31/05/2026
അംഗണവാടിയിൽ ബിരിയാണി വേണമെന്ന് ആവശ്യപ്പെട്ട് കേരളമെങ്ങും ശ്രദ്ധ നേടിയ "ബിരിയാണി ശങ്കു" വീണ്ടും സോഷ്യൽ മീഡിയയിൽ വൈറലാകുകയാണ്. ഇത്തവണ ഭക്ഷണത്തിന്റെ പേരിലല്ല, ഒരു രാഷ്ട്രീയ വേദിയിൽ നടത്തിയ പരാമർശത്തിന് നൽകിയ മറുപടിയിലൂടെയാണ് ശങ്കു വാർത്തകളിൽ ഇടം പിടിച്ചത്.
കഴിഞ്ഞ ദിവസം നടന്ന ഒരു പരിപാടിയിൽ സംസാരിക്കവെ, ബിരിയാണി ചോദിച്ച് വൈറലായ ശങ്കു ചവറയിലെ മഹിളാ കോൺഗ്രസ് ജില്ലാ സെക്രട്ടറി രാധാമണിയുടെ കൊച്ചുമകനാണെന്ന് വനിതാ ശിശുക്ഷേമ വകുപ്പ് മന്ത്രി ബിന്ദു കൃഷ്ണ പറഞ്ഞിരുന്നു. "എനിക്കിഷ്ടമാണ് ആ ബിർണാണി ചോദിച്ച കുഞ്ഞിനെ. അവൻ രാധാമണി ചേച്ചിയുടെ കൊച്ചുമകനാണ്" എന്നായിരുന്നു മന്ത്രിയുടെ പരാമർശം.
എന്നാൽ അധികം വൈകാതെ തന്നെ ശങ്കു വീഡിയോയുമായി രംഗത്തെത്തി. താൻ രാധാമണി ചേച്ചിയുടെ കൊച്ചുമകനല്ലെന്നും, തന്റെ അപ്പൂപ്പന്റെയും അമ്മൂമ്മയുടെയും പേരുകൾ മറ്റൊന്നാണെന്നും ശങ്കു വീഡിയോയിൽ വ്യക്തമാക്കി.
"പുതിയ മന്ത്രി ആന്റി പറഞ്ഞു ഞാൻ രാധാമണി ചേച്ചിയുടെ കൊച്ചുമോനാണെന്ന്. ഞാൻ രാധാമണി ചേച്ചിയുടെ കൊച്ചുമോനൊന്നുമല്ല. എന്റെ അപ്പാമ്മേടെ പേര് ഓമന, എന്റെ അമ്മാമ്മേടെ പേര് റീന..." എന്ന് നിഷ്കളങ്കമായി ശങ്കു പറയുന്ന വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
നിരവധി ആളുകളാണ് വീഡിയോ പങ്കുവെക്കുന്നത്. ബിരിയാണി ചോദിച്ച് കേരളത്തിന്റെ മനസ് കീഴടക്കിയ ശങ്കു, ഇപ്പോൾ തന്റെ നിഷ്കളങ്കമായ മറുപടിയിലൂടെ വീണ്ടും സോഷ്യൽ മീഡിയയിലെ താരമായി മാറിയിരിക്കുകയാണ്.
