Collectorate Dhule - जिल्हाधिकारी कार्यालय धुळे, Garud Baag, Dhule, Maharashtra, Dhule (2026)

16/07/2026

जल जीवन मिशनच्या कामांना गती द्यावी!

जिल्ह्यात जल जीवन मिशन अंतर्गत सुरू असलेल्या पाणीपुरवठा योजनांच्या कामांना गती देण्याच्या सूचना जिल्हाधिकारी भाग्यश्री विसपुते (भा.प्र.से) यांनी दिल्या.

जिल्हाधिकारी कार्यालयातील सातपुडा सभागृहात जिल्हा पाणी व स्वच्छता मिशन समितीची बैठक संपन्न झाली. यावेळी जिल्हाधिकारी भाग्यश्री विसपुते (भा.प्र.से) बोलत होत्या. बैठकीस जिल्हा परिषदेचे मुख्य कार्यकारी अधिकारी बाबासाहेब बेलदार, ग्रामीण पाणी पुरवठा विभाग कार्यकारी अभियंता जयश्री सार्वे, भूजल सर्वेक्षण व विकास यंत्रणेचे वरिष्ठ भूवैज्ञानिक गिरीषकुमार भोरे यांच्यासह संबंधित विभागांचे अधिकारी उपस्थित होते.

जिल्हाधिकारी भाग्यश्री विसपुते (भा.प्र.से) यांनी सांगितले की, प्रत्येक ग्रामीण कुटुंबाला सुरक्षित व स्वच्छ पिण्याचे पाणी उपलब्ध करून देणे हा जल जीवन मिशनचा मुख्य उद्देश असून, त्यासाठी सुरू असलेली कामे निर्धारित वेळेत पूर्ण करणे अत्यंत आवश्यक आहे. प्रलंबित कामांचा तातडीने निपटारा करावा, तांत्रिक मंजुरीचे प्रस्ताव सादर करावे. योजनेचा नियमित आढावा घ्यावा. अपुर्ण कामे त्वरीत पुर्ण करावी. ज्या योजनेची कामे पुर्ण झाली आहेत अशा कामाची चाचणी (ट्रायल रन ) घ्यावी. कामपुर्ण झाल्याचे प्रमाणपत्र ग्रामपंचायतीकडून घ्यावे.

जिल्हा परिषदेचे मुख्य कार्यकारी अधिकारी श्री.बेलदार म्हणाले की, जलजीवन मिशनच्या कामांना नियमित भेटी द्याव्यात. मंजूर कामाचे त्रयस्थ परीक्षण करावे. स्विच रुमचे कामे त्वरीत पुर्ण करावी. बैठकीत योजनांच्या प्रगतीचा सविस्तर आढावा घेण्यात आला.

15/07/2026

जिल्हास्तरीय राष्ट्रीय आरोग्य अभियान नियामक समितीची बैठक संपन्न

जिल्ह्यातील सर्व आरोग्य संस्थांमध्ये नागरिकांना दर्जेदार, सुलभ व वेळेवर आरोग्य सेवा उपलब्ध करून देण्यास प्राधान्य द्यावे, असे निर्देश जिल्हाधिकारी भाग्यश्री विसपुते (भा.प्र.से.) यांनी दिले.

राष्ट्रीय आरोग्य अभियान (एनएचएम) अंतर्गत जिल्हास्तरीय नियामक समितीची बैठक आज जिल्हाधिकारी कार्यालयातील नियोजन सभागृहात जिल्हाधिकारी भाग्यश्री विसपुते (भा.प्र.से.) यांच्या अध्यक्षतेखाली संपन्न झाली. बैठकीस जिल्हा परिषदेचे मुख्य कार्यकारी अधिकारी बाबासाहेब बेलदार, जिल्हा आरोग्य अधिकारी डॉ. सचिन बोडके, जिल्हा शल्यचिकित्सक डॉ. रविंद्र सोनवणे, जिल्हा कार्यक्रम अधिकारी अजय फडोळ, हिरे वैद्यकीय महाविद्यालयाचे अधीक्षक डॉ. अजित पाठक आदी उपस्थित होते.

जिल्हाधिकारी भाग्यश्री विसपुते (भा.प्र.से.) म्हणाल्या की, शासनाच्या विविध आरोग्य योजनांचा लाभ प्रत्येक पात्र लाभार्थ्यापर्यंत पोहोचविण्यासाठी सर्व अधिकारी व कर्मचाऱ्यांनी समन्वयाने कार्य करावे. योजनांच्या अंमलबजावणीत कोणताही विलंब होणार नाही, याची दक्षता घ्यावी. गरोदर मातांची ऑनलाइन नोंदणी वेळेत पूर्ण करून त्यांची नियमित आरोग्य तपासणी करावी. लसीकरणानंतर आवश्यक ऑनलाइन डेटा नोंद तात्काळ पूर्ण करावी. तसेच रुग्णांना विहित वेळेत रुग्णवाहिका उपलब्ध करून देण्याची व्यवस्था सक्षम ठेवावी.

माता व बालकांच्या लसीकरणाची नोंद यू-विन (U-WIN) पोर्टलवर 24 तासांच्या आत करावी. शासकीय रुग्णालयांतील प्रसूतींचे प्रमाण वाढविण्यासाठी विशेष प्रयत्न करावेत. गावागावात व प्राथमिक आरोग्य केंद्रांमध्ये आरोग्य शिबिरे आयोजित करून नागरिकांची नियमित तपासणी करावी. राष्ट्रीय बाल स्वास्थ्य अभियानांतर्गत शाळा, वसतिगृहे व आश्रमशाळांमधील विद्यार्थ्यांची आरोग्य तपासणी नियमितपणे करावी. आयुष्मान भारत कार्ड नोंदणीसाठी विशेष शिबिरे आयोजित करावीत. जननी सुरक्षा योजनेतील लाभार्थ्यांना अनुदानाची रक्कम वेळेत वितरित करावी. तसेच मातामृत्यू व बालमृत्यूचा नियमित आढावा घेऊन आवश्यक उपाययोजना कराव्यात. तालुका वैद्यकीय अधिकारी, वैद्यकीय अधिकारी व कर्मचाऱ्यांना कोणत्याही अडचणी असल्यास त्या तातडीने वरिष्ठांच्या निदर्शनास आणाव्यात, असेही त्यांनी सांगितले.

09/07/2026

मतदार यादी विशेष सखोल पुनरीक्षण (SIR)

जिल्हाधिकारी भाग्यश्री विसपुते (भा. प्र. से.) यांनी दिली घरभेट, मतदार पडताळणी प्रक्रियेची केली पाहणी, नागरिकांशी साधला संवाद*

भारत निवडणूक आयोगाच्या निर्देशानुसार सुरू असलेल्या मतदार यादी विशेष सखोल पुनरीक्षण (SIR) कार्यक्रमांतर्गत जिल्हाधिकारी भाग्यश्री विसपुते (भा. प्र. से.) यांनी आज धुळे शहरातील नटराज चित्रपट गृह, शांतीनगर परिसरात प्रत्यक्ष घरभेट देऊन मतदार पडताळणी प्रक्रियेची पाहणी केली. तसेच नागरिकांशी संवाद साधला.

यावेळी अपर जिल्हाधिकारी सुभाष बोरकर, उपविभागीय अधिकारी रोहन कुवर , महानगरपालिका अतिरिक्त आयुक्त करुणा डहाळे, उप जिल्हा निवडणूक अधिकारी गंगाराम तळपाडे, जिल्हा कार्यक्रम अधिकारी अजय फडोळ ,अपर तहसीलदार वैशाली हिंगे, नगरसेवक प्रतीक कर्पे , छोटू थोरात, माजी महापौर प्रदीप कर्पे, जयश्री अहिरराव, मतदार नोंदणी अधिकारी किशोर कदम आदी उपस्थित होते.

जिल्हाधिकारी भाग्यश्री विसपुते यांनी नागरिकांशी संवाद साधत मतदार पडताळणी यादीसंदर्भात येणाऱ्या अडचणी, आवश्यक कागदपत्रे, अर्ज भरण्याची प्रक्रिया तसेच मतदार यादीतील नाव, पत्ता व इतर तपशील अद्ययावत करण्याबाबत माहिती जाणून घेतली. नागरिकांच्या शंकांचे निरसन केले. त्यांनी नागरिकांना मतदार यादीत आपली नोंद अचूक असल्याची खात्री करून घरी येणाऱ्या मतदान केंद्रस्तरीय अधिकारी सहकार्य करण्याचे आवाहन केले. यावेळी तरुणींनी Enumeration फॉर्म भरुन जिल्हाधिकारी भाग्यश्री विसपुते यांच्याकडे सुपूर्त केला.

तसेच संबंधित मतदान केंद्रस्तरीय अधिकारी यांनी मतदार पडताळणीचे काम अचूक, पारदर्शक व वेळेत पूर्ण करण्याबरोबरच नागरिकांना आवश्यक ते मार्गदर्शन करावे, बीएलओ यांनी पत्रकावर घरगणना नंबर, सेन्सेक्स नंबर ( मॅपिंग ) टाकावा. बीएलओ यांनी दोन दिवसात यांनी शंभर टक्के काम पूर्ण करुन तात्काळ आपली माहिती अपलोड करावी, अशा सूचनाही जिल्हाधिकाऱ्यांनी दिल्या.
Election Commission of India Chief Electoral Officer

04/07/2026

सुलवाडे-जामफळ-कनोली उपसा सिंचन योजनेची जिल्हाधिकारी भाग्यश्री विसपुते (भा. प्र. से.) यांनी केली पाहणी!

धुळे जिल्ह्यातील महत्त्वाकांक्षी सुलवाडे- जामफळ- कनोली उपसा सिंचन योजनेची जिल्हाधिकारी भाग्यश्री विसपुते (भा. प्र. से.) यांनी आज प्रत्यक्ष पाहणी करून प्रकल्पाच्या कामांचा आढावा घेतला.

यावेळी त्यांनी प्रकल्पातील विविध कामांची प्रगती, कालव्यांची उभारणी, पंपगृहाची स्थिती, बंदिस्त नलिका पाईपलाईन तसेच प्रलंबित कामांचा सविस्तर आढावा घेतला. संबंधित अधिकाऱ्यांनी कामांच्या सद्यस्थितीबाबत माहिती दिली.

जिल्हाधिकारी भाग्यश्री विसपुते (भा. प्र. से.)
यांनी कामांची गुणवत्ता राखून प्रलंबित कामे नियोजित कालावधीत पूर्ण करण्याच्या सूचना संबंधित यंत्रणेला दिल्या. तसेच प्रकल्पाच्या अंमलबजावणीत कोणत्याही प्रकारचा विलंब होणार नाही, याची दक्षता घेण्याचे निर्देश दिले.

सुलवाडे-जामफळ-कनोली उपसा सिंचन योजना पूर्ण झाल्यानंतर धुळे जिल्ह्यातील मोठ्या क्षेत्राला सिंचनाची सुविधा उपलब्ध होणार असून शेतकऱ्यांच्या कृषी उत्पादनात वाढ होण्यास मदत होणार आहे. त्यामुळे प्रकल्पाची कामे गतीने आणि दर्जेदार पद्धतीने पूर्ण करण्यावर भर देण्याच्या सूचना जिल्हाधिकारी भाग्यश्री विसपुते (भा. प्र. से.) यांनी दिल्या.

पाहणीदरम्यान सुलवाडे जामफळ कनोली उपसा सिंचन कार्यकारी अभियंता संदीप पवार,लघुपाटबंधारे विभाग धुळे,कार्यकारी अभियंता स्वप्निल गांगुर्डे , तहसीलदार शिंदखेडा नितीन कुमार देवरे, सहाय्यक कार्यकारी अभियंता विक्रम पवार, सहाय्यक अभियंता विशाल खैरनार,संबंधित विभागाचे अधिकारी, अभियंते तसेच प्रकल्पाशी संबंधित अधिकारी उपस्थित होते.

01/07/2026

एकल महिलांचे अभिप्राय व सूचना संकलित करण्यासाठी आज बहुउद्देशीय सभागृह, पोलीस प्रशिक्षण केंद्र, धुळे येथे कार्यशाळेचे आयोजन करण्यात आले होते. त्यावेळी जिल्हाधिकारी भाग्यश्री विसपुते (भा. प्र. से.) बोलत होत्या. यावेळी महानगरपालिकेच्या अतिरिक्त आयुक्त करुण डहाळे, जिल्हा परिषदेचे जिल्हा कार्यक्रम अधिकारी (महिला व बाल विकास) अजय फडोळ, जिल्हा महिला व बाल विकास अधिकारी राजेंद्र भामरे, राज्य उत्पादन शुल्क विभागाच्या अधीक्षक स्वाती काकडे, तहसीलदार (संजय गांधी योजना) हंसराज पाटील, परीविक्षा अधिकारी गिरीश जाधव, साई प्रतिष्ठान ,धुळेचे शरद पाटील, यमुनाई शैक्षणिक व सांस्कृतिक महिला मंडळ,धुळेचे सुनील वाघ, पुण्श्लोक अहिल्यादेवी होळकर शैक्षणिक मंडळ,कुसुंबाचे सुनील परदेशी आदी उपस्थित होते.

जिल्हाधिकारी भाग्यश्री विसपुते (भा. प्र. से.) म्हणाल्या की, राज्यातील एकल महिलांच्या सामाजिक, आर्थिक, शैक्षणिक, कायदेशीर, आरोग्यविषयक आणि पुनर्वसनाच्या प्रश्नांचा सर्वंकष विचार करून स्वतंत्र व प्रभावी धोरण तयार करण्यात येणार आहे. महिलांना विविध शासकीय योजनांचा लाभ घेताना येणाऱ्या अडचणी, उद्योग-व्यवसाय व रोजगार, कर्जसुविधा, कायदेशीर मदत, कामाच्या ठिकाणी सुरक्षितता, समाजातील सन्मान, मालमत्ता हक्कांचे संरक्षण तसेच शासकीय योजनांमध्ये प्राधान्य अशा विविध विषयांवर प्राप्त होणाऱ्या सूचनांचा गांभीर्याने विचार करण्यात येणार आहे. त्यामुळे प्रत्येक एकल महिलांनी आपले मत व सूचना नोंदवाव्यात. यावेळी त्यांनी महिलांशी प्रत्यक्ष संवाद साधून त्यांच्या अडीअडचणी जाणून घेतल्या. तसेच ज्या महिलांनी अद्याप आयुष्मान कार्ड किंवा ॲग्रीस्टॅक नोंदणी केलेली नाही, त्यांनी ती तातडीने काढावे, असेही आवाहन केले.

या कार्यशाळेस विविध शासकीय विभागांचे अधिकारी, स्वयंसेवी संस्थांचे प्रतिनिधी, सामाजिक कार्यकर्ते आणि मोठ्या संख्येने एकल महिला उपस्थित होत्या.

28/06/2026

धुळे जिल्हाधिकारी कार्यालयात नियतकालिक बदल्या आता eSuvidha - AI आधारित जिल्हा व्यवस्थापन पोर्टलद्वारे. संपूर्ण बदली व समुपदेशन प्रक्रिया आता पूर्णपणे ऑनलाइन, अधिक जलद, कार्यक्षम आणि पारदर्शक. सुशासनाच्या दिशेने एक पाऊल.

28/06/2026

धुळ्यात पल्स पोलिओ लसीकरण मोहिमेचे जिल्हास्तरीय उद्घाटन; १.८२ लाख बालकांना पोलिओ डोसचे उद्दिष्ट!

धुळे जिल्ह्यात राष्ट्रीय पल्स पोलिओ लसीकरण मोहिमेचे जिल्हास्तरीय उद्घाटन रविवारी उत्साहात पार पडले. जिल्हाधिकारी भाग्यश्री विसपुते (भा. प्र. से.) यांच्या हस्ते मोहिमेचा शुभारंभ करण्यात आला.

जिल्हा रुग्णालय येथे पार पडलेल्या या कार्यक्रमास जिल्हा परिषदेचे मुख्य कार्यकारी अधिकारी बाबासाहेब बेलदार, जिल्हा शल्य चिकित्सक डॉ. रवींद्र सोनवणे मुंबई शहरी विभागाचे संचालक डॉ. प्रसाद भंडारी, जिल्हा आरोग्य अधिकारी डॉ. सचिन बोडके, अतिरिक्त जिल्हा शल्यचिकित्सक डॉ. महेश भडांगे, महिला व बाल रुग्णालयाच्या वैद्यकीय अधीक्षक डॉ. अश्विनी भामरे, अतिरिक्त जिल्हा शल्यचिकित्सक डॉ. स्वप्नील पाटील, निवासी वैद्यकीय अधिकारी डॉ. विवेक जाधव, डॉ. गीतांजली सोनवणे तसेच विविध विभागांचे अधिकारी, कर्मचारी आणि परिचारिका प्रशिक्षणार्थी उपस्थित होते.

जिल्हाधिकारी भाग्यश्री विसपुते (भा. प्र. से.)
यांनी सांगितले की, जिल्ह्यातील ० ते ५ वर्षे वयोगटातील १ लाख ८२ हजार ८४३ बालकांना पोलिओचा डोस देण्याचे उद्दिष्ट निश्चित करण्यात आले आहे. यासाठी १५०८ लसीकरण केंद्रांवर ३२६० अधिकारी व कर्मचाऱ्यांची नियुक्ती करण्यात आली असून ६३ ट्रान्झिट पथके आणि ९१ मोबाईल पथके कार्यरत राहणार आहेत.

सर्व लसीकरण केंद्रांवर पोलिओचे दोन थेंब देण्यात येतील. त्यानंतर पुढील पाच दिवस घरोघरी जाऊन एकही बालक लसीकरणापासून वंचित राहणार नाही याची दक्षता घ्यावी.पोलिओ पासून बालकांचे संरक्षण करण्यासाठी पोलिओ प्रतिबंधक लसीचे दोन थेंब अत्यंत प्रभावी आहेत. त्यामुळे जिल्ह्यातील पाच वर्षांखालील प्रत्येक बालकाला पोलिओचे दोन थेंब पाजून या मोहिमेला यशस्वी करावे. कोणतेही पात्र बालक लसीकरणापासून वंचित राहू नये, यासाठी आरोग्य विभागाने नियोजनबद्ध पद्धतीने काम करावे, अशा सूचनाही त्यांनी दिल्या.

प्रत्येक पालकाने आपल्या बालकाला पोलिओचा डोस देऊन १०० टक्के लसीकरण मोहिमेला सहकार्य करावे, असे आवाहनही त्यांनी केले.

12/06/2026

धुळे शासकीय तंत्रनिकेतनात ३ कोटींच्या ड्रोन लॅबचे पालकमंत्री जयकुमार रावल यांच्या हस्ते उद्घाटन संपन्न!

शिक्षण महर्षी दादासाहेब रावल शासकीय तंत्रनिकेतन, धुळे येथे जिल्हा नियोजन समिती अंतर्गत उभारण्यात आलेल्या सुमारे ३ कोटी रुपये खर्चाच्या अत्याधुनिक ड्रोन लॅबचे उद्घाटन राज्याचे पणन व राजशिष्टाचार मंत्री तथा जिल्ह्याचे पालकमंत्री जयकुमार रावल यांच्या हस्ते करण्यात आले.

यावेळी जिल्हाधिकारी भाग्यश्री विसपुते, निवासी उपजिल्हाधिकारी शरद पवार,
शिक्षण महर्षी दादासाहेब रावल शासकीय तंत्रनिकेतन, धुळे संस्थेचे प्राचार्य डॉ. राजू वाडेकर, दोंडाईचा कृषी उत्पन्न बाजार समितीचे सभापती नारायण पाटील, जिल्हा आपत्ती व्यवस्थापन अधिकारी जितेंद्र सोनवणे आदी उपस्थित होते.

पालकमंत्री श्री.रावल यांनी सांगितले की, ही ड्रोन लॅब महाराष्ट्रातील पदविका अभियांत्रिकी महाविद्यालयांमधील पहिली अत्याधुनिक ड्रोन लॅब असून, संस्थेत शिक्षण घेणाऱ्या गुणवंत, आर्थिकदृष्ट्या दुर्बल व वंचित घटकांतील विद्यार्थ्यांसाठी ती मोठी संधी ठरणार आहे. या सुविधेमुळे विद्यार्थ्यांना आधुनिक तंत्रज्ञानाचे प्रत्यक्ष प्रशिक्षण मिळून ते राष्ट्रीयच नव्हे तर आंतरराष्ट्रीय स्तरावरही आपली गुणवत्ता सिद्ध करतील, असा विश्वास त्यांनी व्यक्त केला.
याशिवाय भविष्यातही विद्यार्थ्यांना अत्याधुनिक तंत्रज्ञानाशी जोडण्यासाठी अशाच प्रकारच्या आधुनिक प्रयोगशाळा उभारण्याकरिता आवश्यक निधी उपलब्ध करून देण्याबाबत सकारात्मक भूमिका घेण्यात येईल, असेही त्यांनी सांगितले.

ड्रोन लॅबमुळे संस्थेतील विद्यार्थ्यांना ड्रोन तंत्रज्ञान, सर्वेक्षण, मॅपिंग, कृषी क्षेत्रातील अनुप्रयोग तसेच विविध औद्योगिक वापरांबाबत प्रत्यक्ष प्रशिक्षणाची संधी उपलब्ध होणार असून, रोजगारक्षम कौशल्ये विकसित करण्यास मोठी मदत होणार आहे.

प्राचार्य डॉ. राजू वाडेकर,यांनी ड्रोन लॅब उभारण्यामागील उद्देश स्पष्ट करताना विद्यार्थ्यांना आधुनिक तंत्रज्ञानाचे ज्ञान व कौशल्य प्राप्त करून देण्यासाठी ही सुविधा महत्त्वाची ठरणार असल्याचे सांगितले.

12/06/2026

धुळे जिल्हा वार्षिक योजनेची आढावा बैठक संपन्न!

आकांक्षित धुळे जिल्ह्यात जिल्हा वार्षिक योजनेच्या माध्यमातून सर्वसमावेशक विकासासाठी प्रयत्न करावेत, असे निर्देश राज्याचे पणन व राजशिष्टाचार मंत्री तथा जिल्ह्याचे पालकमंत्री जयकुमार रावल यांनी आज केले.

पालकमंत्री श्री. रावल यांच्या अध्यक्षतेखाली जिल्हाधिकारी कार्यालयातील नवीन नियोजन सभागृहात जिल्हा वार्षिक योजनेची आढावा बैठक झाली. त्यावेळी पालकमंत्री श्री. रावल बोलत होते. यावेळी खासदार डॉ.शोभा बच्छाव, आमदार अमरिशभाई पटेल, आमदार काशिराम पावरा, आमदार श्रीमती मंजुळा गावित, जिल्हा नियेाजन समितीच्या सदस्य सचिव तथा जिल्हाधिकारी भाग्यश्री विसपुते, जिल्हा परिषदेचे मुख्य कार्यकारी अधिकारी बाबासाहेब बेलदार, पोलीस अधीक्षक विशाल आनंद, महानगरपालिका आयुक्त नितीन कापडणीस, अपर जिल्हाधिकारी सुभाष बोरकर, निवासी उपजिल्हाधिकारी शरद पवार, जिल्हा नियोजन अधिकारी सुनील सोनार, सहायक नियेाजन अधिकारी संतोष वानखेडे, एकात्मिक आदिवासी विकास विभागाचे प्रकल्प अधिकारी अरुण पवार, समाज कल्याण विभागाचे सहायक आयुक्त देविदास नांदगावकर यांच्यासह सर्व विभागांचे विभागप्रमुख उपस्थित होते.

प्रत्येक तालुक्यात वीज प्रतिबंधक यंत्रे बसविण्यात यावेत.पुनर्वसित गावांचे प्रश्न सोडविण्यासाठी नियमित आढावा घेण्यात यावा. तालुकास्तरावर समन्वय समितीची बैठक घेण्यात यावी. संपूर्ण जिल्ह्यात वन पर्यटन विकास, इको टुरिझमचे कामे करावीत. सर्व शासकीय कार्यालये, शाळा,आश्रमशाळा, प्राथमिक आरोग्य केंद्र येथे सौर संयंत्र बसविण्यात यावेत. असेही निर्देश पालकमंत्री श्री.रावल यांनी दिले.

यावेळी खासदार डॉ. बच्छाव, आमदार श्री.पटेल , आमदार श्री.पावरा, आमदार श्रीमती गावित यांनी विविध विषयांच्या चर्चेत सहभाग घेऊन विविध सूचना केल्या.

जिल्हा नियोजन अधिकारी श्री. सोनार, आदिवासी विकास विभागाचे प्रकल्प अधिकारी श्री. पवार, समाज कल्याण विभागाचे सहायक आयुक्त श्री. नांदगावकर यांनी सादरीकरण केले.

06/06/2026

जिल्हा वार्षिक योजनेची आढावा बैठक!

जिल्हा वार्षिक योजना, आदिवासी उपयोजना आणि अनुसूचित जाती उपयोजनांतर्गत सन 2026-27 या वर्षासाठी मंजूर झालेल्या नियतव्ययाची सविस्तर माहिती घेऊन सर्व विभागांनी आवश्यक विकास कामांचे प्रस्ताव तातडीने सादर करावेत, असे निर्देश जिल्हाधिकारी भाग्यश्री विसपुते (भा. प्र. से.) यांनी दिले.

जिल्हा नियोजन सभागृहात जिल्हा वार्षिक योजनेची सर्वसाधारण, आदिवासी उपयोजना, अनुसूचित जाती उपयोजनांची आढावा बैठक आज सकाळी जिल्हाधिकारी भाग्यश्री विसपुते (भा. प्र. से.) यांच्या अध्यक्षतेखाली झाली. त्यावेळी जिल्हाधिकारी भाग्यश्री विसपुते (भा. प्र. से.) बोलत होत्या. या बैठकीस जिल्हा परिषदेचे मुख्य कार्यकारी अधिकारी बाबासाहेब बेलदार , पोलीस अधीक्षक विशाल आनंद, जिल्हा अधीक्षक कृषी अधिकारी सुरज जगताप, निवासी उपजिल्हाधिकारी महादेव खेडकर, प्रकल्प अधिकारी प्रमोद पाटील, कार्यकारी अभियंता आर.आर.पाटील जिल्हा नियोजन अधिकारी सुनील सोनार, उपजिल्हाधिकारी संजय बागडे, उपविभागीय अधिकारी शरद मंडलिक (शिरपूर) यांच्यासह विविध विभागांचे अधिकारी उपस्थित होते.

वन विभागाने वन समिती मेळावे व कार्यशाळांचे नियोजन करावे. पोलीस विभागाने 24 नवीन पोर्टेबल पोलीस चौक्या, नवीन वाहने तसेच महत्त्वाच्या ठिकाणी सीसीटीव्ही यंत्रणा उभारणीचे प्रस्ताव तयार करावेत. गतवर्षी पूर्ण झालेल्या विकास कामांची जिओ-टॅग छायाचित्रे आणि व्हीडिओ सादरीकरणासाठी पाठवावीत. तसेच सर्व पूर्ण झालेल्या कामांना यूडीआयडी देण्यात यावा.

विकास कामांचे प्रस्ताव तयार करताना ज्या भागांमध्ये अद्याप मूलभूत विकास कामे झालेली नाहीत, अशा भागांना प्राधान्य द्यावे. गतवर्षीच्या जिल्हा विकास आराखड्यातील मंजूर कामे तातडीने पूर्ण करावीत. तसेच चालू वर्षाच्या जिल्हा विकास आराखड्यासाठी सर्व विभागांनी आवश्यक प्रस्ताव आणि नियोजन वेळेत सादर करावे, असे जिल्हाधिकारी भाग्यश्री विसपुते (भा. प्र. से.) यांनी सांगितले.

यावेळी जिल्हा नियोजन अधिकारी श्री. सोनार यांनी जिल्हा वार्षिक योजनेंतर्गत उपलब्ध निधी व खर्चाचा आढावा सादर केला. बैठकीत चालू वर्षातील मंजूर निधी, झालेला खर्च आणि आगामी वर्षाच्या नियोजनाबाबत सविस्तर चर्चा करण्यात आली. बैठकीस विविध विभागांचे अधिकारी व कर्मचारी उपस्थित होते.

Collectorate Dhule - जिल्हाधिकारी कार्यालय धुळे

16/07/2026

15/07/2026

09/07/2026

04/07/2026

01/07/2026

28/06/2026

28/06/2026

12/06/2026

12/06/2026

06/06/2026

Address

Website

Alerts

Shortcuts

Share

Category