N85-ში. მას დიდი ისტორია აქვს, ეს ცოდნის ტაძარი 78 წლისაა, საუკუნემდე არაფერი უკლია. ამ სკოლის კედლებში ამაგდარმა ადამიანებმა არაერთი სახელოვანი შვილი აღუზარდეს ქვეყანას, მათ თავიანთი სახელები კულტურის საგანძურში ოქროს ასოებით ჩაწერეს.
როგორც სკოლის ისტორია გვაუწყებს, სკოლა დაარსდა 1939 წელს. დიდი სამამულო ომის პერიოდში სკოლის შენობა გამოყენებული იყო სამხედრო ჰოსპიტლად. 40-იან წლებში 1954 წლამდე სკოლა იყო N38 ქალთა საშუალო სკოლის სახელით. 1954 წლიდან მოხდა მოსწავლე გოგონებისა და ვაჟების გაერთიანება და ეწოდა მე-12 ზოგადსაგანმანათლებლო საშუალო სკოლა, ხოლო 2005 წლიდან ეწოდა მე-12 საჯარო სკოლა.
სკოლის შენობა ოთხსართულიანი მყარი ნაგებობაა. აქვს ორი სპორტული დარბაზი, სააქტო დარბაზი, მუსიკალურისა და ცეკვის სტუდია, ეზო ორი სპორტული მოედნით, სტადიონითა და ბაღით. სკოლა უზრუნველყოფილია თანამედროვე კომპიუტერული ტექნიკით, ბიბლიოთეკით, ექიმის კაბინეტით. სკოლის სასწავლო კაბინეტები აღჭურვილია ტექნიკური-საშუალებებითა და თვალსაჩინოებებით.
სკოლას აქვს ფართო და ნათელი საკლასო ოთახები, კაბინეტ-ლაბორატორიები, ბიბლიოთეკა, სკოლა უზრუნველყოფილია: გამართული ცენტრალური გათბობით, სასკოლო ავეჯით, სკოლის ბუფეტით.
2014 წლიდან სკოლას ხელმძღვანელობს ქალბატონი მედეია გურგენაძე შესანიშნავი მათემატიკოსი და წარმაწებული მენეჯერი. დირექტორის მოადგილე სასწავლო აღმზრდელობით დარგში, ფიზიკოსი, ქალბატონი მაია ბერძენიშვილი.
სკოლა დაკომპლექტებულია უმაღლესი განათლების მქონე პედაგოგებით, მათ შორის ერთი წამყვანი და 22 უფროსი მასწავლებელია, რომლებიც სწავლებაში აქტიურად იყენებენ თანამედროვე სწავლების მეთოდებსა და ტექნოლოგიებს. სასწავლო პროცესის მართვა მიმდინარეობს გუნდური, აქტიური გამჭირვალე პრინციპით. ხშირად ეწყობა ღია კარის დღეები, მოსწავლეთა თვითმმართველობის, სკოლის ადმინისტრაციისა, სამეურვეო საბჭოსა და მშობლების შეხვედრები პრობლემური საკითხების ერთობლივი განხილვისა და გადაჭრის მიზნით, რაც სკოლის წარმატების საწინდარია. სასწავლო პროგრამების ხარისხის შენარჩუნებისა და განვითარების გადამწყვეტი ფაქტორი არის სკოლაში დამკვიდრებული თვითშეფასებისა და შეფასების კრიტიკული, ობიექტური სისტემა.
სკოლაში ფუნქციონირებს სამეურვეო საბჭო, რომელსაც ხელმძღვანელობს ქალბატონი მარიამ გორგიშელი.
ამდენად, ეს სასწავლებელი დიდი ოჯახია. რთულია, იყო პედაგოგი. გაკვეთილის ახსნას, მოსწავლის გამოკითხვასა და შეფასებას თითქმის ყველა პედაგოგი მოახერხებს, მაგრამ მოზარდთან სულიერი კავშირი, მის გულში ჩაწვდომა ეს რთული პროცესია. ჩვენი სკოლის თითოეული პედაგოგი ამ რთული პროცესის საიდუმლოების გარკვევასა და მოსწავლეთა გულებთან დაახლოება ცდილობს. ,,შვილივით თუ არ გიყვარს მოწაფე, არაფერი გამოგივა, გული თუ არ გეწვის, ვერც ვერაფერს გააკეთებ, მისი მომავალი თუ არ გაწუხებს, შენს მუშაობას ფასი არ აქვს!..“
ვინ იცის, რამდენ საიდუმლოს უნდა ფლობდეს მასწავლებელი, რომ მოსწავლეს ცოდნასთან ერთად ეროვნული და ზოგადსაკაცობრიო ღირებულებები ჩამოუყალიბოს; ლიბერალურ და დემოკრატიულ ფასეულობებზე დამყარებული სამოქალაქო ცნობიერება განუვითაროს საზოგადოებისა და სახელმწიფოს წინაშე საკუთარი უფლება- მოვალეობები გააცნობიერებინოს. ჩვენ მიგვაჩნია, რომ სსიპ ქალაქ თბილისის N12 საჯარო სკოლა, პასუხობს დღევანდელ გამოწვევებს და მოზარდს ადამიანის უფლებების დაცვისა და პიროვნების პატივისცემის გრძნობას უვითარებს.
ჩვენი დევიზია: ,,ყმაწვილი უნდა სწავლობდეს საცნობლად თავისადაო...“ მხოლოდ საკუთარი არსის შეცნობა მისცემს მას საშუალებას, სკოლაში მიღებული თეორიული ცოდნა საკუთრი თავისა და ქვეყნის წარმატების საძირკველად აქციოს.
