25/05/2026
📌საქართველოს პარლამენტის იურიდიულ საკითხთა კომიტეტმა 2026 წლის 25 მაისის სხდომაზე „საჯარო დაწესებულებაში შრომის ანაზღაურების შესახებ“ კანონში ცვლილება პირველი მოსმენით განიხილა და მხარი დაუჭირა.
👉მომხსენებლის, საქართველოს მთავრობის საპარლამენტო მდივნის, ვახტანგ ბაჩიაშვილის განცხადებით, კანონპროექტით გათვალისწინებულია სახელმწიფო პოლიტიკური და პოლიტიკური თანამდებობის პირების ნაწილისთვის შესაძლებლობის შექმნა, რომლის თანახმად, შესაბამისი წინაპირობების არსებობის შემთხვევაში, კანონმდებლობით დადგენილი წესით მათზე გაიცემა სახელფასო დანამატი და ფულადი ჯილდო.
🔗ვრცლად: https://parliament.ge/media/news/iuridiul-sakitkhta-komitetma-sajaro-datsesebulebashi-shromis-anazghaurebis-shesakheb-kanonshi-tsvlilebas-pirveli-mosmenit-mkhari-dauchira
📌იურიდიულ საკითხთა კომიტეტმა ამავე სხდომაზე განიხილა საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონის პროექტი „საქართველოს საჰაერო კოდექსში ცვლილების შეტანის შესახებ“ და საკანონმდებლო ცვლილებების პაკეტში შემავალი სხვა კანონპროექტები, რომლებიც დაკავშირებულია „საავიაციო ობიექტებთან დაკავშირებით მოძრავი მოწყობილობების მიმართ საერთაშორისო გარანტიების შესახებ“ კეიპტაუნის 2001 წლის კონვენციის მოთხოვნების ეროვნულ კანონმდებლობაში ასახვასთან.
📌იურიდიულ საკითხთა კომიტეტმა „პენიტენციურ კოდექსში“ ცვლილება პირველი მოსმენით, დაჩქარებული წესით განიხილა და მხარი დაუჭირა.
👉მომხსენებლის, საქართველოს იუსტიციის მინისტრის მოადგილის, გიორგი დგებუაძის განცხადებით, სპეციალური პენიტენციური სამსახურის მოსამსახურის თანამდებობრივი შეუთავსებლობის საკითხი „კორუფციის წინააღმდეგ ბრძოლის შესახებ“ საქართველოს კანონით დარეგულირდება და არა „პენიტენციური კოდექსით". ასევე, ზოგიერთ საკითხზე გადაწყვეტილებებს სპეციალური პენიტენციური სამსახურის გენერალური დირექტორი მიიღებს, ნაცვლად, იუსტიციის მინისტრისა.
🔗ვრცლად: https://parliament.ge/media/news/iuridiul-sakitkhta-komitetma-penitentsiur-kodeksshi-tsvlilebas-pirveli-mosmenit-mkhari-dauchira
📌საქართველოს პარლამენტის იურიდიულ საკითხთა კომიტეტმა განიხილა საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონის პროექტი „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“, რომლითაც ხორციელდება გარემოსდაცვით სფეროში ადმინისტრაციული პასუხისმგებლობის მარეგულირებელი ნორმების მოქმედ სამართლებრივ რეგულაციებთან შესაბამისობაში მოყვანა.
📌იურიდიულ საკითხთა კომიტეტმა პირველი მოსმენით მხარი დაუჭირა „საქართველოს სამოქალაქო კოდექსში“ ცვლილებას, რომელიც „სამოქალაქო კოდექსის“ საქართველოს საკონსტიტუციო სასამართლოს გადაწყვეტილებასთან შესაბამისობაში მოყვანას ითვალისწინებს.
👉კანონპროექტის თანახმად, სამოქალაქო კოდექსის 1343-ე მუხლის პირველი ნაწილი ჩამოყალიბდა შემდეგი რედაქციით: „თუ არც კანონით მემკვიდრეები და არც ანდერძით მემკვიდრეები არ არიან, არცერთმა მემკვიდრემ არ მიიღო სამკვიდრო ან ყველა მემკვიდრეს ჩამოერთვა მემკვიდრეობის უფლება, უმკვიდრო ქონება გადადის სახელმწიფოს საკუთრებაში”.
🔗ვრცლად: https://parliament.ge/media/news/iuridiul-sakitkhta-komitetma-sakartvelos-samokalako-kodeksshi-tsvlilebas-mkhari-dauchira
📌პარლამენტის იურიდიულ საკითხთა კომიტეტმა „ნოტარიატის შესახებ“ კანონში ცვლილებას პირველი მოსმენით მხარი დაუჭირა.
👉წარმოდგენილი კანონპროექტით ნოტარიუსის თანამდებობაზე დასაკავებელი წინაპირობების მომწესრიგებელი კანონმდებლობა შესაბამისობაში იქნება მოყვანილი საქართველოს საკონსტიტუციო სასამართლოს 2025 წლის 19 სექტემბრის N2/4/1532 გადაწყვეტილებასთან, საქმეზე „გიორგი გოცაძე საქართველოს პარლამენტის წინააღმდეგ“.
🔗ვრცლად: https://parliament.ge/media/news/iuridiul-sakitkhta-komitetma-notariatis-shesakheb-kanonshi-tsvlilebas-mkhari-dauchira
📌იურიდიულ საკითხთა კომიტეტმა „საქართველოს სისხლის სამართლის საპროცესო კოდექსში“ ცვლილება, რომელიც კოდექსის 143 (9 პრიმა) მუხლის (ფარული საგამოძიებო მოქმედების შესახებ შეტყობინება) მე-7 ნაწილის ამოღებას ითვალისწინებს, პირველი მოსმენით განიხილა.
👉ცვლილების თანახმად, პროკურორი არ იქნება ვალდებული, მომეტებული საზოგადოებრივი საშიშროების მქონე დანაშაულებთან დაკავშირებით (საქართველოს სისხლის სამართლის საპროცესო კოდექსის 143 (9 პრიმა) მუხლის მე-6 ნაწილით გათვალისწინებული დანაშაულები) ჩატარებული ფარული საგამოძიებო მოქმედების შესახებ შესაბამის პირს სისხლის სამართლის საქმეზე შემაჯამებელი გადაწყვეტილების მიღებისთანავე, დაუყოვნებლივ აცნობოს.
🔗ვრცლად: https://parliament.ge/media/news/iuridiul-sakitkhta-komitetma-sakartvelos-siskhlis-samartlis-saprotseso-kodeksshi-tsvlilebas-pirveli-mosmenit-mkhari-dauchira
