04/09/2026
හදවතේ සිදුරු දෙකකුත් තියාගෙන, වල් අලි ගහන මහ මූකලන් මැදින් කිලෝමීටර් ගණන් පයින් ගිහින් මුළු ලංකාවෙන්ම පළමුවැනියා වෙච්ච අම්මා නැති මේ පුංචි වීරයාගේ කතාව ඇස්වලට කඳුළු උනන තරම්! ❤️🥺💪💪♥️♥️
මෙවර 5 ශ්රේණිය ශිෂ්යත්ව විභාගයේ ප්රතිඵල නිකුත් වීමත් සමඟ මුළු රටේම අවධානය ‘ඇහැටුවැව’ නාමය වෙත යොමු විය. දිවයින පුරා සිසුන් 289,867 දෙනෙකු අතුරින් කඩඉම් ලකුණ පසුකළ සිසුන් 56,000 අතරින් ලකුණු 193ක් ලබාගනිමින් දිවයිනේ ඉහළම ලකුණු හිමිකර ගැනීමට සමත් වූයේ ගල්ගමුව අධ්යාපන කොට්ඨාසයට අයත් ඇහැටුවැව ආදර්ශ ප්රාථමික විද්යාලයේ ධනෝජ් තීක්ෂණ වීරසේකර පුතුය.
ධනෝජ් ජීවත් වන්නේ පාසලේ සිට කිලෝමීටර් 7-8ක් පමණ ඈතින් පිහිටි ‘මහමේරුව’ නම් දුෂ්කර ගම්මානයේය. නිවසේ සිට පාසලට යන එන මාර්ගය නිරන්තරයෙන් වල් අලි සැරිසරන ඝන කැලෑවකි. පාන්දරින්ම මඟ රැක සිටින වන අලි බාධක හේතුවෙන් බොහෝ දිනවල ඔහුට පාසල් යාමට සිදුවූයේ පමාවීය.
ධනෝජ් පෙරපාසල් යන වියේදීම ඔහුගේ මව මෙලොවින් සමුගත් අතර, එතැන් පටන් මවකගේද සෙනෙහස ලබාදෙමින් දරුවා රැකබලා ගත්තේ පියා සහ වැඩිමහල් සොහොයුරිය විසිනි. ඇයද මීට පෙර ශිෂ්යත්ව විභාගයෙන් ලකුණු 188ක් ලබාගෙන කුරුණෑගල ප්රධාන පාසලක අධ්යාපනය ලබන්නීය.
කිසිදු අමතර උපකාරක පන්තියකට සහභාගී නොවූ ධනෝජ්, පාසලෙන් දුන් අධ්යාපනය උපරිමයෙන් ග්රහණය කරගත්තේය. ඔහුගේ පියා වන ඩබ්.බී.එම්. සිසිර කුමාර මහතා ප්රාදේශීය සභාවේ මාර්ග කම්කරුවෙකු ලෙස වසර හතක් සේවය කළද රැකියාව ස්ථීර නොවූ තැන ඉන් ඉවත් වී, වන්නිහත්පත්තුවේ කටුක මහපොළොව සමඟ පොරබදමින් හේන් ගොවිතැන් කළ අයෙකි.
නය වී කුඹුරු කරමින්, දරු දෙදෙනාට අමතරව සිය වියපත් දෙමව්පියන්ද රැකබලා ගන්නා සිසිර කුමාර මහතාට හේනේදීත්, රෑ පැල් රකිද්දීත්, වගාව වනසන මොනරුන් එළවද්දීත් ළඟින්ම සිටි සෙවණැල්ල වූයේ කුඩා ධනෝජ්ය. ශිෂ්යත්ව ප්රතිඵල ලැබුණු මොහොතේද ඔවුන් සිටියේ හේනේ මෑ වගාව රකිමිනි.
ශාරීරිකවද දැඩි අභියෝගයකට මුහුණ දෙන ධනෝජ්, හදවතේ සිදුරු දෙකක් පැවතීම හේතුවෙන් කුරුණෑගල ‘හද සුව මැදුර’ වෙතින් දිගින් දිගටම ප්රතිකාර ලබාගන්නා දරුවෙකි. පියා දිනක් පැවසූ "ලොකු ලකුණක් ගත්තොත් ටී.වී. එකේ පත්තරවල නම යාවි" යන වචන කිහිපය දැඩි අධිෂ්ඨානයක් කරගත් ධනෝජ්ගේ අනාගත සිහිනය ඉංජිනේරුවරයෙකු වීමයි.
මෙම ජයග්රහණය පිටුපස පාසලේ කැපවීමද සුවිශේෂී විය. වන අලි උවදුර නිසා දරුවා ප්රමාද වී පැමිණෙන විට මඟහැරුණු පාඩම් කියා දෙමින්, සති අන්තයේද ඉගැන්වීම් කරමින් සිය නිවුන් පුතුන් දෙදෙනා සමඟම ධනෝජ්වද රැකබලා ගත්තේ ඔහුගේ පන්තිභාර ගුරු මෑණියන් වූ ඩබ්.ඒ. ආශා කුමුදුනී මහත්මිය විසිනි.
පාසල භාරගන්නා විට විවිධ බාධක, විරෝධතා සහ විමර්ශන දහයකට අධික ප්රමාණයකට මුහුණ දෙමින් පාසල භෞතිකව හා අධ්යාපනිකව ගොඩනැඟූ විදුහල්පති ඩී.එම්. වසන්ත දසනායක මහතා ප්රමුඛ ආචාර්ය මණ්ඩලයේ කැපවීම මත මෙවර විභාගයට පෙනී සිටි සිසුන් 117 දෙනාගෙන් 58 දෙනෙකුම විභාගය සමත්ව ඇත.
මෙම ඓතිහාසික ජයග්රහණය වෙනුවෙන් පසුගිය 3 වනදා මහව අධ්යාපන කලාපයේ කලාප අධ්යාපන අධ්යක්ෂ මොහොමඩ් අලි ජින්නා සහ නියෝජ්ය අධ්යාපන අධ්යක්ෂ (සංවර්ධන) ආර්.ඒ.එච්.එස්. බණ්ඩාර යන මහත්වරුන් පාසලට පැමිණ සුබපැතුම් එක් කළහ. වසර පහක් පුරා 5 ශ්රේණිය ශිෂ්යත්ව විභාග කාර්ය දර්ශක වාර්තාවට අනුව දිවයිනේ ඉදිරියෙන්ම සිටින මහව අධ්යාපන කලාපයේ නාමය තවදුරටත් ඉහළට ඔසවා තැබීමට මේ පුංචි දරුවාට හැකි විය.
දුප්පත්කම, අසනීප බව සහ අම්මාගේ වියෝව හමුවේ නොසැලී මුළු රටක්ම ජයගත් මෙවන් දරුවන් රටකට මහඟු සම්පතකි! 🌸🙏
Verified Source: අරුණ පුවත්පත
සැබෑ අධිෂ්ඨානය සහ නිවැරදි කැපවීම හමුවේ ආර්ථික දුෂ්කරතා හෝ ජීවිතයේ බාධක කිසිවිටෙකත් ජයග්රහණයට බාධාවක් විය නොහැකි බව මුළු රටටම පසක් කළ පාඩමකි.
ධනෝජ් පුතුගේ මෙම විශිෂ්ට ජයග්රහණය සහ ආදර්ශමත් ජීවිතය ගැන ඔබට මොකද හිතෙන්නේ?
