09/09/2026
開咗學幾日，你有冇一種「身體返咗學校，但個心好似唔喺度」嘅感覺？
每日個人好似開咗自動導航咁，時間到就醒、身邊有人講嘢就應兩句，但成個人好似隔咗層紗，好似唔係好睇得清自己喺度做緊乜。
你可能會諗：「我點解要咁辛苦去適應呢個社會同已經可以預期到嘅未來？」好似早前見到有個男仔咁講：「讀書有啥用啊？長大還不是當有錢人的牛馬嘛？」根本就睇唔到有咩值得去期待。
當身邊嘅一切都逼緊你成長，而成長好似只係要你去做更多未必想做嘅嘢，感到迷惘、抽離、甚至對未來失去期待，其實係好真實嘅回應。
心裡面嗰種模糊同失焦，唔係因為你落後於其他人，而係你正努力用自己嘅方式，去消化緊呢份不確定同無力感。
我哋成日被催促要盡快搵到目標，但其實成長從來都唔應該得一套標準答案。如果搵唔到方向，咁就暫時唔好搵住；睇唔清前路，就停喺度抖陣。
成長最寶貴嘅，唔係要即刻變做一個成功嘅大人，係你容許自己去試錯、去迷惘、用自己嘅節奏慢慢探索呢個世界。
你可以今日好積極，聽日突然想躺平，正正因為有呢啲反反覆覆嘅過程，你先可以去認識自己，了解自己想成為一個點嘅人。
當然，有時候都會覺得個心好似穿咗個窿、個人好失焦。
如果有需要，不妨搵我地傾下，uTouch 一直都會喺度陪你，一齊慢慢搵返屬於你嘅節奏。
==========================================================
🍊有心事唔知同邊個講？
歡迎搵我地！
WhatsApp: 6277 8899
(服務時間: Tue to Thur 4pm-10pm | Fri to Sat 4pm-2am)
Telegram Bot:
