29/04/2026
പല കാര്യങ്ങളും നാടിന്റെ പൊതു പ്രശ്നം ആണെന്ന് പറഞ്ഞു വിശ്വസിപ്പിച്ചു രാഷ്ട്രീയ പാർട്ടികൾ നടത്തിയ ഹർത്താൽ ഈ നാട് ഏറ്റെടുത്തിട്ടുണ്ട്. എന്നാൽ ഇന്നലെ നടന്ന ഹർത്താൽ ഏറ്റെടുക്കാൻ പലർക്കും ബുദ്ധിമുട്ട് ഉള്ളതുപോലെ തോന്നി.
ദളിത് സംഘടനകൾ ഐക്യപെട്ട് നടത്തിയ സമരം അവരുടെ മാത്രം ആവശ്യം ആയിരുന്നു എന്ന് പലർക്കും തോന്നി എന്ന് വേണം കരുതാൻ.
എന്നാൽ അവരുടെ ആവശ്യങ്ങൾക്കു നൂറ്റാണ്ടുകളുടെ പഴക്കം ഉണ്ട് എന്ന് ഈ സമൂഹം മനസ്സിലാക്കണം. പിന്നോക്കർ എന്ന് വിശേഷിപ്പിച്ചു ഇവിടത്തെ സമൂഹം മാറ്റി നിർത്തിയ ഒരു വിഭാഗം നൂറു വർഷങ്ങൾക്ക് മുൻപ് സമരം ചെയ്തിരുന്നു, അങ്ങനെ മാറ്റി നിർത്തേണ്ടവർ അല്ല ഞങ്ങൾ എന്ന് പറഞ്ഞുകൊണ്ട്. അതേ ആവശ്യങ്ങൾ ആണ് ഇന്നും അവർക്ക് പറയാനുള്ളത്.
ദന്തൽ വിദ്യാർത്ഥി നിതിൻ രാജിന്റെ മരണ കാരണം എന്ത് തന്നെ ആണെങ്കിലും നിതിൻ നേരിട്ട ജാതി അതിക്ഷേപങ്ങളും അനുഭവിച്ച മാനസിക സമ്മർദ്ധവും മരണത്തെ തുടർന്ന് പുറത്തു വന്നതാണ്. 2026 ലും ഒരാൾ ജാതിയുടെ പേരിൽ വിവേചനം നേരിടുന്നു എന്ന് പറയുന്നത് ഈ സമൂഹത്തിന്റെ പൊതു പ്രശ്നം ആയി കാണാൻ പറ്റുന്നില്ലേ? അതും അധ്യാപകനിൽ നിന്നും വിദ്യാർത്ഥിക്ക്. ഉന്നതകുല ജാതർ എന്ന് കരുതുന്നവർക്കു ഇങ്ങനെ ഒരു അധ്യാപകൻ തങ്ങളുടെ കൂട്ടത്തിൽ ഉള്ളതാണ് എന്ന് പറയുമ്പോൾ അഭിമാനം ആണോ ഇപ്പോളും?
