31/05/2026
സ്കൂൾ തുറപ്പ്
*ആദ്യപാഠം ആരോഗ്യപാഠം ക്യാമ്പയിനുമായി ആരോഗ്യവകുപ്പ്*
സ്കൂൾ തുറക്കുന്നതുമായി ബന്ധപ്പെട്ട് വിദ്യാർത്ഥികളെ കേന്ദ്രീകരിച്ചുള്ള ബോധവത്ക്കരണത്തിനായി ജില്ലയിലെ ആരോഗ്യവകുപ്പ് നടപ്പിലാക്കുന്ന *ആദ്യപാഠം ആരോഗ്യപാഠം* ക്യാമ്പയിന് തുടക്കമായി. സ്കൂൾ തുറക്കുന്നതിന്റെ മുന്നൊരുക്കമായി കായംകുളത്ത് നടന്ന ആരോഗ്യ-വിദ്യാഭ്യാസ വകുപ്പുകളുടെ യോഗത്തിൽ വെച്ച് സഹകരണ-എക്സൈസ് മന്ത്രി എം. ലിജു ക്യാമ്പയിന്റെ ഉദ്ഘാടനം നിർവ്വഹിച്ചു. ജൂൺ 1 മുതൽ 14 വരെ നീണ്ടുനിൽക്കുന്ന ക്യാമ്പയിന്റെ ഭാഗമായി ജില്ലയിലെ വിദ്യാലയങ്ങളിൽ ശുചിത്വം, ആരോഗ്യ ഭക്ഷണ ശീലങ്ങൾ, ആരോഗ്യകരമായ ആശയവിനിമയം എന്നിവയെ കുറിച്ച് ബോധവൽക്കരണ ക്ലാസുകൾ, രക്ഷിതാക്കൾക്ക് പോസിറ്റീവ് പേരന്റിംഗ് ക്ലാസുകൾ, വയറിളക്ക രോഗപ്രതിരോധം, ക്ഷയരോഗ ബോധവൽക്കരണം എന്നിവയ്ക്കായി പ്രത്യേക സ്കൂൾ അസംബ്ലികൾ എന്നിവ സംഘടിപ്പിക്കും. ജൂൺ ആദ്യവാരം നടക്കുന്ന സ്കൂൾ അസംബ്ലിയിൽ ലോക പുകയില വിരുദ്ധദിനത്തോടനുബന്ധിച്ച് വിദ്യാർത്ഥികൾ പുകയിലവിരുദ്ധ പ്രതിജ്ഞ എടുക്കും. കുട്ടികൾക്ക് കളികളിലൂടെ ആരോഗ്യപാഠങ്ങൾ പകർന്നു നൽകുന്നതിനായി ജില്ല എജ്യൂക്കേഷൻ മീഡിയ വിഭാഗം തയ്യാറാക്കിയ ഹെൽത്തി ജമ്പ്, ഹെൽത്തി കാർഡ് ഗെയിം സാമഗ്രികൾ ജില്ലയിലെ എല്ലാ ലോവർപ്രൈമറി സ്കൂളുകൾക്കും ക്യാമ്പയിന്റെ ഭാഗമായി ലഭ്യമാക്കും. ആരോഗ്യപാഠം എന്നപേരിൽ അധ്യാപകർക്കുള്ള റഫറൻസ് മെഡ്യൂളും തയ്യാറാക്കിയിട്ടുണ്ട്. ജില്ല മെഡിക്കൽ ഓഫീസർ ഡോ. വിദ്യ പി വി, ഡോ. വിപിൻ കെ രവി, ഡെപ്യൂട്ടി ജില്ല എജ്യൂക്കേഷൻ മീഡിയ ഓഫീസർമാരായ ഡോ. ചിത്ര ഐ, ഡോ. സേതുനാഥ് ആർ, ടെക്നിക്കൽ അസിസ്റ്റന്റ് ജയൻ കെ എന്നിവർ പങ്കെടുത്തു
