യൂണിറ്റി സ്‌കില്‍ പാര്‍ക്കില്‍ സൗജന്യ അപ്ലിക്കേഷന്‍ ഡെവലപ്പര്‍ കോഴ്‌സിലേക്ക് അപേക്ഷ ക്ഷണിച്ചു. യോഗ്യത: ഡിഗ്രി/ഡിപ്ലോമ രണ്ടു വര്‍ഷം പൂര്‍ത്തിയാക്കിയവര്‍ (എഞ്ചിനീയറിങ്/സയന്‍സ് ബന്ധപ്പെട്ട കോഴ്‌സുകള്‍) അല്ലെങ്കില്‍ 10-ാം ക്ലാസ് കഴിഞ്ഞ് മൂന്ന് വര്‍ഷ ഡിപ്ലോമയും വെബ്/മൊബൈല്‍ മേഖലയില്‍ ഒന്നര വര്‍ഷത്തെ ബന്ധപ്പെട്ട പ്രവൃത്തി പരിചയം (ജോലി/ഇന്റേണ്‍ഷിപ്പ്/അപ്രന്റീസ്ഷിപ്പ് ഉള്‍പ്പെടെ). അപേക്ഷിക്കേണ്ട അവസാന തീയതി - ജൂണ്‍ എട്ട്.

📌 റീടെന്‍ഡര്‍ ക്ഷണിച്ചു

പെരിന്തല്‍മണ്ണ ജില്ലാ ആശുപത്രിയോടനുബന്ധിച്ചുള്ള എച്ച്.എം.സി.കാന്റീനില്‍ 2026 ജൂലൈ ഒന്നു മുതല്‍ 2027 ജൂണ്‍ 30 വരെയുള്ള കാലയളവിലേക്ക് കാറ്ററിങ് സര്‍വീസ് നടത്തുന്നതിന് വ്യക്തികള്‍ / സ്ഥാപനങ്ങള്‍ എന്നിവയില്‍ നിന്ന് ടെന്‍ഡര്‍ ക്ഷണിച്ചു. സൂപ്രണ്ട്, ജില്ലാ ആശുപത്രി, പെരിന്തല്‍മണ്ണ എന്ന വിലാസത്തില്‍ ടെന്‍ഡര്‍ ജൂണ്‍ 15ന് രാവിലെ 11നകം ലഭിക്കണം. കൂടുതല്‍ വിവരങ്ങള്‍ പ്രവൃത്തി സമയങ്ങളില്‍ ആശുപത്രി ഓഫീസില്‍ ലഭിക്കും. ഫോണ്‍- 9495999304.

01/06/2026

*വിദ്യാഭ്യാസ രംഗത്തെ നിലവാരം ഉയര്‍ത്തുക എന്നതാണ് സര്‍ക്കാരിന്റെ ലക്ഷ്യം- മന്ത്രി എ.പി.അനില്‍ കുമാര്‍*

*ജില്ലാതല സ്‌കൂള്‍ പ്രവേശനോത്സവം തിരുവാലി ജി.എച്ച്.എസ്.എസില്‍ മന്ത്രി എ.പി.അനില്‍കുമാര്‍ ഉദ്ഘാടനം ചെയ്തു

പരീക്ഷയില്‍ ലഭിക്കുന്ന എപ്ലസുകളുടെ എണ്ണത്തെക്കാളുപരി നിലവാരമുള്ള വിദ്യാഭ്യാസം വിദ്യാര്‍ഥികള്‍ക്ക് ലഭിക്കണമെന്നും ഇതിനായി വിദ്യാഭ്യാസ രംഗത്ത് സര്‍ക്കാര്‍ മാറ്റങ്ങള്‍ കൊണ്ടുവരുമെന്നും റവന്യൂ മന്ത്രി എ.പി.അനില്‍കുമാര്‍. മലപ്പുറം ജില്ലാതല സ്‌കൂള്‍ പ്രവേശനോത്സവത്തിന്റെ ഉദ്ഘാടനം തിരുവാലി ഗവ.ഹയര്‍സെക്കന്‍ഡറി സ്‌കൂളില്‍ നിര്‍വഹിച്ച് സംസാരിക്കുകയായിരുന്നു മന്ത്രി.

'പത്താം ക്ലാസ് വിജയിച്ച വിദ്യാര്‍ഥി അറിവിലും എഴുത്തിലും വായനയിലും മികവുള്ളവരാകണം. ക്ലാസിലെ മുഴുവന്‍ വിദ്യാര്‍ഥികളും മിടുക്കരാകുന്ന അവസ്ഥയുണ്ടാകണം. ലോകം മുഴുവന്‍ അറിവും തൊഴിലും തേടാന്‍ വിദ്യാര്‍ഥികളെ പ്രാപ്തരാക്കുന്നത് വിദ്യാലയങ്ങളാണ്. ആ രീതിയില്‍ വിദ്യാഭ്യാസ രംഗത്ത് മികച്ച മാറ്റങ്ങള്‍ കൊണ്ടുവന്ന് പുതുയുഗ വിദ്യാലയങ്ങളാക്കാന്‍ സര്‍ക്കാര്‍ നേതൃത്വം നല്‍കും. കുടുംബത്തിന്റെയും നാടിന്റെയും വളര്‍ച്ചയെന്നത് അറിവു നേടിയ വിദ്യാര്‍ഥികളാണ്'- മന്ത്രി പറഞ്ഞു. ഓണവും പെരുന്നാളും പോലെ സ്‌കൂള്‍ പ്രവേശനോത്സവവും നാടിന്റെ ആഘോഷമാണെന്നും മന്ത്രി ഉദ്ഘാടന പ്രസംഗത്തില്‍ പറഞ്ഞു.

വിദ്യാരംഗം കലാസാഹിത്യ വേദി 2025ല്‍ നടത്തിയ സര്‍ഗോത്സവത്തില്‍ 17 ഉപജില്ലകളില്‍ നിന്ന് പങ്കെടുത്ത സാഹിത്യപ്രതിഭകളായ വിദ്യാര്‍ഥികള്‍ രചിച്ച കവിതകളുടെ സമാഹാരം 'സ്മൃതി'യുടെ പ്രകാശനവും തിരുവാലി ജി.എച്ച്.എസ്.എസിന്റെ വീഡിയോ പ്രദര്‍ശന ഉദ്ഘാടനവും മന്ത്രി നിര്‍വഹിച്ചു.

മലപ്പുറം ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ പി.കെ.അസലു അധ്യക്ഷത വഹിച്ചു. പൊതുമരാമത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ കെ.ടി. അജ്മല്‍, വണ്ടൂര്‍ ബ്ലോക്ക് പഞ്ചായത്ത് പ്രസിഡന്റ് അമൃത, തിരുവാലി ഗ്രാമ പഞ്ചായത്ത് പ്രസിഡന്റ് സുമ താരിയന്‍, ജില്ലാ പഞ്ചായത്തംഗം പി.എച്ച്. ഷമീം എന്നിവര്‍ വിശിഷ്ടാതിഥികളായി. ബ്ലോക്ക് പഞ്ചായത്ത് മെമ്പര്‍ ടി.ഷാനി, തിരുവാലി ഗ്രാമപഞ്ചായത്ത് വൈസ് പ്രസിഡന്റ് മുഹമ്മദ് നജീബ്, സ്ഥിരം സമിതി അധ്യക്ഷ സജ്‌ന മന്നിയില്‍, വാര്‍ഡ് മെമ്പര്‍ പി.ശശി, എസ്.എസ്.കെ.ഡി.പി.സി. ടി.അബ്ദുല്‍ സലീം, ഡയറ്റ് പ്രന്‍സിപ്പല്‍ കെ.പി.രാജേഷ്, വിദ്യാകിരണം ജില്ലാ കോ-ഓര്‍ഡിനേറ്റര്‍ സുരേഷ് കോളശ്ശേരി, കൈറ്റ് ജില്ലാ കോ-ഓര്‍ഡിനേറ്റര്‍ കെ.മുഹമ്മദ് ഷരീഫ്, എച്ച്.എസ്.എസ്.ജില്ലാ കോ-ഓര്‍ഡിനേറ്റര്‍ വി.പി.ഷാജു, എസ്.എസ്.കെ.ഡി.പി.ഒ. എം.ഡി. മഹേഷ്, വണ്ടൂര്‍ ഡി.ഇ.ഒ. സലാവുദ്ദീന്‍, എ.ഇ.ഒ. പ്രേമാനന്ദന്‍, വണ്ടൂര്‍ ബി.പി.സി. ഷൈജി ടി.മാത്യു, പി.ടി.എ. പ്രസിഡന്റ് ടി.രമേഷ്, എസ്.എം.സി.ചെയര്‍മാന്‍ കെ.ജയദേവന്‍, മദര്‍ പി.ടി.എ.പ്രസിഡന്റ് എം.സി.സിന്ധു എന്നിവര്‍ ചടങ്ങില്‍ സംസാരിച്ചു. മലപ്പുറം ഡി.ഡി.ഇ. പി.വി.റഫീഖ് സ്വാഗതവും പ്രന്‍സിപ്പല്‍ ഇന്‍ ചാര്‍ജ് എസ്.ജയചന്ദ്രന്‍ നന്ദിയും പറഞ്ഞു. ഒന്നാം ക്ലാസിലേക്ക് പ്രവേശനം നേടിയ വിദ്യാര്‍ഥികള്‍, രക്ഷിതാക്കള്‍, പൂര്‍വ അധ്യാപകര്‍, വിദ്യാര്‍ഥികള്‍ തുടങ്ങിയവര്‍ ചടങ്ങില്‍ സംബന്ധിച്ചു.

30/05/2026

📌ആശാ വര്‍ക്കര്‍ നിയമനം

പെരിന്തല്‍മണ്ണ നഗരസഭാ പരിധിയില്‍ വരുന്ന 4, 7, 9, 10, 18, 22, 30 എന്നീ വാര്‍ഡുകളിലേക്ക് ആശാ വര്‍ക്കര്‍മാരെ നിയമിക്കുന്നതിനായി പെരിന്തല്‍മണ്ണ നഗരസഭ ചെയര്‍പേഴ്സണ്‍ ചേംബറില്‍ വെച്ച് ജൂണ്‍ എട്ടിന് രാവിലെ 10ന് കൂടിക്കാഴ്ച നടക്കും. താത്പര്യമുളള വ്യക്തികള്‍ ബന്ധപ്പെട്ട രേഖകള്‍ സഹിതം ഓഫീസില്‍ കൂടിക്കാഴ്ചക്ക് ഹാജരാകണം.

എസ്.എസ്.എൽ.സി. പാസ്സായ 25 നും 45 നും ഇടയില്‍ പ്രായമുള്ള വനിതകള്‍ക്ക് അപേക്ഷിക്കാം. മുന്‍ ആശാ പ്രവര്‍ത്തക, ആരോഗ്യ മേഖലയില്‍ സന്നദ്ധ സേവനം നടത്തിയവര്‍ എന്നിവര്‍ക്ക് മുന്‍ഗണന. അതാത് വാര്‍ഡ് പരിധിയിലെ സ്ഥിര താമസക്കാര്‍ ആയിരിക്കണം. ഫോണ്‍-9495999304.

📌വനിതകള്‍ക്ക് സ്വയംതൊഴില്‍ വായ്പ: അപേക്ഷ ക്ഷണിച്ചു

വനിതാ വികസന കോര്‍പറേഷന്‍ വനിതകളില്‍ നിന്ന് സ്വയംതൊഴില്‍ പദ്ധതിക്കായുള്ള വ്യക്തിഗത വായ്പാ അപേക്ഷ ക്ഷണിച്ചു. 18 മുതല്‍ 55 വയസ് വരെയുള്ള തൊഴില്‍രഹിത വനിതകള്‍ക്ക് സ്വയംതൊഴില്‍ സംരംഭങ്ങള്‍ ആരംഭിക്കുന്നതിനായി ആറ് മുതല്‍ എട്ട് ശതമാനം വരെ പലിശനിരക്കില്‍ ഉദ്യോഗസ്ഥ ജാമ്യമോ വസ്തു ജാമ്യമോ അടിസ്ഥാനമാക്കിയാണ് വ്യക്തിഗത വായ്പ അനുവദിക്കുക. അപേക്ഷ www.kswdc.org ല്‍ ഓണ്‍ലൈനായി നല്‍കണം. വിശദവിവരങ്ങള്‍ വനിതാ വികസന കോര്‍പറേഷന്‍ ജില്ലാ ഓഫീസ്, കുത്തുക്കല്‍ റോഡ്, മഞ്ചേരി പി.ഒ, മലപ്പുറം-676121 എന്ന വിലാസത്തില്‍ ലഭ്യമാണ്. ഫോണ്‍-9496428680, 9446748584

📌വൈദ്യതി വിതരണം തടസപ്പെടും

എടരിക്കോട് 110 കെ.വി. സബ്സ്റ്റേഷനിൽ അറ്റകുറ്റപ്പണികൾ നടക്കുന്നതിനാൽ നാളെ (ഞായർ) രാവിലെ എട്ടു മുതൽ ഉച്ചയ്ക്ക് രണ്ടു വരെ 11 കെ.വി.ഫീഡറുകളിലും ഉച്ചയ്ക്ക് രണ്ടു മുതൽ വൈകുന്നേരം അഞ്ചു വരെ എല്ലാ 33 കെ.വി.ഫീഡറുകളിലും വൈദ്യുതി വിതരണം തടസ്സപ്പെടും.

30/05/2026

ഒ.ബി.സി/മതന്യൂനപക്ഷ വിഭാഗങ്ങള്‍ക്ക് സ്വയം തൊഴില്‍ വായ്പ

പിന്നാക്ക വിഭാഗ വികസന കോര്‍പറേഷന്‍ ജില്ലയിലെ സാമ്പത്തികമായി പിന്നാക്കം നില്‍ക്കുന്ന മറ്റു പിന്നാക്ക (ഒ.ബി.സി) വിഭാഗങ്ങളില്‍ ഉള്‍പ്പെടുന്നവര്‍ക്കും മത ന്യൂനപക്ഷ വിഭാഗങ്ങളില്‍ ഉള്‍പ്പെടുന്നവര്‍ക്കും സ്വയം തൊഴില്‍ സംരംഭങ്ങള്‍ തുടങ്ങുന്നതിന് വായ്പ നല്‍കുന്നു.

5.5 ശതമാനം മുതല്‍ എട്ടു ശതമാനം വരെയാണ് പലിശ നിരക്ക്. പ്രവാസികള്‍, പ്രൊഫഷനല്‍ കോഴ്‌സ് ജയിച്ചവര്‍, വിധവകള്‍, നിയമപരമായി വിവാഹ മോചനം നേടിയ സ്ത്രീകള്‍ തുടങ്ങിയവര്‍ക്കും ടാക്സി ആയി ഓടുന്നതിന് ഇലക്ട്രിക്/സി.എന്‍.ജി വാഹനങ്ങള്‍ വാങ്ങുന്നതിനും നിബന്ധനകള്‍ക്ക് വിധേയമായി സബ്‌സിഡി ലഭിക്കും. വായ്പാ തുക 60 തുല്യപ്രതിമാസ തവണകളായി തിരിച്ചടക്കണം.
വായ്പക്ക് മതിയായ വസ്തു ജാമ്യമോ ഉദ്യോഗസ്ഥ ജാമ്യമോ നല്‍കണം. അപേക്ഷാ ഫോമും വിശദ വിവരങ്ങളും എല്ലാ പ്രവര്‍ത്തി ദിവസവും കോര്‍പറേഷന്റെ ബന്ധപ്പെട്ട ഓഫിസുകളില്‍ നിന്നും ലഭിക്കും. പൂരിപ്പിച്ച അപേക്ഷകള്‍ ജൂണ്‍ 15 നകം ലഭ്യമാക്കണം.

ഫോണ്‍ നമ്പര്‍ -ജില്ലാ ഓഫീസ്, മലപ്പുറം. (പെരിന്തല്‍മണ്ണ ഏറനാട്, തിരൂരങ്ങാടി കൊണ്ടോട്ടി താലൂക്കുകളില്‍ താമസിക്കുന്നവര്‍ക്ക്) 0483 2734114.

ഉപജില്ലാ ഓഫിസ് തിരൂര്‍(പൊന്നാനി, തിരൂര്‍ താലൂക്കുകളില്‍ താമസിക്കുന്നവര്‍ക്ക്)-0494 2432275.

ഉപജില്ലാ ഓഫീസ് വണ്ടൂര്‍ (നിലമ്പൂര്‍ താലൂക്കില്‍ താമസിക്കുന്നവര്‍ക്ക്)-04931 248300.

7306022527 എന്ന നമ്പറില്‍ പേര്, ആരംഭിക്കാനുദ്ദേശിക്കുന്ന പദ്ധതി എന്നിവ വാട്സ്ആപ് ചെയ്താലും വിവരങ്ങള്‍ ലഭിക്കും.

30/05/2026

നിയമസഭാ തെരഞ്ഞെടുപ്പ്: സ്ഥാനാര്‍ഥികളുടെ ചെലവ് നിരീക്ഷണവുമായി ബന്ധപ്പെട്ട് അവലോകന യോഗം ചേര്‍ന്നു

നിയമസഭാ തെരഞ്ഞെടുപ്പില്‍ മത്സരിച്ച സ്ഥാനാര്‍ഥികളുടെ തെരഞ്ഞെടുപ്പ് ചെലവുകളുമായി ബന്ധപ്പെട്ട അവലോകന യോഗം ജില്ലാ പഞ്ചായത്ത് ഹാളില്‍ നടന്നു. തെരഞ്ഞെടുപ്പ് കമ്മീഷന്‍ നിശ്ചയിച്ചിട്ടുള്ള പരിധിക്കുള്ളില്‍ നിന്നാണോ സ്ഥാനാര്‍ഥികള്‍ തുക ചെലവഴിച്ചത് എന്ന് ഉറപ്പുവരുത്തുന്നതിനും കണക്കുകള്‍ കൃത്യമായി ബോധിപ്പിക്കുന്നതിനുമാണ് യോഗം വിളിച്ചുചേര്‍ത്തത്.

തെരഞ്ഞെടുപ്പ് കമ്മീഷന്‍ നിയോഗിച്ച പ്രത്യേക ചെലവ് നിരീക്ഷകരായ അനൂപ് കുമാര്‍ വര്‍മ, അനുരാഗ് ശ്രീവാസ്തവ, റൗട്ട് മനീഷ് മഹേന്ദ്ര, മഹേന്ദ്ര പ്രതാപ് സിംഗ് ബിസേന്‍ എന്നിവര്‍ യോഗത്തില്‍ നേരിട്ടെത്തി പരിശോധനാ നടപടികള്‍ നിരീക്ഷിച്ചു. സീനിയര്‍ ഫിനാന്‍സ് ഓഫീസര്‍ യു. വി. പ്രസീത പരിശോധന നടപടികള്‍ക്ക് നേതൃത്വം നല്‍കി. സ്ഥാനാര്‍ഥികളും അവരുടെ ഇലക്ഷന്‍ ഏജന്റുമാരും സമര്‍പ്പിച്ച ചെലവ് രജിസ്റ്ററുകളും അനുബന്ധ രേഖകളും നിരീക്ഷകരുടെ സാന്നിധ്യത്തില്‍ ഉദ്യോഗസ്ഥര്‍ വിശദമായി പരിശോധിച്ചു.

പ്രചാരണത്തിനായി ഉപയോഗിച്ച വാഹനങ്ങള്‍, പബ്ലിസിറ്റി സാമഗ്രികള്‍, പരസ്യങ്ങള്‍, പൊതുയോഗങ്ങള്‍ തുടങ്ങിയവയുടെ ചെലവുകള്‍ കൃത്യമായി രേഖപ്പെടുത്തിയിട്ടുണ്ടോ എന്ന് യോഗം വിലയിരുത്തി. കണക്കുകളില്‍ എന്തെങ്കിലും തരത്തിലുള്ള അപാകതകള്‍ കണ്ടെത്തുകയാണെങ്കില്‍ അത് നിശ്ചിത സമയത്തിനകം പരിഹരിക്കാന്‍ സ്ഥാനാര്‍ത്ഥികള്‍ക്ക് നിര്‍ദ്ദേശം നല്‍കി. വിവിധ മണ്ഡലങ്ങളിലെ സ്ഥാനാര്‍ഥികള്‍, അവരുടെ പ്രതിനിധികള്‍, തെരഞ്ഞെടുപ്പ് വിഭാഗം ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.

District Information Office, Malappuram

02/06/2026

02/06/2026

02/06/2026

02/06/2026

02/06/2026

02/06/2026

01/06/2026

30/05/2026

30/05/2026

30/05/2026

Address

Opening Hours

Telephone

Website

Alerts

Contact The Organization

Shortcuts

Share

Category

Monday	10am - 5pm
Tuesday	10am - 5pm
Wednesday	10am - 5pm
Thursday	10am - 5pm
Friday	10am - 5pm
Saturday	10am - 5pm