27/02/2026
സാമൂഹിക സുരക്ഷാ പദ്ധതികളിൽ നിന്നുള്ള കേന്ദ്ര പിന്മാറ്റം പ്രതിഷേധാർഹം: ബികെഎംയു
ആലപ്പുഴ: രാജ്യത്തെ ദരിദ്ര ജനവിഭാഗങ്ങൾക്ക് നൽകിവരുന്ന സാമൂഹിക സുരക്ഷാ പദ്ധതികളിൽനിന്ന് പൂർണമായും മാറിനിൽക്കാനുള്ള കേന്ദ്ര സർക്കാർ നടപടി അങ്ങേയറ്റം പ്രതിഷേധാർഹമാണെന്ന് ബികെഎംയു സംസ്ഥാന സെക്രട്ടറി ആർ അനിൽകുമാർ പറഞ്ഞു. കേരള സ്റ്റേറ്റ് കർഷക തൊഴിലാളി ഫെഡറേഷന്റെ (ബികെഎംയു) നേതൃത്വത്തിൽ ആലപ്പുഴയിൽ സംഘടിപ്പിച്ച പ്രതിഷേധ സായാഹ്നം ഉദ്ഘാടനം ചെയ്യുകയായിരുന്നു അദ്ദേഹം. സാമൂഹിക സുരക്ഷാ പദ്ധതികൾ പൂർണമായും സംസ്ഥാനങ്ങളുടെ ചുമലിലേക്ക് മാറ്റി ഉത്തരവാദിത്തത്തിൽനിന്ന് ഒളിച്ചോടുകയാണ് കേന്ദ്ര സർക്കാർ. മൂന്ന് കോടിയിലധികം വരുന്ന ഗുണഭോക്താക്കൾക്ക് അൽപമെങ്കിലും ആശ്വാസമേകുന്ന ദേശീയ സാമൂഹിക പെൻഷൻ പദ്ധതിയിൽനിന്നുള്ള ഈ പിന്മാറ്റത്തിനെതിരെ ശക്തമായ പ്രതിഷേധം ഉയർന്നുവരുമെന്നും അദ്ദേഹം പറഞ്ഞു.
ആലപ്പുഴ ക്വിറ്റ് ഇന്ത്യാ സ്തൂപത്തിന് മുന്നിൽ നടന്ന പ്രതിഷേധ സായാഹ്നത്തിൽ ആലപ്പുഴ മണ്ഡലം പ്രസിഡന്റ് പി കെ ബൈജു അധ്യക്ഷനായി. സെക്രട്ടറി എ ആബിദ് സ്വാഗതം പറഞ്ഞു. എഐടിയുസി സംസ്ഥാന വർക്കിങ് കമ്മിറ്റിയംഗം ബി നസീർ, എസ് രാജേന്ദ്രൻ, ആർ വെങ്കിടേഷ്, ഡി സുദർശനൻ, ടി തങ്കച്ചൻ, രാജു, മിനി പ്രസാദ്, സന്ധ്യ ജയേഷ്, പി സന്തോഷ് എന്നിവർ സംസാരിച്ചു. അരൂർ ഈസ്റ്റ് കമ്മിറ്റിയുടെ നേതൃത്വത്തിൽ പെരുമ്പളം കവലയിൽ നടന്ന പരിപാടി ജില്ലാ പ്രസിഡന്റ് ടി ആനന്ദൻ ഉദ്ഘാടനം ചെയ്തു. സ്മിതാ ദേവാനന്ദ് അധ്യക്ഷയായി. സെക്രട്ടറി ഇ എം സന്തോഷ് കുമാർ സ്വാഗതം പറഞ്ഞു. എം കെ ഉത്തമൻ, കെ ബാബുലാൽ, ബീന അശോകൻ, വി ആർ രജിത, സി ടി വേണുഗോപാൽ എന്നിവർ സംസാരിച്ചു.
കുട്ടനാട് സൗത്ത് മണ്ഡലം കമ്മിറ്റിയുടെ നേതൃത്വത്തിൽ തകഴിയിൽ സംസ്ഥാന കമ്മിറ്റിയംഗം ബി ലാലി ഉദ്ഘാടനം നിർവഹിച്ചു. പ്രസിഡന്റ് കെ ജെ കുഞ്ഞുമോൻ അധ്യക്ഷനായി. ഇ കെ തങ്കപ്പൻ സ്വാഗതം പറഞ്ഞു. അമ്മിണി ചാക്കോ, ടി എസ് സുരേഷ്, ബിജോ ജോസഫ്, മണിയമ്മ എന്നിവർ സംസാരിച്ചു. ചേർത്തല മണ്ഡലം കമ്മിറ്റിയുടെ നേതൃത്വത്തിൽ പട്ടണക്കാട് സിപിഐ ചേർത്തല മണ്ഡലം സെക്രട്ടേറിയറ്റംഗം പി ഡി ബിജു ഉദ്ഘാടനം ചെയ്തു. പ്രസിഡന്റ് കെ പി ഷാജി അധ്യക്ഷനായി. സെക്രട്ടറി ആർ അജയൻ സ്വാഗതം പറഞ്ഞു. സംസ്ഥാന കമ്മിറ്റിയംഗം ടി പ്രസാദ്, ഡി സുരേഷ്, സജിത്ത് രാജ് എന്നിവർ സംസാരിച്ചു.
