08/10/2026
വോട്ട് കൊള്ളയ്ക്കെതിരെ;
ജില്ലയിൽ സിപിഐ നൈറ്റ് മാർച്ച്
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ നേതൃത്വത്തിൽ നടന്ന വോട്ടുകൊള്ളയും ജനാധിപത്യവിരുദ്ധ നടപടികളും രാജ്യത്തിന്റെ അടിത്തറ തകർക്കുന്നതാണെന്ന് സിപിഐ ജില്ലാ സെക്രട്ടറി പി.എസ്. സുപാൽ വ്യക്തമാക്കി. ഇതിനെതിരെ രാജ്യതലസ്ഥാനത്ത് നടക്കുന്ന പ്രക്ഷോഭങ്ങൾക്ക് ഐക്യദാർഢ്യം പ്രഖ്യാപിച്ചുകൊണ്ട് സിപിഐയുടെയും ബഹുജന സംഘടനകളുടെയും നേതൃത്വത്തിൽ ജില്ലയിൽ പ്രതിഷേധ നൈറ്റ് മാർച്ചുകൾ സംഘടിപ്പിക്കുമെന്ന് അദ്ദേഹം അറിയിച്ചു. ഇതിന്റെ ഭാഗമായി ഒക്ടോബർ 10, 11 തീയതികളിൽ സിപിഐ മണ്ഡലം കമ്മിറ്റികളുടെ നേതൃത്വത്തിൽ നൈറ്റ് മാർച്ചുകൾ നടക്കും.
തുടർന്ന് വിവിധ ബഹുജന സംഘടനകളുടെ നേതൃത്വത്തിലും പ്രതിഷേധ മാർച്ചുകൾ സംഘടിപ്പിച്ചിട്ടുണ്ട്. ഒക്ടോബർ 12-ന് എഐഎസ്എഫ് - എഐവൈഎഫ് മണ്ഡലം കമ്മിറ്റികളുടെയും, 13-ന് കേരള മഹിളാ സംഘത്തിന്റെയും, 14-ന് എഐടിയുസി മണ്ഡലം കമ്മിറ്റികളുടെയും നേതൃത്വത്തിൽ ബഹുജനപങ്കാളിത്തത്തോടെ നൈറ്റ് മാർച്ചുകൾ നടക്കും.
ഈ പ്രക്ഷോഭ പരിപാടികളുടെ ഭാഗമായി ഒക്ടോബർ 15-ന് ജില്ലയിലെ വിവിധ മണ്ഡലം കമ്മിറ്റികളിൽ നിന്നായി അയ്യായിരത്തിലധികം പേരുടെ ബഹുജന പങ്കാളിത്തത്തോടെ ജില്ലാ കേന്ദ്രത്തിൽ മാർച്ച് സംഘടിപ്പിക്കും. ജില്ലാ മാർച്ചിനെ തുടർന്ന് ഒക്ടോബർ 16 മുതൽ 25 വരെയുള്ള തീയതികളിൽ ലോക്കൽ കമ്മിറ്റികളുടെ നേതൃത്വത്തിലും നൈറ്റ് മാർച്ചുകൾ സംഘടിപ്പിക്കും.
വോട്ടർ പട്ടികയിലെ തിരിമറികൾക്കതിരെയും ഭരണഘടനാ സ്ഥാപനങ്ങളുടെ പക്ഷപാതപരമായ പെരുമാറ്റത്തിനെതിരെയും രാജ്യത്ത് ഉയർന്നുവരുന്ന ജനാധിപത്യ സംരക്ഷണ പോരാട്ടങ്ങൾക്ക് കരുത്തുപകരാൻ മുൻകൈയെടുത്ത് ഈ പ്രക്ഷോഭ പരിപാടികൾ മുഴുവൻ ബഹുജനങ്ങളും ചേർന്ന് വൻ വിജയമാക്കി തീർക്കണമെന്ന് അദ്ദേഹം അഭ്യർത്ഥിച്ചു.
