22/02/2022
今日(22/2)係創辦人紀念日，紀念童軍創辦人貝登堡嘅生日🎂
貝登堡勳爵喺1857年2月22日於英國倫敦出生。少年時期嘅佢已經對野外活動有濃厚興趣，經常喺假期同兄弟們一齊露營、遠足同泛舟，所以貝登堡對於搭帳篷、地圖及指南針運用等技能十分純熟。🏕🚣🏻♂
貝登堡長大後加入軍隊，由於投考軍校成績表現優異，直接被編入第13輕騎兵團為少尉，豁免訓練，並駐防印度、阿富汗及南非等地。1899年，貝登堡獲升為上校駐守南非梅富根城，10月11日波爾戰爭爆發，梅富根城被敵人包圍。當時因為駐軍很少，所以貝登堡召集咗一班當地青年，臨時教授佢哋急救、傳訊以及偵察等各種技能協助駐軍。經過了217天抵抗，駐軍最終在1900年5月17日解圍，當時貝登堡亦因此被英國人視為英雄人物，而佢為訓練軍隊編寫成嘅《警探術》一書亦已出版。📕
當貝登堡被調返英國出任騎兵總監時，佢所著作嘅《警探術》一書已風行全國，受各界人士稱許，有教師更請求貝登堡將書嘅內容修改，用作訓練青年和兒童，由此就引起貝登堡創辦童軍嘅動機。
於是貝登堡喺1907年召集咗20名少年、自己嘅侄兒同埋營友嘅1名兄長，在英國南部嘅白浪島露營，教導佢哋生火、炊事、追蹤、露營等技能，並發表「營火談話」🔥，即係我哋常讀嘅《少年警探》(Scouting for Boys)📗。呢次實驗露營非常成功，其後好多童軍小隊相繼組織起來，童軍運動逐漸發展為世界性嘅運動，而1908年出版嘅《少年警探》更成為很多機構嘅訓練教材，被翻譯成多種語言。得到英皇愛德華七世👑嘅鼓勵，貝登堡於1910年退役(當時佢已經係中將)，專心致力童軍運動。⚜
其後貝登堡致力於⚜童軍及☘女童軍運動嘅發展，並作環球旅行，宣揚童軍運動。1912年，貝登堡與奧利花小姐結婚。貝登堡夫人常常協助貝登堡發展童軍運動，成為貝登堡最大嘅助力。貝登堡於1920年嘅世界大露營獲推舉為⚜世界童軍總領袖 (World Chief Scout)，而☘貝登堡夫人亦於1930年獲推舉為世界女童軍總領袖(World Chief Guide)。貝登堡更於1929年獲英皇👑冊封為基維爾勳爵。
其實今日除咗係貝登堡勳爵嘅生日，亦都係貝登堡夫人嘅生日。為咗紀念呢日，喺⚜童軍我哋會稱為「創辦人紀念日」，而☘女童軍就會稱之為「世界靜思日」。
貝登堡伉儷生日快樂！🎂
創辦人紀念日及世界靜思日快樂！🎉
Happy Birthday Lord & Lady Baden-Powell!🎂
Happy Founder's Day & World Thinking Day!!🎉
#香港童軍
#創辦人紀念日
#世界靜思日
