21/08/2026
*বানপানী সমস্যাৰ স্থায়ী সমাধানৰ দাবীত যোৰহাটত চিপিআই(এম) ৰ দাবী দিৱসঃ মুখ্যমন্ত্ৰীলৈ স্মাৰক পত্ৰ প্ৰদান*
চিপিআই(এম) দলৰ অসম ৰাজ্যিক কমিটিৰ আহ্বান মৰ্মে ২১ আগষ্ট তাৰিখে যোৰহাটত চিপিআই(এম) য়ে বানপানী সমস্যাৰ স্থায়ী সমাধান বিচাৰি বিক্ষোভ কাৰ্যসূচী সংগঠিত কৰে। কাৰ্যসূচীৰ অংশ হিচাপে আজি চিপিআই(এম) ৰ যোৰহাট জিলা কাৰ্যালয়ত অৰ্ধ শতাধিক লোক সমবেত হৈ এটা প্ৰতিবাদী মিচিল উলিয়াই জিলা আয়ুক্তৰ কাৰ্যালয়ত ধৰ্ণা কাৰ্যসূচী ৰূপায়ন কৰে। ইয়াৰ পিছত ডঃ পিনাকী সেনগুপ্ত আৰু ৰাজেন মহন্তৰ নেতৃত্বত যোৱা দলৰ এটা প্ৰতিনিধি দলে জিলা আয়ুক্তৰ জড়িয়তে মুখ্যমন্ত্ৰীলৈ স্মাৰক-পত্ৰ প্ৰেৰণ কৰে। দলৰ এটা বিবৃতিযোগে কোৱা হয় যে, যোৱা ১৯ জুলাইৰ পৰা শিৱসাগৰ, চৰাইদেউ, যোৰহাট আৰু পৰৱৰ্তী সময়ত গোলাঘাটকে ধৰি কেইবাখনো জিলাত বানপানীয়ে যি অকল্পনীয় ৰূপ ধাৰণ কৰিলে, তাৰ বিষময় পৰিণতি এতিয়াও জনসাধাৰণে ভুগি থাকিবলগীয়া হৈছে। এই জনপ্ৰলয়ৰ সঠিক আৰু সুনিৰ্দিষ্ট কাৰণ এতিয়াও চৰকাৰে ৰাজহুৱা কৰা নাই। কিন্তু ভৱিষ্যতে এনেধৰণৰ বিপৰ্যয় ৰোধ কৰিবলৈ সঠিক অনুসন্ধানৰ অতীৱ প্ৰয়োজন। অঞ্চলটোৰ বাসিন্দাসকলৰ অভিমত হ'লঃ প্ৰাকৃতিক কাৰকবোৰৰ লগতে নগালেণ্ড আৰু অসমত হোৱা অবৈধ খনন আৰু পৰিৱেশ ধ্বংসই এই জলপ্ৰলয় সৃষ্টিত যথেষ্ট অৰিহণা যোগাইছে। অসমৰ দাঁতিকাষৰীয়া ৰাজ্য আৰু ভূটানত নিৰ্মিত বৃহৎ নদীবান্ধবোৰেও অসমৰ বিভিন্ন অঞ্চলত বানপানীৰ প্ৰকোপ বৃদ্ধিত অৰিহণা যোগাইছে। ক্ষতিৰ পৰিমাণ আৰু গভীৰতালৈ লক্ষ্য কৰিলে এনেবোৰ ক্ষেত্ৰত চৰকাৰী নীতিৰ পৰিৱৰ্তন যে দৰকাৰ, সেয়া স্পষ্ট। চিপিআই(এম)ৰ দৃঢ় অভিমত হ'ল যে ক্ষয়ক্ষতিৰ পৰিমাণ আৰু চৰিত্ৰ বিবেচনা কৰি এই জলপ্ৰলয়ক জাতীয় দুৰ্যোগ (National Disaster)হিচাপে ঘোষণা কৰিব লাগিব। অসমৰ বানপানী সমস্যাৰ সৈতে যিহেতু দাঁতি-কাষৰীয়া দেশ আৰু ৰাজ্যৰ পৰিৱেশ আৰু কৰ্মকাণ্ড সাঙোৰ খাই আছে, সেয়ে ইয়াক ৰাষ্ট্ৰীয় সমস্যা হিচাপে বিবেচনা কৰি স্থায়ী সমাধানৰ ব্যৱস্থা কৰিব লাগিব।
এই প্ৰেক্ষাপটত অহা ২১ আগষ্টত চিপিআই(এম)ৰ পক্ষৰ পৰা অসম চৰকাৰৰ জৰিয়তে কেন্দ্ৰীয় চৰকাৰৰ ওচৰত উত্থাপন কৰিব লগা দাবী কেইটা হ'লঃ (১) উজনি অসমৰ বানপানীৰ কাৰকসমূহ চিহ্নিত কৰাৰ বাবে বিশেষজ্ঞ কমিটি গঠন আৰু নিৰ্ধাৰিত সময়ত প্ৰতিবেদন দাখিল, (২) উজনি অসমৰ এই বানপানীক জাতীয় দুৰ্যোগ (National Disaster) হিচাপে ঘোষণা কৰা, (৩) অসমৰ ওপৰত সামগ্ৰিক প্ৰভাৱ (cumulative effect) সঠিকভাৱে নিৰ্ণয় নকৰা পৰ্যন্ত দাঁতিকাষৰীয়া ৰাজ্য সমূহত নিৰ্মিয়মান বৃহৎ নদীবান্ধসমূহৰ নিৰ্মাণ স্থগিত ৰখা আৰু (৪) অসমৰ বানপানী সমস্যাক ৰাষ্ট্ৰীয় সমস্যা হিচাপে বিবেচনা কৰি স্থায়ী সমাধানৰ বাবে সময় নিৰ্ধাৰিত কাৰ্যসূচী ঘোষণা কৰা।
ৰাজ্য চৰকাৰৰ ওচৰত চিপিআই(এম)ৰ দাবীসমূহ হ'লঃ (১)বানৰ ফলত নিহতৰ পৰিয়াললৈ অন্ততঃ ২০ লাখ টকা সাহায্য প্ৰদান, (২)ক্ষতিগ্রস্ত প্ৰতিটো পৰিয়ালক শীঘ্ৰে এক লাখ টকাকৈ এককালীন সাহায্য, (৩) সম্পূর্ণভাৱে ধ্বংস বা নষ্ট হোৱা পঁকী বা কেঁচা ঘৰৰ বাবে ক্ষতিপূৰণৰ পৰিমাণ অন্ততঃ ১০ লাখ টকালৈ বৃদ্ধি, বেয়াকৈ ক্ষতিগ্ৰস্ত ঘৰৰ বাবে অন্ততঃ ৫লাখ টকা নিৰ্ধাৰণ, (৪) শস্যহানি, গৱাদি পশুৰ মৃত্যুৰ বাবে নিৰ্ধাৰিত ক্ষতিপূৰণৰ পৰিমাণ বৃদ্ধি, (৫)বানপীড়িত পৰিয়াললৈ ছমাহ বিনামূলীয়া খাদ্য যোগান,
(৬)বানত ক্ষতিগ্ৰস্ত কৃষকে পুনৰ খেতি কৰিব পৰাকৈ চৰকাৰে বিনামূলীয়াকৈ কঠিয়া যোগান ধৰাৰ বাবে জৰুৰী ব্যৱস্থা গ্ৰহণ, (৭)ক্ষতিগ্ৰস্ত অঞ্চলবোৰত মহামাৰী ৰোধ কৰা, মানুহ আৰু জীৱ-জন্তুৰ বাবে উপযুক্ত চিকিৎসা সেৱা আগবঢ়োৱা, (৮)বানে গৰকা গাঁওবোৰত চৰকাৰৰ উদ্যোগত অন্ততঃ ২০০দিনৰ কাম নিশ্চিত কৰা, (৯) বানত ক্ষতিগ্ৰস্ত শিক্ষানুষ্ঠান, অংগনৱাড়ী কেন্দ্ৰ মেৰামতিৰ বাবে বিশেষ পুঁজিৰ আবণ্টন, ছাত্ৰ-ছাত্ৰীলৈ বিনামূলীয়া ইউনিফৰ্ম আৰু কিতাপ-বহী, বিশেষ আৰ্থিক অনুদানৰ ব্যৱস্থা আৰু (১০)বানত বেয়াকৈ ক্ষতিগ্ৰস্ত সকলৰ ঋণ মকুব কৰা।
