31/05/2016
FOOTBALL LEH A KAIHNAWIH...
(1994 CARIBBEAN CUP A THIL THLENG DANGDAI)
BARBADOS 4–2 GRENEDA
CONCACAF zones ten an khelh thin 1994 Caribbean Cup final stage chu Trinidad and Tobago ah khelh a ni a. ram hrang hrang te hian first round(final round) khelh hma in Qualifying round an paltlang phawt a ngai a. Qualifying round ah chuan Group hrang hrang 6 ah inthenin group tina a sang ber zelin first round an thleng thin. Martinique(champion lai) leh Trinidad and Tobago( a thlengtu) te hi automatic a first round lut sa an ni a.
Tichuan, group tin atanga a sang paruk te nen first round ah chuan team 8 an awm ta a. Heng team 8 te hi group hnih ah an inthen leh a ni.Tun tuma kan sawi tur hi chu qualifying round-a thil thleng mak leh dangdai, football khawvela thil la thleng ngai miah lo, mak si tak si Barbados vs Grenada te inkhelh tuma thil thleng hi a ni.
Qualifying round Group no 1 ah hian Barbados, Grenada leh Puerto Rico te hi group khatah an awm ho a. Hemi te group result hi lo en ila :-
Jan 23, 1994 – Barbados 0-1 Puerto Rico
Jan 25, 1994 – Greneda 2-0 Puerto Rico (extime)
Jan 27, 1994 – Barbados 4-2 Greneda (extime).
Khi khi an group dinhmun chu a ni a, tun tuma kan sawi tur chu Jan 27, 1994 – Barbados 4-2 Greneda (extime) inkhel chanchin hi a ni.
Kan hriatthiam awlsam nan hemi hunlaia an football rules hi tarlang hmasa phawt ila.
RULES :- Hun pangngaia inhnehtawk awm theih a ni lo a, an indraw chuan extra time khelh ngei ngei tur. Extra time hi Golden goal rule( a pet goal hmasa zawk chak) a ni a. Tin, extra time goal thun reng reng hi a double a chhiar tur a ni. Entirnan :- vawi khat i pet goal chuan vawi hnih i pet goal tihna.
Le… Kan thupuiah kan lut tawh ang.
Barbados vs Greneda inkhelh tum hian thil mak leh nuihzatthlak tak a thleng a. Barbados hian final round(first round) lut turin goal 2 margin tala an chak a ngai a, Greneda aia goal 2 tala an thun tam loh chuan Greneda hi first round lut tur an ni.
Tichuan, an inkhel ta a hun rei lote chhungin Barbados chuan 2-0 in hma an hruai ta a. Hemi dinhmunah chuan Barbados hi tlang tur zawk an ni. Mahse, Greneda player te an beidawng mai lova hun tawp hma minute 7 chiah a awm tawh tih ah goal khat an rawn thun ve ta, 2-1 a ni ta chiah e. Greneda dinhmun a tha leh ta zawk ta. Barbados player ten goal thun tumin theihtawp an chhuah a mahse an thun thei lo. Hun a tawp dawn tep tihah chuan Barbados player ten idea tha tak mai an rawn nei ta a, Anmahni lamah pet goal se extra time khelh angai anga chance kan nei zawk ang tiin ngaihtuahna an nei ta a. Hun a tawp tep a an defender pakhat leh goal keeper chuan an goal bulah ball an in pass an in pass a anmahni lamah an pet goal lui ta thut a, 2-2 a ni leh ta. Hetiang dinhmunah chuan extra time khelh ngei ngei a ngai.
Mahse, Greneda player te an lo a bik hauh lo mai. Hun tawp hma a anmahni lama an tih goal luih ve chuan Barbados hi 3-2 in an chak anga, goal difference hmangin an tlang dawn tho tih an hre chhuak ve ta a. Greneda ho chuan anmahni lamah tih goal luih an tum ve dawn ta a ni. Chumi rilru chu Barbados player ten an hre ve tho a. Tichuan le, Barbados player te chuan anmahni lama goal lut tur leh Greneda ho in anmahni lama own goal an nei tur vengin an tlan ta zak zak mai le. Anmahni lama goal tur leh lehlam pawl lama goal lut tur an veng kawp ta zak zak mai anih chu. Ava buaithlak dawn tehreng em. Mahse, an vanneia siamin Greneda ho lah chuan khawi lamah mah an ti goal thei ta bik lo. Tichuan, extra time chu an khelh alo ngai ta a, Barbados lamin goal an thun ta a. 3-2 a ni a,an rules hmangin 4-2 a ni a game a tawp zui nghal bawk, Tichuan, Barbados chuan final round an lut ta a ni.
(Hetiang thil hi football khawvela la thleng ngai lo a ni a, a thlen nawn leh kher pawh a rinawm tawh loh, a chhan chu heti hun laia Rules hi hman a ni tawh lo a ni.)
1994 Caribbean Cup a thil thleng hi a duh tan youtube lamah pawh en tur a awm e..
