30/05/2021
*स्वत:हून व्हिटॅमिनच्या गोळ्या खात आहात का? मग बातमी आपण वाचलीच पाहिजे!*
संकलन... साहेबराव माने.
9028261973
प्रतिकारशक्ती कमी होऊन आपल्याला कोरोना होईल या भीतीमुळे कित्येक लोक स्वत:हून व्हिटॅमिनच्या गोळ्या घेऊ लागले आहेत. परंतु ते अत्यंत धोेकादायक आहे. अशा गोळ्यांचे ओव्हरडोस घेण्याने किडनीवर दुष्परिणाम होऊ शकतात, असे मत तज्ज्ञ डॉक्टरांनी व्यक्त केले आहे. नैसर्गिक आहारातून मिळणारी जीवनसत्त्वेच घ्या, असा सल्ला त्यांनी दिला आहे.
कोरोनामुळे अनेकांची प्रतिकारशक्ती कमी होते. असे लोक डॉक्टरांच्या सल्ल्यानुसार औषधे तसेच जीवनसत्त्वे असणार्या गोळ्या घेतात; पण ज्यांना कोरोना झाला नाही, असे लोकही प्रतिकारशक्ती कमी होऊन कोरोना होईल या भीतीने स्वत:हून औषधाच्या दुकानात जाऊन अ, ब, क, ड, ई आदी प्रकारची जीवनसत्त्वे असणार्या गोळ्या घेतात. मात्र हे जर डॉक्टरांच्या सल्ल्याविना घेतले तर त्याचे दुष्परिणाम शरीरावर होऊ शकतात.
व्हिटॅमिन डी टॉक्सिसिटी
व्हिटॅमिन डीच्या ओव्हरडोसमुळे हायपर कॅल्सेमिया होतो. रक्तात कॅल्शियमचे प्रमाण आवश्यकतेपेक्षा जास्त वाढते. भूक न लागणे, मानसिक तणाव, डोकेदुखी, थकवा, वारंवार तहान लागणे, बद्धकोष्ठता ही लक्षणे त्यांच्यात दिसतात. किडनीवरही परिणाम होतो. हाडांच्या तक्रारी उद्भवतात. याला व्हिटॅमिन डी टॉक्सिसिटी म्हणतात.
‘व्हिटॅमिन डी’चे स्रोत
अंडी, दही, ताक, ज्यूस, चीज, मासे यातून आपल्याला व्हिटॅमिन डी जीवनसत्त्व मिळते. त्यामुळे आपला मूळचा नैसर्गिक आहार चांगला असेल तर या गोळ्या घेणे कटाक्षाने टाळावे.
‘व्हिटॅमिन बी’चे स्रोत
मटण, अंडी, दूध, चिकन, दही, डाळी, कडधान्य, सूर्यफूल तेल आदी.
‘व्हिटॅमिन बी’चे दुष्परिणाम
अंगावर पुरळ येणे, अपचन, उलटी, सौम्य जुलाब होणे, पायाला मुंग्या येणे, उच्च रक्तदाब, सतत मूड बदलणे.
‘व्हिटॅमिन ई’चे स्रोत
गहू, सूर्यफूल सोयाबीन तेल, बदाम, शेंगदाणे, बिट, भोपळा, हिरव्या भाज्या.
‘व्हिटॅमिन ई’चे दुष्परिणाम
रक्त पातळ होणे, मेंदूत रक्तस्राव, डोकेदुखी, उलटी, मळमळ, थकवा आदी लक्षणे दिसतात.
‘व्हिटॅमिन ए’चे स्रोत
मासे व माशाचे तेल, दूध, अंडी, फळे, पालेभाज्या, गाजर, रताळे, टोमॅटो, डाळी यातून व्हिटॅमिन ए मिळते.
‘व्हिटॅमिन ए’चे दुष्परिणाम
व्हिटॅमिन एची मात्रा जास्त झाली तर द़ृष्टीमध्ये बदल होणे, हाडे दुखणे, यकृताला इजा होणे, मेंदूवरील ताण वाढणे ही लक्षणे दिसतात. रक्त तपासणी केल्यावरच त्याचे प्रमाण कळते.
‘व्हिटॅमिन सी’चे दुष्परिणाम
पाण्यात विद्राव्य आहे. ते शरीरात साचून राहत नाही. ते लगेच बाहेर पडते. व्हिटॅमिन सी वरून घेतले तरीही पचनक्रिया बिघडणे, मुतखडा, हगवण, मळमळ अशी लक्षणे दिसू शकतात.
‘व्हिटॅमिन सी’चे स्रोत
लिंबूवर्गीय फळे, संत्री, मोसंबी, लिंबू, आवळा, अननस, आंबा, पपई, स्ट्रॉबेरी, पेरू यातून व्हिटॅमिन सी मिळते. याचा आहारात वापर करावा..
