06/03/2026
നഗരവികസനത്തിനും, ആരോഗ്യ മേഖലക്കും ഊന്നൽ നൽകി കോതമംഗലം നഗരസഭ ബജറ്റ്
കോതമംഗലം നഗരസഭയുടെ 2026-27 വർഷത്തെ ബജറ്റ് വൈസ് ചെയർപേഴ്സൺ ശ്രീ. പ്രിൻസ് വർക്കി അവതരിപ്പിച്ചു. 71671100/- രൂപ മുന്നിരിപ്പും 830547800/- രൂപ വരവും 847663900 ചിലവും കണക്കാക്കി 54555000/- രൂപ നീക്കിയിരിപ്പുമുളള ബഡ്ജറ്റാണ് കൌൺസിൽ പാസ്സാക്കിയത്.
ലൈഫ് പദ്ധതിക്ക് നഗരസഭാ വിഹിതമായി ഒരു കോടി രൂപ, ടൗൺഹാൾ നിർമ്മാണത്തിന്റെ പ്രാരംഭ പ്രവർത്തനങ്ങൾക്കായി രണ്ടു കോടി രൂപ, പൊതു ശ്മശാനത്തിൻറെ ലാൻഡ്സ്കേപ്പിംഗ് പ്രവർത്തനങ്ങൾക്കായി 50 ലക്ഷം രൂപയും വകയിരുത്തി. നഗരസഭ പരിധിക്കുള്ളിലെ താമസക്കാരായ പട്ടികജാതി പട്ടികവർഗ്ഗ വിഭാഗത്തിലുള്ളവർക്കും പിന്നോക്ക വരുമാനക്കാരായ തദ്ദേശവാസികൾക്കും ക്രിമേഷനും ആമ്പുലൻസ് സൌകര്യവും സൗജന്യമായി നൽകുന്നതാണ്. വിവിധ കുടിവെള്ള പദ്ധതികൾക്കായി ഒരുകോടി രൂപ, ബസ് സ്റ്റാൻഡ് ബിൽഡിങ്ങിൻറെ കാലപ്പഴക്കം മൂലം പൊളിച്ചുമാറ്റി തൽസ്ഥാനത്ത് പുതിയ കെട്ടിടം പണിയുന്നതിന് ആറ് കോടി രൂപ, മുൻ വർഷങ്ങളിൽ പ്രവൃത്തികൾ ഏറ്റെടുത്ത് പൂർത്തിയാക്കിയ കരാറുകാർക്ക് കൊടുത്തു തീർക്കുവാനുളള തുക 70 ലക്ഷം രൂപ, ഓഫീസ് നവീകരണത്തിനായി 1.5 കോടി രൂപ എന്നിങ്ങനെ വകയിരുത്തിയിട്ടുണ്ട്. എബിസി സെൻറർ ആരംഭിക്കുന്നതിനും തെരുവുനായ ആക്രമണങ്ങളിൽ നിന്നും സംരക്ഷണത്തിനായി ഷെൽറ്റർ സംവിധാനം ഒരുക്കുന്നതിനും 25 ലക്ഷം രൂപയും ഉൾപ്പെടുത്തിയിട്ടുണ്ട്. പൊതു വിദ്യാഭ്യാസ മേഖലയുടെ സംരക്ഷണവുമായി ബന്ധപ്പെട്ട് സ്കൂളുകളുടെ നവീകരണത്തിനും അനുബന്ധ പ്രവർത്തനങ്ങൾക്കും 85 ലക്ഷം രൂപ വകയിരുത്തി. കൂടാതെ കാർഷീക, ഉത്പാദന മേഖലകളിൽ 1.27 കോടി രൂപയും വകിയിരുത്തിയിട്ടുണ്ട്.
ആരോഗ്യ മേഖലയിൽ ഡയാലിസിസ് നടത്തുന്ന വൃക്ക രോഗികൾക്കും ക്യാൻസർ രോഗികൾക്കും ചികിത്സാ ധനസഹായം നൽകുന്നതും ഉൾപ്പെടെയുളള താലൂക്ക് ആശുപത്രിയുടെ പ്രവർത്തനങ്ങൾക്കായി 1.5 കോടി രൂപ, വെണ്ടുവഴി വെൽനസ് സെൻററിന് സ്ഥലം വാങ്ങുന്നതിന് 30 ലക്ഷം രൂപ, പാലിയേറ്റീവ് കെയർ പ്രവർത്തനങ്ങൾക്കായി 14 ലക്ഷം രൂപ, ഐസിയു സൌകര്യമുളള അത്യാധുനിക ആംബുലൻസ് വാങ്ങുന്നതിന് 25 ലക്ഷം രൂപ, ശുചിത്വ നഗരം, സീവേജ് വാട്ടർ ട്രീറ്റ്മെൻറ് പ്ലാൻറ് എന്നിവ സ്ഥാപിക്കുന്നതിന് ഡിപിആർ തയ്യാറാക്കുന്നതിന് 10 ലക്ഷം രൂപ എന്നിങ്ങനെ ഉൾപ്പെടുത്തിയിട്ടുണ്ട്. അയ്യപ്പൻമുടിയുടെ സാദ്ധ്യതകൾ പൂർണ്ണമായി പ്രയോജനപ്പെടുത്തി കോതമംഗലത്തെ ഒരു വിനോദ സഞ്ചാരകേന്ദ്രമാക്കി മാറ്റുന്നതിനുള്ള പദ്ധതിയുടെ ഡിപിആർ തയ്യാറാക്കുന്നതിന് 10 ലക്ഷം രൂപ, കായിക മേഖലയുടെ ഉന്നമനത്തിനായി രാമല്ലൂർ, കറുകടം, പുതുപ്പാടി എന്നിവിടങ്ങളിൽ സ്ഥലം വാങ്ങി മിനി സ്റ്റേഡിയം നിർമ്മാണത്തിന് ഒന്നരക്കോടി രൂപ പ്ലാൻ ഫണ്ടിൽ നിന്നും ഒരു കോടി രൂപ തനത് ഫണ്ടിൽ നിന്നും വകയിരുത്തിയിട്ടുണ്ട്.
കൂടാതെ പുറമ്പോക്ക് നിവാസികൾക്ക് സ്ഥലവും വീടും നൽകുന്നതിന് പദ്ധതിക്കായും തുക മാറ്റി വച്ചിട്ടുണ്ട്. കാർഷീക, പാർപ്പിട, കുടിവെളള, കായീക, ആരോഗ്യ മേഖലകൾക്കും ശുചിത്വ മാലിന്യ സംസ്കരണത്തിനും തുല്യ പ്രാധാന്യം നൽകി പ്രദേശിക സാമ്പത്തിക വികസനത്തിനാണ് 2026-27 സാമ്പത്തിക വർഷത്തെ ബജറ്റിൽ ഊന്നൽ നൽകുന്നതെന്ന് വൈസ് ചെയർപേഴ്സൺ ശ്രീ. പ്രിൻസ് വർക്കി ബജറ്റവതരണത്തിൽ വ്യക്തമാക്കി. കൌൺസിൽ യോഗം നഗരസഭാ ചെയർപേഴ്സൺ ശ്രീമതി. ഭാനുമതി രാജു അദ്ധ്യക്ഷത വഹിച്ചു.
