05/10/2017
本月25日，政府就會將冇約束力一地兩檢方案提交俾立法會審議，換言之，喺冇諮詢過市民嘅前提下，一地兩檢嘅方案如果被立法會通過，政府就會喺無視民意下推行。
一地兩檢事實上係將香港嘅土地供國家使用，違反基本法嘅協定，可以話係喺香港地域實施內地法律，政府一直以深圳灣口岸嘅運行模式誤導市民，然而深圳灣口岸係香港向內地租借土地作為口岸區，同今次一地兩檢情況唔同，並唔可以相提並論。
同時，行政長官林鄭月娥喺冇任何根據嘅情況吓聲稱會得到香港市民嘅支持。事實上，一些網上調查顯示出香港人壓倒性地反對政府所推行嘅所謂唯一方案，政府係明知不可為而為之，根本唔係市民代表所應該做嘅事。高鐵嘅福田等站已經有預備供通關使用嘅空間，政府反而聲稱一地兩檢並唔可能有替代方案，只係引導市民支持呢個方案。
一地兩檢違反基本法，違反基本法嘅事情係唔容許討論(例如港獨)，所以一地兩檢嘅方案喺政府提出之後就唔會有討論空間，咁樣真係冇違背香港嘅核心價值？
立法會表決一地兩檢方案，但係幾名民主派議員俾DQ後，民主派議員根本唔夠票數代表民意去否決方案。問題嘅原因同結果一目了然，但係我哋唔團結起來，只可以睇住事情咁樣發展而冇辦法阻止。
市民需要思考嘅係，喺咁樣嘅選舉制度之下，政府同立法會係唔係真係可以做到作為市民嘅代表嘅作用?
現時香港社會撕裂可以話冇人可以否認，主要嘅原因大概係政府嘅政策所構建嘅環境令市民嘅不滿發酵，彼此矛盾。雜誌《經濟學人》指出，要令香港唔再撕裂，就唯有令香港全面民主化，只有咁，政府先可以真正代表市民嘅意見，即使政府實施嘅政策帶來唔好嘅後果，亦係由選出佢哋嘅市民負責，而唔係發展成市民同政府對立嘅局面。
