25/07/2025
ആറന്മുളയും വള്ളസദ്യയും.
ആറന്മുള എന്ന പ്രദേശത്തിന് (52 കരകൾ) പുറത്തുള്ള സുഹൃത്തുക്കൾക്കായി ആണ് ഈ കുറിപ്പ്. ആറന്മുള ക്ഷേത്രത്തിൽ ജൂലൈ മാസം ഏതാണ്ട് പകുതിയോടെ ആരംഭിച്ച് സെപ്റ്റംബർ അവസാനം വരെ നടന്നു വരാറുള്ള 'വള്ളസദ്യ' എന്ന വഴിപാട് സംബന്ധിച്ച് പുറമേക്ക് ഉള്ള ആളുകളിൽ ഒരു തെറ്റിദ്ധാരണ നിലനിൽക്കുന്നുണ്ട്. അതിന് ഒരു ചെറിയ വിശദീകരണം നൽകാം എന്ന് കരുതി. 'വളളസദ്യ' എന്ന് പറയുന്നത് ഒരു വ്യക്തി തൻ്റെ അഭീഷ്ട കാര്യത്തിനായി ഭഗവാനോട് പ്രാർത്ഥിച്ച്, അത് സാധ്യമായാൽ നടത്തുന്ന നേർച്ച/വഴിപാടാണ് ആറന്മുള വള്ളസദ്യ എന്ന് പറയുന്നത്.
ഓർക്കുക, ഇതൊരു സമൂഹസദ്യയോ, അന്നദാനമോ, പ്രസാദവിതരണമോ അല്ല.
വള്ളസദ്യ വഴിപാട് നേർന്നവർ ആദ്യം ഇതിൻ്റെ നടത്തിപ്പുകാരായ (കരക്കൂട്ടായ്മ) പള്ളിയോട സേവാസംഘവുമായി ബന്ധപ്പെടുന്നു. അവിടെ മുമ്പ് സൂചിപ്പിച്ച 52 പള്ളിയോട കരകളിൽ ഏതെങ്കിലും ഒരു പള്ളിയോടത്തിന് ഇന്ന തീയതിയിൽ വഴിപാട് ബുക്ക് ചെയ്ത് പണമടയ്ക്കുന്നു. ആ ചടങ്ങിൽ ടി പള്ളിയോട കരയും അവരുടെ ക്ഷണിക്കപ്പെട്ട ബന്ധുമിത്രാദികളും മാത്രമാണ് പങ്കെടുക്കുക. ഏകദേശം 250 - 300 ആളുകൾക്കാണ് ഈ സദ്യ തയ്യാറാക്കുക. അത് പള്ളിയോട സേവാസംഘം നൽകുന്ന പാസ് മുഖാന്തിരം നിയന്ത്രിച്ചിരിക്കുന്നു. നിശ്ചിത എണ്ണം പാസ് വഴിപാട് നടത്തുന്നവർക്കും ബാക്കി അതാത് കരകളിലും ആണ് നൽകുക. പാസ് ഇല്ലാതെ ഒരാളെയും വള്ളസദ്യയിൽ പങ്കെടുപ്പിക്കുകയില്ല കാരണം മേൽ പറഞ്ഞപോലെ ഇത് വഴിപാട് നടത്തുന്ന ഭക്തൻ 250 - 300 ആളുകൾക്കായി ആണ് തയ്യാറാക്കിയിരിക്കുന്നത്. ചില ദിവസങ്ങളിൽ ശരാശരി 5 മുതൽ 8 വരെ പള്ളിയോടങ്ങൾക്ക് സദ്യ ഉണ്ടാകാറുണ്ട്. അങ്ങനെ വന്നാൽ തന്നെ ആകെ 2000 - 2500 ആളുകൾക്കാണ് അങ്ങേയറ്റം ഈ വഴിപാടിൽ പങ്കെടുത്ത് സദ്യ കഴിക്കാൻ സാധിക്കുന്നത്.
ഈ കാലയളവിൽ ദർശനത്തിനായി ഒരു ദിവസം ക്ഷേത്രത്തിൽ എത്തുന്ന ഭക്തരുടെ എണ്ണം അതിൽ എത്രയോ ഇരട്ടിയാണ്. അവരൊക്കെ ഇവിടെ എത്തുമ്പോൾ ഇങ്ങനെ ഒരു ചടങ്ങ് കണ്ട് ഇത് സമൂഹസദ്യ / അന്നദാനം വഴിപാട് ആണെന്ന് തെറ്റിദ്ധരിക്കാറുണ്ട്. അതാണ് ഈ വിവാദങ്ങൾക്കെല്ലാം കാരണം. ലിമിറ്റഡ് ആയി നടത്തുന്ന സദ്യ ആയതിനാൽ എല്ലാവർക്കും നൽകാൻ സാധിക്കില്ല. എന്നാൽ നിശ്ചിത ആളുകൾ ഇല്ല എങ്കിൽ പാസ് ഇല്ലാത്ത ഭക്തരെയും വിളിച്ച് ഇരുത്തി തയ്യാറാക്കിയ വിഭവങ്ങൾ തീരുന്നത് വരെ ഭക്ഷണം നൽകാറുണ്ട്. പക്ഷെ വളരെ അപൂർവ്വമായി മാത്രമേ അങ്ങനെ സംഭവിക്കാറുള്ളൂ. കാരണം മുമ്പ് പറഞ്ഞത് പോലെ മുൻകൂട്ടി നിശ്ചയിച്ച് 250 - 300 ആളുകൾക്ക് മാത്രമായി ആണ് ആ നേർച്ച / വഴിപാട് നടത്തുന്നത് എന്നത് തന്നെ കാരണം.
ദൂരെ ദേശത്ത് നിന്ന് ക്ഷേത്ര ദർശനത്തിന് എത്തുന്ന ഭക്തർ ഈ ചടങ്ങിൽ ഒന്ന് പങ്ക് കൊള്ളണമെന്ന് തീർച്ചയായും ആഗ്രഹിക്കും അങ്ങനെയുള്ളവർക്ക് വേണ്ടിയാണ് ഇതിൻ്റെ നടത്തിപ്പുകാരായ പള്ളിയോട സേവാസംഘം കഴിഞ്ഞ വർഷങ്ങളിൽ അവരുടെ ഓഫീസ് കെട്ടിടം പ്രവർത്തിക്കുന്ന കിഴക്കേ നടയിലുള്ള 'പാഞ്ചജന്യം' എന്ന ഓഡിറ്റോറിയത്തിൽ വെച്ച് പെയ്ഡ് സദ്യ ഒരുക്കിയിട്ടുള്ളത്. മുൻകൂട്ടി ബുക്ക് ചെയ്ത് 250 രൂപ വീതം അടച്ച് ഈ സദ്യ കഴിക്കാവുന്നതാണ്. ആറന്മുള സദ്യ ഏതാണ്ട് 64 കൂട്ടം വിഭവങ്ങൾ അടങ്ങുന്ന സദ്യ കഴിക്കാം എന്നല്ലാതെ മേൽ പറഞ്ഞ വഴിപാടുമായി ഇതിന് യാതൊരു ബന്ധവുമില്ല. KSRTC യും ടൂറിസം വകുപ്പും പ്രത്യേക സർവ്വീസ് നടത്തി ആളുകളെ പങ്കെടുപ്പിക്കുന്നതും പാഞ്ചജന്യത്തിൽ നടത്തുന്ന മുൻകൂട്ടി പണമടച്ച് പങ്കെടുക്കുന്ന ഈ സദ്യയിലാണ്. ഇതിൽ പങ്കെടുക്കണമെങ്കിൽ പള്ളിയോട സേവാസംഘത്തിൻെ ഔദ്യോഗിക വെബ്സൈറ്റ് ആയ https://aranmulaboatrace.com/ മുഖേനയോ +91-8281113010 എന്ന ഓഫീസ് നമ്പറിലോ വിളിച്ച് മുൻകൂട്ടി ബുക്ക് ചെയ്ത് പാസ് എടുത്ത് ഈ സദ്യ കഴിക്കാവുന്നതാണ്.
അപ്പോഴും ഒരു കാര്യം ഓർക്കുക, നിങ്ങൾക്ക് ആറന്മുള സദ്യ ആസ്വദിക്കാനാകും പക്ഷെ ഇതും വള്ളസദ്യ വഴിപാടും രണ്ടും രണ്ടാണ്.
ഈ വിവാദങ്ങൾക്കെല്ലാം കാരണം ഈ ചടങ്ങിന് കിട്ടുന്ന പബ്ലിസിറ്റിയാണ്. എന്നാൽ കാര്യം കാര്യമായി മീഡിയകൾ ഉൾപ്പടെ പറയുന്നും ഇല്ല. എല്ലാവർക്കും പങ്കെടുക്കാൻ കഴിയുന്ന അന്നദാനം എന്ന് പറയുന്നത് അഷട്മി രോഹിണി നാളിൽ ക്ഷേത്രമുറ്റത്ത് നടക്കുന്ന സമൂഹ സദ്യ മാത്രമാണ്. അത് ക്ഷേത്രമതിൽക്കകത്ത് ഓഡിറ്റോറിയത്തിൻ്റെ തറയിലും മണൽപ്പുറത്തുമായാണ് ഇലയിട്ട് വിളമ്പുക. ഏകദേശം അര ലക്ഷത്തോളം ആളുകൾ അന്നേ ദിവസം ഈ സമൂഹസദ്യ കഴിക്കാറുണ്ട് എന്നാണ് സംഘാടകർ പറയുന്നത്.
പിന്നെ ഇപ്പോൾ ഉണ്ടായ വിവാദം എന്നത് തിരുവിതാകൂർ ദേവസ്വം ബോർഡ് എല്ലാ ഞായറാഴ്ചകളിലും വള്ളസദ്യ നടത്തുവാൻ പോകുന്നു എന്ന് പ്രഖ്യാപിച്ചതിനെ തുടർന്നാണ്. പള്ളിയോട സേവാസംഘം നടത്തുന്ന മാതൃകയിൽ പടിഞ്ഞാറേ ഊട്ടുപുരയിൽ സദ്യ ഒരുക്കും എന്നാണ് പറഞ്ഞിട്ടുള്ളത്. 250 രൂപ നിരക്കിൽ ഒരു സദ്യ കഴിക്കാം എന്നല്ലാതെ വഴിപാടുമായോ ക്ഷേത്ര ചടങ്ങുകളുമായോ ഇതിന് യാതൊരു ബന്ധവുമില്ല എന്ന് ക്ലിയറായി ഇവരും പറയുന്നില്ല എന്നതാണ് വാസ്തവം. ദൂരെ ദേശങ്ങളിൽ നിന്നും വരുന്ന ഭക്തരെ തെറ്റിദ്ധരിപ്പിക്കാതെ വഴിപാട് വള്ളസദ്യയും മറ്റ് സദ്യകളും തമ്മിലുള്ള വ്യത്യാസം വിശദമാക്കി തന്നെ ഈ കാര്യങ്ങൾ ചെയ്യുവാൻ ബന്ധപ്പെട്ടവർ മേലിലും ശ്രദ്ധിക്കണം. കൃത്യമായ അറിയിപ്പുകളിലൂടെ ആറമ്മുള സദ്യ കഴിക്കാൻ ആഗ്രഹിക്കുന്നവർക്ക് നല്ല നിലവാരമുള്ള ഭക്ഷണം നൽകുവാനും ശ്രമിക്കുക എന്ന് മാത്രം പറഞ്ഞുകൊണ്ട് ഈ കുറിപ്പ് അവസാനിപ്പിക്കുന്നു.
കടപ്പാട്-വേണു പനവേലിൽ.
NB: പാസ് ആവശ്യപ്പെട്ടു കൊണ്ട് നിരവധി ആളുകൾ ബന്ധപ്പെടാറുണ്ട്. അവർക്ക് ഈ കുറിപ്പ് ഉപകാരപ്പെടും എന്ന് വിശ്വസിക്കുന്നു.
Aranmula Vallamkali - Official Website of Aranmula Palliyoda Seva Sangam
