29/08/2026
அறிக்கை
நெல்லை பாளையங்கோட்டையைச் சேர்ந்த மாணவி ஸ்ருதிலயா, நீட் தேர்வில் தேர்ச்சி பெற்றும் கலந்தாய்வில் மருத்துவ இடம் கிடைக்காத மன உளைச்சலில் உயிரிழந்த செய்தி நெஞ்சை உலுக்குகிறது. மருத்துவராக வேண்டும் என்ற கனவோடு பல ஆண்டுகள் கடினமாக உழைத்த ஒரு இளம் மகளை நாம் இழந்திருப்பது தாங்க முடியாத வேதனை. மாணவி ஸ்ருதிலயாவின் குடும்பத்தினருக்கு தமிழ்நாடு மாணவர் காங்கிரஸ் சார்பில் ஆழ்ந்த இரங்கலைத் தெரிவித்துக் கொள்கிறோம்.
நீட் என்ற தேசிய நுழைவுத் தேர்வு முறை தமிழ்நாட்டு மாணவர்களின் கனவுகளைத் தொடர்ந்து நசுக்கி வருவதற்கான சமீபத்திய சான்று இது. தேர்ச்சி பெற்ற பின்பும் இடம் கிடைக்காத நிலை, பயிற்சிச் செலவு, கலந்தாய்வு முறை, இட ஒதுக்கீடு மற்றும் சமூக நீதிக்கு எதிரான மத்திய அரசின் பிடிவாதம் ஆகியவை மாணவர்களை மனஅழுத்தத்திற்குத் தள்ளியுள்ளன.
நீட் தேர்வைத் திணித்து, தமிழ்நாட்டு மாணவர்களின் கனவுகளைச் சிதைக்கும் மோடி அரசை கண்டிக்கிறோம். தேர்ச்சி பெற்ற பின்பும் இடம் மறுக்கப்படும் இந்த அநீதி தொடர்வது ஏற்புடையதல்ல.
தமிழ்நாட்டிலிருந்து இன்னும் எத்தனை பலிகள் வேண்டும்?
நீட்டை தமிழ்நாட்டிற்கு விலக்கு அளித்து, மாநில வாரிய மதிப்பெண்களின் அடிப்படையில் சேர்க்கை நடைபெற வேண்டும். மாணவர்களின் உயிரையும் எதிர்காலத்தையும் காக்க மத்திய அரசு உடனடி நடவடிக்கை எடுக்க வேண்டும்.
