M Ganeshan

08/10/2026

പി. ഇ. ബി മേനോൻ സാർ അനുസ്മരണം ഇന്ന്.
രാഷ്ട്രീയ സ്വയംസേവക സംഘത്തിന്റെ മുൻ പ്രാന്തസംഘചാലകും പ്രശസ്ത ചാർട്ടേർഡ് അക്കൗണ്ടന്റുമായിരുന്ന പി. ഈ ബി മേനോൻ സാർ വിട വാങ്ങിയിട്ട് ഒരു വർഷം ആവുകയാണ്. സ്വർഗീയ മാധവ്ജിയിലൂടെ സംഘപ്രസ്ഥാനങ്ങളുമായി ബന്ധപ്പെട്ട മേനോൻ സാറിന്റെ ജീവിതം ഓരോ സ്വയംസേവകനും മാതൃകയാണ്. സംഘസമർപ്പിതമാണ് അദ്ദേഹത്തിന്റെ ജീവിതം. എന്റെ അധ്യാത്മിക ഗുരു മാധവ്ജിയും സാമൂഹ്യ ഗുരു സംഘവുമാണെന്ന് ശ്രീവിദ്യാ ഉപാസകൻ കൂടിയായ മേനോൻ സാർ പറയാറുണ്ട്.

തന്റെ കുടുംബ ജീവിതവും തിരക്കിട്ട ഔദ്യോഗിക ജീവിതവും സംഘത്തിന്റെ പ്രവർത്തനത്തിന് പ്രാമുഖ്യം നൽകുന്ന തരത്തിൽ അദ്ദേഹം ചിട്ടപ്പെടുത്തി. ക്ഷേത്രസംരക്ഷണ സമിതിയിലൂടെ സംഘത്തിലെത്തിയ മേനോൻ സാർ തുടർന്ന് സംഘത്തിന്റെ താലൂക്ക് ജില്ല വിഭാഗ് സംഘചാലകായി പ്രവത്തിച്ചതിനുശേഷമാണ് രണ്ട് പതിറ്റാണ്ടോളം കേരള പ്രാന്ത സംഘചാലകായി പ്രസ്ഥാനത്തിന് മാർഗനിർദേശം നൽകിയത്. ജില്ല സംഘചാലകനായിരിക്കെ തന്റെ തിരക്കിട്ട ഔദ്യോഗിക ജോലികൾക്കൊപ്പം പ്രഥമ വർഷ സംഘശിക്ഷാ വർഗ് പൂർത്തിയാക്കിയ അദ്ദേഹം തുടർന്ന് തുടർച്ചയായി ദ്വിതീയ തൃതീയ പരിശീലനവും പൂർത്തിയാക്കി സംഘചാലകന്മാർക്കും മുതിർന്ന കാര്യകർത്താക്കൾക്കും മാതൃകയായി. ഇതിൽ നിന്ന് പ്രേരണയുൾക്കൊണ്ട് നിരവധി മുതിർന്ന കാര്യകർത്താക്കൾ പരിശീലന വർഗുകൾക്ക് പോകാൻ തയ്യാറായി.
പ്രാന്ത സംഘചാലകനെന്ന നിലയിൽ സംസ്ഥാനത്തിന്റെ എല്ലാ ഭാഗത്തും പൂർണ്ണ സമയ പ്രവർത്തകനെ പോലെ യാത്ര ചെയ്തു. കേരളത്തിലെ മുഴുവൻ പ്രാന്തകാര്യകർത്താക്കളും ഹ്രസ്വകാല വിസ്താരകന്മാരായി ഇറങ്ങാൻ സംഘം ആവശ്യപ്പെട്ടപ്പോൾ സാധരണ സ്വയംസേവകനെപ്പോലെ അദ്ദേഹവും ആലപ്പുഴയിൽ വിസ്‌താരകനായി പ്രവർത്തിച്ചു. സംഘടനാ ബൈഠക്കുകളുടെ സമാരോപിൽ കാര്യകർത്താക്കളെ ചുരുങ്ങിയ വാക്കുകളിൽ തുടർച്ചയായി ഓർമിപ്പിച്ച ആശയങ്ങൾ സംഘം ഒരു കുടുംബമാണെന്നും പരസ്പരസ്നേഹം, വിശ്വാസം, കൂട്ടായ ചിന്തയും കൂട്ടായ പ്രവർത്തനവും ആണ് നമ്മുടെ വിജയത്തിന്റെ ആധാരം എന്നുമാണ്. ഈ ഗുണങ്ങൾ അദ്ദേഹത്തിന്റെ ജീവിതത്തിൽ തുടിച്ചു നിന്നു.

സംഘപ്രവർത്തനത്തിൽ നിഷ്ഠയോടെ പ്രവർത്തിക്കുന്നതോടൊപ്പം സ്വയംസേവകർ ഏറ്റെടുക്കേണ്ട സമൂഹത്തിന്റെ വിവിധ മേഖലയിലെ നിരവധി പ്രവർത്തനങ്ങൾക്ക് മാതൃകാപരമായി നേതൃത്വം നൽകാൻ മേനോൻ സാറിന് സാധിച്ചു. കേരളത്തിലെ ആദ്യത്തെ സേവാ സംരഭമായ മാതൃച്ഛായ ഉൾപ്പെടെ നിരവധി സേവാ പ്രവർത്തനങ്ങൾക്ക് നേതൃത്വം നൽകുന്ന ആലുവ കേന്ദ്രമാക്കി പ്രവർത്തിക്കുന്ന ഗ്രാമസേവാസമിതിയുടെ ഇന്നത്തെ വികാസത്തിന്റെ പ്രേരണാ സ്രോതസ് മേനോൻ സാറാണ്. തന്ത്ര വിദ്യാപീഠം, ബാലസംസ്ക്കാര കേന്ദ്രം, ഡോ. ഹെഡ്ഗേവാർ സ്മാരക സേവാസമിതി, വിദ്യാധിരാജ സ്കൂൾ, അന്താരാഷ്ട്ര ശ്രീകൃഷ്ണ കേന്ദ്രം, രാഷ്ട്രധർമ്മ പരിഷത്ത് തുടങ്ങി നിരവധി പ്രവർത്തനങ്ങൾക്ക് ആവശ്യമായ മാർഗദർശനവും സഹായ സഹകരണവും ആത്മവിശ്വാസവും പ്രേരണയും നൽകാൻ അദ്ദേഹത്തിന് കഴിഞ്ഞു.

സമ്പൂർണ്ണ സംഘശരണത്വമാണ് മേനോൻ സാറിന്റെ വിജയ രഹസ്യം. നിരവധി സാമൂഹ്യ സേവന പ്രവർത്തനങ്ങൾക്ക് മാർഗ നിർദ്ദേശം നൽകുന്നതോടൊപ്പം താൻ ഏറ്റെടുക്കുന്ന എല്ലാ പ്രവർത്തനത്തിനും തന്റെ സമർപ്പണം മാതൃകാപരമായി അദ്ദേഹം നടത്തി. പ്രാന്തസംഘചാലകന്നെന്ന നിലയിൽ സേവാ പ്രവർത്തനങ്ങൾക്ക് ജന്മഭൂമി, കേസരി പോലുള്ള മാധ്യമങ്ങളിലൂടെ സഹായം അഭ്യർതത്ഥിക്കുമ്പോൾ മേനോൻ സാറിന്റെ വിഹിതം പിറ്റേ ദിവസം തന്നെ പ്രാന്തകാര്യാലയത്തിൽ എത്തിക്കുകയെന്ന സാറിന്റെ
മാതൃക സ്വയംസേവകർക്ക് എന്നും പ്രേരണയാണ്.(ഇത്തരത്തിലുള്ള അനുഭവങ്ങൾ നിരവധിയാണ്). പ്രാന്തസംഘചാലകെന്ന നിലയിലും പ്രശസ്തനായ ചാർട്ടേർഡ് അക്കൗണ്ടന്റ് എന്ന നിലയിലും കേരളത്തിനകത്തും പുറത്തും വിപുലമായ സമ്പർക്കം അദ്ദേഹത്തിനുണ്ടായിരുന്നു.. നിരവധി പ്രമുഖ വ്യക്തികളെ മേനോൻ സാറിനോടൊപ്പം സമ്പർക്കം ചെയ്യാൻ അവസരം ലഭിച്ചു. കേരളത്തിലെ പ്രമുഖനായ ചാർട്ടേഡ് അക്കൗണ്ടിനെ സമ്പർക്കം ചെയ്തപ്പോഴുള്ള സാറിന്റെ വാക്കുകൾ ഇന്നും മുഴങ്ങി കേൾക്കുന്നുണ്ട്. സംഘത്തിലുള്ള അദ്ദേഹത്തിന്റെ വിശ്വാസവും സമർപ്പണവും ഓർമ്മപ്പെടുത്തുന്നവയാണവ. താങ്കളെ പോലുള്ള ഉന്നതനായ ഒരു പ്രഫഷണലിന് കാക്കി നിക്കറും ധരിച്ച് ഏങ്ങിനെ ഈ പ്രവർത്തനം ചെയ്യാൻ കഴിയും എന്ന ചോദ്യത്തിന് ഉത്തരം ഗൗരവത്തോടെ സ്പഷ്ടമാക്കുകയായിരുന്നു മേനോൻസാർ. നമ്മുടെ സമൂഹത്തിനും സംസ്ക്കാരത്തിനും രാഷ്ട്രത്തിനും വേണ്ടി ഒന്നും തിരിച്ച് പ്രതീക്ഷിക്കാതെ നിസ്വാർഥമായി പ്രവർത്തിക്കാൻ മനസ്സുള്ളവർക്കേ സംഘത്തിൽ പ്രവർത്തിക്കാൻ സാധിക്കൂ. അവസരവാദികൾക്കു സംഘത്തിൽ സ്ഥാനമില്ലെന്ന് കൂടി സരളമായി സ്നേഹപൂർവം മേനോൻ സാർ ഓർമ്മപ്പെടുത്തിയപ്പോൾ ആദരവോടെ എഴുന്നേറ്റ് നിന്ന് മേനോൻ സാറിനോട് അദ്ദേഹം പറഞ്ഞു, Balan, as a Professional CA l am Proud of you . ഇനി ഞാനെന്താണ് ചെയ്യേണ്ടത് എന്നദ്ദേഹം ചോദിച്ചപ്പോൾ ലക്ഷമീ ഭായ് ടവേഴ്സിന്റെ ഉൽഘാടനത്തിന് അദ്ദേഹത്തെ ക്ഷണിച്ചു. സന്തോഷപൂർവം പരിപാടിയിൽ അദ്ദേഹം പങ്കെടുത്തു. ഇത്തരത്തിൽ സമൂഹത്തിന്റെ വിവിധമേഖലകളിൽ പ്രവർത്തിക്കുന്ന അനേകായിരം പേരെ സംഘപ്രസ്ഥാനങ്ങളോടടുപ്പിക്കാൻ അദ്ദേഹത്തിന് കഴിഞ്ഞു.
ഇന്ന് കേരളത്തിൽ സേവന രംഗത്ത് പ്രവർത്തിക്കുന്ന സേവാഭാരതിയുടേയും
ഡോ ഹെഡ്ഗേവാർ സ്മാരക സമിതിയുടെയും നൂറ് കണക്കിന് സംഘ ട്രസ്റ്റുകളുടേയും പ്രവർത്തനം ഏകോപിപ്പിക്കുന്നതിലും കണക്കുകൾ കൃത്യമായി സൂക്ഷിക്കുന്നതിലും പ്രവർത്തനങ്ങൾ നിയമാനുസൃതമാക്കുന്നതിലും മേനോൻ സാറിന്റെ പങ്ക് അവിസ്മരണീയമാണ്. കേരളത്തിലെ നിരവധി ആധ്യാത്മിക സാമൂഹ്യ പ്രസ്ഥാനങ്ങളുമായി അദ്ദേഹത്തിന് അടുത്ത ബന്ധമുണ്ടായിരുന്നു. നിർണ്ണായക ഘട്ടങ്ങളിൽ അവയ്ക്ക് ആവശ്യമായ മാർഗദർശനവും സഹായസഹകരണങ്ങളും നൽകിയതിന്റെ അനുഭവങ്ങൾ ഒരു കുറിപ്പിൽ ഒതുക്കാനാവില്ല. ആത്മ നിർഭർ ഭാരത് ആശയം ചർച്ച ചെയ്യപ്പെടുന്നതിന് പതിറ്റാണ്ട്കൾക്ക് മുൻമ്പ് സാമ്പത്തിക തളർച്ച നേരിട്ട KPBF ഏറ്റെടുക്കാനും സാമ്പത്തിക സ്വാവലംബനത്തിന്റെ കേന്ദ്രമാക്കി മാറ്റാനും സാധിച്ചത് മോനോൻ സാറിന്റെ സാമ്പത്തിക മാനേജ്മെന്റ് വൈഭവവും ഉൾകാഴ്‌ചയും കാരണമാണ്.

ചുരുക്കത്തിൽ മേനോൻ സാറിന്റെ ജീവിതം ഓരോ സംഘപ്രവർത്തകനും സാമൂഹ്യ പ്രവർത്തകനും ഗൃഹപാഠമാക്കേണ്ട പുസ്തകമാണ്.
മേനോൻ സാറിൻ്റെ അനശ്വരമായ സ്മരണകൾക്ക് ഒന്നിൽ പ്രണാമം.
Janmabhumi Janam TV Kesari Weekly Vishwa Samvad Kendra Keralam

08/10/2026

#വന്ദേമാതരം ദ്വിദിന ദേശീയ സെമിനാർ സമാപിച്ചു.
കാസർകോട്: കേരള കേന്ദ്ര സർവകലാശാലയിൽ നടന്ന 'വന്ദേമാതരത്തിന്റെ 150-ാം വാർഷികം' സംബന്ധിച്ച രണ്ടുദിവസത്തെ ദേശീയ സെമിനാർ സമാപിച്ചു. സാഹിത്യ അക്കാദമി, അഖില ഭാരതീയ സാഹിത്യ പരിഷത്ത്, കേരള കേന്ദ്ര സർവകലാശാല (CUK) എന്നിവയുടെ സംയുക്ത ആഭിമുഖ്യത്തിൽ സംഘടിപ്പിച്ച സെമിനാർ, വന്ദേമാതരത്തിന്റെ ചരിത്രപരവും സാഹിത്യപരവും സാംസ്‌കാരികവുമായ പ്രാധാന്യം ചർച്ച ചെയ്തു.

സമാപന സമ്മേളനത്തിൽ കേരള-തമിഴ്‌നാട് ഗവർണർ രാജേന്ദ്ര വിശ്വനാഥ് അർലേക്കർ മുഖ്യാതിഥിയായി പങ്കെടുത്തു. വന്ദേമാതരത്തിന്റെ ചരിത്രം, അത് രചിക്കാനുണ്ടായ സാഹചര്യങ്ങൾ, ഭാരതത്തിൻ്റെ ദേശീയ പ്രസ്ഥാനത്തിൽ അതിനുണ്ടായ സ്വാധീനം എന്നിവയെക്കുറിച്ച് സമഗ്രമായ ഗവേഷണം നടത്തണമെന്നും, കണ്ടെത്തലുകൾ രേഖപ്പെടുത്തി ഭാവി തലമുറയ്ക്കായി പ്രസിദ്ധീകരിക്കണമെന്നും അദ്ദേഹം ആഹ്വാനം ചെയ്തു.

വന്ദേമാതരം കേവലം ഒരു ഗാനമല്ലെന്നും, സ്വാതന്ത്ര്യസമര കാലഘട്ടത്തിൽ രാജ്യത്തുടനീളമുള്ള ജനങ്ങളെ ഒന്നിപ്പിച്ച ദേശീയ ബോധത്തിന്റെ ശക്തമായ പ്രതീകമാണെന്നും ഗവർണർ പറഞ്ഞു. വന്ദേമാതരത്തിനെതിരായ പ്രതിഷേധങ്ങൾക്ക് പിന്നിലുള്ള ശക്തികളെയും ആശയങ്ങളെയും തിരിച്ചറിയണമെന്നും, സമൂഹം ജാഗ്രത പാലിക്കുകയും ഉചിതമായ സാമൂഹിക ഇടപെടലുകളിലൂടെ പ്രതികരിക്കുകയും വേണമെന്നും അദ്ദേഹം ഊന്നിപ്പറഞ്ഞു.
പ്രജ്ഞാ പ്രവാഹ് ദേശീയ സംയോജകൻ ജെ. നന്ദകുമാർ ഉദ്ഘാടന ചടങ്ങിൽ സംസാരിച്ചു.
പ്രൊഫ. സുനൈന സിംഗ് സമാപന പ്രസംഗം നടത്തി. സാഹിത്യ അക്കാദമി മലയാളം ഉപദേശക സമിതി കൺവീനർ കെ. പി. രാമനുണ്ണി, വൈസ് ചാൻസലർ പ്രൊഫ. സിദ്ധു പി. അൽഗൂർ, അഖില ഭാരതീയ സാഹിത്യ പരിഷത്ത് ജനറൽ സെക്രട്ടറി പവൻപുത്ര ബാദൽ, സാഹിത്യ അക്കാദമി എഡിറ്റർ (ഇംഗ്ലീഷ്) സ്നേഹ ചൗധരി എന്നിവരും ചടങ്ങിൽ സംസാരിച്ചു.

Vishwa Samvad Kendra Keralam Mahesh Velapoyil DrMadhu Meenachil Sudheesh Payyanur

08/10/2026

07/10/2026

കൃഷ്ണാര്‍പ്പണമായി എം.എ സാര്‍ അനുസ്മരണം

കൊച്ചി: കൃഷ്ണനായി ജനിച്ച് കൃഷ്ണസന്ദേശം നാടിന് പകര്‍ന്ന് നല്‍കി കൃഷ്ണപാദങ്ങളില്‍ അലിഞ്ഞുചേര്‍ന്ന എം.എ സാര്‍ അനുസ്മരണം അക്ഷരാര്‍ത്ഥത്തില്‍ കൃഷ്ണാര്‍പ്പണമായി മാറി. എം.എ കൃഷ്ണന്‍ ജീവിതത്തിന്റെ ഏറിയ പങ്കും ചെലവഴിച്ച എളമക്കര മാധവനിവാസിനോട് ചേര്‍ന്നുള്ള ഭാസ്‌കരീയത്തില്‍ നടന്ന അനുസ്മരണം അത്യന്തം ഹൃദയസ്പര്‍ശിയായിരുന്നു.


കൃഷ്ണതത്വം പ്രചരിപ്പിക്കുക എന്നത് ജീവിത ലക്ഷ്യമായി കണ്ട് ആ കൃഷ്ണ പാദങ്ങളില്‍ കേരളം മുഴുവന്‍ ഉണ്ണിക്കൃഷ്ണന്മാരെ കൊണ്ട് നിറച്ച ഒരു സാഫല്യമാണ് എം.എ. സാറിന്റേതെന്ന് ചടങ്ങില്‍ അധ്യക്ഷത വഹിച്ച സാഹിത്യകാരി ശ്രീകുമാരി രാമചന്ദ്രന്‍ പറഞ്ഞു. അദ്ദേഹം ഏല്‍പ്പിച്ച ചുമതല ഇന്നും തുടരുകയാണെന്നും അവര്‍ പറഞ്ഞു. എം.എ സാര്‍ എവിടെയായിരുന്നോ അവിടേയ്ക്ക് മഹത്തുക്കള്‍ ആകര്‍ഷിക്കപ്പെടുന്ന അസാധാരണ വ്യക്തിത്വമായിരുന്നുവെന്ന് പ്രജ്ഞാ പ്രവാഹ് ദേശീയ സംയോജകന്‍ ജെ. നന്ദകുമാര്‍ അനുസ്മരിച്ചു. എം.എ സാറിനെ സംബന്ധിച്ചിടത്തോളം മാധ്യമ പ്രവര്‍ത്തനം ഒരു തൊഴിലായിരുന്നില്ല, പകരം നമ്മുടെ നാടിന്റെ ഭാരതത്തിന്റെ സംസ്‌കാരത്തെ ജനങ്ങളിലേക്ക് എത്തിക്കാനുള്ള തപസായിരുന്നുവെന്ന് വി. മുരളീധരന്‍ എംഎല്‍എ അനുസ്മരിച്ചു. എംജി സര്‍വകലാശാല വൈസ് ചാന്‍സലര്‍ ഡോ. ഡി. മാവൂത്ത്, ശ്രീവത്സം ബാലഗോകുലം ഭാരവാഹി നന്ദഗോപന്‍. ജെ, ചിത്രകാരന്‍ അക്കിത്തം നാരായണന്‍, ഹിന്ദു ഐക്യവേദി സംസ്ഥാന അധ്യക്ഷന്‍ ആര്‍.വി. ബാബു, ശബരിമല കര്‍മ്മസമിതി ജനറല്‍ കണ്‍വീനര്‍ എസ്.ജെ.ആര്‍. കുമാര്‍, ആലുവ ബാലസംസ്‌കാര കേന്ദ്രം ചെയര്‍മാന്‍ പി.കെ. വിജയരാഘവന്‍, തൃപ്പൂണിത്തുറ നഗരസഭ ചെയര്‍മാന്‍ അഡ്വ. പി.എല്‍. ബാബു, ചിന്മയ ഇന്റര്‍നാഷണല്‍ ഫൗണ്ടേഷന്‍ ഡയറക്ടര്‍ ഡോ. എം.വി. നടേശന്‍, തപസ്യ സംസ്ഥാന വൈസ് പ്രസിഡന്റ് മുരളി പാറപ്പുറം, ബാലഗോകുലം സംസ്ഥാന അധ്യക്ഷന്‍ കെ.എന്‍. സജികുമാര്‍, ഡോ. പി. ശ്രീലത, ബിന്ദു വിജയകുമാര്‍ എന്നിവര്‍ സംസാരിച്ചു.

07/10/2026

രചന : പത്മശ്രീ പി. നാരായണക്കുറുപ്പ് | ആലാപനം : ഡോ. ലക്ഷ്മിദാസ്

06/10/2026

മുതിർന്ന പ്രചാരകനും രാഷ്ട്രീയ സ്വയംസേവക സംഘത്തിൻ്റെ മുൻ അഖില ഭാരതീയ സഹ പ്രചാരക് പ്രമുഖുമായ വിനോദ് കുമാർജി അന്തരിച്ചു
ആദരാഞ്ജലികൾ.
Kesari Weekly Vishwa Samvad Kendra Keralam Janam TV

05/10/2026

ജന്മനാട്ടിൽ നടന്ന എം. എ സാർ അനുസ്മരണത്തിൽ നിന്ന്
ഒരിക്കൽ ഒപ്പം നടന്നവരും ആ വാക്കുകൾ കേട്ടു വളർന്നവരും ആശയങ്ങൾ ജീവിതത്തിൽ ചേർത്തുപിടിച്ചവരും ഒരുമിച്ചെത്തിയപ്പോൾ ഐവർകാലയെന്ന ഗ്രാമം പ്രിയപ്പെട്ട എംഎ സാറിന്റെ ഓർമകളിൽ തുളുമ്പി. മുതിർന്ന ആർഎസ്എസ് പ്രചാരകനും ബാലഗോകുലം, തപസ്യ തുടങ്ങിയ സംഘടനകളുടെ സ്ഥാപകരിൽ ഒരാളുമായിരുന്ന എം.എ. കൃഷ്ണൻ (എം.എ. സാർ) അനുസ്മരണച്ചടങ്ങിലാണ് ജന്മനാട് സ്നേഹാർദ്രമായത്.ഐവർകാല പുത്തനമ്പലം വള്ളിവിള വീട്ടിൽ വൈകുന്നേരം നടന്ന അനുസ്മരണച്ചടങ്ങിന് പുഷ്പാർച്ചനയോടെയാണ് തുടക്കമായത്. പ്രിയപ്പെട്ട എം.എ. സാറിന്റെ ചിത്രത്തിനു മുന്നിൽ പുഷ്പങ്ങൾ അർപ്പിച്ച് കുട്ടികളും സഹപ്രവർത്തകരും ശിഷ്യരും സുഹൃത്തുക്കളും നാട്ടുകാരും അദ്ദേഹത്തിന്റെ ഓർമകൾക്ക് പ്രണാമമർപ്പിച്ചു.സംഘ പ്രസ്ഥാനത്തിന്റെയും സാംസ്കാരിക മേഖലയുടെയും വളർച്ചയ്ക്കായി ജീവിതം സമർപ്പിച്ച എം.എ. സാറിന്റെ പ്രവർത്തനങ്ങളും ആശയങ്ങളും അനുസ്മരണഭാഷണങ്ങളിൽ നിറഞ്ഞു. വ്യക്തിബന്ധങ്ങൾക്ക് അപ്പുറം തലമുറകളെ സ്വാധീനിച്ച അദ്ദേഹത്തിന്റെ ജീവിതത്തെക്കുറിച്ചുള്ള ഓർമകൾ ചടങ്ങിനെ വികാരനിർഭരമാക്കി. മനസ്സിലെ ആശയങ്ങളെ പ്രായോഗികമാക്കുവാനും അത് പുതുതലമുറയ്ക്ക് പകർന്നു നൽകുവാനും കഴിഞ്ഞ വ്യക്തിത്വം ആയിരുന്നു എംഎ സാറിന്റെതെന്ന് ചടങ്ങിൽ മുഖ്യഭാഷണം നടത്തിയ മുതിർന്ന പ്രചാരകൻ എസ്. സേതുമാധവൻ പറഞ്ഞു. അത്യന്തം ആഴത്തിലുള്ള ഭാവനകൾ കാണുവാനും ആ ഭാവനകളെ യാഥാർഥ്യമാക്കാനും അതിനായി കാര്യകർത്താക്കളെ നിശ്ചയിക്കാനും എം എ സാറിന് കഴിഞ്ഞു. ലോകമെമ്പാടും ബാലഗോകുലം ഒരു അത്ഭുതമായി മാറാൻ അദ്ദേഹത്തിന്റെ ഈ ദൃഢ നിശ്ചയത്തിലൂടെ സാധിച്ചു. പരിചയപ്പെടുന്നവരുടെ മനസ്സിൽ മായാത്ത മുദ്രകൾ പതിപ്പിക്കാൻ അദ്ദേഹത്തിന് സാധിച്ചു. എംഎ സാർ പകർന്നു നൽകിയ സ്നേഹം എന്നും ഓർമ്മിക്കപ്പെടുമെന്നും അദ്ദേഹം പറഞ്ഞു. കേരളത്തിന്റെ സാംസ്‌കാരിക തനിമയെ ആവിഷ്കരിച്ച് അവതരിപ്പിച്ച വ്യക്തിത്വം ആയിരുന്നു എം. എ സാറിന്റെതെന്ന് ആർഎസ്എസ് ദക്ഷിണ ക്ഷേത്രീയ കാര്യവാഹ് എം. രാധാകൃഷ്ണൻ അനുസ്മരണ പരിപാടിയിൽ പറഞ്ഞു. അക്കിത്തത്തെ പോലെയുള്ള മഹാകവികളുടെ വാക്കുകളിലൂടെ തന്നെ എംഎ സാറിന്റെ സംഘടനാ പ്രഭാവവും ആദർശങ്ങളും നമുക്ക് ദർശിക്കാൻ സാധിക്കും. നിശ്ചയിച്ചുറപ്പിക്കുന്ന കാര്യങ്ങളിൽ നിന്ന് അണുവിട മാറാത്ത വ്യക്തിത്വവുമായിരുന്നു അദ്ദേഹത്തിന്റെതെന്ന് എം. രാധാകൃഷ്ണൻ പറഞ്ഞു. കേരളത്തിന്‌ ഒരു സാംസ്‌കാരിക ഭദ്രത രൂപപ്പെടുത്താൻ എം. എ. സാറിനു കഴിഞ്ഞുവെന്ന് ചടങ്ങിൽ തപസ്യ സംസ്ഥാന ഉപാധ്യക്ഷൻ ആർ. പ്രസന്നകുമാർ പറഞ്ഞു. ബാലഗോകുലത്തിലൂടെ കുട്ടികളുടെ സർഗ്ഗാത്മകതയ്ക്ക് വേദിയൊരുക്കാൻ അദ്ദേഹത്തിന് സാധിച്ചു. കർമ്മത്തെ സാധനയാക്കിയ അദ്ദേഹം ചെന്ന് കാണുക, കൂടെ കൂട്ടുക എന്ന സൂത്രവാക്യം ജീവിതത്തിൽ പകർത്തിയിരുന്നതായും ആർ. പ്രസന്ന കുമാർ പറഞ്ഞു. തുടർന്ന് നിർവാണ ഷഡ്കം ചൊല്ലിയാണ് ചടങ്ങ് അവസാനിപ്പിച്ചത്.

05/10/2026

എം. ഏ സാർ അനുസ്‌മരണം കോഴിക്കോട് കേസരി ഭവനിൽ

04/10/2026

സ്വർഗ്ഗീയ #അശോക്_സിംഗാൾ ജിയുടെ ശതാബ്‌ദി വേളയിൽ സർകാര്യവാഹ് ആദരണീയനായ ദത്താത്രേയ ഹൊസബാളെയുടെ ലേഖനം.
(കേരള കൗമുദി, മെട്രോ വാർത്ത, മംഗളം, ജന്മഭൂമി, മനോരമ പത്രങ്ങളിൽ കാണാം)

ഭാരതത്തെ സംബന്ധിച്ചിടത്തോളം ഇതൊരു രാഷ്ട്രനിര്‍മ്മാണ ഘട്ടമാണ്. പുതിയ ആത്മവിശ്വാസത്തോടെ ഒരു നവീന ഭാരതം കെട്ടിപ്പടുക്കാന്‍ രാജ്യം മുഴുവന്‍ പ്രതിജ്ഞാബദ്ധമായിരിക്കുന്നു. ആത്മനിന്ദ നിറഞ്ഞിരുന്ന അവസ്ഥയില്‍ നിന്ന് ആത്മാഭിമാനത്തിലേക്കുള്ള യാത്രയിലാണ് ഭാരതം; നാടിന്റെ ആത്മബോധം ഉണര്‍ന്നു കഴിഞ്ഞു. ഈ പരിവര്‍ത്തനത്തെ ഭാരതത്തിന്റെ പുനരുത്ഥാനം എന്ന് വിശേഷിപ്പിക്കാം.
ഭാരതത്തിന്റെ ആത്മബോധം ഉണര്‍ത്തുന്നതിനും ഹിന്ദു സമൂഹത്തില്‍ ആത്മവിശ്വാസം വളര്‍ത്തുന്നതിനും അക്ഷീണം പ്രയത്‌നിച്ച മഹത്തുക്കളില്‍ അശോക് സിംഗാളിന്റെ സ്ഥാനം മുന്‍നിരയിലാണ്. സമൂഹം ആദരവോടെ അദ്ദേഹത്തെ ഹിന്ദു ഹൃദയ സാമ്രാട്ട് എന്ന് വിളിച്ചു. രാമജന്മഭൂമി പ്രസ്ഥാനത്തിന്റെയും ഹിന്ദു പുനരുത്ഥാനത്തിന്റെയും നായകനെന്ന് വിശേഷിപ്പിച്ചു. രാഷ്ട്രജാഗരണയജ്ഞത്തിന്റെ പോരാളി എന്ന് അഭിവാദ്യം ചെയ്തു. എല്ലാ വിശേഷണങ്ങള്‍ക്കുമപ്പുറം ഒറ്റവാക്കില്‍ പറഞ്ഞാല്‍ അശോക്ജി ഒരു കര്‍മ്മയോഗി ആയിരുന്നു.
ചെയ്തതെല്ലാം നിസ്വാര്‍ത്ഥ മനോഭാവത്തോടെയായിരുന്നു. കഠിനമായ പരിശ്രമത്തിലൂടെ നേടിയെടുത്ത വിജയങ്ങളുടെയൊന്നും അവകാശവാദം അദ്ദേഹം ഏറ്റെടുത്തില്ല. എല്ലാ നേട്ടങ്ങളും ഈശ്വരന് സമര്‍പ്പിച്ചു. വിജയത്തിന് പിന്നാലെയെത്തുന്ന പ്രശസ്തിയില്‍ നിന്ന് അകന്നുനിന്നു. ഉന്നതമായ അംഗീകാരങ്ങള്‍ ലഭിച്ചിട്ടും അദ്ദേഹം ഒരിക്കലും പ്രശസ്തി ആഗ്രഹിച്ചില്ല. അത്തരം പ്രശംസകള്‍ അദ്ദേഹത്തിന് അസ്വസ്ഥതയുണ്ടാക്കിയിരുന്നു. ആദരങ്ങള്‍ക്കും അപമാനങ്ങള്‍ക്കും കീര്‍ത്തിക്കും അപകീര്‍ത്തിക്കും അതീതനായി, സമചിത്തതയോടെ കര്‍മ്മപഥത്തില്‍ മുന്നേറുക എന്നത് ഒരു കര്‍മ്മയോഗിയുടെയും യഥാര്‍ത്ഥ സ്വയംസേവകന്റെയും ലക്ഷണമാണ്. ഈ ഗുണം അശോക്ജിയുടെ ജീവിതത്തില്‍ പ്രകടമായിരുന്നു.
വ്യക്തിപരമായ നേട്ടങ്ങള്‍ക്കായല്ല, രാഷ്ട്രസേവനത്തിനായാണ് അദ്ദേഹം സ്വന്തം പ്രതിഭ സമര്‍പ്പിച്ചത്. അസാമാന്യമായ കഴിവുകളും തീക്ഷ്ണമായ ബുദ്ധിശക്തിയും രാഷ്ട്രത്തിന്റെ ഉന്നമനത്തിനായി സമര്‍പ്പിച്ചു. ഉന്നതവും പ്രശസ്തവുമായ ഒരു കുടുംബത്തിലാണ് അദ്ദേഹം ജനിച്ചത്. സഹോദരന്മാരിലൊരാള്‍ ഇന്ത്യന്‍ പോലീസ് സര്‍വീസില്‍ സേവനമനുഷ്ഠിക്കുകയും ഉത്തര്‍പ്രദേശ് പോലീസ് മേധാവിയായി (ഡിജിപി) ഉയരുകയും ചെയ്തു; മറ്റു സഹോദരന്മാര്‍ വ്യവസായികളും സംരംഭകരുമായിത്തീര്‍ന്നു. അശോക് ജി ബനാറസ് ഹിന്ദു സര്‍വകലാശാലയില്‍ നിന്ന് മെറ്റലര്‍ജിയില്‍ എന്‍ജിനീയറിങ് പഠനം പൂര്‍ത്തിയാക്കി. വിജയകരമായ ഒരു വ്യക്തിഗത ഔദ്യോഗിക ജീവിതം കെട്ടിപ്പടുക്കാന്‍ നിരവധി അവസരങ്ങള്‍ ഉണ്ടായിരുന്നെങ്കിലും, ജീവിതം മുഴുവന്‍ രാഷ്ട്രസേവനത്തിനായി സമര്‍പ്പിക്കാനാണ് അദ്ദേഹം തീരുമാനിച്ചത്. യഥാര്‍ത്ഥത്തില്‍, ആത്മസാക്ഷാത്കാരം നേടിയ ഒരു ഉത്തമ സാധകനായിരുന്നു അദ്ദേഹം. സ്വാമി വിവേകാനന്ദനെപ്പോലെ തന്നെ, സ്വയം ഒന്നും ആഗ്രഹിക്കാതെ സമൂഹത്തിനും രാഷ്ട്രത്തിനും വേണ്ടി അദ്ദേഹം ജീവിതം ഉഴിഞ്ഞുവച്ചു. ആ ആത്മീയ സാധനയും കേന്ദ്രീകരിച്ചത് സമൂഹത്തിലും രാഷ്ട്രത്തിലുമായിരുന്നു. സംഘസംസ്‌കാരത്താല്‍ രൂപപ്പെട്ട വ്യക്തിത്വമായിരുന്നു അദ്ദേഹത്തിന്റേത്. വിദ്യാര്‍ത്ഥിയായിരിക്കുമ്പോള്‍ തന്നെ അശോക്ജി രാഷ്ട്രീയ സ്വയംസേവക സംഘവുമായി ബന്ധപ്പെട്ടു. ജീവിതത്തിന്റെ ആദ്യകാലങ്ങളില്‍, പ്രൊഫ. രാജേന്ദ്ര സിങ്ങിന്റെ (രജ്ജു ഭയ്യ) മാര്‍ഗനിര്‍ദ്ദേശം ലഭിക്കാനുള്ള ഭാഗ്യം അദ്ദേഹത്തിനുണ്ടായി. സ്വര്‍ഗീയ ഭാവുറാവു ദേവറസ് ഒരു വിദഗ്ദ്ധ ശില്പിയെപ്പോലെ അശോക്ജിയുടെ വ്യക്തിത്വത്തെ രൂപപ്പെടുത്തി. പൂജനീയ ഗുരുജിയുടെ മാര്‍ഗനിര്‍ദ്ദേശവും അദ്ദേഹത്തിന് ലഭിച്ചിരുന്നു.
ഈ മഹാന്മാരുടെ സ്വാധീനം അശോക്ജിയുടെ സമര്‍പ്പണബോധം, കഠിനാധ്വാനം, ദൃഢനിശ്ചയം, നിര്‍വഹണ മികവ്, സംഘടനാപാടവം, ദീര്‍ഘവീക്ഷണം എന്നിവയില്‍ പ്രതിഫലിച്ചിരുന്നു. എന്‍ജിനീയറിങ് വിദ്യാഭ്യാസം പൂര്‍ത്തിയാക്കിയ ഉടന്‍ തന്നെ അദ്ദേഹം ആര്‍എസ്എസ് പ്രചാരകനായി. ലഭിച്ച എല്ലാ ഉത്തരവാദിത്തങ്ങളും സമ്പൂര്‍ണ സമര്‍പ്പണത്തോടും കഠിനാധ്വാനത്തോടും കൂടി അദ്ദേഹം നിറവേറ്റി. ആ ഉത്തരവാദിത്തം നിര്‍വഹിക്കാന്‍ വേണ്ടിത്തന്നെ ജനിച്ചയാളാണ് അദ്ദേഹമെന്ന് തോന്നിപ്പിക്കുന്ന വിധത്തിലായിരുന്നു പ്രവര്‍ത്തനം.

വിരാടഹിന്ദു സമ്മേളനവും
വിശ്വഹിന്ദു പരിഷത്തും

ദല്‍ഹിയും ഹരിയാനയും ഉള്‍പ്പെടുന്ന ദല്‍ഹി പ്രാന്തത്തിന്റെ പ്രാന്ത പ്രചാരകനായിരുന്ന കാലത്താണ് മീനാക്ഷിപുരത്തെ ഇസ്ലാമിക മതപരിവര്‍ത്തന സംഭവങ്ങള്‍ രാജ്യത്തൊട്ടാകെ ആശങ്ക സൃഷ്ടിച്ചത്. ഹിന്ദു സമൂഹം ഉണര്‍ന്നേ മതിയാകൂ എന്ന ഉറച്ച ബോധ്യമാണ് ആ സംഭവം സൃഷ്ടിച്ചത്. ദല്‍ഹിയില്‍ 'വിരാട് ഹിന്ദു സമ്മേളനം' സംഘടിപ്പിക്കാനുള്ള ചുമതല അശോക് ജിയെ ഏല്‍പിച്ചു. ഡോ. കരണ്‍ സിങ് ഉള്‍പ്പെടെ സമൂഹത്തിന്റെ വിവിധ തുറകളിലുള്ളവരെ ഒന്നിപ്പിച്ചുകൊണ്ട് അദ്ദേഹം ആ സമ്മേളനം വിജയകരമാക്കി. അതിനുവേണ്ടി ആദരണീയരായ സന്യാസിവര്യന്മാരുടെ മാര്‍ഗനിര്‍ദേശപ്രകാരം, സമൂഹത്തിന്റെ വിവിധ വിഭാഗങ്ങളെ ഒരുമിപ്പിച്ചു. മികച്ച സംഘാടനപാടവത്തോടെ അത്തരമൊരു ബൃഹത്തായ പരിപാടി സംഘടിപ്പിച്ചതിലൂടെ, സമൂഹത്തെ ഏകോപിപ്പിക്കാനും അണിനിരത്താനുമുള്ള അദ്ദേഹത്തിന്റെ കഴിവ് എല്ലാവര്‍ക്കും ബോധ്യമായി.
മതപരിവര്‍ത്തനം എന്ന വെല്ലുവിളിക്കെതിരെ സമൂഹത്തെ ഉണര്‍ത്താന്‍ ഈ സമ്മേളനം സഹായിച്ചു. തുടര്‍ന്ന്, ധാര്‍മ്മികവും സാമൂഹികവുമായ മേഖലകളില്‍ കൂടുതല്‍ വ്യാപകമായ ഉണര്‍വ് സൃഷ്ടിക്കുന്നതിനായി വിശ്വഹിന്ദു പരിഷത്തിന്റെ ചുമതലയില്‍ അശോക്ജി നിയുക്തനായി. അര്‍പ്പണബോധത്തോടും ജാഗ്രതയോടും കൂടി അദ്ദേഹം ആ ഉത്തരവാദിത്തം ഏറ്റെടുത്തു. സാമൂഹിക സാഹചര്യങ്ങള്‍ മനസ്സിലാക്കുക, അവയെക്കുറിച്ച് ആഴത്തില്‍ ചിന്തിക്കുക, അതിനനുസൃതമായി പദ്ധതികള്‍ ആസൂത്രണം ചെയ്യുക, ആ പദ്ധതികള്‍ പ്രാവര്‍ത്തികമാക്കുക തുടങ്ങിയവ അദ്ദേഹത്തിന്റെ പ്രവര്‍ത്തനശൈലിയുടെ സവിശേഷതകളായി മാറി.

ഹിന്ദുഐക്യത്തിനുവേണ്ടി

നൂറ്റാണ്ടുകളായി ഹിന്ദു സമൂഹത്തിന് മുന്നിലുള്ള ഗുരുതരമായ വെല്ലുവിളിയാണ് അയിത്താചരണം. അയിത്തം അവസാനിപ്പിക്കാതെ, ഐക്യമുള്ള ഒരു സമൂഹമെന്ന കാഴ്ചപ്പാട് പൂര്‍ണ്ണമാകില്ല. ഈ വിഷയത്തിലുള്ള പ്രവര്‍ത്തനങ്ങളെ പന്തിഭോജനങ്ങളിലോ പ്രതീകാത്മക പരിപാടികളിലോ മാത്രമായി അശോക്ജി പരിമിതപ്പെടുത്തിയില്ല. അയിത്താചരണം ഹിന്ദുധര്‍മ്മത്തിന്റെ അടിസ്ഥാന ആദര്‍ശങ്ങള്‍ക്ക് അനുയോജ്യമല്ലെന്ന കാര്യം ഹിന്ദു സമൂഹത്തെ ബോധ്യപ്പെടുത്താന്‍ അദ്ദേഹം സന്യാസിവര്യന്മാരോട് അഭ്യര്‍ത്ഥിച്ചു. സന്യാസിമാര്‍ പട്ടികജാതി-വര്‍ഗ വിഭാഗങ്ങളുടെ കോളനികള്‍ സന്ദര്‍ശിക്കാന്‍ തുടങ്ങി; ഒപ്പം ഈ വിഷയത്തില്‍ പഠനങ്ങളും ചര്‍ച്ചകളും മുന്നോട്ട് കൊണ്ടുപോയി..
1989 നവംബര്‍ 9ന് അയോദ്ധ്യയിലെ രാമജന്മഭൂമി ക്ഷേത്രത്തിന്റെ ശിലാസ്ഥാപന ചടങ്ങില്‍, പട്ടികജാതി വിഭാഗത്തില്‍പ്പെട്ട കാമേശ്വര്‍ ചൗപാല്‍ വഹിച്ച പങ്ക് സാമൂഹിക ഐക്യമെന്ന ഈ വിശാലമായ സന്ദേശത്തിന്റെ ഭാഗമായിരുന്നു. ആ ചടങ്ങില്‍ നിരവധി സന്യാസിമാരും ധര്‍മ്മാചാര്യന്മാരും സന്നിഹിതരായിരുന്നു. അതുപോലെ തന്നെ, വാരണാസിയില്‍ ശ്മശാനത്തില്‍ ചിതയൊരുക്കുന്ന ഡോം സമൂഹത്തിന്റെ നേതാവ് ഡോം രാജയുടെ വസതിയില്‍ സംന്യാസിശ്രേഷ്ഠരെത്തി ഭക്ഷണം കഴിച്ചത് സാമൂഹികസമരസതയുടെ മികവുറ്റ ഉദാഹരണമായി. ഈ പരിശ്രമങ്ങളിലൂടെ സാമൂഹിക വിവേചനം അവസാനിപ്പിക്കാനും ഒരുമയുള്ള ഒരു ഹിന്ദു സമൂഹം കെട്ടിപ്പടുക്കാനും കഴിയുമെന്ന വിശ്വാസം സമൂഹത്തില്‍ ബലപ്പെട്ടു.

രാമജന്മഭൂമി പ്രസ്ഥാനം

ആധുനിക ഭാരതത്തിലെ ഏറ്റവും വ്യാപകമായ സാമൂഹിക-ധാര്‍മിക മുന്നേറ്റങ്ങളില്‍ ഒന്നായിരുന്നു രാമജന്മഭൂമി പ്രസ്ഥാനം. 1980കള്‍ മുതല്‍ 2019ലെ സുപ്രീം കോടതി വിധിയും തുടര്‍ന്നുണ്ടായ രാമക്ഷേത്ര നിര്‍മ്മാണവും വരെ ഈ പ്രസ്ഥാനം പല സുപ്രധാന ഘട്ടങ്ങളിലൂടെയും കടന്നുപോയി. രാം-ജാനകി രഥയാത്ര, ശിലാപൂജ, ചരണ-പാദുക പൂജ, രാമജ്യോതി തുടങ്ങിയ പരിപാടികള്‍ രാജ്യത്തിന്റെ വിവിധ ഭാഗങ്ങളില്‍ വ്യാപകമായ ജനകീയ ഉണര്‍വ് സൃഷ്ടിച്ചു. ഈ പ്രസ്ഥാനത്തിലുടനീളം അശോക്ജി അതീവ നിര്‍ണായകമായ പങ്ക് വഹിച്ചു. 1990ലെ കര്‍സേവയും നിരവധി പ്രവര്‍ത്തകരുടെ ത്യാഗവും ഈ മുന്നേറ്റത്തില്‍ നിര്‍ണായകമായി. പ്രതികൂല സാഹചര്യങ്ങളിലും അശോക്ജിയുടെ ഉറച്ച വിശ്വാസം കാര്യകര്‍ത്താക്കള്‍ക്ക് പ്രചോദനമായി. ഇത് ഭഗവാന്‍ രാമന്റെ കാര്യമാണ്, അദ്ദേഹം ഈ കാര്യം പൂര്‍ത്തിയാക്കുകതന്നെ ചെയ്യുമെന്ന് അശോക്ജി ദൃഢമായി വിശ്വസിച്ചു.
അദ്ദേഹത്തിന്റെ ജീവിതകാലത്ത് ക്ഷേത്രനിര്‍മ്മാണം പൂര്‍ത്തിയായില്ലെങ്കിലും, പതിറ്റാണ്ടുകളോളം അദ്ദേഹം ദിശാബോധവും കരുത്തും ഊര്‍ജ്ജവും നല്‍കിയ പ്രസ്ഥാനം ലക്ഷ്യപ്രാപ്തിയിലെത്തി. 2019 നവംബര്‍ 9ലെ സുപ്രീം കോടതി വിധിയെത്തുടര്‍ന്ന്, ശ്രീരാമജന്മഭൂമിയില്‍ ക്ഷേത്രം നിര്‍മ്മിക്കുന്നതിനുള്ള വഴി തെളിഞ്ഞു. 2020 ഓഗസ്റ്റ് അഞ്ചിന് ഭൂമിപൂജ നടന്നു, 2024 ജനുവരി 22ന് ശ്രീരാം ലല്ലയുടെ പ്രാണപ്രതിഷ്ഠയും നടന്നു. ഇന്ന് അവിടെ ഒരു മഹാക്ഷേത്രം നിലകൊള്ളുന്നു.

അതിനുമപ്പുറം

രാമജന്മഭൂമി പ്രസ്ഥാനത്തില്‍ മാത്രം ഒതുങ്ങിനില്‍ക്കുന്നതല്ല അശോക്ജിയുടെ സ്വാധീനം. രാമജന്മഭൂമി പ്രസ്ഥാനത്തിന്റെ പ്രധാന നേതാക്കളിലൊരാളായാണ് അറിയപ്പെട്ടതെങ്കിലും അദ്ദേഹത്തിന്റെ പ്രവര്‍ത്തനമണ്ഡലം അതിനപ്പുറത്തേക്ക് വ്യാപിച്ചുകിടന്നിരുന്നു. രാമസേതു സംരക്ഷണം, അമര്‍നാഥ് യാത്ര, ഗോ-ഗവേഷണവും ഗോസംരക്ഷണവും, സാമൂഹിക സമരസത, ഹിന്ദു ചിന്താധാരയുമായി ബൗദ്ധിക ലോകത്തെ കൂട്ടിയിണക്കല്‍, വിവിധ സാമൂഹിക-ദേശീയ വിഷയങ്ങളില്‍ അവബോധം സൃഷ്ടിക്കല്‍ തുടങ്ങി നിരവധി മേഖലകളില്‍ അദ്ദേഹത്തിന്റെ മുന്‍കൈയും മാര്‍ഗ്ഗനിര്‍ദ്ദേശവും ശ്രദ്ധേയമായിരുന്നു.
ലോഹശാസ്ത്രത്തിലാണ്(മെറ്റലര്‍ജി) ശാസ്ത്രജ്ഞനായിരുന്നതെങ്കിലും സമൂഹത്തിന്റെ സ്വഭാവം, ശേഷി, വെല്ലുവിളികള്‍ എന്നിവയെക്കുറിച്ചും അദ്ദേഹത്തിന് ആഴത്തിലുള്ള ധാരണയുണ്ടായിരുന്നു. ശാസ്ത്രീയ വീക്ഷണം, സംഘടനാപാടവം, ആത്മീയവും ദേശീയവുമായ ബോധം എന്നിവയുടെ സംയോജനമായിരുന്നു അദ്ദേഹത്തിന്റെ പ്രവര്‍ത്തനശൈലി.

ദീര്‍ഘവീക്ഷണം

ലക്ഷ്യം പൂര്‍ത്തിയാക്കി മടങ്ങുകയായിരുന്നില്ല അദ്ദേഹത്തിന്റെ പ്രവര്‍ത്തനശൈലി. അതിന്റെ തുടര്‍പ്രവര്‍ത്തനത്തിലേക്ക് അദ്ദേഹം കടക്കുമായിരുന്നു. സമൂഹത്തിന് മുന്നിലുള്ള ഓരോ വെല്ലുവിളിയും ഏറ്റെടുക്കുകയും പരിഹരിക്കുന്നതിനായി സമൂഹത്തെ സംഘടിപ്പിക്കാന്‍ സ്വയം സമര്‍പ്പിക്കുകയും ചെയ്തു. അദ്ദേഹത്തിന് സംഘടന ഒരു മാര്‍ഗ്ഗവും, സമൂഹം ലക്ഷ്യവും രാഷ്ട്രസേവനം ജീവിതോദ്ദേശ്യവുമായിരുന്നു.
വ്യക്തിജീവിതത്തിനുള്ള സാധ്യതകള്‍ ഉപേക്ഷിച്ച് അദ്ദേഹം രാഷ്ട്രസേവനം തിരഞ്ഞെടുത്തു. പ്രശസ്തി നേടിയെങ്കിലും അതില്‍നിന്നെല്ലാം അദ്ദേഹം അകന്നുനിന്നു. നേതൃത്വം നല്‍കിയെങ്കിലും ഒരിക്കലും അതിന്റെ ക്രെഡിറ്റ് സ്വന്തമാക്കാന്‍ ശ്രമിച്ചില്ല. കഠിനമായി പരിശ്രമിച്ചു, പക്ഷേ ഒരിക്കലും അത് വ്യക്തിപരമായ നേട്ടത്തിനല്ലായിരുന്നു. അതുകൊണ്ടാണ് അശോക് സിംഗാള്‍ ജിയുടെ ജീവിതം കേവലം ഒരു വ്യക്തിയുടെ കഥയല്ലാതാകുന്നത്. അത് സമര്‍പ്പണത്തിന്റെയും ആത്മീയ അന്വേഷണത്തിന്റെയും, സംഘാടനത്തിന്റെയും, കര്‍മ്മയോഗത്തിന്റെയും പ്രചോദനാത്മകമായ അധ്യായമാണ്.
ഭാരതത്തിന്റെ ഇന്നത്തെ ഉയിര്‍ത്തെഴുന്നേല്‍പ്പിന് തപസ്സുകൊണ്ടും ത്യാഗംകൊണ്ടും പരിശ്രമംകൊണ്ടും സംഭാവന നല്‍കിയ മഹാന്‍മാരില്‍ അശോക്ജിക്ക് സുപ്രധാന സ്ഥാനമുണ്ട്. ഹിന്ദു സമൂഹത്തിലാകെ ആത്മവിശ്വാസം വളര്‍ത്തുന്നതിനും സാമൂഹിക ഐക്യം മുന്നോട്ട് കൊണ്ടുപോകുന്നതിനും ദേശീയ ബോധം ശക്തിപ്പെടുത്തുന്നതിനുമായി അദ്ദേഹം ജീവിതം സമര്‍പ്പിച്ചു. അതുകൊണ്ട്, രാമജന്മഭൂമി പ്രസ്ഥാനത്തിന്റെ മഹാനായ നാകന എന്ന നിലയില്‍ മാത്രം അദ്ദേഹത്തെ കാണുന്നത് ആ വ്യക്തിത്വത്തിന്റെ വ്യാപ്തിയെ പരിമിതപ്പെടുത്തുന്നതിന് തുല്യമാകും. വാസ്തവത്തില്‍, അദ്ദേഹം ഒരു കര്‍മ്മയോഗിയായിരുന്നു - വരുംതലമുറകള്‍ക്ക് എന്നും പ്രചോദനമേകുന്ന ജീവിതം നയിച്ച ഒരാള്‍.

Vishva Hindu Parishad -VHP DrMadhu Meenachil Janmabhumi Kummanam Rajasekharan
Metro Vartha Mangalam Newspaper Keralakaumudi Kesari Weekly Sudheesh Payyanur Mathrubhumi @