13/02/2026
व्हॅलेन्टाईन डे ला ‘मॉरल पोलिसिंग’ करणाऱ्यांवर कठोर कारवाईची मागणी
छ. संभाजीनगर | दि.१३ फेब्रुवारी
व्हॅलेन्टाईन डे (१४ फेब्रुवारी) च्या दिवशी शहरातील सार्वजनिक ठिकाणी तरुण-तरुणींना त्रास देणाऱ्या, धमकावणाऱ्या तसेच धुडगूस घालणाऱ्या टोळ्यांवर कठोर कारवाई करून कायदा-सुव्यवस्था राखावी, अशी मागणी पोलीस आयुक्तांकडे निवेदनाद्वारे करण्यात आली आहे.
निवेदनात नमूद करण्यात आले आहे की, दरवर्षी व्हॅलेन्टाईन डे च्या निमित्ताने उद्यान, महाविद्यालय परिसर, रस्ते, चौक, कॅफे परिसर अशा ठिकाणी तरुण-तरुणी शांतपणे वेळ घालवत असतात. मात्र काही संघटित टोळ्या/गुंड प्रवृत्तीचे लोक या दिवशी जबरदस्ती, शिवीगाळ, धमकी, मारहाण, व्हिडिओ काढणे, महिलांची छेडछाड, मानसिक त्रास देणे असे प्रकार करून धुडगूस घालतात. यामुळे महिलांच्या सुरक्षिततेवर थेट आघात होतो आणि कायदा हातात घेण्याचा प्रयत्न केला जातो, असेही निवेदनात म्हटले आहे.
या पार्श्वभूमीवर शहरातील संवेदनशील ठिकाणी विशेष पोलीस बंदोबस्त तैनात करावा, त्रास देणाऱ्या टोळ्यांवर तत्काळ गुन्हे दाखल करावेत, तसेच गटागटाने तोंडाला फडके बांधून दांडे घेऊन फिरणाऱ्या टोळ्यांवर प्रतिबंधात्मक कारवाई करावी, अशी मागणी करण्यात आली आहे. यासोबतच यापूर्वी अशा प्रकारचे गुन्हे केलेल्या व्यक्तींना नोटीस बजावावी, महिलांची छेडछाड, धमकी, मारहाण, जबरदस्तीने व्हिडिओ काढणे यावर कठोर कलमानुसार कारवाई करावी, तसेच ‘मॉरल पोलिसिंग’ करणाऱ्या गटांवरही प्रतिबंधात्मक कारवाई करावी, अशी भूमिका निवेदनात मांडण्यात आली आहे.
यावेळी रिपब्लिकन विद्यार्थी सेनेचे सचिन निकम, कुणाल भालेराव, प्रा.प्रबोधन बनसोडे आदींची उपस्थिती होती.
सचिन अशोक निकम
रिपब्लिकन विद्यार्थी सेना,महाराष्ट्र.
