Ambasada e Republikës së Shqipërisë në Kroaci

16/06/2026

🇦🇱

Sot në Zagreb u zhvilluan konsultimet politike ndërmjet Ministrive të Punëve të Jashtme të Shqipërisë dhe Kroacisë, në një atmosferë miqësore, të ngrohtë dhe konstruktive.

Diskutimet konfirmuan nivelin e shkëlqyer të marrëdhënieve dypalëshe, të mbështetura mbi vlera të përbashkëta, besim të ndërsjellë dhe vizion të përbashkët europian. U shkëmbyen mendime mbi bashkëpunimin dypalësh, zhvillimet rajonale dhe koordinimin në kuadër të NATO-s dhe organizatave ndërkombëtare.

Shprehim mirënjohjen tonë për mbështetjen e vazhdueshme të Kroacisë në rrugëtimin e Shqipërisë drejt Bashkimit Evropian dhe për mikpritjen e ngrohtë të kolegëve tanë kroatë.

🇦🇱🤝🇭🇷

Miqësi e fortë, partneritet i ngushtë dhe një e ardhme e përbashkët evropiane.

🇬🇧

Today in Zagreb, political consultations were held between the Ministries of Foreign Affairs of Albania and Croatia in a warm, friendly, and constructive atmosphere.

The discussions reaffirmed the excellent state of bilateral relations, built on shared values, mutual trust, and a common European vision. The two delegations exchanged views on bilateral cooperation, regional developments, and coordination within NATO and international organizations.

We highly appreciate Croatia’s continued support for Albania’s EU accession process and thank our Croatian colleagues for their warm hospitality.

🇦🇱🤝🇭🇷

Strong friendship, close partnership, and a shared European future.

Ministria për Evropën dhe Punët e Jashtme - Republika e Shqipërisë

16/06/2026

12/06/2026

11/06/2026

10/06/2026

Sot, 148 vjet më parë, Lidhja e Prizrenit bashkoi shqiptarët nga të gjitha trevat në mbrojtje të identitetit, gjuhës, kulturës dhe të drejtave kombëtare.

Lidhja e Prizrenit u udhëhoq me vizion dhe largpamësi nga rilindasi ynë i madh Abdyl Frashëri, arkitekti politik i programit kombëtar shqiptar, së bashku me luftëtarë e patriotë të shquar si Ymer Prizreni, Sulejman Vokshi, Ali Pashë Gucia, Haxhi Zeka dhe shumë veprimtarë të tjerë nga të gjitha trojet shqiptare. Të bashkuar përtej dallimeve krahinore e fetare, ata ngritën një platformë të qartë kombëtare për mbrojtjen e tërësisë territoriale të trojeve shqiptare, kundërshtimin e vendimeve të padrejta të Kongresit të Berlinit që synonin copëtimin e tyre dhe forcimin e unitetit kombëtar shqiptar.

Në një kohë sfidash të mëdha historike, Lidhja e Prizrenit hodhi themelet e vetëdijes sonë politike kombëtare dhe dëshmoi se shqiptarët, kur bashkohen rreth interesit kombëtar, janë të aftë të mbrojnë të drejtat, identitetin dhe të ardhmen e tyre.

Sot shqiptarët jetojnë më të lirë, më të sigurt dhe më të zhvilluar se në çdo periudhë tjetër të historisë së tyre moderne. Nga Shqipëria dhe Kosova, te shqiptarët në Maqedoninë e Veriut, Malin e Zi dhe Luginën e Preshevës, ruajtja dhe forcimi i identitetit kombëtar, i gjuhës shqipe dhe i lidhjeve tona kulturore mbeten shtylla themelore të së ardhmes sonë të përbashkët.

Shqipëria është një aleate e denjë në NATO dhe pranë realizimit të objektivit historik të anëtarësimit në Bashkimin Evropian. Kosova ka konsoliduar shtetësinë dhe institucionet demokratike, duke dëshmuar se është një histori suksesi e ndërtuar mbi lirinë, demokracinë dhe orientimin euroatlantik, ndërsa synon integrimin e plotë në NATO dhe në familjen evropiane.

Arritjet e shqiptarëve nuk janë vetëm rezultat i sakrificave të brezave të kaluar, por edhe i zgjedhjes sonë të qartë për t'i përqafuar vlerat e demokracisë, lirisë, shtetit të së drejtës dhe bashkëpunimit euroatlantik. Këto janë vlerat që na kanë forcuar si komb dhe që do të vazhdojnë të na udhëheqin drejt zhvillimit, mirëqenies dhe sigurisë së qëndrueshme.

Teksa afrohemi drejt 150-vjetorit të Lidhjes së Prizrenit në vitin 2028, le të punojmë që ky jubile historik të na gjejë më të bashkuar, më të fortë në institucionet tona, më të zhvilluar ekonomikisht dhe më pranë realizimit të aspiratave tona të përbashkëta. Ky është amaneti i Lidhjes së Prizrenit dhe detyrimi ynë ndaj brezave që do të vijnë: një komb shqiptar krenar për rrënjët e tij, i sigurt në identitetin e tij dhe plotësisht i ankoruar në familjen euroatlantike.