03/02/2026
নিচা দূৰীকৰণ আৰু পুনৰ সংস্থাপন কেন্দ্ৰ, গোলাঘাটে "নিচাযুক্ত আৰু মাদক দ্ৰব্য নিবাৰণী সপ্তাহ"ৰ সফল উদযাপন সমাপ্ত কৰে। যোৱা ইংৰাজী ০২/০২/২০২৬ তাৰিখে জিলা সমাজ কল্যাণ বিভাগ, গোলাঘাটৰ সহযোগত গোলাঘাট জিলা শ্বহীদ কুশল কোঁৱৰ অসামৰিক চিকিৎসালয় আৰু গোলাঘাট জিলা আয়ুক্তৰ কাৰ্যালয়ৰ সমীপত নিচাযুক্ত দ্ৰব্যৰ বিৰুদ্ধে সজাগতা বিষয়ক দুখনি বাটৰ নাট অনুষ্ঠিত কৰা হয়। লগতে আজি ইং ০৩/০২/২০২৬ তাৰিখে চান্দমাৰি উচ্চ মাধ্যমিক বিদ্যালয় গোলাঘাটত এখনি সজাগতা সভা অনুষ্ঠিত কৰা হয়। উক্ত সভাত গোলাঘাট শ্বহীদ কুশল কোঁৱৰ অসামৰিক চিকিৎসালয়ৰ মানসিক ৰোগ বিভাগৰ শ্ৰী বুল্টি শইকীয়া (Clinical Psychologist) উপস্থিত থাকি ছাত্ৰ-ছাত্ৰীসকলক সকলক মাদক দ্ৰব্যৰ অপকাৰিতা আৰু ইয়াৰ পৰিণতিৰ বিষয়ে বহুমূলীয়া বক্তব্য আগবঢ়ায়। ইয়াৰ লগতে উক্ত সভাত বিদ্যালয়ৰ প্ৰধান শিক্ষক শ্ৰী অনুক কুমাৰ শৰ্মা, শ্ৰীমতী জ্যোতি বৰুৱা গগৈ (স্থানীয় নাগৰিক), নিচা দূৰীকৰণ আৰু পুনৰ সংস্থাপন কেন্দ্ৰ গোলাঘাটৰ প্ৰকল্প সমন্বয়ক আৰু কৰ্মচাৰীবৃন্দ উপস্থিত থকাৰ লগতে বিদ্যালয়ৰ শিক্ষক-শিক্ষয়িত্ৰী সকলে সহায়-সহযোগ আগবঢ়ায়।
