16/09/2026
“E nderuar ambasadore Donika,
po ju shkruaj nga Zara, ku kemi shkuar me nxënësit shqiptarë. Këto ditë mësuam shumë për historinë dhe traditat e arbëneshëve, që prej 300 vitesh gjeneratat e tyre jetojnë në Zara.
Ju dërgojmë këtë kartolinë si kujtim i bukur nga udhëtimi ynë.” ❤️
Sot mora këtë mesazh nga nxënësit shqiptarë në Kroaci. Dhe më preku thellë.
Sepse kjo nuk është thjesht një kartolinë.
Është një kartolinë e posaçme, e botuar me rastin e 300-vjetorit të ardhjes së Arbëneshëve në Zarë: 1726–2026. Një copëz historie që sot ka kaluar në duart e fëmijëve tanë.
Dhe pikërisht këtu qëndron edhe kuptimi i asaj që kemi nisur të bëjmë.
Që nga fundi i gushtit kemi filluar shpërndarjen e librave për fëmijët shqiptarë dhe për shkollat, klasat dhe grupet e mësimit të gjuhës shqipe në të gjithë Kroacinë. Kjo punë tani po përmbyllet.
Por në të vërtetë, nuk po shpërndajmë vetëm libra.
Po përpiqemi të japim një mundësi që një fëmijë shqiptar në Kroaci të njohë gjuhën e gjyshërve të tij, historinë e popullit të vet, traditat dhe kulturën që e lidhin me rrënjët e tij.
Dhe kur shohim një nxënëse të vizitojë Zarën, të mësojë për Arbëneshët dhe më pas të ulet të shkruajë me dorën e saj një mesazh në shqip, kupton se pse ia vlen çdo përpjekje.
Kjo nuk është punë e një personi apo e një institucioni të vetëm.
Është puna e mësuesve që mbajnë gjallë gjuhën shqipe në klasat e tyre.
E prindërve që zgjedhin t’ua mësojnë fëmijëve shqipen.
E komunitetit që mbështet dhe organizon.
E të gjithë atyre që japin kohë, energji, libra dhe dashuri për të ruajtur lidhjen e brezave me Shqipërinë dhe me njëri-tjetrin.
Dhe ndoshta nuk ka simbolikë më të bukur se kjo:
300 vjet histori e Arbëneshëve në Zarë dhe sot, fëmijë shqiptarë që mësojnë për atë histori në gjuhën shqipe.
Historia nuk jeton vetëm në libra.
Ajo jeton kur ua përcjellim brezave. ❤️🇦🇱🇭🇷
Faleminderit të gjithë mësuesve, prindërve, nxënësve dhe komunitetit shqiptar në Kroaci që po e bëjnë këtë të mundur.
