ქალაქ თბილისის მუნიციპალიტეტის საკრებულო, ქალაქ თბილისში 2021 წელს ერთჯერადად აცხადებს კონკურსს „პანდემია, როგორც შესაძლებლობა“, რომლის მიზანია ქალაქ თბილისის სკოლის მოსწავლეებმა ვიდეორგოლების მეშვეობით ერთმანეთს გაუზიარონ საკუთარი გამოცდილება, გააანალიზონ კოვიდ-19-ის პანდემიით გამოწვეული გლობალური რისკი, საკუთარი და საზოგადოების როლი პანდემიის მართვასა და მის პრევენციაში. კონკურსი მონაწილეებს სა
შუალებას მისცემს საკუთარ თავში აღმოაჩინონ/გამოავლინონ ახალი ნიჭი, შესაძლებლობები და ინტერესები, დაეუფლონ განსხვავებულ ცოდნას, საკუთარი ძალისხმევა მიმართონ თავიანთი და საზოგადოების ჯანმრთელობის დაცვისა და კეთილდღეობისკენ.
კონკურსის ფარგლებში წარმოდგენილი სამოყვარულო ვიდეოების შინაარსში უნდა წარმოჩინდეს მოსწავლეთა თვალით დანახული შემდეგი საკითხები:
• საქართველო გლობალური სამყაროს ნაწილი;
• მოზარდების თვითგანვითარება;
• თვითრეალიზაცია;
• პასუხისმგებლიანი, გლობალური მოქალაქე;
• სოლიდარობა, სოციალური ქცევა, ტექნოლოგიები.
კონკურსის მონაწილე შეიძლება გახდეს ქალაქ თბილისის მუნიციპალიტეტის ადმინისტრაციულ ტერიტორიაზე არსებული სკოლის გუნდი, არაუმეტეს 4-5 მონაწილისა. საკონკურსო განაცხადის სახით სკოლას შეუძლია წარმოადგინოს მხოლოდ ერთი ვიდეორგოლი. კონკურსში მიიღება და განიხილება კოვიდ-19 პანდემიასთან თემატურად დაკავშირებული ვიდეორგოლი, რომელსაც შექმნიან მონაწილე გუნდები კონკურსში მონაწილეობისთვის.
კონკურსში მონაწილეობის მისაღებად საჭიროა სკოლის მიერ შეივსოს ელექტრონული განაცხადი და საკონკურსო ნაწარმოები წარდგენილ იქნეს ელექტრონული სახით ელ-ფოსტაზე [email protected]
კონკურსში გამარჯვებულ 3 გუნდს (I, II და III ადგილები) გამოავლენს კომპეტენტური ჟიური, რომელიც საკონკურსო ნამუშევრების შეფასებისას, იხელმძღვანელებს შემდეგი კრიტერიუმებით:
• პოზიტიური ხედვა;
• შემოქმედებითი მიდგომა;
• სცენარი და შინაარსი;
• ფასეულობითი სარგებელი.
აგრეთვე, კონკურსში გამოვლინდება მე-4 გამარჯვებული ნომინაციაში „ხალხის რჩეული“. „ხალხის რჩეული“ გახდება ვიდეორგოლი, რომელიც საკონკურსო განაცხადების მიღების დასრულების შემდეგ, 21-30 ივნისის პერიოდში, კონკურსის სოციალური ქსელის (ფეისბუკი) გვერდზე ყველაზე მეტ მოწონებას მიიღებს.
გამარჯვებულ ოთხ გუნდს (I, II, III ადგილებზე გასული გუნდები და ნომინაციაში „ხალხის რჩეული“ გამარჯვებული გუნდი) გადაეცემათ ფასიანი საჩუქრები კონკურსის მხარდამჭერი კომპანიების მიერ.
კონკურსის ჩატარების ეტაპები და ვადები:
I ეტაპი - განცხადების შევსებისა და საკონკურსო ნამუშევრების წარდგენა - 2021 წლის 2 ივნისიდან 2021 წლის 20 ივნისის 24 საათის ჩათვლით;
II ეტაპი - ჟიურის მიერ ნამუშევრების გაცნობა, შეფასების კრიტერიუმების მიხედვით I, II და III ადგილებზე გასულ გამარჯვებულთა გამოვლენა; აგრეთე ნომინაციაში „ხალხის რჩეული“ გამარჯვებულის გამოვლენა - 2021 წლის 21 ივნისიდან 2021 წლის 30 ივნისის ჩათვლით;
III ეტაპი - გამარჯვებულების დაჯილდოება.
პროექტის ორგანიზატორია ქალაქ თბილისის მუნიციპალიტეტის საკრებულო.
