02/10/2026
കൊച്ചിൻ കോർപ്പറേഷന്റെ പരിധിയിലുള്ള 76 ഡിവിഷനുകളിൽ നിന്നും ഡയപ്പർ, സാനിറ്ററി പാഡുകൾ എന്നിവ ശേഖരിച്ച് സുരക്ഷിതമായി സംസ്കരിക്കുന്നതിനായി പ്രത്യേക വാതിൽപടി സേവനത്തിന് തുടക്കം കുറിച്ച് കോർപ്പറേഷൻ.
സക്സസ് ഗ്രൂപ്പുമായി സഹകരിച്ചാണ് പദ്ധതി നടപ്പിലാക്കുന്നത്. പദ്ധതിയുടെ ഭാഗമായി സക്സസ് ഗ്രൂപ്പ് നൽകിയ 10 പുതിയ വാഹനങ്ങളുടെ ഫ്ലാഗ് ഓഫ് കർമ്മം കൊച്ചി മേയർ അഡ്വ. മിനിമോൾ വി.കെ. നിർവഹിച്ചു.
കോർപ്പറേഷനിലെ ഓരോ ഡിവിഷനിൽ നിന്നും ആഴ്ചയിൽ ഒരുദിവസം വീതം നിശ്ചയിച്ചാണ് ഡയപ്പറും സാനിറ്ററി പാഡുകളും ശേഖരിക്കുക. ഇതിനായി പ്രത്യേക ദിവസങ്ങളിൽ വാഹനങ്ങൾ അതത് ഡിവിഷനുകളിലെ വീടുകളിൽ നേരിട്ടെത്തും. ഇങ്ങനെ ശേഖരിക്കുന്ന മാലിന്യങ്ങൾ ബ്രഹ്മപുരത്ത് പ്രവർത്തിക്കുന്ന സാനിറ്ററി ഇൻസിനറേറ്റർ പ്ലാന്റുകളിൽ എത്തിച്ച് ശാസ്ത്രീയമായി സംസ്കരിക്കാനാണ് തീരുമാനം. നഗരത്തിലെ മാലിന്യസംസ്കരണ രംഗത്ത് വലിയൊരു മാറ്റത്തിന് ഈ പദ്ധതി വഴിതെളിക്കുമെന്ന് മേയർ വ്യക്തമാക്കി.
ഡെപ്യൂട്ടി മേയർ വി.ആർ. സുധീർ അധ്യക്ഷത വഹിച്ചു. ആരോഗ്യകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സീന ഗോകുലൻ, സ്റ്റാൻഡിംഗ് കമ്മിറ്റി അധ്യക്ഷരായ ആന്റണി പൈനുതറ, ടി.കെ. അഷ്റഫ്, ഷാകൃത സുരേഷ് ബാബു, അഡ്വ. പി.എം. നസീമ, കെ.എ. മനാഫ്, ജിസ്മി ജെറാൾഡ്, സക്സസ് ഗ്രൂപ്പ് എം.ഡി. രാജീവ് നമ്പ്യാർ, കൊച്ചി കോർപ്പറേഷൻ സെക്രട്ടറി പി.എസ്. ഷിബു എന്നിവർ സംസാരിച്ചു.
