ਪਿਰਤਾ ਘੁੱਦਾ Pirta Ghudda

27/10/2022

ਗੁੜ੍ਹਤੀ ਦੇ ਵਿੱਚ ਦਾਰੂ ਮਿਲਦੀ
ਵਿਰਸੇ ਦੇ ਵਿੱਚ ਧੱਕੇ
ਪਹਿਲਾਂ ਸੋਚ ਵਿਚਾਰ ਨੀ ਕਰਦੇ
ਹੁਣ ਜਿੰਦਗੀ ਤੋਂ ਅੱਕੇ
ਰੇਹੜੀ ਵੀ ਅਸੀਂ ਲਾ ਨੀ ਸਕਦੇ
ਰਿਕਸ਼ਾ auto ਚਲਾ ਨੀ ਸਕਦੇ
ਰਫਲਾਂ ਪਿਸਟਲ ਗਹਿਣੇ ਸਾਡੇ
ਵਿੱਚ ਫੁਕਰਪੰਥੀਆਂ ਤੁੰਨੇ ਆਂ
ਛੋਟਾ ਕੰਮ ਅਸੀਂ ਕਰ ਨਹੀ ਸਕਦੇ
ਕਿਉਂਕਿ ਅਸੀਂ ਜੱਟ ਹੁੰਨੇ ਆਂ

ਮੰਗਣਾ ਵਿਆਹ ਕੋਈ ਖੁਸ਼ੀ ਦਾ ਮੌਕਾ
ਜਾਂ ਬਾਪੂ ਦਾ ਮਰਨਾ
ਪਹਿਲਾਂ ਤਾਂ ਕਿਸੇ ਸੁੱਖ ਨਹੀ ਦਿੱਤਾ
ਹੁਣ ਕਹਿੰਦੇ ਵੱਡਾ ਕਰਨਾ
ਅੱਡੀਆਂ ਚੱਕ ਕੇ ਫਾਹਾ ਲੈਣਾ
ਰਿਸ਼ਤੇਦਾਰਾਂ ਵਿੱਚ ਘੱਟ ਨਹੀ ਰਹਿਣਾ
ਪਿੰਡ ਵਿੱਚ ਹੈ ਸਰਦਾਰ ਕਹਾਉਣਾ
ਭਾਵੇਂ ਮੂੰਹ ਸਿਰ ਸਾਡੇ ਮੁੰਨੇ ਆਂ
ਖਰਚਾ ਅਸੀਂ ਘਟਾ ਨਹੀ ਸਕਦੇ
ਕਿਉਂਕਿ ਅਸੀਂ ਸਰਦਾਰ ਹੁੰਨੇ ਆਂ

ਵਿਦੇਸ਼ ਜਾਣਾ ਸਰਕਾਰੀ ਨੌਕਰ
ਬੱਸ ਦੋ ਤਿੰਨ ਚਾਅ ਨੇ ਰਹਿਗੇ
ਕਈਆਂ ਦੀ ਮਜਬੂਰੀ ਕਰਜਾ
ਸਰਦੇ ਵਰਦੇ ਵੀ ਕਈ ਲੈਗੇ
ਕੁਝ ਤਾਂ ਸੋਚ ਵਿਚਾਰੋ ਲੋਕੋ
ਚਾਦਰ ਵੇਖਕੇ ਪੈਰ ਪਸਾਰੋ ਲੋਕੋ
ਕਰਜੇ ਦੀ ਇਸ ਦਲ ਦਲ ਨੇ
ਘਰ ਬਾਰ ਕਈ ਕਰਤੇ ਸੁੰਨੇ ਆਂ
ਬਿਣ ਕਰਜੇ ਦੇ ਅਸੀਂ ਰਹਿ ਨਹੀ ਸਕਦੇ
ਕਿਉਂਕਿ ਅਸੀਂ ਜੱਟ ਹੁੰਨੇ ਆਂ

ਅਸੀਂ ਜਿਹੜਾ ਕੰਮ ਵਿਦੇਸ਼ ਚ ਕਰਦੇ
ਉਹ ਕਰਨ ਪੰਜਾਬ ਚ ਭਈਏ
ਅਕਲ ਦੇ ਦੁਸ਼ਮਣ ਅਸੀਂ ਹਾਂ ਮੁੱਢ ਤੋਂ
ਹੋਰ ਭਲਾਂ ਕੀ ਕਹੀਏ
ਦੋ ਨੰਬਰ ਵਿੱਚ ਫੌਰਨ ਜਾਣਾ ਪੱਕੀ ਸਾਡੀ ਗਰਾਰੀ ਆ
ਪਹਿਲਾਂ ਸੀ ਜੋ ਭੋਲੇ ਹੁੰਦੇ ਅੱਜ ਕੱਲ ਜੱਟ ਜੁਗਾੜੀ ਆ
ਕਈ ਪੱਤੇ ਖਾਕੇ ਰਾਤਾਂ ਕੱਢਦੇ
ਜਿੰਨਾ ਮੈਕਸੀਕੋ ਜੰਗਲ ਘੁੰਮੇ ਆਂ
ਅਸੀਂ ਇੱਕ ਨੰਬਰ ਵਿੱਚ ਜਾ ਨਹੀ ਸਕਦੇ
ਕਿਉਂਕਿ ਜੱਟ ਜੁਗਾੜੀ ਹੁੰਨੇ ਆਂ

ਟੀ ਵੀ ਤੇ ਜੋ ਦਹਿਸ਼ਤ ਪਾਉਂਦੇ
ਕੀ ਆਖਾਂ ਲੁੱਚੇ ਲੰਡਿਆਂ ਨੂੰ
ਕੁੜੀਆਂ ਦੇ ਜੋ ਵਾਲ ਕਟਾਕੇ
ਗੁੱਤ ਕਰਾਉਂਦੇ ਮੁੰਡਿਆਂ ਨੂੰ
ਐਸਾ ਇੱਕ ਮਹੌਲ ਬਣਾਤਾ
ਅਸਲਾ ਬੱਚਿਆਂ ਹੱਥ ਫੜਾਤਾ
ਪਾਣੀ ਦੀ ਅਸੀਂ ਵਾਰੀ ਖਾਤਰ
ਚਾਚੇ ਤਾਏ ਆਪਣੇ ਭੁੰਨੇ ਆਂ
ਕੋਈ ਸਿੱਧੀ ਸਿੱਖਿਆ ਲੈ ਨਹੀ ਸਕਦੇ
ਕਿਉਂਕਿ ਅਸੀਂ ਜੱਟ ਹੁੰਨੇ ਆਂ

ਥੋੜ੍ਹੀ ਪੂੰਜੀ ਵੱਡੇ ਸੁਪਨੇ ਹਰ ਕੋਈ ਲੈਣੇ ਚਾਹੁੰਦਾ ਏ
'ਪਿਰਤੇ ਘੁੱਦਿਆ' ਤੇਰਾ ਨਾਂ ਵੀ ਏਸ ਲਿਸਟ ਵਿਚ ਆਉਂਦਾ ਏ
ਓਹੀ ਜਮੀਨ ਦੇ ਦੋ ਹਿੱਸੇ ਜੱਟ ਹਰ ਪੀੜ੍ਹੀ ਵਿਚ ਪਾਉਂਦਾ ਏ
ਕਿਰਤ ਸਾਡਾ ਹਥਿਆਰ ਜੇ ਬਣਜੇ
ਬਾਣੀਏ ਜਿਆ ਸਹਿਚਾਰ ਜੇ ਬਣਜੇ
ਸਾਨੂੰ ਤਾਂ ਉਹੀ ਮਾਰ ਜਾਂਦੇ
ਜਿਹਨੂੰ ਆਪਣੇ ਹੱਥੀ ਚੁਣਨੇ ਆਂ......ਪਿਰਤਾ ਘੁੱਦਾ 9501293995

13/10/2022

Repost...ਕੰਮ ਤੇ ਸ਼ਰਮ ( ਪੜ੍ਹ ਲਿਓ ਲਾਈਕ ਤੇ ਸ਼ੇਅਰ ਬੇਸ਼ੱਕ ਨਾ ਕਰਿਓ)

ਬੇਰੁਜ਼ਗਾਰੀ ਦਾ ਬਹੁਤ ਰੌਲਾ ਪਾਇਆ ਪੰਜਾਬ ਚ ..ਕੁਛ ਹੱਦ ਤੱਕ ਸਹੀ ਵੀ ਆ
ਪਰ ਕੰਮ ਕਰਨਾ ਕੌਣ ਚਾਹੁੰਦਾ 5%-10% ਨੂੰ ਛੱਡ ਕੇ
ਜਿਹਨੂੰ ਸਰਕਾਰੀ ਨੌਕਰੀ ਨਹੀ ਮਿਲੀ ਹਰੇਕ ਈ ਬੇਰੁਜ਼ਗਾਰ ਕਹਾਉਂਦੇ
ਕੰਮ ਕਰਨ ਵਾਸਤੇ ਸੋਚ ਬਦਲਣੀ ਪਊ
ਪੰਜਾਬ ਕਿੰਨੇ ਬੇਰੁਜ਼ਗਾਰ ਮੁੰਡੇ ਆ.. ਤੇ ਕਿੰਨੀਆ ਰੇਹੜੀਆਂ? ਤੇ ਕਿੰਨੀਆ ਰੇਹੜੀਆਂ ਪੰਜਾਬੀ ਚਲਾਉਂਦੇ ਆ ਤੇ ਆਟੋ ਰਿਕਸ਼ਾ ਤੇ ਚਾਹ ਦੀਆਂ ਦੁਕਾਨਾਂ ਤੇ ਕਿੰਨੇ ਪੰਜਾਬੀ ਆ
ਛੋਟਾ ਵੱਡਾ ਕੰਮ ਸਮਝਣ ਵਾਲਿਓ ਸਾਰੀ ਰਾਤ ਪਾਣੀ ਦੀ ਵਾਰੀ ਲਾਉਣ ਨਾਲੋ ਬਰਗਰ ਭਰਕੇ ਦੇਣੇ ਜਾਂ ਆਟੋ ਚਲਾਉਣਾ ਕੋਈ ਔਖਾ ਨਹੀ.. ਪਰ ਸ਼ਰਮ ਮਾਰਦੀ ਆ ਸਾਨੂੰ
ਅਸੀਂ ਸਬਜੀ ਵੇਚਣ ਦੀ ਸ਼ਰਮ ਮੰਨਦੇ ਆ ਪਰ ਲੈਬਾਰਟਰੀ ਖੋਲਕੇ ਮਾਣ ਮਹਿਸੂਸ ਕਰਦੇ ਆਂ ਜਿੱਥੇ ਬਾਹਰ ਮੋਟੇ -ਮੋਟੇ ਅੱਖਰਾਂ ਲਿਖਾਉਂਣੇ ਆ
"ਇੱਥੇ 'ਥੁੱਕ, ਟੱਟੀ ,ਪੇਸ਼ਾਬ, ਵੀਰਜ ਤੇ ਖੂਨ ਚੈੱਕ ਕੀਤਾ ਜਾਂਦਾ ਹੈ "
ਅਸੀਂ ਭਈਆ ਨੂੰ ਮਾੜਾ ਕਹਿਣ ਲੱਗੇ ਮਿੰਟ ਮਾਰਦੇ ਆ ਪਰ ਇਹ ਨੀ ਸੋਚਦੇ ਕਿ ਸਾਡੇ ਭੈਣ ਭਰਾ ਵੀ ਵਿਦੇਸ਼ਾਂ ਚ ਇਹੀ ਕੰਮ ਕਰ ਰਹੇ ਆ ਤੇ ਰੋਜੀ ਰੋਟੀ ਲਈ ਐਮ ਏ ਪਾਸ ਮੁੰਡੇ ਪੀਜ਼ਾ ਸ਼ੌਪ,ਟੈਕਸੀ ਡਰਾਈਵਰ, ਜਾ ਦਿਹਾੜੀ ਕਰ ਰਹੇ ..ਉਥੇ ਨੀ ਸ਼ਰਮ ਆਉਂਦੀ
ਇਕ ਰੇਹੜੀ ਵਾਲਾ ਜਾਂ ਆਟੋ ਵਾਲਾ ਹਜਾਰ ਰੁਪਏ ਦਿਹਾੜੀ ਕਮਾ ਰਿਹਾ ਪਰ ਉਹਨਾ ਚੋ ਜਿਆਦਾਤਰ ਪੰਜਾਬੀ ਨਹੀ ..ਕਿਉਂ?
ਇਥੇ ਕਿਸੇ ਦਾ ਬੀਹ ਸਾਲ ਦਾ ਜਵਾਕ ਸਾਇਕਲ ਤੇ ਨੀ ਚੜਦਾ ਕੰਮ ਮਿਲੇ ਜਾਂ ਨਾ ਮਿਲੇ ...ਜਿਮ ਚ ਬਾਡੀ ਬਣਾਉਂਦਾ ਪਰ.. ਪੱਠੇ ਹੱਥੀਂ ਨੀ ਕੁਤਰਦਾ
ਮੋਬਾਈਲ, ਮੋਟਰਸਾਈਕਲ ਜੇ ਅੱਜ ਦੇ ਜਮਾਨੇ ਦੀ ਲੋੜ ਤਾਂ ਕੰਮ ਦੀ ਵੀ ਸਾਨੂੰ ਕੋਈ ਸ਼ਰਮ ਨੀ ਹੋਣੀ ਚਾਹੀਦੀ
ਬਾਕੀ ਜਿਹੜਾ ਇਹਨਾ ਗੱਲਾਂ ਨੂੰ ਹਲੇ ਵੀ ਫੇਸਬੁੱਕੀ ਵਿਦਵਾਨ ਸਮਝਦਾ ਤਾਂ ਮੈਂ ਦੱਸ ਦਿਆਂ ਕਿ ਮੈਂ ਇਕ ਫੌਜੀ ਆ ਤੇ ਸਾਨੂੰ ਝਾੜੂ ਤੋਂ ਲਾ ਕੇ ਬਦੂੰਕ ਤੱਕ ਚਲਾਉਣੀ ਸਿਖਾਈ ਜਾਂਦੀ ਆ(ਕੰਮ ਕਰਮ ਆ) ...ਕਰਮ ਚ ਸ਼ਰਮ ਨਹੀ ਹੋਣੀ ਚਾਹੀਦੀ
ਪਿਰਤਾ ਘੁੱਦਾ....

13/10/2022

ਭਈਏ ਭਜਾਓ ਪੰਜਾਬ ਬਚਾਓ ਅੰਦੋਲਨ ਦੋ ਦਿਨ ਲੇਟ ਕਰਨਾ ਪਿਆ ਕਿਉਂਕਿ ਪ੍ਰਧਾਨ ਸਾਹਬ ਦੇ ਮੁੰਡੇ ਦੀ ਕਨੇਡਾ ਦੀ ਫਲਾਇਟ ਸੀ

21/07/2022

ਮਹੱਤਵਪੂਰਣ ਸਵਾਲ ਖੜ੍ਹੇ ਕਰ ਗਈ
ਫ਼ਿਲਮ ‘ਪਦਮ ਸ਼੍ਰੀ ਕੌਰ ਸਿੰਘ’

ਸੰਗਰੂਰ ਜਿਲ੍ਹੇ ਦਾ ਧੁਰੰਤਰ ਬਾਕਸਰ ਕੌਰ ਸਿੰਘ ਬਾਕਸਿੰਗ ਰਿੰਗ ਇੱਕ ਅਜਿਹਾ ਯੋਧਾ ਹੈ ਜਿਸ ਦਾ ਗੁਣ-ਗਾਨ ਉਸ ਪੱਧਰ ’ਤੇ ਨਹੀਂ ਹੋਇਆ ਜਿਸ ਦਾ ਉਹ ਹੱਕਦਾਰ ਹੈ।ਕੌਰ ਸਿੰਘ ਜਿਹੇ ਯੋਧਿਆਂ ਦੀ ਜਿੱਤ ਦਾ ਤਲਿੱਸਮ 1982 ਏਸ਼ੀਅਨ ਖੇਡਾਂ ਵਿੱਚ ਫ਼ਾਈਨਲ ਦੀ ਹਾਕੀ ਵਾਲੀ ਹਾਰ ਵਿੱਚ ਗਵਾਚ ਗਿਆ ਸੀ।ਅਰਜਨ ਐਵਾਰਡ ਅਤੇ ਪਦਮ ਸ਼੍ਰੀ ਜਿਹੇ ਐਵਾਰਡ ਬੇਮਾਅਨੇ ਜਾਪਦੇ ਹਨ ਜਦੋਂ ਸਾਡੇ ਅਜਿਹੇ ਯੋਧੇ ਸਾਧਾਰਨ ਤੋਂ ਹੇਠਲੀ ਪੱਧਰ ਦੀ ਜ਼ਿੰਦਗੀ ਜਿਉਂਦੇ ਹੋਏ ਵੇਖੇ ਜਾਂਦੇ ਹਨ।

ਕਰਮ ਬਾਠ ਹੁਰਾਂ ਵੱਲੋਂ ਸਾਧਾਰਨ ਜਿਹੇ ਬਜਟ ਵਿੱਚ ਬਣਾਈ ਫ਼ਿਲਮ ‘ਪਦਮ ਸ਼੍ਰੀ ਕੌਰ ਸਿੰਘ’ ਭਾਵੇਂ ਕੌਰ ਸਿੰਘ ਦੀਆਂ ਪ੍ਰਾਪਤੀਆਂ ਦੇ ਕੱਦ ਨਾਲ ਇਨਸਾਫ਼ ਨਹੀਂ ਕਰਦੀ ਪਰ ਇੱਕ ਬਹੁਤ ਹੀ ਮਹੱਤਵਪੂਰਣ ਸਵਾਲ ਖੜ੍ਹਾ ਕਰਦੀ ਹੈ।1982 ਦੀਆਂ ਏਸ਼ੀਅਨ ਖੇਡਾਂ ਦੇ ਫ਼ਾਈਨਲ ਮੁਕਾਬਲੇ ਤੋਂ ਪਹਿਲਾਂ ਪੰਜਾਬ ਸਰਕਾਰ ਐਲਾਨ ਕਰਦੀ ਹੈ ਕਿ ਜੇ ਉਹ ਸੋਨ-ਤਮਗ਼ਾ ਜਿੱਤ ਕੇ ਲਿਆਵੇ ਤਾਂ ਉਸ ਨੂੰ ਸਰਕਾਰ ਵੱਲੋਂ ਇੱਕ ਲੱਖ ਰੁਪਏ ਦਾ ਇਨਾਮ ਦਿੱਤਾ ਜਾਵੇਗਾ।ਕੌਰ ਸਿੰਘ ਸੋਨ-ਤਮਗ਼ਾ ਜਿੱਤਦਾ ਹੈ ਪਰ 1982 ਦਾ ਐਲਾਨਿਆ ਇਨਾਮ ਉਸ ਨੂੰ ਅੱਜ ਤੱਕ ਨਹੀਂ ਮਿਲਦਾ।ਚਾਹੀਦਾ ਤਾਂ ਏਹ ਸੀ ਕਿ ਜਦੋਂ ਉਹ ਸੋਨ-ਤਮਗ਼ਾ ਜਿੱਤਣ ਬਾਅਦ ਪਿੰਡ ਆਉਂਦਾ ਤਾਂ ਮੁੱਖ-ਮੰਤਰੀ ਲੱਖ ਰੁਪਏ ਦਾ ਚੈੱਕ ਲੈ ਕੇ ਉਸਦੇ ਬਾਰ ਮੂਹਰੇ ਖੜ੍ਹਾ ਹੁੰਦਾ।ਪਤਾ ਨਹੀਂ ਕਿਉਂ ਸਰਕਾਰੀ ਐਲਾਨ ਬਾਬੂਆਂ ਦੀ ਭੇਟ ਚੜ੍ਹ ਜਾਂਦੇ ਹਨ।ਸਰਕਾਰੀ ਬਾਬੂਆਂ ਦੀਆਂ ਫ਼ਾਈਲਾਂ ਵਿੱਚ ਰੁਲਦੇ ਇਨਾਮਾਂ ਦੇ ਐਲਾਨ ਖਿਡਾਰੀਆਂ ਨੂੰ ਨਿਰ-ਉਤਸ਼ਾਹਿਤ ਕਰਦੇ ਹਨ।ਯੁਵਰਾਜ ਦੇ 6 ਛਿੱਕਿਆਂ ’ਤੇ ਕਰੋੜਾਂ ਰੁਪਏ ਲੁਟਾਉਣ ਵਾਲੀਆਂ ਸਰਕਾਰਾਂ ਨਿਮਾਣੇ ਖਿਡਾਰੀਆਂ ਨੂੰ ਕਿਉਂ ਭੁੱਲ ਜਾਂਦੀਆਂ ਹਨ?

ਸੰਗਰੂਰ ਜਿਲ੍ਹੇ ਦੇ ਸੁਖਦੇਵ ਸਿੰਘ ਢੀਂਡਸਾ ਵਰਗੇ ਦਿੱਗਜ਼ ਨੇਤਾ ਪੰਜਾਬ ਓਲੰਪਿਕ ਐਸੋਸੀਏਸ਼ਨ ਦੇ ਪ੍ਰਧਾਨ ਵੀ ਰਹਿੰਦੇ ਹਨ ਪਰ ਆਪਣੇ ਜਿਲ੍ਹੇ ਦੇ ਯੋਧੇ ਨੂੰ ਆਪਣੀ ਅਕਾਲੀ ਸਰਕਾਰ ਹੱਥੋਂ ਉਸਦਾ ਬਣਦਾ ਇਨਾਮ ਦਿਵਾਉਣ ਵਿੱਚ ਨਾਕਾਮਯਾਬ ਰਹਿੰਦੇ ਹਨ।ਫ਼ਿਲਮ ਸਰਕਾਰੀ ਸਿਸਟਮ ’ਤੇ ਚੋਟ ਕਰਦੀ ਹੈ।ਕੌਰ ਸਿੰਘ ਦਾ ਕੱਦ ਕਿਵੇਂ ਵੀ ਸ: ਮਿਲਖ਼ਾ ਸਿੰਘ ਅਤੇ ਪਾਨ ਸਿੰਘ ਤੋਮਰ ਜਿਹੇ ਮੈਦਾਨੀ ਯੋਧਿਆਂ ਤੋਂ ਘੱਟ ਨਹੀਂ ਸੀ ਪਰ ਵੱਡੇ ਫ਼ਿਲਮਕਾਰ ਏਸ ਯੋਧੇ ਨੂੰ ਵੱਡੇ ਪਰਦੇ ’ਤੇ ਉਤਾਰਨ ਤੋਂ ਪੈਰ ਪਿਛਾਂਹ ਖਿੱਚ ਜਾਂਦੇ ਹਨ।ਕਰਮ ਬਾਠ ਦੇ ਯਤਨਾਂ ਦੀ ਸ਼ਲਾਘਾ ਕਰਨੀ ਬਣਦੀ ਹੈ ਜਿਸ ਨੇ ਆਪਣੇ ਸੀਮਤ ਸਾਧਾਨਾਂ ਰਾਹੀਂ ਆਪਣਾ ਫ਼ਰਜ਼ ਤਾਂ ਨਿਭਾਇਆ ਹੈ।ਸਾਡੀ ਦਿਲੀ ਇੱਛਾ ਰਹੇਗੀ ਕਿ ਸਾਡੇ ਏਸ ਯੋਧੇ ਦੀ ਫ਼ਿਲਮ “ਭਾਗ ਮਿਲਖ਼ਾ ਸਿੰਘ ਭਾਗ” ਅਤੇ “ਪਾਨ ਸਿੰਘ ਤੋਮਰ” ਵਾਂਗ ਵੱਡੇ ਕੈਨਵਸ ’ਤੇ ਬਣੇ।

ਜੇ ਏਹ ਸੱਚ ਹੈ ਕਿ ਉਸ ਨੂੰ ਐਲਾਨ ਕੀਤੀ ਰਾਸ਼ੀ ਅੱਜ ਤੱਕ ਵੀ ਨਹੀਂ ਮਿਲੀ ਤਾਂ ਭਗਵੰਤ ਮਾਨ ਨੂੰ ਆਪਣੇ ਹੀ ਜਿਲ੍ਹੇ ਦੇ ਏਸ ਯੋਧੇ ਦਾ ਸਨਮਾਨ ਕਰਦਿਆਂ ਪਿਛਲੀਆਂ ਸਰਕਾਰਾਂ ਦੀ ਭੁੱਲ ਸੁਧਾਰਨੀ ਚਾਹੀਦੀ ਹੈ ਅਤੇ 1982 ਦੇ ਇੱਕ ਲੱਖ ਨੂੰ ਅੱਜ ਦੇ ਭਾਅ ਮੁਤਾਬਿਕ ਭੁਗਤਾਨ ਕਰਨਾ ਚਾਹੀਦਾ ਹੈ।

ਪ੍ਰਭਜੋਤ ਸਿੰਘ ਸੰਧੂ ਸਿਡਨੀ (ਆਸਟਰੇਲੀਆ)

20/07/2022

(ਰੱਬ ਦੇ ਘਰ ਵਿਚ ਠੱਗ).
ਰੱਬ ਦੇ ਨਾਂ ਤੇ ਪਾਈ ਦੁਕਾਨ
ਆਪਣਾ ਵੇਚੀ ਜਾਣ ਸਮਾਨ
ਇੱਥੇ ਅਨਪੜ੍ਹ ਦੇਣ ਗਿਆਨ
ਦੁਨੀਆ ਦੇ ਠੱਗ ਬਣੇ ਮਹਾਨ
ਕਈ ਲੁੱਟਦੇ ਨੇ ਟੋਪੀਆਂ ਪਾਕੇ
ਕਈਆਂ ਬੋਦੀ ਰੱਖੀ ਟਿੰਡ ਕਰਵਾਕੇ
ਕਈਆਂ ਬੰਨ੍ਹੀ ਪੱਗ ਓ ਲੋਕੋ
ਰੱਬ ਦੇ ਘਰ ਵਿਚ ਠੱਗ ਓ ਲੋਕੋ ਰੱਬ ਦੇ ਘਰ ਵਿਚ ਠੱਗ

ਨਾ ਸੇਵਾ ਪੁੰਨ ਦਾਨ ਕਰਨ ਦਾ
ਗੋਲਕਾਂ ਵਿੱਚੋਂ ਢਿੱਡ ਭਰਨ ਦਾ
ਰੌਲਾ ਏ ਪ੍ਰਧਾਨ ਬਣਨ ਦਾ
ਬੰਦਾ ਕੋਈ ਬੇਈਮਾਨ ਬਣਨ ਦਾ
ਜਾਂ ਮੱਸ਼ਰਿਆ ਸਾਨ੍ਹ ਬਣਨ ਦਾ
ਕਈਆਂ ਦੇ ਗੱਲ ਸੁਣਕੇ ਲੱਗਣੀ
ਸੀਨੇ ਦੇ ਵਿੱਚ ਅੱਗ ਓ ਲੋਕੋ
ਰੱਬ ਦੇ ਘਰ ਵਿਚ ਠੱਗ........

ਝੂਠ ਨੂੰ ਕਹਿਕੇ ਸੱਚ ਸੁਣਾਤਾ
ਮੁਰਦਾ ਕੋਈ ਫਰਿੱਜ ਚ ਲਾਤਾ
ਲੁੱਚੇ ਲੰਡੇ ਨੂੰ ਰੱਬ ਬਣਾਤਾ
ਸ਼ੇਰਾਂ ਨੇ ਜਦੋਂ ਹੱਗ ਵਖਾਤਾ
ਕਮਲਾ ਟੋਲਾ ਮਗਰ ਹੈ ਲਾਤਾ
ਜਿਓਂ ਭੇਡਾਂ ਦਾ ਵੱਗ ਓ ਲੋਕੋ
ਰੱਬ ਦੇ ਘਰ ਵਿਚ ਠੱਗ.......

ਗੁਰਬਾਣੀ ਦੀ ਗੱਲ ਬੰਨ੍ਹੋ ਪੱਲੇ
ਕਿਉਂ ਫਿਰਦੇ ਓ ਹੋਏ ਝੱਲੇ
ਕੁਝ ਨਹੀ ਸਾਧ ਪਖੰਡੀਆਂ ਪੱਲੇ
ਇਹ ਵੋਟਾਂ ਲਈ ਪਾਲੇ ਦੱਲੇ
ਦੁੱਧ ਨਹੀ ਹੁੰਦਾ ਫੰਡਰਾਂ ਥੱਲੇ
ਹੱਡਾਰੋੜੀ ਦੇ ਕੁੱਤੇ ਜਿਓਂ ਚੱਲੇ
ਭਾਲਣ ਦੇ ਲਈ ਹੱਡ ਓ ਲੋਕੋ
ਰੱਬ ਦੇ ਘਰ ਵਿਚ ਠੱਗ..........

ਬਲਾਤਕਾਰੀ ਨੇ ਇਹਨਾ ਦੇ ਅੱਡੇ
ਬੰਦੇ ਖੱਸੀ ਕਰਕੇ ਛੱਡੇ
ਫਿਲਮਾਂ ਦੇ ਪ੍ਰੋਜੈਕਟ ਵੀ ਵੱਡੇ
ਨੱਪਦੇ ਸੰਘੀ ਵਾਜ ਕੋਈ ਕੱਢੇ
'ਪਿਰਤੇ ਘੁੱਦਿਆ' ਲੁੱਟਣ ਤੋਂ ਪਈ
ਦੁਨੀਆ ਲਾਈ ਲੱਗ ਓ ਲੋਕੋ
ਰੱਬ ਦੇ ਘਰ ਵਿਚ ਠੱਗ..........
ਪਿਰਤਾ ਘੁੱਦਾ ...9501293995

03/07/2022

ਚੈੱਕ ਬੁੱਕ ਤੇ ਬਹੀਆਂ ਦਾ
ਜੀ ਟੀ ਰੋੜ ਤੇ ਪਹੀਆਂ ਦਾ
ਖੁਰਪੀ ਕਸੌਲੀ ਕਹੀਆਂ ਦਾ
ਲੈਦਰ ਦੇ ਬੂਟ ਤੇ ਜੁੱਤੀ ਦੀ ਜਰਕ ਦੱਸਾਂਗੇ
ਕਦੇ ਬੈਹਕੇ ਸੁਣੀ ਤੈਨੂੰ ਪਿੰਡਾਂ ਤੇ ਸ਼ਹਿਰਾਂ ਦੇ ਫਰਕ ਦੱਸਾਂਗੇ

ਪਿੰਪਲ ਫੋੜੇ ਧੱਫੜਾਂ ਦਾ
ਤੇਰੇ ਪੂਲ ਤੇ ਪਿੰਡ ਦੇ ਛੱਪੜਾਂ ਦਾ
ਤੇਰੇ ਡੈਡ ਦੀ ਘੂਰ ਤੇ ਬਾਪੂ ਦੇ ਥੱਪੜਾਂ ਦਾ
ਤੇਰੀ ਵਾਇਨ ਦਾ ਚਿੱਲ ਤੇ ਲਾਹਣ ਦੀ ਬੜ੍ਹਕ ਦੱਸਾਂਗੇ
ਕਦੇ ਬੈਹਕੇ ਸੁਣੀ ਤੈਨੂੰ ਪਿੰਡਾਂ ਤੇ ਸ਼ਹਿਰਾਂ ਦੇ ਫਰਕ ਦੱਸਾਂਗੇ

ਬੇਰ ਜਾਮਣ ਤੇ ਲੀਚੀ ਦਾ
ਗੁੱਸਾ ਹਰਖ ਕਚੀਚੀ ਦਾ
ਚੈੱਸ ਤੇ ਬਾਰਾਂ ਡੀਟੀ ਦਾ
ਟੈਨਿਸ ਤੇ ਲੁਕਣ ਮਚੀਚੀ ਦਾ
ਜੀਨ ਨੂੰ ਪਟਿਆਲਾ ਸ਼ਾਹੀ ਸਲਵਾਰ ਦੀ ਮੜ੍ਹਕ ਦੱਸਾਂਗੇ
ਕਦੇ ਬੈਹਕੇ ਸੁਣੀ ਤੈਨੂੰ ਪਿੰਡਾਂ ਤੇ ਸ਼ਹਿਰਾਂ ਦੇ ਫਰਕ ਦੱਸਾਂਗੇ

ਤੇਰੇ ਲਾਅਨ ਤੇ ਸਾਡੇ ਵਾੜੇ ਦਾ
ਟਕੀਲਾ ਸ਼ੌਟ ਦੇਸੀ ਦੇ ਹਾੜ੍ਹੇ ਦਾ
ਹਿਪ ਹੌਪ ਕਲੱਬ ਤੇ ਖੁੱਲੇ ਅਖਾੜੇ ਦਾ
ਗੱਲਾਂ ਤੇਰੀਆਂ ਰੌਮਾਂਟਿਕ ਨੇ ਕੀ ਹੁੰਦੀ ਤੈਨੂੰ ਠਰਕ ਦੱਸਾਂਗੇ
ਕਦੇ ਬੈਹਕੇ ਸੁਣੀ ਤੈਨੂੰ ਪਿੰਡਾਂ ਤੇ ਸ਼ਹਿਰਾਂ ਦੇ ਫਰਕ ਦੱਸਾਂਗੇ

ਘੜੀ ਪਹਿਰ ਤੇ ਬਿੰਦ ਬਾਰੇ
ਅੜੀ ਅਣਖ ਤੇ ਹਿੰਢ ਬਾਰੇ
ਅੱਕ ਕਰੀਰ ਤੇ ਰਿੰਡ ਬਾਰੇ
ਤੈਨੂੰ ਦੱਸਾਂਗੇ 'ਘੁੱਦੇ' ਪਿੰਡ ਬਾਰੇ
ਤੇਰੇ ਸ਼ੀਸ਼ਿਆਂ ਦੀ ਡਸਟ ਤੇ ਕੱਕੇ ਰੇਤੇ ਦੀ ਕਰਕ ਦੱਸਾਂਗੇ
ਕਦੇ ਬੈਹਕੇ ਸੁਣੀ ਤੈਨੂੰ ਪਿੰਡਾਂ ਤੇ ਸ਼ਹਿਰਾਂ ਦੇ ਫਰਕ ਦੱਸਾਂਗੇ
ਪਿਰਤਾ ਘੁੱਦਾ..9501293995

01/07/2022

ਕਰਾਂ ਦਾਤਾ ਫਰਿਆਦ,
ਰਹਿਣ ਫਸਲਾਂ ਅਬਾਦ,
ਨਾ ਮਾੜੀ ਨਿਕਲੇ ਔਲਾਦ,
ਸੁਖੀ ਵਸੇ ਏਹ ਪੰਜਾਬ,
ਪੈਰ ਭੜਕੇ ਰਾਹਾਂ ਤੋਂ ਸਿੱਧੇ ਪਾਈ ਮੇਰੇ ਮਾਲਕਾ,
ਡੁੱਬਦੀ ਜਵਾਨੀ ਤੇ ਕਿਸਾਨੀ ਨੂੰ ਬਚਾਈ ਮੇਰੇ ਮਾਲਕਾ,

ਵੰਡ ਕਾਣੀ ਕਾਹਤੋ ਪਾਉਂਦਾ ਸਾਡੇ ਨਾਲ ਹਰ ਵਾਰੀ,
ਪਹਿਲਾ ਚਿੱਟੀ ਮੱਖੀ ਹੁਣ ਖੇਤੀ ਗੜਿਆਂ ਨੇ ਮਾਰੀ,
ਬੈਠੀ ਘਰ ਵਿੱਚ ਧੀ ਕੋਠੇ ਜਿੱਡੀ ਏ ਕੁਆਰੀ,
ਭਾਰ ਇੱਕ ਵੀ ਨਾ ਲਾਹਿਆ ਭੋਂਏ ਗਹਿਣੇ ਹੋਈ ਸਾਰੀ,
ਹੋ ਗਈ ਘਾਟੇ ਦਾ ਏ ਸੌਦਾ ਹੁਣ ਵਾਹੀ ਮੇਰੇ ਮਾਲਕਾ,
ਡੁੱਬਦੀ ਜਵਾਨੀ ਤੇ ਕਿਸਾਨੀ. . . . .

ਟਾਇਮ ਚਲਦਾ ਕੁਹਲੈਣਾ ਔਖੇ ਦਿਨ ਲੰਘਦੇ,
ਲਾ ਲਾ ਵਹੀਆ ਉਤੇ ਗੂਠੇ ਹੋਏ ਨੀਲੇ ਰੰਗਦੇ,
ਬਣੇ ਘਰ ਚ ਹਾਲਾਤ ਜਿਵੇਂ ਹੁੰਦੇ ਜੰਗਦੇ,
ਪੱਟੇ ਮੁੰਡੇ ਵਾਡਰਾਂ ਤੋ ਆਉਂਦੀ ਭੰਗ ਦੇ,
ਰੋਂਦੇ ਚਿਹਰਿਆਂ ਤੇ ਹਾਸੇ ਤੂੰ ਲਿਆਈ ਮੇਰੇ ਮਾਲਕਾ,
ਡੁੱਬਦੀ ਜਵਾਨੀ ਤੇ ਕਿਸਾਨੀ. . . . .

ਖੁਦਕਸ਼ੀਆਂ ਤੋ ਬਿਨਾ ਜੱਟ ਕੀ ਕਰਨ ਵਿਚਾਰੇ,
ਇੱਕ ਆੜ੍ਹਤ ਦੀ ਲੁੱਟ ਦੂਜਾ ਲੀਡਰਾਂ ਨੇ ਮਾਰੇ
ਫਸੇ ਦਲ ਦਲ ਵਿਚ ਬੜੀ ਦੂਰ ਨੇ ਕਿਨਾਰੇ,
ਘੁੱਦੇ ਵਾਲਿਆ ਕੀ ਢਿੱਲੋਂ ਹੋਰ ਦੱਸਾਂ ਇਹਨਾ ਬਾਰੇ,
ਰਾਹ ਜਿਉਣ ਦਾ ਕੋਈ ਨਵਾਂ ਤੂੰ ਵਿਖਾਈ ਮੇਰੇ ਮਾਲਕਾ,
ਡੁੱਬਦੀ ਜਵਾਨੀ ਤੇ ਕਿਸਾਨੀ. . . . .

ਢਿੱਡ ਦੁਨੀਆ ਦਾ ਭਰ ਆਪ ਭੁੱਖਾ ਸਾਉਂਦਾ ਰਾਤ ਨੂੰ,
ਰੁਲੇ ਮੰਡੀਆਂ ਦੇ ਵਿੱਚ ਕੋਈ ਪੁੱਛਦਾ ਨਾ ਬਾਤ ਨੂੰ,
ਪੁੱਤ ਹੋ ਗਿਆ ਨਸ਼ੇੜੀ ਸਿੱਧਾ ਬੋਲਦਾ ਨਾ ਬਾਪ ਨੂੰ,
ਕਿਉ ਗੀਤਾਂ ਵਿੱਚ ਵੈਲੀ ਇਹ ਵਿਖਾਉਣ ਜੱਟ ਜਾਤ ਨੂੰ,
ਖਾਨੇ ਇਹਨਾ ਦੇ ਕੋਈ ਅਕਲ ਤੂੰ ਪਾਈ ਮੇਰੇ ਮਾਲਕਾ,
ਡੁੱਬਦੀ ਜਵਾਨੀ ਤੇ ਕਿਸਾਨੀ ਨੂੰ ਬਚਾਈ ਮੇਰੇ ਮਾਲਕਾ
ਪਿਰਤਾ ਘੁੱਦਾ .....

25/06/2022

ਮੁਲਖ ਦਾ ਹਾਲ

ਇੱਥੇ ਮਾਸਟਰ ਵੀ ਕੁੱਟਦੇ ਆ
ਤੇ ਮਾਸਟਰ ਵੀ ਕੁੱਟੇ ਜਾਂਦੇ ਆ

ਇੱਥੇ ਪੈਟਰੌਲ ਪੰਪ ਵਾਲੇ ਵੀ ਲੁੱਟਦੇ ਆ
ਤੇ ਪੈਟਰੌਲ ਪੰਪ ਵੀ ਲੁੱਟੇ ਜਾਂਦੇ ਆ

ਇੱਥੇ ਕੰਜਕਾ ਵੀ ਬਠਾਈਆਂ ਜਾਦੀਆਂ
ਤੇ ਕੁੜੀਆ ਦੇ ਭਰੂਣ ਕੂੜੇ ਚ ਸੁੱਟੇ ਜਾਂਦੇ ਆ

ਇੱਥੇ ਸਰਕਾਰੀ ਸਕੂਲ ਚ ਨੌਕਰੀ ਲੈ ਕੇ
ਤੇ ਆਪਣੇ ਬੱਚੇ ਪ੍ਰਾਈਵੇਟ ਚ ਪੜ੍ਹਾਏ ਜਾਂਦੇ ਆ

ਇੱਥੇ ਲੁੱਟ ਕਰਨ ਲਈ ਕਮਿਸ਼ਨ ਦੇਣਾ ਪੈਂਦਾ
ਤੇ ਹੱਕ ਲੈਣ ਲਈ ਧਰਨੇ ਲਾਏ ਜਾਂਦੇ ਆ

ਇੱਥੇ ਗਰੀਬਾਂ ਕੋਲੇ ਤਣ ਢਕਣ ਲਈ ਲੀੜਾ ਨਹੀ
ਤੇ ਅਮੀਰੀ ਵਿਖਾਉਣ ਲਈ ਘੱਟ ਪਾਏ ਜਾਂਦੇ ਆ

ਧਰਮ ਦੇ ਨਾਮ ਤੇ ਪੱਗਾ ਬੰਨੀਆ ਵੀ ਜਾਂਦੀਆ
ਤੇ ਪੱਗਾਂ ਲਾਹੀਆ ਵੀ ਜਾਂਦੀਆ

ਇੱਥੇ ਮੰਦਰ ਬਣਾਉਣ ਲਈ
ਮਸਜਿਦਾਂ ਢਾਹੀਆਂ ਵੀ ਜਾਂਦੀਆ

ਇੱਥੇ ਪਸ਼ੂਆ ਨੂੰ ਪੂਜਿਆ ਵੀ ਜਾਂਦਾ
ਤੇ ਬਲੀਆਂ ਚੜ੍ਹਾਈਆਂ ਵੀ ਜਾਂਦੀਆ..ਪਿਰਤਾ ਘੁੱਦਾ

12/03/2022

ਕੁੱਬੇ ਦੇ ਮਾਰੀ ਲੱਤ ........FM ਬਨਾਮ MC
ਬਠਿੰਡੇ ਕਾਰਪੋਰੇਸ਼ਨ ਦੀਆਂ ਚੋਣਾ ਹੋਈਆਂ ਤਾਂ ਜਗਰੂਪ ਸਿੰਘ ਗਿੱਲ 48 ਨੰਬਰ ਵਾਰਡ ਚੋਂ ਚੋਣ ਲੜਿਆ ਤੇ ਇਹਨਾ ਭਾਣਜਾ ਸੁਖਦੀਪ ਢਿੱਲੋਂ ਸਾਡੇ 2 ਨੰਬਰ ਵਾਰਡ ਚੋਂ ਕੈਂਡੀਡੇਟ ਸੀ ਜਦੋਂ ਇੱਥੇ ਚੋਣ ਪ੍ਰਚਾਰ ਹੋਇਆ ਤਾਂ ਇਹੀ ਕਿਹਾ ਗਿਆ ਕਿ ਮੇਅਰ ਦਾ ਦਾਅਵੇਦਾਰ ਜਗਰੂਪ ਗਿੱਲ ਹੀ ਆ ਐਥੋ ਤੱਕ ਕਿ ਇਹ ਚੋਣਾਂ ਲੜ੍ਣ ਲਈ ਗਿੱਲ ਸਾਹਬ ਨੇ ਪਲੈਨਿੰਗ ਬੋਰਡ ਦੇ ਚੇਅਰਮੈਨ ਤੋਂ ਅਸਤੀਫਾ ਵੀ ਦੇ ਦਿੱਤਾ ਚੋਣਾਂ ਲੜੇ ਤੇ ਜਿੱਤ ਵੀ ਗਏ
ਪਰ ਕਹਾਣੀ ਕੁਛ ਹੋਰ ਈ ਵਰਤ ਗਈ ਜਦੋਂ ਮੇਅਰ ਦੀ ਚੋਣ ਕਰਨ ਚਰਨਜੀਤ ਚੰਨੀ ਤੇ ਮਿਰਜਾ ਗਾਲਿਬ (ਮਨਪ੍ਰੀਤ) ਨੇ ਮਿਲਕੇ ਰਮਨ ਗੋਇਲ ਨੂੰ ਬਣਾਤਾ ਬਾਹਰ ਆ ਕੇ ਗਿੱਲ ਸਾਹਬ ਨੇ ਵੀ ਆਵਦੀ ਬਹੁਤ ਭੜ੍ਹਾਸ ਕੱਢੀ ਕਿਹਾ ਕਿ ਇਹਨਾ ਦੇ ਮਨਪ੍ਰੀਤ ਦੇ ਸਾਲੇ ਨਾਲ ਠੇਕੇ ਸਾਂਝੇ ਆ ਪਰ੍ਹ ਢਾਡਿਆਂ ਮੂਹਰੇ ਕਿਹਦੀ ਚੱਲਦੀ ਆ
ਸਮਾਂ ਲੰਘਿਆ ਆਮ ਆਦਮੀ ਪਾਰਟੀ ਨੂੰ ਵੀ ਬਠਿੰਡਾ ਸ਼ਹਿਰੀ ਲਈ ਸਾਫ ਸੁਥਰੇ ਤੇ ਸਟਰੌਂਗ ਕੈਂਡੀਡੇਟ ਦੀ ਭਾਲ ਸੀ ਤੇ ਇਹਨਾਂ ਸ਼ਰਤਾਂ ਤੇ ਜਗਰੂਪ ਗਿੱਲ ਪੂਰਾ ਉਤਰਦਾ ਸੀ 40 ਸਾਲਾਂ ਤੋਂ MC ਜਿੱਤਦਾ ਆ ਰਿਹਾ ਸੀ ਤੇ ਬਠਿੰਡਾ Bar Cauncil ਦਾ ਪ੍ਰਧਾਨ ਤੇ ਨਗਰ ਕਾਂਊਸਲ ਦਾ ਪ੍ਰਧਾਨ ਵੀ ਰਹਿ ਚੁੱਕਾ ਸੀ ਇੱਕ ਪਾਸੇ ਪੰਜ ਸਾਲ ਦੀ ਸੱਤਾਧਾਰੀ ਸਰਕਾਰ ਦਾ ਖਜਾਨਾ ਮੰਤਰੀ ਤੇ ਦੂਜੇ ਪਾਸੇ 48 ਨੰਬਰ ਵਾਰਡ ਦਾ MC ਜਿਹਦੇ ਕੋਲ ਨਾ ਤਾਂ ਕੋਈ ਪਾਵਰ ਤੇ ਨਾ ਬਹੁਤ ਵੱਡੀ ਪੂੰਜੀ ਵੋਟਾਂ ਖਰੀਦਣ ਤੇ ਨਸ਼ਾ ਵੰਡਣ ਲਈ
ਪਰ FM ਬਨਾਮ MC ਵਾਲਾ ਮੈਚ ਓਦੋਂ ਦਿਲਚਸਪ ਹੋ ਨਿਬੜਿਆ ਜਦੋਂ ਇਹ MC ਜਗਰੂਪ ਸਿੰਘ ਗਿੱਲ ਪੰਜਾਬ ਚ ਸਭ ਤੋਂ ਵੱਧ ਦੂਜੇ ਨੰਬਰ ਦਾ ਮਾਰਜਣ ਲੱਗਭੱਗ 64000 ਵੋਟਾਂ ਦੇ ਫਰਕ ਨਾਲ ਖਜਾਨਾ ਮੰਤਰੀ ਹਰਾਕੇ ਵਿਧਾਨ ਸਭਾ ਦੀਆਂ ਪੌੜੀਆਂ ਚੜ੍ਹ ਗਿਆ - ਪਿਰਤਾ ਘੁੱਦਾ 9501293995

12/02/2022

ਮੁੰਡੇ ਭੇਜ ਕੇ ਸਟੱਡੀ ਵੀਜੇ਼ ਉੱਤੇ
ਤੇ ਗੁਣ ਗਾਉਂਦੇ ਸਰਕਾਰ ਦੇ

ਜਦੋਂ ਹਲਕੇ ਦਾ ਚਾਰਜ ਸੰਭਾਲਿਆ
ਤੇ ਜੇਬ ਭਾਰੀ ਹੋਈ ਆਪਣੀ

ਸਾਨੂੰ ਲੀਡਰਾਂ ਤੇ ਰਿਹਾ ਨਾ ਭਰੋਸਾ
ਤੇ ਕੁੱਤੇ ਵਫਾਦਾਰ ਹੋ ਗਏ

ਪੈਸੇ ਦੇਕੇ ਕਰਾਏ ਕੰਮ ਆਪਣੇ
ਤੇ ਭੰਡਦੇ ਨੇ ਸਿਸਟਮ ਨੂੰ

ਤੀਜੀ ਪਾਰਟੀ ਚੋਂ ਲੈ ਲਿਆ ਸਿਰੋਪਾ
ਤੇ ਲੋਕਾਂ ਦੀ ਇੱਕ ਸੇਵਾ ਕਰਕੇ

ਨਸ਼ਾ ਖਾ ਗਿਆ ਜੀ ਰੰਗਲੇ ਪੰਜਾਬ ਨੂੰ
ਤੇ ਠੇਕੇ ਉੱਤੇ ਗੱਲ ਚੱਲ ਪਈ..ਪਿਰਤਾ ਘੁੱਦਾ

03/02/2022

ਉਖੜੀ ਕੁਹਾੜੀ ਦਾ
ਗੁਆਂਢ ਚ ਵਿਗਾੜੀ ਦਾ
ਵੈਲੀ ਨਾਲ ਆੜੀ ਦਾ
ਪਿਓ ਦੀ ਫੜੀ ਦਾੜੀ ਦਾ
ਸੋਗ ਵਿੱਚ ਤਾੜੀ ਦਾ
ਔਲਾਦ ਕੋਈ ਮਾੜੀ ਦਾ
ਜੀ ਬੜਾ ਨੁਕਸਾਨ ਆ

ਚੜੀ ਹੋਈ ਭੰਗ ਦਾ
ਸੱਪ ਵਾਲੇ ਡੰਗ ਦਾ
ਗਲੀ ਵਿੱਚ ਖੰਗ ਦਾ
ਮੁਲਕਾ ਚ ਯੰਗ ਦਾ
ਪਰਮਾਣੂ ਬੰਬ ਦਾ
ਦਾਜ ਵਾਲੀ ਮੰਗ ਦਾ
ਜੀ ਬੜਾ ਨੁਕਸਾਨ ਆ

ਖੁਸਰੇ ਨੂੰ ਮੋੜੇ ਦਾ
ਅੰਨੇ ਬੈਲ ਘੋੜੇ ਦਾ
ਛਾਤੀ ਵਿੱਚ ਫੋੜੇ ਦਾ
ਵਾਧੂ ਪੈਸਾ ਰੋੜੇ ਦਾ
ਜੀ ਬੜਾ ਨੁਕਸਾਨ ਆ

ਖੋਟ ਸੁਨਿਆਰ ਦਾ
ਪੁਲਸੀਏ ਯਾਰ ਦਾ
ਨੰਗੀ ਤਲਵਾਰ ਦਾ
ਲੋਟੂ ਸਰਕਾਰ ਦਾ
ਹੋਈ ਗੜੇਮਾਰ ਦਾ
ਜੀ ਬੜਾ ਨੁਕਸਾਨ ਆ

ਕਲਮਾਂ ਦੀ ਮਾਰ ਦਾ
ਵਧੇ ਹੋਏ ਭਾਰ ਦਾ
ਯੁੱਧ ਵਿੱਚ ਹਾਰ ਦਾ
ਬੱਚੇ ਹੱਥ ਅੰਗਿਆਰ ਦਾ
ਬੇ-ਲਾਇਸੰਸੀ ਹਥਿਆਰ ਦਾ
ਜੀ ਬੜਾ ਨੁਕਸਾਨ ਆ

ਵਿਕੀ ਹੋਈ ਵੋਟ ਦਾ
ਅਮਲੀ ਨੂੰ ਤੋਟ ਦਾ
ਨੀਤ ਵਿੱਚ ਖੋਟ ਦਾ
ਸਿਰ ਵਾਲੀ ਚੋਟ ਦਾ
ਚੋਰਾਂ ਦੀ ਸਪੋਟ ਦਾ
ਜੀ ਬੜਾ ਨੁਕਸਾਨ ਆ

ਪੁਲਸ ਦੀ ਕੁੱਟਦਾ
ਸ਼ਾਹਾ ਵਾਲੀ ਲੁੱਟਦਾ
ਭਾਈਆਂ ਵਿੱਚ ਫੁੱਟ ਦਾ
ਧੀ ਦੀ ਰੱਖੀ ਚੁੱਪ ਦਾ
ਨੀਂਹ ਚ ਉੱਗੇ ਰੁੱਖ ਦਾ
ਜੀ ਬੜਾ ਨੁਕਸਾਨ ਆ

ਬੇ-ਸੁਰਾ ਗਾਉਣ ਦਾ
ਅਮਲੀ ਨਹਾਉਣ ਦਾ
ਚੁਗਲੀ ਨੂੰ ਲਾਉਣ ਦਾ
ਬਹੁਤਾ ਖਾਣ ਸਾਉਣ ਦਾ
ਘਰੇ ਕੀੜਿਆਂ ਦੇ ਭੌਣ ਦਾ
ਧੀ ਨੂੰ ਕੁੱਖ ਚ ਮਰਾਉਣ ਦਾ
ਸੱਚ 'ਪਿਰਤੇ' ਸਣਾਉਣ ਦਾ
ਜੀ ਬੜਾ ਨੁਕਸਾਨ ਆ

ਲੱਗੀ ਹੋਈ ਸਿਉਂਕ ਦਾ
ਕੁੱਤਾ ਰਾਤੀ ਭੌਕ ਦਾ
ਮਹਿੰਗੇ ਰੱਖੇ ਸ਼ੌਕ ਦਾ
ਬਿਨ ਬੱਤੀਆ ਦੇ ਚੌਂਕ ਦਾ
ਜੀ ਬੜਾ ਨੁਕਸਾਨ ਆ
ਪਿਰਤਾ ਘੁੱਦਾ....9501293995

30/01/2022