05/12/2021
আগন্তুক বৰ্ষৰ ডিব্ৰুগড় পৌৰসভাৰ নিৰ্বাচনৰ বাবে ডিব্ৰুগড়ৰ নাগৰিকৰ হোমৱৰ্ক কৰাৰ সময় সমাগত৷
বিগত নিৰ্বাচনত যিসকল ৱাৰ্ড কমিচনাৰক নিৰ্বাচন কৰি পঠিয়াইছিল, তেওঁলোক সামগ্ৰিকভাৱেে ডিব্ৰুগড়বাসীৰ আশা আকাংক্ষাক ৰূপায়িত কৰাত ব্যৰ্থই নহয়, লগতে দূৰ্নীতিৰ বজাৰ মেলি ডিব্ৰুগড়ৰ বদনাম আনিলে আৰু লগতে অকৰ্মণ্যতাৰ পৰিচয় দিলে যাৰ বাবে সেই পৌৰ নিগমে নিজৰ কাৰ্যকাল সম্পূৰ্ণ কৰিব নোৱাৰিলে৷ ডিব্ৰুগড়বাসী ৰাইজ প্ৰতাৰিত হ’ল৷
এই একে নাটকৰ পুনৰাবৃত্তি নহ’বলৈ দল-নিৰ্বিশেষে সকলো যোৱা নিৰ্বাচনৰ ৱাৰ্ড কমিচনাৰক এইবাৰৰ নিৰ্বাচনত নিৰ্বাচিত নকৰাটো ডিব্ৰুগড়ৰ নাগৰিকৰ প্ৰথম দায়িত্ব হোৱা উচিত আৰু প্ৰতিটো ৰাজনৈতিক দল এইক্ষেত্ৰত কঠোৰ হোৱাটো প্ৰয়োজন৷
ডিব্ৰুগড় নগৰখনৰ সামগ্ৰিক উন্নয়নত পৌৰসভাৰ ভূমিকা বহুত আৰু সঠিক ব্যক্তিয়ে যদি ২২টা ৱাৰ্ডক দল নিৰ্বিশেষ প্ৰতিনিধিত্ব কৰে তেতিয়াহে সেইয়া সম্ভৱ হ’ব৷ Participatory Democracy ত তৃণমূল পৰ্যায়ৰ পৌৰসভা, পঞ্চায়ত আদিক সৱলীকৰণ আৰু পাৰদৰ্শী কৰাত নাগৰিকৰ ভূমিকা থাকে, কিন্তু বিভিন্ন কাৰণত নাগৰিকৰ নিৰ্লিপ্ততাত অকৰ্মণ্য প্ৰতিনিধিক সকলোৱে এই অনুষ্ঠানবোৰত পঠিয়াই আহিছে৷ যোৱাবাৰ ডিব্ৰুগড়ৰ পৌৰসভা এটা জ্বলন্ত উদাহৰণ৷
পাছত দুখ কৰি থকাতকৈ এতিয়াই নিজৰ নিজৰ ৱাৰ্ডত একো একোজন যোগ্য প্ৰতিনিধিক চিনাক্ত কৰো আঁহক যি “ৱাৰ্ড কমিচনাৰ“ সংস্হাপন তথা ঠিকা-ঠুকলি আহৰণৰ আহিলা হিচাপে নলৈ, এক সেৱাৰ মনোভাৱেৰে ডিব্ৰুগড় নগৰক এক পাৰদৰ্শী চহৰলৈ পৰ্যবসিত কৰিবলৈ পোৱা এক সুযোগ বুলিহে গণ্য কৰে৷
0
