09/10/2020
''ഹസ്ത ലാ വിക്തോറിയ സിയംബ്രേ' '(ഞങ്ങള് വിജയം വരെ പോരാട്ടം തുടരും)
അടിസ്ഥാനവര്ഗ്ഗത്തിന്റെ ജീവിതവും യാതനകളും അടുത്തറിഞ്ഞാണ് ഏണസ്റ്റോ ചെഗുവേര സാമ്രാജ്യത്വ വിരുദ്ധ പോരാട്ടങ്ങളുടെ നായകനാകുന്നത്. ലാറ്റിനമേരിക്കന് രാജ്യങ്ങളിലൂടെ നടത്തിയ യാത്രകള് അദ്ദേഹത്തിന്റെ ജീവിതം തന്നെ മാറ്റിമറിച്ചു. ലാറ്റിനമേരിക്കന് ജനതയെ അടിമകളെ പോലെ ചൂഷണം ചെയ്ത അമേരിക്കന് ഭരണകൂടത്തിനും കുത്തകകള്ക്കുമെതിരെ സായുധ വിപ്ലവം നയിച്ചു.
ക്യൂബയില് മര്ദ്ദകവാഴ്ച നടത്തിയ ബാറ്റിസ്റ്റയും ചെയുടെ വിപ്ലവത്തിന്റെ ചൂടറിഞ്ഞു. ഫിദല് കാസ്ട്രോയുടെ മുന്നണിയില് ചേര്ന്ന ചെഗുവേര ക്യൂബയില് സ്വാതന്ത്ര്യത്തിന്റെ പതാക ഉയര്ത്തി. ക്യൂബയുടെ തലവനായി ഫിദലും വ്യവസായ ധനകാര്യ മന്ത്രിയും നാഷണല് ബാങ്കിന്റെ പ്രസിഡന്റുമായി ചെഗുവേരയും ചുമതലയേറ്റു. എന്നാല് ചെ അവിടെ ഒതുങ്ങിനിന്നില്ല. അനീതിക്കെതിരായുള്ള പോരാട്ടത്തിന്, അടിച്ചമര്ത്തപ്പെട്ടവര്ക്കിടയിലേക്ക് അദ്ദേഹം യാത്ര തുടര്ന്നു. ബൊളീവിയയില് സാമ്രാജ്യത്വത്തിനെതിരെ പടനയിച്ചു.
കൊല്ലപ്പെടുന്നതിനു മുന്പുള്ള തടവറ ജീവിതകാലത്തും അദ്ദേഹം ചിന്തിച്ചത് വിപ്ലവത്തിന്റെ അനശ്വരതയെക്കുറിച്ചായിരുന്നു. കാലമിത്ര കഴിഞ്ഞിട്ടും ലോകമെമ്പാടും പോരാളികള്ക്ക് പ്രതീക്ഷയും ആവേശവുമാണ് ഏണസ്റ്റോ ചെ ഗുവേര. മരണത്തിനിപ്പുറവും ലോകത്തിന്റെ വിപ്ലവസൂര്യനായി ഏണസ്റ്റോ ജ്വലിച്ചു നില്ക്കുന്നു.
