Info Kutch GoG

08/10/2026

ખાસ લેખ
સેવા સંકલ્પ અભિયાન
૦૦૦૦
કચ્છમાં ૧૦૮ની સેવા બની જીવાદોરી: એક જ મહિનામાં ૫૪૭૯ જિંદગીઓ બચાવી
00000
ગુજરાતના તત્કાલીન મુખ્યમંત્રી અને વર્તમાન વડાપ્રધાનશ્રી નરેન્દ્રભાઈ મોદીની દૂરંદેશી દેન સમાન ૧૦૮ માત્ર એમ્બ્યુલન્સ નહીં, પણ હોસ્પિટલ પહોંચતા પહેલાંની જીવનરક્ષક સારવાર
00000
તાલીમબદ્ધ EMTs દ્વારા એમ્બ્યુલન્સમાં જ ૬૧ સફળ પ્રસુતિઓ કરાવીને માતા અને બાળક બંનેના જીવ બચાવાયા
૦૦૦૦૦
કચ્છમાં અત્યારસુધી કુલ ૬.૯૫ લાખથી વધુ ઈમરજન્સી કેસોના સંચાલન સાથે ૧૦૮ સેવાએ ૬.૯૨ લાખથી વધુ કિંમતી જિંદગીઓ બચાવી
૦૦૦૦૦
માહિતી બ્યૂરો, ભુજ
જીવન અને મૃત્યુ વચ્ચે જંગ ખેલાતો હોય ત્યારે દરેક સેકન્ડ અમૂલ્ય બની જાય છે. જ્યારે પરિવાર પર આફત આવી પડે અને દર્દી જીવન-મરણ વચ્ચે ઝોલા ખાતો હોય, ત્યારે દૂરથી સંભળાતી ૧૦૮ એમ્બ્યુલન્સની સાયરન નવજીવનની આશા બનીને આવે છે. કચ્છના રણથી લઈને દરિયાકાંઠા સુધી અને શહેરથી લઈને છેવાડાના ગામડા સુધી, ગુજરાત સરકારની ૧૦૮ ઈમરજન્સી મેડિકલ સર્વિસ આજે હજારો પરિવારો માટે સંકટ સમયની સંગાથી અને જીવાદોરી બની ગઈ છે.
હાઈવે પર સર્જાયેલો ગમખ્વાર અકસ્માત હોય, અચાનક આવેલો હાર્ટ એટેક હોય કે પછી પ્રસુતાની વેદનાથી તડપતી માતા હોય - આવી દરેક પરિસ્થિતિમાં ૧૦૮નો એક કોલ એટલે જીવન બચાવવા માટે દોડી આવતી મદદ. વડાપ્રધાનશ્રી નરેન્દ્રભાઈ મોદીએ જ્યારે ગુજરાતના મુખ્યમંત્રી તરીકે તા. ૨૯ ઓગસ્ટ ૨૦૦૭ના રોજ ઈમરજન્સી મેનેજમેન્ટ એન્ડ રિસર્ચ ઈન્સ્ટિટ્યૂટ (EMRI) સંસ્થા સાથે મળીને આ સેવાની શરૂઆત કરાવી હતી. જેણે આરોગ્ય સેવાઓમાં અભૂતપૂર્વ પરિવર્તન આણ્યું છે. આજે ગુજરાતની આરોગ્ય સેવાનું ચિત્ર જ બદલાઈ ગયું છે. આ સેવા કોઈપણ ચાર્જ વગર અને સતત ૨૪ કલાક ઉપલબ્ધ છે. આ એમ્બ્યુલન્સ માત્ર વાહન નથી, પણ ફરતું દવાખાનું છે, જેમાં દર્દીને હોસ્પિટલમાં દાખલ થતા પહેલા જ કુશળ સ્ટાફ દ્વારા પ્રાણરક્ષક પ્રી-હોસ્પિટલ ટ્રીટમેન્ટ આપવામાં આવે છે, જેથી અત્યંત ગરીબ વ્યક્તિ પણ આર્થિક ચિંતા વિના યોગ્ય સમયે ઉત્તમ સારવાર મેળવી શકે.
આ અંગે માહિતી આપતા કચ્છના ૧૦૮ પ્રોજેક્ટ મેનેજરશ્રી ડો. ભંવરલાલ પ્રજાપતિએ જણાવ્યું હતું કે, કચ્છ જેવા વિશાળ ભૌગોલિક વિસ્તારમાં ૧૦૬ એમ્બ્યુલન્સનો કાફલો દિવસ-રાત સેવારત છે. આ કાફલામાં સામાન્ય એમ્બ્યુલન્સ ઉપરાંત ICU On Wheels, વેન્ટિલેટર અને મલ્ટી પેરા મોનિટરથી સજ્જ એડવાન્સ લાઈફ સપોર્ટ એમ્બ્યુલન્સ, બેઝિક લાઈફ સપોર્ટ એમ્બ્યુલન્સ અને નવજાત શિશુઓ માટે ખાસ ડિઝાઈન કરાયેલી નિયો-નેટલ એમ્બ્યુલન્સ પણ ઉપલબ્ધ છે.
૧૦૮ સેવાની તત્પરતાનો અંદાજ તેના આંકડા પરથી લગાવી શકાય છે. માત્ર ઓગસ્ટ-૨૦૨૬ મહિનામાં જ કચ્છ જિલ્લામાં કુલ ૫૮૫૭ ઈમરજન્સી કેસોનું સફળતાપૂર્વક સંચાલન કરવામાં આવ્યું હતું, જેમાં ૫૮૪૦ મેડિકલ ઈમરજન્સી, ૧૬ પોલીસ અને ૧ આગની ઈમરજન્સીનો સમાવેશ થાય છે. આ સમયગાળા દરમિયાન ૫૪૭૯ લાભાર્થીઓને મદદ પહોંચાડવામાં આવી હતી, જેમાંથી ૬૬૫ જેટલા લોકોના જીવ ગંભીર પરિસ્થિતિમાં બચાવી લેવાયા હતા. મુખ્ય તબીબી કટોકટીઓમાં ૨૦૮૩ પ્રસુતિ સંબંધી કેસ, ૬૦૫ માર્ગ અકસ્માત અને ટ્રોમા, ૨૩૬ હૃદયરોગ અને ૩૪૫ શ્વાસની તકલીફના કેસ નોંધાયા હતા.
સૌથી ગૌરવની વાત એ છે કે, અમારા તાલીમબદ્ધ EMTs દ્વારા એમ્બ્યુલન્સમાં જ ૬૧ સફળ પ્રસુતિઓ કરાવીને માતા અને બાળક બંનેના જીવ બચાવાયા હતા. ૪૫૬૫૨ ચોરસ કિમીના વિશાળ વિસ્તારમાં સરેરાશ માત્ર ૧૧ મિનિટ ૩૯ સેકન્ડના પ્રતિભાવ સમય સાથે સેવા પહોંચાડવામાં આવી હતી. શરૂઆતથી અત્યાર સુધીમાં કચ્છમાં કુલ ૬.૯૫ લાખથી વધુ ઈમરજન્સી કેસો હાથ ધરવામાં આવ્યા છે અને ૬.૯૨ લાખથી વધુ કિંમતી જિંદગીઓ બચાવવામાં આવી છે.
૧૦૮ની સૌથી મોટી વિશેષતા એ છે કે તે માત્ર દર્દીને લઈ જતું વાહન નથી. એમ્બ્યુલન્સમાં હાજર ઈમરજન્સી મેડિકલ ટેકનિશિયન (EMT) દ્વારા ઈમરજન્સી રિસ્પોન્સ સેન્ટરના તબીબોના માર્ગદર્શન હેઠળ દર્દીને હોસ્પિટલ પહોંચતા પહેલાં જ સારવાર શરૂ કરી દેવામાં આવે છે. 'ગોલ્ડન અવર' તરીકે ઓળખાતી આ કિંમતી મિનિટોમાં અપાતી સારવાર જ ઘણીવાર દર્દીના જીવનનો નિર્ણય કરે છે.
આમ, કચ્છના હજારો પરિવારો માટે ૧૦૮ એ માત્ર સરકારી યોજના નથી, પરંતુ અડધી રાતે એક ફોન પર દોડી આવતો વિશ્વાસ છે, ગભરાટની ક્ષણોમાં હિંમત આપતો સાથ છે અને જીવનને બીજી તક આપતી જીવાદોરી છે.

08/10/2026

*કચ્છ પશ્ચિમ વન વિભાગની પ્રેરણાદાયી પહેલ: માતાના મઢ જતા પદયાત્રાળુઓની સેવામાં દયાપર ઉત્તર અને દક્ષિણ વન્યજીવ રેન્જ ખડેપગે*
००००
*કચ્છ વન વર્તૂળના વન સંરક્ષક ડૉ. ધીરજ મિત્તલની પ્રેરણા અને નાયબ વન સંરક્ષક હર્ષ ઠક્કરના માર્ગદર્શન હેઠળ દયાપર ફોરેસ્ટ કેમ્પ અને રેસ્ટ હાઉસ ખાતે સેવા કેમ્પ કાર્યરત*
००००
*પદયાત્રીઓની સુવિધા માટે ઇલેક્ટ્રિક મસાજર, ગરમ પાણીના શેક, મલમ-પટ્ટી તેમજ ચા-પાણી અને વિશ્રામની વિનામૂલ્યે સુવિધા*
००००
માહિતી બ્યૂરો, ભુજ :

કચ્છની ધરા પર નવરાત્રીના પાવન પર્વ નિમિત્તે દેશ-વિદેશ તેમજ રાજ્યભરમાંથી લાખો ભાવિક ભક્તો કુળદેવી મા આશાપુરાના દર્શનાર્થે માતાના મઢ ખાતે પદયાત્રા કરીને જઈ રહ્યા છે. પદયાત્રીઓની આ આસ્થા અને ભક્તિની યાત્રા વધુ સુગમ અને આરામદાયક બને તેવા ઉમદા હેતુથી કચ્છ પશ્ચિમ વન વિભાગ દ્વારા વિશેષ સેવાકીય પ્રવૃત્તિઓ હાથ ધરવામાં આવી છે. વન અને પર્યાવરણના જતન સાથે લોકસેવાનો ઉત્તમ સમન્વય સાધીને વન વિભાગના કર્મયોગીઓ હાલ પદયાત્રીઓની સેવામાં જોડાયા છે.
કચ્છ વન વર્તુળના વન સંરક્ષકશ્રી ડૉ. ધીરજ મિત્તલની પ્રેરણાથી અને કચ્છ પશ્ચિમ વન વિભાગના નાયબ વન સંરક્ષકશ્રી હર્ષ ઠક્કરના સીધા માર્ગદર્શન હેઠળ દયાપર ઉત્તર વન્યજીવ રેન્જ તેમજ દયાપર દક્ષિણ રેન્જ દ્વારા માતાના મઢ દર્શનાર્થે પધારતા પદયાત્રાળુઓ અને શ્રદ્ધાળુઓનું ભાવભર્યું સ્વાગત કરવામાં આવી રહ્યું છે. દયાપર ફોરેસ્ટ કેમ્પ ખાતે વિશેષ શમિયાણો ઊભો કરીને તેમજ દયાપર દક્ષિણ રેન્જના રેસ્ટ હાઉસ ખાતે યાત્રાળુઓની સવલત માટે સુચારુ વ્યવસ્થાઓ ગોઠવવામાં આવી છે.

લાંબા અંતરની પદયાત્રાને કારણે પદયાત્રીઓને થતા શારીરિક થાક અને પગના દુખાવામાં ત્વરિત રાહત મળી રહે તે માટે વન વિભાગ દ્વારા આરોગ્યલક્ષી સેવાઓ પણ શરૂ કરવામાં આવી છે. જે અંતર્ગત સેવા કેમ્પમાં પદયાત્રાળુઓ માટે પગના મસાજ માટેના મસાજર, શેક કરવા માટે ગરમ પાણીની થેલીઓ તેમજ પ્રાથમિક સારવાર અને મલમ-પટ્ટીની નિઃશુલ્ક સેવા ઉપલબ્ધ કરાવવામાં આવી છે, જેનો મોટી સંખ્યામાં પદયાત્રીઓ લાભ લઈ રહ્યા છે.

આ ઉપરાંત, દયાપર ઉત્તર વન્યજીવ રેન્જ અને દયાપર દક્ષિણ રેન્જ દ્વારા યાત્રાળુઓ માટે શુદ્ધ પીવાના પાણી, ગરમાગરમ ચા-નાસ્તો, મોબાઈલ ચાર્જિંગ પોઈન્ટ તેમજ થાક ઉતારવા માટે હવાઉજાશવાળા મંડપમાં ગાદલા સાથે આરામ કરવાની પણ આરામદાયક વ્યવસ્થા કરવામાં આવી છે. વન વિભાગના અધિકારીઓ અને સ્ટાફ મિત્રો દ્વારા ખડેપગે રહીને કરવામાં આવતી આ નિઃસ્વાર્થ સેવાને પદયાત્રાળુઓ અને સ્થાનિક નાગરિકો દ્વારા બિરદાવવામાં આવી રહી છે.
००००

08/10/2026

અખબાર યાદી
કચ્છ જિલ્લામાં JOSH Teamsનું લોન્ચિંગ તથા ટીબી મુક્ત ભારત અભિયાન
અંતર્ગત જિલ્લા કક્ષાનો કાર્યક્રમ યોજાયો
૦૦૦૦૦

રાષ્ટ્રીય ક્ષય નિર્મૂલન કાર્યક્રમ (NTEP) અંતર્ગત ટીબી મુક્ત ભારતના લક્ષ્યને સાકાર કરવા તેમજ યુવાનો અને વિવિધ વિભાગોની ભાગીદારીથી ટીબી નિર્મૂલનની કામગીરીને વધુ વેગ આપવા જિલ્લા પંચાયત, કચ્છ–ભુજ ખાતે JOSH (Joint Squad for Health) Teamsના લોન્ચિંગ સાથે જિલ્લા કક્ષાના કાર્યક્રમનું આયોજન કરવામાં આવ્યું હતું.

કાર્યક્રમના પ્રથમ તબક્કામાં સવારે ૧૧:૦૦થી બપોરે ૧૨:૩૦ કલાક સુધી ભારત મંડપમ, નવી દિલ્હી ખાતે યોજાયેલા JOSH Teamsના રાષ્ટ્રીય શુભારંભ કાર્યક્રમનું જીવંત પ્રસારણ કરવામાં આવ્યું હતું.

JOSH (Joint Squad for Health) Teamsમાં Class-1 અધિકારીઓ, MY Bharatના સ્વયંસેવકો અને NCC કેડેટ્સને જોડવામાં આવ્યા છે. આ ટીમો દ્વારા ટીબી મુક્ત ભારતનો સંદેશ લોકો સુધી પહોંચાડવા, ટીબી અંગે જનજાગૃતિ વધારવા, વહેલું નિદાન અને સમયસર સારવાર માટે લોકોને પ્રોત્સાહિત કરવા તેમજ ટીબીના દર્દીઓને જરૂરી સહયોગ મળી રહે તે માટે કામગીરી કરવામાં આવશે.

પ્રથમ તબક્કામાં દેશના ૧૧ રાજ્યોના ૫૫ જિલ્લાઓમાં JOSH Teams કાર્યરત કરવામાં આવશે. આ ટીમો દ્વારા ટીબી અંગે જાગૃતિ, વહેલી ઓળખ, સારવારમાં સહયોગ અને સમુદાયની ભાગીદારી વધારવા માટે વિવિધ પ્રવૃત્તિઓ કરવામાં આવશે.

વર્ષ ૨૦૨૫ દરમિયાન દેશના ૬૯૭ જિલ્લાઓની ૬૭,૯૩૩ ગ્રામ પંચાયતોને ટીબી મુક્ત પંચાયત તરીકે સન્માનિત કરવામાં આવી છે. આ સિદ્ધિથી પ્રેરણા લઈને યુવાનોની સક્રિય ભાગીદારી સાથે ટીબી મુક્ત ભારતના અભિયાનને વધુ મજબૂત બનાવવાનો પ્રયાસ કરવામાં આવી રહ્યો છે.

ત્યારબાદ બપોરે ૧૨:૩૦ કલાકથી જિલ્લા પંચાયત, કચ્છ–ભુજ ખાતે જિલ્લા કક્ષાનો કાર્યક્રમ યોજાયો હતો.

કાર્યક્રમમાં કચ્છ-મોરબી લોકસભાના માનનીય સાંસદશ્રી વિનોદ ચાવડાજી, જિલ્લા પંચાયત પ્રમુખશ્રી પ્રભાબેન હુણ, જિલ્લા પંચાયત આરોગ્ય સમિતિના ચેરમેનશ્રી રણજીતસિંહ જાડેજા, મુખ્ય જિલ્લા આરોગ્ય અધિકારી (CDHO), જિલ્લા ક્ષય અધિકારી (DTO), MY Bharat કચ્છના યુથ ઓફિસર, NCC અધિકારી, ADHO, DMO, તાલુકા આરોગ્ય અધિકારીશ્રીઓ, ટીબી અને HIV કાર્યક્રમના અધિકારીઓ-કર્મચારીઓ તેમજ MY Bharat અને NCCના સ્વયંસેવકો ઉપસ્થિત રહ્યા હતા.

કચ્છને ટીબી મુક્ત બનાવવા માટેના અભિયાનમાં સહયોગ અને પ્રતિબદ્ધતાને બિરદાવતાં જિલ્લા પંચાયત પ્રમુખશ્રી પ્રભાબેન હુણનું સ્મૃતિચિહ્ન અર્પણ કરી સન્માન કરવામાં આવ્યું હતું.

આ ઉપરાંત ટીબીના દર્દીઓને પોષણ સહાય પૂરી પાડવા તથા ટીબી નિર્મૂલન અભિયાનમાં સહયોગ આપવા બદલ માનનીય સાંસદશ્રી વિનોદ ચાવડાજી અને આશાપુરા NGOને નિક્ષય મિત્ર તરીકેના યોગદાન બદલ પ્રમાણપત્ર એનાયત કરવામાં આવ્યાં હતાં.

કાર્યક્રમના અંતે ઉપસ્થિત મહાનુભાવો, અધિકારીઓ, આરોગ્ય વિભાગના કર્મચારીઓ, ટીબી અને HIV સ્ટાફ તેમજ MY Bharat અને NCCના સ્વયંસેવકો દ્વારા ટીબી મુક્ત ભારત માટે શપથ લેવામાં આવ્યો હતો.

શપથ દરમિયાન ટીબીનું વહેલું નિદાન કરાવવા, સમયસર અને નિયમિત સારવાર લેવા, ટીબીના દર્દીઓ પ્રત્યે ભેદભાવ ન રાખવા, ટીબી અંગે જનજાગૃતિ ફેલાવવા તેમજ ટીબીના દર્દીઓને જરૂરી સહયોગ આપવા માટે પ્રતિબદ્ધતા વ્યક્ત કરવામાં આવી હતી.

ટીબી મુક્ત કચ્છના સંકલ્પને સાકાર કરવા સરકારના પ્રયાસો સાથે સમાજની ભાગીદારી, યુવાનોની સક્રિય ભૂમિકા અને વિવિધ સંસ્થાઓના સહયોગને વધુ મજબૂત બનાવવાનો સંકલ્પ વ્યક્ત કરવામાં આવ્યો હતો.

08/10/2026

સેવા સંકલ્પ અભિયાન
૦૦૦૦
ભુજ ખાતે શ્રમ, કૌશલ્ય અને રોજગાર રાજ્યમંત્રીશ્રી કાંતિલાલ અમૃતિયાની પ્રેરક ઉપસ્થિતિમાં વડાપ્રધાનશ્રીના સુશાસનના ૨૫ વર્ષની ઉજવણી અંતર્ગત “વિકસિત ભારત સંકલ્પ” સભા યોજાઈ
0000
વડાપ્રધાનશ્રી નરેન્દ્રભાઈ મોદીએ વર્ચ્યુઅલી જોડાઈને વર્ષ ૨૦૪૭ સુધી 'વિકસિત ભારત' બનાવવાના સંકલ્પ માટે નાગરિકોને પ્રતિબદ્ધ કર્યા
0000
માહિતી બ્યૂરો, ભુજ
ભારતના વડાપ્રધાનશ્રી નરેન્દ્રભાઈ મોદીના સેવા, સમર્પણ અને વિશ્વાસના સુશાસનના ગૌરવવંતા ૨૫ વર્ષની ઉજવણીના ભાગરૂપે આજરોજ આ પ્રસંગે શ્રમ, કૌશલ્ય અને રોજગાર રાજ્યમંત્રીશ્રી કાંતિલાલ અમૃતિયાની પ્રેરક ઉપસ્થિતિમાં ભુજની લાલન કોલેજ ખાતે “વિકસિત ભારત સંકલ્પ” સભાનું આયોજન કરવામાં આવ્યું હતું. આ પ્રસંગે રાજ્યમંત્રીશ્રીએ નાગરિકોને વડાપ્રધાનશ્રીના વિકસિત ભારતના સંકલ્પને સાકાર કરવા નાગરિકોને સહયોગ આપવા અનુરોધ કર્યો હતો.
આ પ્રસંગે અમદાવાદ પશ્ચિમના પૂર્વ સાંસદ શ્રી ડૉ. કિરીટભાઈ સોલંકીએ જણાવ્યું હતું કે, વડાપ્રધાનશ્રી નરેન્દ્ર મોદીના નેતૃત્વમાં દેશ 'વિકસિત ભારત' અને 'નવા ભારત' તરફ આગળ વધી રહ્યો છે. તેમણે ઉમેર્યું હતું કે, 'આયુષ્માન ભારત' યોજના આજે વિશ્વની સૌથી મોટી હેલ્થકેર સ્કીમ બની છે. આ યોજના થકી કરોડો પરિવારોને સ્વાસ્થ્ય સુરક્ષા મળી છે, જેથી ગરીબ દર્દીઓને ગંભીર બીમારીઓમાં લાખો રૂપિયાના ખર્ચમાંથી રાહત મળી છે. આ ઉપરાંત વડાપ્રધાનશ્રી દ્વારા અમલી વિવિધ કલ્યાણકારી યોજનાઓ દ્વારા છેવાડાના માનવી સુધી વિકાસ પહોંચાડવામાં આવ્યો છે.
દેશના આર્થિક વિકાસનો શ્રેય વડાપ્રધાનશ્રી નરેન્દ્રભાઈ મોદીને આપતા તેમણે વધુમાં જણાવ્યું હતું કે, ભારત આજે વિશ્વની અર્થવ્યવસ્થામાં ચોથા ક્રમે પહોંચ્યું છે. આ પ્રસંગે સંવિધાનના શિલ્પી ડો. બાબાસાહેબ આંબેડકરને યાદ કરતા તેમણે ઉમેર્યું હતું કે, આજે વડાપ્રધાનશ્રી સંવિધાનના મૂલ્યોના પગલે ચાલીને દેશની સેવા કરી રહ્યા છે. અંતમાં તેમણે સૌને વર્ષ ૨૦૪૭ સુધીમાં ભારતને સંપૂર્ણ 'વિકસિત ભારત' બનાવવાના સંકલ્પ સાથે આગળ વધવા આહ્વાન કર્યું હતું.
વડાપ્રધાનશ્રી નરેન્દ્રભાઈ મોદીએ વર્ચ્યુઅલી જોડાઈને નાગરિકોને વર્ષ ૨૦૪૭ સુધી 'વિકસિત ભારત' બનાવવાના સંકલ્પ માટે પ્રતિબદ્ધ કર્યા. આ પ્રસંગે વડાપ્રધાનશ્રી નરેન્દ્રભાઈ મોદીએ જીવંત પ્રસારણમાં કચ્છના ભૂકંપ અને ત્યારબાદ કચ્છના વિકાસને યાદ કરતા જણાવ્યું હતું કે, કચ્છની પુનઃનિર્માણની શક્તિ મારા જાહેર જીવનની સૌથી મોટી પ્રેરણા રહી છે. તેમણે આ પ્રસંગે નાગરિકોને "વિકસિત ભારત, આત્મનિર્ભર ભારત" બનાવવા આહ્વાન કર્યું હતું.
કાર્યક્રમના અંતે ઉપસ્થિત નાગરિકોએ વિકસિત ભારતના સંકલ્પને સાકાર કરવા માટે શપથ લઇને પોતાના યોગદાનની પ્રતિબદ્ધતા વ્યક્ત કરી હતી. આ કાર્યક્રમમાં સહભાગી થવા કચ્છ જિલ્લામાંથી મોટી સંખ્યામાં નાગરિકો ઉપસ્થિત રહ્યા હતા.
આ પ્રસંગે સાસંદશ્રી વિનોદભાઈ ચાવડા, જિલ્લા પંચાયત પ્રમુખશ્રી પ્રભાબેન હુણ, ધારાસભ્યશ્રી સર્વ કેશુભાઇ પટેલ, માલતીબેન મહેશ્વરી, પ્રદ્યુમનસિંહ જાડેજા, વિરેન્દ્રસિંહ જાડેજા, ભુજ નગરપતિશ્રી શીતલભાઈ શાહ, ગાંધીધામના મેયરશ્રી દિવ્યાબેન નાથાણી, આગેવાનશ્રીઓ દેવજીભાઈ વરચંદ, ફલજીભાઈ ચૌધરી, ધવલ આચાર્ય, ભીમજીભાઇ જોધાણી, હિતેશભાઈ ખંડોલ, કલેક્ટરશ્રી અનિલ રાણાવસિયા, ગાંધીધામ મ્યુનિસિપલ કમિશનર શ્રી ડી.બી.ડવેરા, જિલ્લા વિકાસ અધિકારીશ્રી ઉત્સવ ગૌતમ, પશ્ચિમ કચ્છ એસ.પીશ્રી વિકાસ સૂંડા સહિત જિલ્લાની નગરપાલિકાઓના પ્રમુખશ્રી, તાલુકા પંચાયતોના પ્રમુખશ્રી, જિલ્લા પંચાયતના વિવિધ સમિતિઓના ચેરમેનશ્રી સહિત જિલ્લાના પદાધિકારીઓશ્રીઓ, ઉચ્ચ અધિકારીઓશ્રી સહિત મોટી સંખ્યામાં વિદ્યાર્થીઓ તથા નાગરિકો ઉપસ્થિત રહ્યા હતા.

08/10/2026

અખબાર યાદી
સ્પર્ધાત્મક પરીક્ષાની તૈયારી કરતી દીકરીઓ માટે “કલેક્ટર કી ક્લાસ” કાર્યક્રમ યોજાશે
જિલ્લા કલેક્ટરશ્રીના સીધા માર્ગદર્શન હેઠળ વિવિધ સ્પર્ધાત્મક પરિક્ષાની તૈયારી કરતી કચ્છ જિલ્લાની દીકરીઓ માટે બેટી બચાઓ બેટી પઢાઓ યોજના અંતર્ગત જિલ્લા મહિલા અને બાળ અધિકારીની કચેરી દ્વારા “કલેક્ટર કી ક્લાસ”નું આયોજન કરવામાં આવ્યું છે.
જીપીએસસી, યુપીએસસી, ગુજરાત ગૌણ સેવા પસંદગી બોર્ડ, પંચાયત બોર્ડ, કે પોલીસ વિભાગ સહિતની વિવિધ સ્પર્ધાત્મક પરીક્ષાઓની તૈયારીઓ કરતી દીકરીઓને પ્રોત્સાહન અને સચોટ માર્ગદર્શન પૂરું પાડવાના ઉદ્દેશ્યથી જિલ્લા મહિલા અને બાળ અધિકારીની કચેરી દ્વારા એક વિશેષ આયોજન કરવામાં આવ્યું છે. જે અંતર્ગત આગામી દિવસોમાં ભુજ ખાતે કલેક્ટર કી ક્લાસ કાર્યક્રમ યોજાશે.
આ કાર્યક્રમમાં ભાગ લેવા ઈચ્છતી અને સ્પર્ધાત્મક પરીક્ષાની તૈયારી કરતી માત્ર કચ્છની દીકરીઓએ ઓનલાઇન રજિસ્ટ્રેશન કરાવવાનું રહેશે. જેમાં ઉમેદવારે પોતાનું નામ, ગામનું નામ, મોબાઈલ નંબર, હાલનો શૈક્ષણિક અભ્યાસ તેમજ હાલ કઈ સ્પર્ધાત્મક પરીક્ષાની તૈયારી કરી રહ્યા છો, તે સહિતની પૂરક વિગતો ભરીને ફોર્મ સબમિટ કરવાનું રહેશે. નોંધણી પ્રક્રિયા પૂર્ણ થયા બાદ તમામ ડેટા એકત્રિત કરીને તેનું સંકલન કરવામાં આવશે અને ત્યારબાદ ભુજમાં “કલેક્ટર કી ક્લાસ” કાર્યક્રમનું આયોજન કરાશે. ભુજમાં યોજાનારા આ કાર્યક્રમમાં જિલ્લા કલેક્ટરશ્રી તેમજ અન્ય વિવિધ ઉચ્ચ અધિકારીશ્રીઓ ઉપસ્થિત રહેશે. તેઓ સ્પર્ધાત્મક પરીક્ષાની તૈયારી કરતી દીકરીઓ સાથે સીધો સંવાદ કરશે. દીકરીઓને અભ્યાસ અને પરીક્ષાને લગતા મૂંઝવતા પ્રશ્નોનું નિરાકરણ લાવવામાં આવશે તેમજ સ્પર્ધાત્મક પરીક્ષા કઈ રીતે અને કઈ રણનીતિથી પાસ કરી શકાય તે અંગે અધિકારીઓ પોતાના અનુભવોના આધારે માર્ગદર્શન પૂરું પાડશે. આ આ કાર્યક્રમાં ભાગ લેવા માટે ગુગલ લિંક https://forms.gle/sZXs8DgpCkzKFKwdA પર રજિસ્ટ્રેશન કરાવવાનું રહેશે મર્યાદિત સંખ્યામાં કાર્યક્રમ કરવાનો હોઈ પ્રથમ ૬૦ દીકરીઓને ભાગ લેવાની તક મળશે જેથી વહેલાસર રજિસ્ટ્રેશન કરાવી લેવા અપીલ કરવામાં આવે છે

08/10/2026

05/10/2026

*રાજ્યપાલ શ્રી આચાર્ય દેવવ્રતજીએ કચ્છના ભોરારા ગામે અનુસૂચિત જાતિના પરિવાર સાથે સવારનો નાસ્તો કરીને સામાજિક સમરસતા અને સાદગીનું ઉત્તમ ઉદાહરણ પૂરું પાડ્યું*
૦૦૦૦

સમાનતા અને સામાજિક સમરસતાના મૂલ્યોને સાર્થક કરતા ગુજરાતના માનનીય રાજ્યપાલ શ્રી આચાર્ય દેવવ્રતજીએ કચ્છ જિલ્લાના ભોરારા ગામની મુલાકાત લઈને અનુસૂચિત જાતિ પરિવારના શ્રી કાનજીભાઈ જેઠાભાઈ મહેશ્વરીના નિવાસસ્થાને સાદો નાસ્તો કર્યો હતો.

રાજ્યપાલશ્રીએ ભોરારા ગામના અનુસૂચિત જાતિ પરિવારના શ્રી કાનજીભાઈ જેઠાભાઈ મહેશ્વરી અને તેમના પરિવારના સભ્યો સાથે સવારનો નાસ્તો કરીને કચ્છની મહેમાનગતિ અને આગતાસ્વાગતાને બિરદાવી હતી. રાજ્યપાલશ્રીએ પરિવારના સભ્યો સાથે તેમના રોજિંદા જીવન, શિક્ષણ અને આજીવિકાના સ્ત્રોતો આત્મીયતાથી ચર્ચા કરી હતી.

રાજ્યપાલશ્રીએ કાનજીભાઈને પરિવારના મોભી હોવાના નાતે અનુરોધ કર્યો હતો કે બાળકોમાં સતત સંસ્કારનું સિંચન કરીને તેમને જીવનમાં ઉચ્ચ શિક્ષણ અપાવજો. કોઈપણ સંજોગોમાં બાળકોનું શિક્ષણ ન છૂટે તેમ રાજ્યપાલશ્રીએ ખાસ સૂચન કર્યું હતું. આ ઉપરાંત, જીવનમાં કર્મ કરવા અને આર્થિક ઉપાર્જન માટે કોઈપણ કામને નાનું નહીં માનીને જીવન વ્યતિત કરવા રાજ્યપાલશ્રીએ જણાવ્યું હતું.‌

શ્રી કાનજીભાઈના પરિવાર દ્વારા ૪ જેટલી ગાયોનું પાલન થાય છે તે જાણીને રાજ્યપાલશ્રીએ અત્યંત આનંદની લાગણી વ્યક્ત કરી હતી. રાજ્યપાલશ્રીએ પરિવારજનોને ગાય આધારિત પ્રાકૃતિક કૃષિના લાભ સમજાવ્યા હતા અને ફળફળાદી ઉગાડવા માટે માર્ગદર્શન પૂરું પાડ્યું હતું. રાજ્યપાલશ્રીએ શ્રી કાનજીભાઈના પરિવારને લોકભવન, ગાંધીનગર પધારવા આમંત્રણ પાઠવ્યું હતું.

સવારના નાસ્તા દરમિયાન રાજ્યપાલશ્રીએ કચ્છ કલેક્ટરશ્રી અનિલ રાણાવસિયા, જિલ્લા વિકાસ અધિકારીશ્રી ઉત્સવ ગૌતમ અને પશ્ચિમ કચ્છ પોલીસ અધિક્ષકશ્રી વિકાસ સુંડા સાથેની વાતચીતમાં પ્રધાનમંત્રીશ્રી નરેન્દ્રભાઈ મોદીના વિઝનથી છેલ્લા ૨૫ વર્ષમાં કચ્છ જિલ્લામાં થયેલા અભૂતપૂર્વ વિકાસની મનમૂકીને પ્રશંસા કરી હતી. જિલ્લા કલેક્ટરશ્રી સહિત અધિકારીશ્રીઓએ રાજ્યપાલશ્રીને કચ્છના પશુધન, સેવાભાવી સંસ્થાઓ અને જિલ્લાની ભૌગોલિક, આર્થિક તેમજ સામાજિક સ્થિતિ અંગે અવગત કરાવ્યા હતા. કચ્છના મહત્તમ ખેડૂતો પ્રાકૃતિક કૃષિ મોડેલ ફાર્મની મુલાકાત લે અને વધુને વધુ ખેડૂતો પ્રાકૃતિક કૃષિ તરફ વળે તે બાબત પર રાજ્યપાલશ્રીએ વિશેષ ભાર મૂક્યો હતો.

આ પ્રસંગે જિલ્લા કલેક્ટરશ્રી અનિલ રાણાવસિયા, જિલ્લા વિકાસ અધિકારીશ્રી ઉત્સવ ગૌતમ, પશ્ચિમ કચ્છ પોલીસ અધિક્ષકશ્રી વિકાસ સુંડા, મુન્દ્રા એસએસપીશ્રી ગૌતમ વિવેકાનંદન, ગામના સરપંચશ્રી, પ્રાંત અધિકારીશ્રી અભિષેક સિન્હા, મામલતદારશ્રી કલ્પનાબેન ગોન્દિયા, નાયબ નિયામકશ્રી(અનુસૂચિત જાતિ) વિનોદ રોહિત, જિલ્લા પુરવઠા અધિકારીશ્રી વિવેક બારહટ સહિત પરિવારના સભ્યો ઉપસ્થિત રહ્યા હતા.
૦૦૦૦