20/02/2026
തദ്ദേശസ്ഥാപനങ്ങളെ സർക്കാർ ശ്വാസം മുട്ടിക്കുന്നു : അഡ്വ. ഇ വി രാമകൃഷ്ണൻ
ശ്രീകണ്ഠപുരം : ശമ്പള ബില്ലുകൾ ഒഴികെ മറ്റൊരു ബില്ലും പാസാക്കരുത് എന്ന് സർക്കാർ നിർദ്ദേശം നൽകുന്നതിലൂടെയും, തദ്ദേശ ദിനാഘോഷം എന്നപേരിൽ ഉദ്യോഗസ്ഥർക്ക് അനാവശ്യ ചുമതല നൽകുന്നതിലൂടെയും തദ്ദേശസ്ഥാപനങ്ങളെ സംസ്ഥാന സർക്കാർ ശ്വാസംമുട്ടിക്കുകയാണെന്ന് ശ്രീകണ്ഠാപുരം നഗരസഭ ചെയർപേഴ്സൺ അഡ്വ ഇ വി രാമകൃഷ്ണൻ പ്രസ്താവനയിൽ അറിയിച്ചു. സാധാരണഗതിയിൽ മാർച്ച് മാസം മാത്രമാണ് ട്രഷറികളിൽ നിയന്ത്രണം ഏർപ്പെടുത്താറുള്ളത്. എന്നാൽ ഇത്തവണ ഫെബ്രുവരി ആദ്യം തന്നെ അപ്രഖ്യാപിത നിയന്ത്രണം സർക്കാർ ട്രഷറികളിൽ ഏർപ്പെടുത്തിയിരുന്നു. നിലവിൽ അമ്പതിനായിരം രൂപയ്ക്ക് മുകളിലുള്ള ബില്ലുകൾക്ക് നിയന്ത്രണം ഏർപ്പെടുത്തി എന്നാണ് മനസ്സിലാക്കുന്നത്. നിലവിൽ നഗരസഭ ഉൾപ്പടെ പദ്ധതി പൂർത്തീകരണത്തിന്റെ അവസാന ഘട്ടത്തിലും അടുത്ത വർഷത്തേക്കുള്ള പദ്ധതി ആവിഷ്കരണത്തിന്റെ പ്രാരംഭ ഘട്ടത്തിലും ആണ്.
കൂടാതെ തദ്ദേശ ദിനാഘോഷം എന്ന പേരിൽ ഉദ്യോഗസ്ഥർക്ക് അധിക ചുമതല നൽകിയിരിക്കുന്നതും തദ്ദേശസ്ഥാപനങ്ങളുടെ ദൈനംദിന പ്രവർത്തനങ്ങളെ സാരമായി ബാധിക്കുന്ന ഒന്നാണ്. മാർച്ച് മാസം ആദ്യം നിയമസഭാ തിരഞ്ഞെടുപ്പ് വിജ്ഞാപനം വരാനിരിക്കെ സർക്കാർ നടത്തുന്ന ഈ നടപടി അംഗീകരിക്കാൻ ആവില്ലെന്നും ഇതിൽ പ്രതിഷേധം അറിയിക്കുന്നു എന്നും അദ്ദേഹം കൂട്ടിച്ചേർത്തു .
