09/07/2026
നിങ്ങളുടെ കുട്ടികളുടെ ആധാർ രജിസ്ട്രേഷനും ബയോമെട്രിക് പുതുക്കലും സമയബന്ധിതമായി പൂർത്തിയാക്കേണ്ടത് അത്യന്താപേക്ഷിതമാണ്.
📍കുട്ടികളുടെ ആധാർ രജിസ്ട്രേഷൻ (0 മുതൽ 5 വയസ്സ് വരെ)
നവജാത ശിശുക്കൾക്ക് വളരെ എളുപ്പത്തിൽ ആധാർ എൻറോൾ ചെയ്യാവുന്നതാണ്.
അഞ്ച് വയസ്സിന് താഴെയുള്ള കുട്ടികൾക്ക് രജിസ്ട്രേഷൻ സമയത്ത് ബയോമെട്രിക് വിവരങ്ങൾ നൽകേണ്ടതില്ല. കുട്ടിയുടെ പേര് ചേർത്ത ജനന സർട്ടിഫിക്കറ്റ് മാത്രം ഉപയോഗിച്ച് ഈ രജിസ്ട്രേഷൻ തികച്ചും സൗജന്യമായി പൂർത്തിയാക്കാൻ സാധിക്കും.
📍നിർബന്ധിത ബയോമെട്രിക് പുതുക്കൽ (5 വയസ്സിലും 15 വയസ്സിലും)
കുട്ടികൾക്ക് അഞ്ച് വയസ്സിലും പതിനഞ്ച് വയസ്സിലും ബയോമെട്രിക് വിവരങ്ങൾ നിർബന്ധമായും പുതുക്കേണ്ടതുണ്ട്. കൃത്യസമയത്ത് ഇത് ചെയ്തില്ലെങ്കിൽ ആധാർ കാർഡ് അസാധുവാകാൻ സാധ്യതയുണ്ട്.
സ്കൂൾ/കോളേജ് അഡ്മിഷൻ, സ്കോളർഷിപ്പ്, പാൻ കാർഡ്, ഡിജിലോക്കർ, APAAR ID, NEET / JEE / KEAM രജിസ്ട്രേഷൻ തുടങ്ങിയ സേവനങ്ങൾ തടസമില്ലാതെ ലഭിക്കാൻ ഇത് അത്യന്താപേക്ഷിതമാണ്. സെപ്റ്റബർ 2026 വരെ ഈ സേവനം തികച്ചും സൗജന്യമായി പൊതുജനങ്ങൾക്ക് ലഭ്യമാണ്.
📍മൊബൈൽ, ഇ-മെയിൽ അപ്ഡേറ്റ് ചെയ്യൽ
വിവിധ സർക്കാർ ഓൺലൈൻ സേവനങ്ങൾ കൃത്യമായി ലഭിക്കുന്നതിന് നിലവിലെ മൊബൈൽ നമ്പറും ഇ-മെയിൽ ഐഡിയും ആധാറുമായി ബന്ധിപ്പിച്ചിട്ടുണ്ടെന്ന് ഉറപ്പുവരുത്തുക. ഡിസംബർ 2026 വരെ ആധാർ ആപ്പ് വഴി ഇത് സൗജന്യമായി അപ്ഡേറ്റ് ചെയ്യാവുന്നതാണ്.
📍ഈ സേവനങ്ങൾ എവിടെ ലഭിക്കും?
സംസ്ഥാനത്തെ അക്ഷയ കേന്ദ്രങ്ങൾ വഴിയും മറ്റ് അംഗീകൃത ആധാർ കേന്ദ്രങ്ങൾ വഴിയും പുതിയ ആധാർ എടുക്കാനും, ബയോമെട്രിക് പുതുക്കാനും, മൊബൈൽ നമ്പർ അല്ലെങ്കിൽ ഇമെയിൽ എന്നിവ മാറ്റുന്നതിനുമുള്ള സൗകര്യങ്ങൾ ഒരുക്കിയിട്ടുണ്ട്.
📍കൂടുതൽ വിവരങ്ങൾക്ക്
സിറ്റിസൺ കോൾ സെന്റർ: 1800-4251-1800 / 0471-2335523
കേരള സ്റ്റേറ്റ് ഐ.ടി. മിഷൻ (ആധാർ സെക്ഷൻ): 0471-2525442
ഇ-മെയിൽ: [email protected]
