05/06/2025
Vawiin June ni 5 2025 hian Ministry of Housing and Urban Affairs (MoHUA), ruahman angin AMRUT Mitra Program (Mission pahnih- AMRUT leh DAY NULM tangkawp) hnuai ah Thingphun Runpui: “Women for Trees” campaign hun hman a ni, thupui a tan ‘Ek Ped Maa Ke Naam’ hman a ni.
AMRUT Mitra hma lakna hnuaia “Women for Trees” campaign – in a tum ber chu Hmeichhe Self Help Group (SHG) te kaihhruaina hnuaiah a tam thei ang ber thingphun a ni.
Aizawl ah chuan he thingphun bultanna huntawi hi BSUP Lawipu ah neih a ni a, Pu K Sapdanga UD&PA Deptt. Minister in a hman pui a ni. Minister chuan kalkhawm te fuih in “Thingphun ringawt hi a tawk loh zia kan hre vek a, a phun tluk zetin a enkawl zui a pawimawh a ni” a ti, Self help Group (SHG) member zawng zawng te pawh mahni thingphun uluk leh tha taka enkawl zui a, an thingphunte a puitlin theih ngei na tura hma la turin a chah a ni. Khawvel boruak lum leh chhe zel tur venna a tana thawk sauh sauh turin kalkhawmte a chah bawk a ni.
Ministry ruahman angin he AMRUT Mitra hnuai a SHG member ten thingphun runpui an neih tur hi mumal taka duan a ni a. Phase-I hnuai ah thingphunna hmun tur thlan fel vek a ni tawh a. Mizoram ah chuan khawpui 10 ah, hmun 46 ah phun tum a ni a, Aizawl bikah chuan BSUP Complex pathum (Lawipu, Edenthar leh Durtlang) bak ah RAY complex Falkland ah thing hi phun tura ruahman a ni. Phase-II chu vawiin a bultan tak, a tak a thingphun tan hi a ni a, ruahman ang chuan August thla thleng a awh dawn a ni. Chumi hnu ah Phase-III tan leh tur niin SHG member ten thingphun hi an enkawl chhunzawm dawn a ni.
UD&PA Department kaltlang a Mizoram chhung a ruahman ang chuan he Women for Trees program ah hian Self Help Group (SHG) 112 atangin member 517 ten thing hi an phun dawn a, thingtiak 1149 phun tura hmalak a ni.
He thing phun tanna huntawi hmanna pui ber BSUP Complex Lawipu, Aizawl a neih hi Pu Jacob Lalawmpuia, Director UD&PA Deptt in a kaihruaia, UD&PA Minister Pu K Sapdanga’n khuallian ni a hmanpui bak ah Pu Lalmalsawma, Secretary, UD & PA Department khual zahawm niin a tel pui a ni. Women for Trees hnuai a hmalak tawhna hrang hrang leh hmalak dan tur report Pu Andrew Lalhruaia, Joint Director UD&PA Deptt. in a pe bawk a ni. He hunah hian SHG member thahnem tak leh UD&PA Deptt. a thawkte an kal khawm a ni. SHG member kalkhawmte hi thingphunna tura an mamawh hrang hrang te pek an ni. Hetiang a thingphun tanna huntawi hi District Headquarter hrang hrang ah pawh vawiin vek hian hman a ni.
