18/01/2026
#താലൂക്ക്സെമിനാർ
പാവങ്ങളുടെ മനുഷ്യപക്ഷ വായന സമൂഹത്തെ നവീകരിക്കുന്നു:
കരുനാഗപ്പള്ളി: വിക്ടർ യൂഗോ 1862 ൽ എഴുതി നൂറ് വർഷത്തിന് മുൻപ് നാലപ്പാട്ട് നാരായണമേനോൻ പരിഭാഷപ്പെടുത്തിയ പാവങ്ങൾ എന്ന നോവൽ ഇന്നും മനുഷ്യനെ നവീകരിക്കുന്ന കൃതിയാണെന്ന് കാപ്പക്സ് ചെയർമാൻ എം. ശിവശങ്കരപ്പിള്ള പറഞ്ഞു.
പാവങ്ങൾ എന്ന നോവലിൻ്റെ മലയാള പരിഭാഷയുടെ നൂറാം വാർഷികത്തോടനുബന്ധിച്ച് കരുനാഗപ്പള്ളി താലൂക്ക് ലൈബ്രറി കൗൺസിൽ സംഘടിപ്പിച്ച സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മുൻമന്ത്രി മുല്ലക്കര രത്നാകരൻ വിഷയാവതരണം നടത്തി. താലൂക്ക് ലൈബ്രറി കൗൺസിൽ പ്രസിഡൻ്റ് കടത്തൂർ മൻസൂർ അധ്യക്ഷനായി. താലൂക്ക് കൗൺസിൽ സെക്രട്ടറി വി വിജയകുമാർ ആമുഖാവതരണം നടത്തി. ജില്ലാ എക്സിക്യൂട്ടീവ് അംഗം വി പി ജയപ്രകാശ് മേനോൻ, വിജയമ്മ ലാലി, ആർ കെ ദീപ, എ സജീവ് എന്നിവർ സംസാരിച്ചു.
കരുനാഗപ്പള്ളി താലൂക്ക് ലൈബ്രറി കൗൺസിൽ സംഘടിപ്പിച്ച ബാലോത്സവം, മുതിർന്നവരുടെയും കുട്ടികളുടെയും വനിതകളുടേയും വായനാ മത്സരങ്ങൾ എന്നിവയിൽ വിജയിച്ചവർക്കുള്ള സമ്മാനദാനവും നടന്നു.
