19/12/2024
ସମ୍ବିଧାନ ପ୍ରଣେତା ଭୀମ ରାଓ ଆମ୍ବେଦକରଙ୍କ ପ୍ରତି କେନ୍ଦ୍ର ଗୃହମନ୍ତ୍ରୀ ଦେଇଥିବା ଅପମାନ ସୂଚକ ମନ୍ତବ୍ୟ ପ୍ରତିବାଦରେ ଆମ୍ ଆଦମୀ ପାର୍ଟିର ବିକ୍ଷୋଭ, ଜିଲ୍ଲା ସଙ୍ଗଠନ ଇସ୍ତଫା ଦାବୀ କଲା, ପ୍ରଧାନମନ୍ତ୍ରୀଙ୍କୁ ଦାବିପତ୍ର ।
ଢେଙ୍କାନାଳ : ସମ୍ବିଧାନ ପ୍ରଣେତା ଭୀମ ରାଓ ଆମ୍ବେଦକରଙ୍କ ପ୍ରତି କେନ୍ଦ୍ର ଗୃହମନ୍ତ୍ରୀ ଦେଇଥିବା ଅପମାନ ସୂଚକ ମନ୍ତବ୍ୟ ପ୍ରତିବାଦରେ ଢେଙ୍କାନାଳ ଆମ୍ ଆଦମୀ ପାର୍ଟିର ଜିଲ୍ଲା ସଭାପତି ପଙ୍କଜ ନାୟକଙ୍କ ନେତୃତ୍ୱରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ l ଏହି ପରିପ୍ରେକ୍ଷୀରେ ଜୟ ଭୀମ ସଂଗଠନର ଅଧ୍ୟକ୍ଷ କୈଳାଶ ବେହେରା ଏବଂ ଆପ୍ ଓଡ଼ିଶା ରାଜ୍ୟ ସଂଗଠନ ସମ୍ପାଦକ ଭରତ ଦାସ ଯୋଗଦେଇ କଟୁ ମନ୍ତବ୍ୟ ଯୋଗୁଁ ଗୃହମନ୍ତ୍ରୀଙ୍କ ଇସ୍ତଫା ଦାବୀ କରିଛନ୍ତି ଏବଂ ପ୍ରଧାନମନ୍ତ୍ରୀଙ୍କୁ ଦାବିପତ୍ର ଜିଲ୍ଲାପାଳଙ୍କ ଜରିଆରେ ପ୍ରଦାନ କରାଯାଇଛି । ପ୍ରକାଶ ଥାଉକି ସଂସଦର ପବିତ୍ର ମନ୍ଦିର ପରିସରରେ ଭାରତବର୍ଷର ସମ୍ବିଧାନ ପ୍ରଣେତା ଭାରତ ରତ୍ନ ଡଃ ଭୀମରାଓ ଆମ୍ବେଦକରଙ୍କ ଉଦ୍ଦେଶ୍ୟରେ ଗୃହମନ୍ତ୍ରୀ ଶ୍ରୀ ଅମିତ ଶାହାଙ୍କର ଅଶାଳୀନ ଓ ଅପମାନ ଜନକ ଟିପ୍ପଣୀ କୋଟି କୋଟି ଭାରତୀୟଙ୍କ ଭାବାବେଗକୁ କୁଠାରାଘାତ କରିଛି। ସଂସଦର ଶୀତକାଳୀନ ସତ୍ର ଚାଲିଥିବା ସମୟରେ ସଂସଦୀୟ ମର୍ଯ୍ୟାଦା ଓ ଶୃଙ୍ଖଳା ଆବଦ୍ଧରେ ରହି ବିରୋଧୀ ଦଳର ଅନେକ ସାଂସଦ କେନ୍ଦ୍ରସରକାରଙ୍କର ସମ୍ବିଧାନ ବିରୋଧୀ କାର୍ଯ୍ୟକଳାପର ଦୃଢ଼ ପ୍ରତିବାଦ କରିବା ଅବସରରେ ବାବା ସାହେବ୍ ଭୀମରାଓ ଆମ୍ବଦକରଙ୍କ ନାମ ବାରମ୍ବାର ଉଚ୍ଚାରଣ କରିବାର ଦେଖାଯାଇଥିଲା। ଦୁର୍ଭାଗ୍ୟବଶତଃ କେନ୍ଦ୍ରସରକାର ବିରୋଧୀ ଦଳର ସାଂସଦ ମାନଙ୍କର ଅଭିବ୍ୟକ୍ତିକୁ ସମ୍ମାନ ଜଣାଇବା ପରିବର୍ତ୍ତେ ଖୋଦ୍ ସରକାରଙ୍କ ପ୍ରତିନିଧି ଗୃହମନ୍ତ୍ରୀ ଶ୍ରୀ ଅମିତ୍ ଶାହା ବାବାସାହେବଙ୍କ ନାମକୁ ଅତି ତାତ୍ସଲ୍ୟ ପୂର୍ଣ୍ଣ ଭଙ୍ଗୀରେ ଅପମାନିତ କରି ବିରୋଧୀଙ୍କୁ "ଆମ୍ବେଦକରଙ୍କ ନାମ ବାରମ୍ବାର ଉଚ୍ଚାରଣ ନ କରି ଈଶ୍ୱରଙ୍କ ନାମ ଉଚ୍ଚାରଣ କଲେ ସାତ ଜନ୍ମ ପାଇଁ ସ୍ୱର୍ଗପ୍ରାପ୍ତି ହେବ" କହି ଲଜ୍ଜ୍ୟାଜନକ ପରାମର୍ଶ ଦେବାର ପରିଦୃଶ୍ୟ ହୋଇଥିଲା। ଗୃହମନ୍ତ୍ରୀଙ୍କର ଏଭଳି ଅସୌଜନ୍ୟ ଟିପ୍ପଣୀ ଭାରତୀୟ ଜନତା ପାର୍ଟି ନେତୃତ୍ଵାଧୀନ ସରକାରଙ୍କର ସମ୍ବିଧାନ ବିରୋଧୀ ମାନସିକତାକୁ କେବଳ ଉଜାଗର କରିନି ବରଂ ବିଗତ ଦିନରେ ଦେଶବାସୀଙ୍କ ମନରେ ଉଙ୍କି ମାରିଥିବା କେନ୍ଦ୍ରସରକାରଙ୍କ ସମ୍ବିଧାନ ପରିବର୍ତ୍ତନ କରିବାର କ୍ରୁର ପ୍ରୟାସର ଆଶଙ୍କାକୁ ସ୍ପଷ୍ଟ କରିଛି। ସଂସଦ ଭିତରେ ଓ ସଂସଦ ବାହାରେ ଗଣତନ୍ତ୍ରର ବାରମ୍ବାର କଣ୍ଠରୋଦ୍ଧନ କରୁଥିବା କେନ୍ଦ୍ରସରକାରଙ୍କ ଗୃହ ବିଭାଗ ଭଳି ଏକ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟର ନେତୃତ୍ୱ ନେଉଥିବା ଶ୍ରୀ ଶାହା ଙ୍କର ଏଭଳି ଦାୟିତ୍ବହୀନ ମନ୍ତବ୍ୟ ଦେଶବାସୀଙ୍କୁ କଠୋର ଆଘାତ କରିଛି। ଏଭଳି ଏକ ଦୁର୍ବିସହ ଘଟଣାକ୍ରମରେ ବାବା ସାହେବଙ୍କ ପ୍ରଣୀତ ସମ୍ବିଧାନ ମାଧ୍ୟମରେ ଅଧିକାର ଓ ସମ୍ମାନର ହକଦାର ହୋଇଥିବା ସମାଜର ଅନ୍ତିମ ସୋପାନର ବ୍ୟକ୍ତିଙ୍କୁ ବିଶେଷକରି ଗଭୀର ମାନସିକ ଦୁଃସ୍ଥିତି ମଧ୍ୟକୁ ଠେଲି ଦେଇଛି। ବାବା ସାହେବଙ୍କ ପ୍ରଣୀତ ଭାରତୀୟ ସମ୍ବିଧାନର ଅନୁକରଣରେ ନିର୍ବାଚନ ବିଧି ବ୍ୟବସ୍ଥାକୁ ପାଥେୟ କରି ଭାରତୀୟ ଜନତା ପାର୍ଟି ସରକାର ଗଠନ କରିବା ପରେ ବାରମ୍ବାର ସମ୍ବିଧାନ ବିରୋଧୀ ଚିନ୍ତାଧାରାକୁ ଶାଣିତ କରିବାର କ୍ରୂର ଉଦ୍ୟମ ଜାରି ରଖିଛି ଯାହା ଭାରତୀୟ ସମ୍ବିଧାନ ଓ ଏହା ପ୍ରଦତ୍ତ ଦେଶବାସୀଙ୍କର ମୌଳିକ ଅଧିକାରର ଅକ୍ଷୁର୍ଣ୍ଣତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ସାଧାରଣ ଜନତାଙ୍କ ଠାରୁ ଆରମ୍ଭକରି ରାଷ୍ଟ୍ର ନିର୍ମାତାଙ୍କ ପର୍ଯ୍ୟନ୍ତ ସମଗ୍ର ରାଷ୍ଟ୍ରବାସୀ ସଂପ୍ରତି ଏକ ସଙ୍କଟପୂର୍ଣ୍ଣ ଓ ଘଡିସନ୍ଧି ମୁହୂର୍ତ୍ତରେ ଗତି କରୁଥିଲା ବେଳେ କୋଟି କୋଟି ଭାରତୀୟଙ୍କ ଚଳନ୍ତି ଈଶ୍ୱରଙ୍କୁ ଗୃହମନ୍ତ୍ରୀଙ୍କର ଅପମାନ ସୂଚକ ଚରମ ଔଦ୍ଧତ୍ୟାମିକୁ କଦାପି ବରଦାସ୍ତ କରିବେ ନାହିଁ ଆପ୍ କହିଛି l ଆମ୍ ଆଦମୀ ପାର୍ଟି ଦାବି କରୁଛି ଗୃହମନ୍ତ୍ରୀ ଶ୍ରୀ ଶାହା ଦେଶବାସୀଙ୍କ ସମ୍ମାନରେ ମଥାନତ ହୋଇ କ୍ଷମା ପ୍ରାର୍ଥନା କରିବାସହ ଅବିଳମ୍ବେ ଇସ୍ତଫା ପ୍ରଦାନ କରନ୍ତୁ। ଯଦି ଅମିତ ଶାହା ତୁରନ୍ତ ନିଜ କୁକର୍ମର ପ୍ରାୟଶ୍ଚିତ ନ କରନ୍ତି ତେବେ ଆଗାମୀ ଦିନରେ ବାବା ସାହେବଙ୍କ ସମ୍ମାନ ରକ୍ଷା କରିବା ଉଦ୍ଦେଶ୍ୟରେ ଆମ୍ ଆଦମୀ ପାର୍ଟି ପକ୍ଷରୁ ଧାରଣା ପ୍ରଦର୍ଶନ କରାଯିବା ସହ ଆନ୍ଦୋଳନର ଚେତାବନୀ ଦିଆଯାଉଛି। ଏହି କାର୍ଯ୍ୟକ୍ରମରେ ଜିଲ୍ଲା ଉପସଭାପତି ଜିତେନ୍ଦ୍ର ବେହେରା, ନାରୀ ନେତ୍ରୀ ରୁନୁବାଳା ଚିନାରା, ମୁନିସିପାଲିଟି ସଭାପତି ଦେବାଶିଷ ନନ୍ଦ, ରଚିତା ନାଏକ, ଇଂ ପିତାମ୍ବର ଦାସ, ସୋସିଆଲ ମିଡ଼ିଆ ପ୍ରଭାରୀ ସୁମନ୍ତ ଗୋଛାୟତ, ସନ୍ତୋଷ ନାଏକ, ପ୍ରସନ୍ନ ବରାଳ, ଜୟନ୍ତ ଦାସ, ଉପେନ୍ଦ୍ର ନାଥ ସ୍ୱାଇଁ ପ୍ରମୁଖ ଯୋଗଦେଇ ବାବା ସାହେବଙ୍କୁ ଅପମାନ ସୂଚକ ମନ୍ତବ୍ୟକୁ ପ୍ରତିବାଦ କରିଥିଲେ l
