16/09/2026
അച്ചന്‍കോവില്‍ ഗ്രാമം - ആദിവാസി സമൂഹവും സാധാരണക്കാരും അധിവസിക്കുന്ന നിബിഡവനത്തിനിടയിലെ മലയോര ഗ്രാമം. കൊല്ലം പാര്‍ലമെന്‍റ് മണ്ഡലത്തിലെ കിഴക്കന്‍ അതിര്‍ത്തി ഗ്രാമം. ആര്യങ്കാവ് കഴിഞ്ഞ് തമിഴ്നാട്ടിലെ ചെങ്കോട്ടയും കഴിഞ്ഞ് വേണം അച്ചന്‍കോവില്‍ ഗ്രാമത്തിലെത്താന്‍.
2020 ല്‍ കോവിഡ് കാലഘട്ടത്തിന്‍റെ തുടക്കം. വിദ്യാഭ്യാസ സ്ഥാപനങ്ങള്‍ അടഞ്ഞുകിടന്ന സാഹചര്യത്തില്‍ സംസ്ഥാനത്ത് ഓണ്‍ലൈന്‍ വിദ്യാഭ്യാസത്തിന് തുടക്കം കുറിച്ചു. വനമേഖലയില്‍ ഇന്‍റര്‍നെറ്റ് സൗകര്യം പരിമിതമായതിനാല്‍ മൊബൈല്‍ ഫോണുമായി സ്കൂള്‍ കുട്ടികള്‍ ഉയരം കൂടിയ മലയുടെ മുകളില്‍ പാറപ്പുറത്ത് ഇരുന്നാണ് ഓണ്‍ലൈന്‍ വിദ്യാഭ്യാസത്തിന്‍റെ ഭാഗമായത്.
ഈ വിഷയം വാര്‍ത്തകളിലൂടെ ശ്രദ്ധയില്‍പ്പെട്ടപ്പോള്‍ തന്നെ BSNL അധികൃതരുമായി ഇടപെട്ടു. യുദ്ധകാലാടിസ്ഥാനത്തില്‍ മൂന്ന് സ്ഥലത്ത് പുതിയ ടവറുകള്‍ സ്ഥാപിച്ച് കുട്ടികള്‍ക്കുള്ള ഓണ്‍ലൈന്‍ പഠനം സുഗമമാക്കി.
ആ സ്ഥലങ്ങളില്‍ ഇപ്പോള്‍ 3 കോടിയിലധികം രൂപ ചെലവഴിച്ച് മൂന്നു വലിയ ടവറുകള്‍ സ്ഥാപിച്ച് അച്ചന്‍കോവില്‍ സമ്പൂര്‍ണ്ണ 4G സൗകര്യം ലഭ്യമാക്കി.
ഇന്നലെ അച്ചന്‍കോവിലില്‍ എത്തി പദ്ധതി നാടിനായി സമര്‍പ്പിച്ചപ്പോള്‍ ഉണ്ടായ ചാരിതാര്‍ത്ഥ്യം വിവരണാതീതമാണ്. പ്രധാനമന്ത്രിയുടെ പ്രത്യേക പദ്ധതിയില്‍ ഉള്‍പ്പെടുത്തിയാണ് പദ്ധതിക്ക് പണം കണ്ടെത്തിയത്.
ഒറ്റപ്പെട്ട മലയോര ഗ്രാമത്തില്‍ ഹൈ സ്പീഡ് ഇന്‍റര്‍നെറ്റ് സൗകര്യം ലഭ്യമാക്കിയതിലുള്ള സന്തോഷം പങ്കുവയ്ക്കുന്നു.
മലയുടെ മുകളില്‍ ചുട്ടുപൊള്ളുന്ന പാറയില്‍ ഇരുന്ന് പാവപ്പെട്ട കുട്ടികള്‍ പഠിച്ച സ്ഥലത്താണ് പടുകൂറ്റന്‍ ടവര്‍ സ്ഥാപിതമായത് എന്നത് കൗതുകകരമാണ്.
ടെലികോം രംഗത്ത് BSNL എന്ന പൊതുമേഖലാ സ്ഥാപനം അവശേഷിക്കുന്നത് കൊണ്ട് മാത്രമാണ് പാവപ്പെട്ടവര്‍ക്ക് ഈ സൗകര്യം ലഭ്യമായത്.
